Popera ga Chantiágu ümatüxü̃ 5:2 - Tupanaarü Ore

² Perü ngẽmaxü̃gü rü marü nangaue, rü ngẽma pexchiru i mexẽchixü̃ rü nawe nanangṍmü.

Popera ga Chantiágu ümatüxü̃ 5:2 Referans Kwoze

Yox 13:28

Rü choma rü chigúchigü ñoma wüxi i ta̱xacü i ngauxü̃rüxü̃, rü ñoma wüxi i naxchiru i nawe ngṍxü̃rüxü̃.

Ore i mexü̃ ga Luca ümatüxü̃ 12:33

¡Rü namaxã petaxe i perü ngẽmaxü̃gü i pexü̃́ ngẽmagüxü̃, rü togü i duü̃xü̃gü i nüxü̃́ nataxuxü̃na penaxã i ngẽma diẽru! Rü ngẽmaãcü tá pegüxü̃́ penangexmaxẽxẽ i perü ngẽmaxü̃gü i taguma pexü̃́ ngauxü̃ rü taguma gúxü̃ i daxũguxü̃ i naanewa i ngextá ngĩ́ta̱xagüxü̃ tama íyaxücuxü̃wa rü naweane tama ínachixexẽẽxü̃wa.

Ichaía 50:9

Rü Tupana ya Guxãétüwa Ngẽxmacü nixĩ ya choxü̃ rüngü̃xẽẽcü. ¿Rü texé tá tixĩ ya poxcu chomaxã ueguxe? Rü guxü̃ma i chorü uanügü rü tá nayue rü ñoma naxchiru i naweane ngõ̱xgüxü̃rüxü̃ tá nixĩgü.

Nüxíraxü̃xü̃ ga popera ga Pedru ümatüxü̃ 1:4

Rü pema rü wüxi i ngunexü̃gu tá penayauxgü i guxü̃ma i ngẽma mexü̃gü ya Tupana tá pexna ãxü̃ i ñu̱xma daxũguxü̃ i naanegu pexü̃́ namaxã nanguxü̃xü̃. Rü ngẽma mexü̃gü ya Tupana tá pexna ãxü̃ rü tagutáma nachixe, rü tagutáma naxãũãchi, rü tagutáma nangau.

Yeremía 17:11

Ngẽma duü̃xü̃ i chixexü̃gu nügü diẽruã́xü̃, rü ñoma wüxi i nguga i toguxecharaü̃ chuexẽẽxü̃rüxü̃ nixĩ. Rü ngẽma duü̃xü̃ rü ngẽxguma tauxta nayaxüchigu rü tá nüxna nixũ i ngẽma diẽru rü düxwa ñoma wüxi i duü̃xü̃ i naechitamare maxü̃xü̃rüxü̃ tá nixĩ.

Wiyaegü 39:11

Rü cuma rü cuyaxucu̱xẽ rü cuyacua̱i̱xgü i ngẽma duü̃xü̃gü i chixexü̃gu maxẽxü̃. Rü ñoma nawerüxü̃ cunaxüte̱xe i ngẽma yexeracü nüxü̃́ ngúchaü̃xü̃. Rü wüxichigüarü maxü̃ rü ñoma wüxi i ngü̃ãcüürüxü̃ nixĩ.

Ochéa 5:12

Rü ngẽmaca̱x i choma rü tá chayanaxoxẽxẽ i ngẽma Efraíü̃tanüxü̃ rü Yudáanecüã̱xgü. Rü ñoma mürapewa i nawe ngṍxü̃rüxü̃ tá nixĩgü.

Popera ga Chantiágu ümatüxü̃ 2:2

Rü ngẽxguma chi perü ngutaque̱xegu naxücu̱xgu i wüxi i yatü i úirumaxã ãneraã́xü̃ rü mexchiruxü̃, rü pema rü mea penayauxgü rü ñaperügügü nüxü̃, “¡Nua mexü̃ i nachicawa rüto!” ñaperügügü. Rü ngẽxgumarüxü̃ ta chi ngẽxma naxücu̱xgu i wüxi i yatü i ngearü diẽruã́xü̃ rü wexachiruxü̃ rü ñaperügügü nüxü̃, “¡Cuma rü ngẽxmatama nachi!” rüe̱xna “¡Ngéma ñatüanewa rütomare!” ñaperügügü nüxü̃.