Popera ga Chantiágu ümatüxü̃ 2:6 - Tupanaarü Ore

⁶ Natürü pema rü penaxãnexẽxẽ rü nüxü̃ pexo i ngẽma ngearü diẽruã̱xgüxü̃. ¿Taux ẽ̱xna ngẽma diẽruã̱xgüxü̃ yixĩxü̃ i chixri pemaxã icua̱xgüxü̃ rü ãẽ̱xgacügüpe̱xewa pexü̃ itúxü̃ rü íyaxuaxü̃güxü̃?

Popera ga Chantiágu ümatüxü̃ 2:6 Referans Kwoze

Ucu̱xẽgüchiga 17:5

Texé ya yíxema ngearü diẽruã́xẽxü̃ cugüxe, rü chixexü̃ taxü nape̱xewa ya Tupana ya ngearü diẽruã́xẽxü̃ ngo̱xẽẽcü, rü tá tapoxcu ya yíxema taãẽxe i ngẽxguma guxchaxü̃ tüxü̃ üpetügu ya yíxema ngearü diẽruã́xẽ.

1 Corintios 11:22

¿Ẽ̱xna pengechiü̃gü rü ngẽmaca̱x tama ngéma pechibüexü̃ rü pexaxegüxü̃? ¿Tü̱xcüü̃ nüxü̃ pexoe i ngẽma togü i yaxõgüxü̃ rü penaxãneexẽxẽ i ngẽma yaxõgüxü̃ i taxuxü̃ma nüxü̃́ ngẽxmagüxü̃? ¿Rü ta̱xacüxü̃ tá pemaxã chixu i ñu̱xmax? ¿Pexca̱x rü tá pemaxã chataãxẽxü̃? Dücax, pemaxã nüxü̃ chixu rü tama pemaxã chataãxẽ naxca̱x i ngẽma pexügüxü̃.

Ucu̱xẽgüchiga 14:31

Tupanaaxü̃́ nangu̱x i ngẽxguma texé wüxi i ngearü diẽruã́xẽmaxã chixri icua̱xgu. Natürü Tupana rü tümamaxã nataãxẽ ya yíxema ngearü diẽruã́xẽmaxã mea icuáxe.

Wiyaegü 14:6

Rü ngẽma chixexü̃ ügüxü̃ rü tüxü̃́ nüxü̃ nacugüe i tümaarü ĩnü ya yíxema tama tügü icua̱xüxü̃güxe. Natürü nüma ya Cori ya Tupana rü tüxna nadau rü tüxü̃ ínapoxü̃.

Popera ga Chantiágu ümatüxü̃ 5:4

Rü pema rü tama nüxü̃́ ngĩxü̃ pexütanü ga yema diẽru ga ngĩxca̱x napuracüecü ga perü puracütanüxü̃. Rü ngẽmaca̱x i ngẽma perü puracütanüxü̃ rü ngĩxca̱x nidexagü ga yema diẽru ga tama nüxna ngĩxü̃ pexãcü. Rü nüma ya Cori ya Tupana ya Guxü̃étüwa Ngẽxmacü rü marü ngẽma duü̃xü̃güxü̃ naxĩnü nax ngĩxca̱x yadexagüxü̃ ga yema diẽru ga nüxü̃́ ngĩxü̃ pengetanücü.

Ngechuchuarü ngúexü̃gü ga yamugüxü̃arü puracüchiga 17:6

Natürü yexguma tama yexma nüxü̃ yangaugügu, rü Yachóü̃xü̃ niyauxgü, rü ñuxre ga yaxõgüxü̃xü̃ rü ta ínayauxü̃. Rü nayagáuxü̃tanü, rü guma ĩanearü ãẽ̱xgacügüpe̱xewa nanagagü. Rü tagaãcü ñanagürügü: —Ngẽma Pauru rü Chíra i guxü̃ i naanewa duü̃xü̃güxü̃ chixexẽẽgüxü̃, rü núma rü ta nangugü.

Ngechuchuarü ngúexü̃gü ga yamugüxü̃arü puracüchiga 13:50

Natürü yema Yudíugü ga tama Ngechuchuaxü̃́ yaxõgüchaü̃xü̃, rü chixexü̃maxã nayaxuxcu̱xẽgü ga yema ngexü̃gü ga tachigagüxü̃ ga Yudíugücümagu ĩxü̃ rü ñu̱xũchi nayaxuxcu̱xẽgü ga guma ĩanearü ãẽ̱xgacügü nax Pauruxü̃ rü Bernabéxü̃ ínawoxü̃xü̃ca̱x ga yema naanewa.

Ngechuchuarü ngúexü̃gü ga yamugüxü̃arü puracüchiga 8:3

Rü nüma ga Chauru rü yoxni guxema yaxõgüxewe ningechigü. Rü tümapatagu nixücuchigü nax tüxü̃ ínayauxü̃xü̃ca̱x. Rü yéma tüxü̃ ínatúxü̃ ga yatügü rü ngexegü, rü ñu̱xũchi poxcupataü̃gu tüxü̃ nawocu.

Chacaría 7:10

Rü tama chanaxwa̱xe nax chixeãcü tümamaxã pixĩgüxü̃ ya yíxema yutegüxe rü yíxema taxcutagü rü yíxema to i nachixü̃anecüã̱x i petanüwa ngẽxmagüxe rü yíxema ngearü diẽruã̱xgüxe. ¡Rü taxṹ i nagu perüxĩnüexü̃ nax ñuxãcü tá pegümaxã chixexü̃ pexügüxü̃! —ñanagürü.

Amúx 5:11

Rü pemax, Pa Ãẽ̱xgacügüx, rü chixri tümamaxã ipecua̱x ya yíxema ingearü diẽruã́xẽ. Rü naétü tüxna peca nax tümaarü trigumaxã pexü̃́ tanaxütanüxü̃ca̱x naxca̱x nax penamexẽẽgüxü̃ i tümaarü guxchagü. Rü ngẽmaca̱x i pema rü taxũtáma nawa pemaxẽ ya yima ĩpatagü ya nutagümaxã pexüxü̃ne, rü bai tá peyaxagüxü̃ ya yimá bínu i peanegu petogüxü̃ i úbagüwaxü̃cü.

Ngu̱xẽẽtaeruü̃arü ore 5:8

¡Taxũtáma cubaixãchi i ngẽxguma nüxü̃ cuda̱u̱xgu nax to i nachixü̃anegüwa rü ãẽ̱xgacügü chixri namaxã inacua̱xgüxü̃ i ngẽma norü duü̃xü̃gü i ngearü diẽruã̱xgüxü̃. Rü ngẽma ãẽ̱xgacügü i guxchaxü̃arü mexẽẽruü̃gü rü diẽruca̱x tama tüxü̃ nangü̃xẽẽgüxü̃ ya yíxema ngearü diẽruã̱xgüxe! Erü wüxichigü i ngẽma ãẽ̱xgacügü rü natüxü̃wa nangẽxma i to i ãẽ̱xgacü i naétüwa ngẽxmaxü̃, rü ngẽma ãẽ̱xgacü i naétüwa ngẽxmaxü̃ rü to i ãẽ̱xgacütüü̃wa nangẽxma, rü guxü̃ma i ngẽma ãẽ̱xgacügü rü nügü ínapoxü̃gü.

Ucu̱xẽgüchiga 22:16

Ngẽma diẽruã́xü̃ rü yíxema ngearü diẽruã́xẽaxü̃́ nangĩ̱x nax yexera nadiẽruã́xü̃ca̱x, rü ngẽmagagu düxwa tá ngearü diẽruã̱xwa nangu. Rü ngẽxgumarüxü̃ ta ya yíxema diẽruã́xü̃na ãmare ãxẽ rü ngearü diẽruã̱xwa tá tangu.

Wiyaegü 12:5

Natürü nüma ya Cori ya Tupana rü ñanagürü: —Choma rü tá tümaétüwa chachogü rü tá tüxü̃ charüngü̃xẽxẽ ya yíxema ngearü diẽruã̱xgüxe rü turaexe rü chixri tümamaxã inacua̱xgüxe. Erü ngẽma nixĩ i tanaxwa̱xegüxü̃ ya yíxema ngúxü̃ ingegüxe —ñanagürü.

Wiyaegü 10:14

Pa Corix, cumatama marü nüxü̃ cudau i ngẽma taxü̃ i chixexü̃ i naxügüxü̃, rü name i cunapoxcu naxca̱x i ngẽma ngúxü̃ nax duü̃xẽgüxü̃ yangexẽẽgüxü̃. Rü yíxema turaexe rü curü ngü̃xẽẽca̱x nixĩ i tadaugüxü̃, erü cuma nixĩ i tümaarü poxü̃ruxü̃ quixĩxü̃. Rü cuma nixĩ i tüxü̃ curüngü̃xẽẽxü̃ ya yíxema taxcutagü.

Popera ga Chantiágu ümatüxü̃ 5:6

Rü pema penapoxcue rü penadai i ngẽma duü̃xü̃gü i taxuxü̃ma i chixexü̃ pemaxã üchiréxü̃. Rü nümagü rü pexü̃ narüturamaegü, rü taxuacüma nügü ínapoxü̃gü.

Ngechuchuarü ngúexü̃gü ga yamugüxü̃arü puracüchiga 18:12

Natürü yexguma Acáyaanearü ãẽ̱xgacü yixĩxgu ga Garióü̃, rü yema Yudíugü rü wüxigu Pauruxü̃ niyauxgü, rü ãẽ̱xgacüpe̱xewa nanagagü.

Abacú 3:14

Rü cumax, Pa Tupanax, rü noxrütama naxnegümaxã cuyama̱x ga yema ãẽ̱xgacü ga chixexü̃ üxü̃ ga yexguma norü churaragümaxã curü duü̃xü̃güca̱x íyaxüãchigu nax ñoma buanecü ya taxüchicürüxü̃ nawoonexẽẽãxü̃ca̱x ga curü duü̃xü̃gü ga tama poraexü̃ nax nügü ínapoxü̃güxü̃.

Amúx 4:1

¡Iperüxĩnüe, Pa Ngexü̃gü i Íngüexü̃ i Chamáriawa Maxẽxü̃x! Pema rü chixri tümamaxã ipecua̱x ya yíxema ngearü diẽruã̱xgüxe. Rü yíxema ngü̃xẽẽca̱x pexna caxemaxã rü chixri tümamaxã pixĩxgü. Rü petegüxü̃ pemu nax perü axruxü̃ ya bínuwa naxĩxü̃ca̱x.

Ichaía 53:3

Rü duü̃xü̃gü rü tama nüxü̃ nacua̱xgüchaü̃, rü nüxü̃ naxoe. Rü nüma rü wüxi ga duü̃ ga poraãcü ngúxü̃ ingecü nixĩ, rü namaxã nixü nax ngúxü̃ yangexü̃. Rü yixema rü tama nüxü̃ tadaugüchaü̃ rü ñoma wüxi i duü̃xü̃ i taxuwama mexü̃rüxü̃ tayaxĩxẽxẽ. Rü yemaacü nüxü̃ taxoe rü tama tanayauxgüchaü̃.

Wiyaegü 10:10

Rü ñoma leóü̃ i yauxexü̃chaü̃xü̃rüxü̃ nixĩ nax tüxü̃ yayaxuxü̃ca̱x ya yíxema turaxe. Rü norü poramaxã tüxü̃ narüyexera rü ngẽmaãcü naxme̱xgu tangu.

Wiyaegü 10:8

Rü chütacü rü ĩanexacügü i ẽanexü̃gu tüxü̃ ínicu̱xéxü̃ rü ngẽxma tüxü̃ nima̱x ya yíxema tümaechita ngéma üpetüxe. Rü guxü̃guma bexma tüxü̃ ínidawenüchigüxü̃ ya yíxema turaxe i taxucürüwama tügü ípoxü̃xẽ.

Wiyaegü 10:2

Erü ngẽma chixexü̃gu maxü̃xü̃ rü nügü írütaxü̃ rü norü numaxã tüxü̃ nachixewe ya yíxema taxucürüwa tügü ípoxü̃xẽ. Natürü nüma i ngẽma chixexü̃gu maxü̃xü̃ tátama nagu nangu ya yima yüta ya toguxeca̱x naxüxü̃ne.

Yox 20:19

Rü duü̃xẽgü ya ingearü diẽruã̱xgüxe tüxü̃ napuracüexẽxẽ, rü ñu̱xũchi ngéma tüxü̃ nawogümare. Rü ĩpatagü ya tama nüma ínaxüxü̃ne rü noxrüxü̃ nayaxĩgüxẽxẽ.

Ore i mexü̃ ga Cuáü̃ ümatüxü̃ 8:49

Rü Ngechuchu nanangãxü̃, rü ñanagürü nüxü̃: —Chowa rü nataxuma i ngo̱xo. Rü ngẽma chaxüxü̃ nixĩ nax Chaunatüxü̃ chicua̱xüxü̃xü̃, natürü i pema rü chixri chauchiga pidexagü.

Ucu̱xẽgüchiga 18:23

Yíxema ngearü diẽruã́xẽ rü meama ngẽma diẽruã́xü̃na diẽruca̱x taca. Natürü ngẽma diẽruã́xü̃, rü numaxã tüxü̃ nangãxü̃.

Ucu̱xẽgüchiga 22:7

Yíxema ingearü diẽruã́xẽtanüwa rü ngẽma diẽruã́xü̃ rü ãẽ̱xgacü nixĩ. Rü yíxema diẽruã́xü̃xü̃tawa diẽruca̱x íca̱xaxe, rü ngẽma diẽruã́xü̃me̱xẽwa tangexma.