Ãẽ̱xgacügü ga guxchaxü̃güarü mexẽxẽruü̃gü 1:23 - Tupanaarü Ore

²³ Rü guma ĩane rü noxri rü Lúx nixĩ ga naéga. Rü guma ĩanewa nanamugü ga ngugütaeruü̃gü rü Cori ya Tupana nüxü̃ narüngü̃xẽxẽ.

Ãẽ̱xgacügü ga guxchaxü̃güarü mexẽxẽruü̃gü 1:23 Referans Kwoze

Naanearü ügüchiga 28:19

Rü yema nachicawa rü nũxcüma rü nayexma ga wüxi ga ĩane ga Lúxgu ãégane. Natürü nüma ga Acóbu rü nanaxüchicüxü ga naéga ga yema nachica, rü Betégu nanaxüéga.

Naanearü ügüchiga 48:3

Rü Yúchexü̃ ñanagürü: —Yimá Tupana ya Guxãétüwa Ngẽxmacü rü cha̱u̱xca̱x nango̱x ga Lúxarü ĩanewa ga Canaáü̃anewa, rü yéma mexü̃ chomaxã nanaxuegu. Rü ñanagürü choxü̃: “Rü dücax, choma rü tá chayamuxẽxẽ i ngẽma cunegü, rü cutaagü. Rü ngẽma cutaatanüwa tá ne naxĩ i muxü̃tama i natücumügü i cutanüxü̃. Rü naétü tá ngẽma cutaagüna chanaxã i ñaa naane nax guxü̃gutáma noxrü yixĩxü̃ca̱x”, ñanagürü choxü̃ ga Tupana.

Naanearü ügüchiga 35:6

Rü Acóbu rü guxü̃ma ga yema duü̃xü̃gü ga nawe rüxĩxü̃maxã rü meama Canaáü̃anewa yexmane ga ĩane ga Lúxgu ãéganewa nangugü. Rü to ga naéga rü Beté nixĩ.

Ãẽ̱xgacügü ga guxchaxü̃güarü mexẽxẽruü̃gü 18:2

Rü yemaca̱x ga Dáü̃tanüxü̃ rü ĩanegü ga Choráwa rü Etaóü̃wa inanamuãchitanü ga 5 ga yatügü ga iporaexü̃ nax to ga naaneca̱x yadaugüxü̃ca̱x rü cúãcü nangugüanegüãxü̃ca̱x. Rü yema 5 ga ngugütaeruü̃gü rü Efraíü̃tanüxü̃arü naane ga máxpü̱xanexü̃wa naxĩ. Rü Micaíapatawa nangugü. Rü yema chütaxü̃ rü yexma napegü.

Yochué 7:2

Rü nüma ga Yochué rü Yericúwa inanamuãchitanü ga ñuxre ga yatügü nax ĩane ga Áiwa yangugütaegüxü̃ca̱x, rü nüxü̃́ natauxcha nax guma ĩane rü tá nagu nachocuxü̃ca̱x. Rü guma ĩane ga Ái rü ĩane ga Betéarü éstewaama nayexma ga Bex-abéü̃arü ngaicamana. Rü nümagü rü yéma naxĩ rü nayangugütaegü.

Yochué 2:1

Rü yexguma Chitíü̃wa nayexmagügu, rü nüma ga Yochué rü bexma inanamuãchitanü ga taxre ga ngugütaeruü̃gü, rü ñanagürü nüxü̃: —¡Ẽcü peyangugü i ngẽma naane i Yudáü̃arü tocutüwa ngẽxmaxü̃ rü ñu̱xmata yima ĩane ya Yericúwa pengugü! —ñanagürü. Rü nüma ga yema taxre rü inaxĩãchi, rü ngĩpatawa nangugü ga wüxi ga nge ga naxü̃nemaxã taxexü̃ ga Yericúgu ãpatacü. Rü Raá nixĩ ga ngĩéga. Rü ngĩma rü ngĩpatagu inapegüxẽxẽ ga yema chütaxü̃.

Yochué 18:13

Rü yéma rü inida rü ĩane ga Lúxarü súrwaama nadapetü. (Rü guma ĩane rü Beté nixĩ ga to ga naéga.) Rü yéma rü narüdae, rü ñu̱xmata Atarú-adáxwa nangu. Rü yéma narüdae ñu̱xmata nawa nangu ga guma ma̱xpǘne ga ĩane ga Bex-oróü̃arü súrwaama yexmane. Rü guma ĩane ga Bex-oróü̃ rü guma ma̱xpǘnepechinüwa nayexma.

Ãẽ̱xgacügü ga guxchaxü̃güarü mexẽxẽruü̃gü 1:22

Rü Efraíü̃tanüxü̃ rü ñu̱xũchi Manachétanüxü̃ rü inaxĩãchi nax ĩane ya Betéxü̃ yapugüxü̃. Rü nüma ga Cori ya Tupana rü nüxü̃ narüngü̃xẽxẽ.

Yochué 16:1

Yema naane ga sortéuwa nüxna üxü̃ ga Yúchetaagü rü natü ga Yudáü̃arü éstewaama inaxügü meama Yericúarü natüxacügüwa. Rü yéma rü naxnücüanexü̃wa nada. Rü ñu̱xũchi nagu nida ga guma ma̱xpǘnegü ga Yericúwa ixügüne ñu̱xmata Betéwa nangu.

Yochué 16:2

Rü Beté rü to ga naéga rü Lúx nixĩ. Rü guma ĩanewa rü inida rü Arquítanüxü̃arü naanewa nadapetü ñu̱xmata Atarúwa nangu. Rü yéma rü oéstewaama nada. Rü Yapéxtanüxü̃arü naanewa narüdae ñu̱xmata Bex-oróü̃wa nangu. Rü yéma rü nadapetü ñu̱xmata Guéchewa nangu. Rü yéma rü inida ñu̱xmata Már Mediteráneugu nayacua̱x ga yema üyeane.