Ichaía 9:19 - Tupanaarü Ore

^19-20 Rü yimá Cori ya Tupana ya Guxãétüwa Ngẽxmacüarü nugagu nixĩ i yaxãxü̃ i Iraétanüxü̃arü naane, rü ngẽma üxüema nixĩ i yaguxü̃ ya ĩane. Rü duü̃xü̃gü rü taxũtáma nügüenexẽmaxã nügü nangechaü̃gü. Rü taiyamaxã tá nanaxĩ̱xãchiãẽgü. Rü yíxema norü tügünecüwagu ãchixü̃xẽ rü tá tümawemüca̱x nangĩ̱x rü noxtacüma nayaga, natürü tá nataiyaama. Rü ngẽma to rü tá yíxema norü to̱xwecüwagu ãchiü̃xẽ rü tá tüxna nanapu i tümaarü õna, natürü taxũtáma nüxü̃́ ningu. Rü duü̃xü̃gü rü düxwa tá naxacügümaxã nixãwemü.

Ichaía 9:19 Referans Kwoze

Miquéa 7:2

Rü ñoma i naanewa rü marü nataxuma i duü̃xü̃gü i mexü̃gu rüxĩnüexü̃ rü Tupanamaxã ixaixcümagüxü̃. Rü wüxichigü rü naxca̱x nadau nax ñuxãcü guxchaxü̃ togueca̱x naxüxü̃. Rü ngẽxguma guxchaxü̃ ngẽxmagu, rü guxü̃ma rü ínamemare nax nügü nada̱i̱xü̃.

Miquéa 7:6

Rü ngẽma nanegü rü tauxü̃táma nanatüga naxĩnüe, rü ngẽma ingexü̃ i naxacügü rü naémaxã tá nanue. Rü ngẽma naneã̱xgü rü na̱xẽgüchi tá naxai. Rü ngẽma tümaarü uanü ixĩgüxü̃ rü tümatanüxü̃tama nixĩgü.

Norü taxre ga popera ga Pedru ümatüxü̃ 2:4

Rü nüma ya Tupana rü tama nüxü̃́ nüxü̃ narüngüma ga norü chixexü̃gü ga yema orearü ngeruü̃gü ga daxũcüã̱x ga pecadu ügüxü̃. Rü yemaca̱x yima üxü ya taguma ixoxü̃newa nanawogü, rü ínaxẽãnexü̃gu nanapoxcue. Rü cadénamaxã nayana̱i̱xgü nax ngéma nangẽxmagüxü̃ca̱x ñu̱xmatáta nawa nangu i ngẽma ngunexü̃ i nagu Tupana nüxna ca̱xaxü̃ i duü̃xü̃gü.

Ngechuchuarü ngúexü̃gü ga yamugüxü̃arü puracüchiga 2:20

Rü üa̱xcü rü tá nixoema rü tauemacü rü tá nagürüxü̃ naduema naxü̃pa nax wenaxarü núma naxũxü̃ ya Cori. Rü ngẽma ngunexü̃ i nagu núma naxũxü̃, rü wüxi i ngunexü̃ i poraãcü ãũcümaxü̃ tá nixĩ.

Ore i mexü̃ ga Matéu ümatüxü̃ 27:45

Rü tocuchigu inaxügü rü ñu̱xmata tomaepü̱xarü orawa nangu nax naxẽanexü̃ ga guxü̃ ga naanewa.

Amúx 5:18

¡Rü pegümaxã pengechaxü̃ i pema i penaxwa̱xexü̃ nax paxa petanüwa changuxü̃! Natürü tama nüxü̃ pecua̱x nax ta̱xacü tá pexü̃ ngupetüxü̃ i ngẽma ngunexü̃gu. Rü ngẽma ngunexü̃gu rü tá nawaane rü taxũtáma nangóone.

Echequié 9:5

Rü yemawena nüxü̃ chaxĩnü ga Cori ya Tupana nax yema togü ga yatügüxü̃ ñaxü̃: —¡Rü ngẽma yatüwe pixĩxü̃tanü nawa ya daa ĩane! Rü guxü̃ma i ngẽma duü̃xü̃gü i ngeégacatüxü̃ ¡rü penadai! ¡Rü tauxü̃táma nüxü̃ pengechaxü̃ rü bai tá i pexü̃́ nax nangechaü̃tümüxü̃güxü̃!

Yeremía 13:16

¡Rü Cori ya Tupanaxü̃ picua̱xüxü̃gü naxü̃pa nax nüma waanexü̃ ínanguxẽẽxü̃ rü naxü̃pa nax yima ma̱xpǘnegü ya waanexü̃wa ngẽxmagünegu peyacaipetütanüxü̃, rü naxü̃pa nax waanexü̃ i ãũcümaxü̃xü̃ yanguxuchixẽxẽãxü̃ i ngẽma ngóonexü̃ i ípenanguxẽxẽxü̃!

Ichaía 60:2

Rü ẽanexü̃wa nangema i ñoma i naane, rü guxü̃ma i nachixü̃anegüca̱x rü nawaane. Natürü nüma ya Cori ya Tupana rü tá pexca̱x nanangóonexẽxẽ rü pewa tá inanawe̱x i norü pora.

Ichaía 24:6

Rü ngẽmaca̱x nixĩ i chixexü̃ naxca̱x ínguxü̃ i ñoma i naane rü ngẽma duü̃xü̃gü i nawa maxẽxü̃ rü ngúxü̃ yangegüxü̃. Rü ngẽmaca̱x nixĩ i ínagu̱xü̃ i ngẽma duü̃xü̃gü i ñoma i naanewa maxẽxü̃ rü ínaxĩxü̃ i norü mu, rü noxretama íyaxügüxü̃.

Ichaía 13:18

Rü ngẽma duü̃xü̃gü rü tá norü chuxchimaxã ngextü̱xü̃güxü̃ nadai. Rü taxũtáma nüxü̃́ taxãũxãchitümüxü̃ ya yíxema ngexwaca íxragüxe rü ñu̱xũchi yíxema marü iyaxüraxe.

Ichaía 13:13

Rü ngẽxguma tá nawa nanguxgu i ngẽma ngunexü̃ rü choma rü chorü numaxã tá chayadu̱xruxẽxẽ i daxũguxü̃ i naane. Rü chorü nugagu rü ñoma i naane rü tá nixũgachi i nachicawa.

Ichaía 13:9

Rü marü nawa nangu i ngẽma ngunexü̃ i ãũcümaxü̃ i nagu Tupana norü numaxã tá chianexü̃xü̃ yanguxuchixẽẽxü̃ i ñaa naane. Rü tá nanadai i ngẽma duü̃xü̃gü i chixexü̃arü üruü̃gü i ngẽma naanewa ngẽxmagüxü̃.

Ichaía 8:22

Rü ñu̱xũchi tá ñaa waixü̃müanegu narüdaunü, rü ngẽma nüxü̃ nadaugüxü̃ tá nixĩ nax nataxuma i ta̱xacürü õna. Rü ẽanexü̃xü̃xica tá nadaugü rü ngúxü̃ tá ningegü. Rü guxü̃watáma nachüta rü nawaanemare.

Ichaía 5:30

Rü ngẽxguma nawa nanguxgu i ngẽma ngunexü̃ rü norü taga i ngẽma nachixü̃anearü churaragü i Iraétanüxü̃ca̱x íyaxüãchixü rü ñoma már arü yuapegarüxü̃ tá nixĩ. Rü ngẽxguma texé nüxü̃ dawenügu i ñoma i naane rü tá nüxü̃ tadau nax nawaanexü̃, rü caixanexü̃ i waemaxü̃ rü tá nanatüpechita ya üa̱xcü.

Ichaía 1:31

Rü yimá yatü ya poracü rü ñoma maxẽ ya ipacürüxü̃ tá nixĩ, rü ngẽma chixexü̃ i naxüxü̃ rü üxüarü ya̱u̱xraxü̃rüxü̃ tá nixĩ. Rü ngẽma taxre rü tá wüxigu niyaura, rü taxucürüwa tá texé tayaxoxẽxẽ —ñanagürü ga Tupana.

Ichaía 3:5

Rü perü ĩanewa rü tá taxü̃ i guxchaxü̃ ínangu, rü duü̃xü̃gü rü tá nügü nadai, rü woo nügümücügümaxã rü tá ta nügü nadai. Rü ngẽma ingextü̱xüxü̃ rü tá yaxguã̱xgüxü̃ tachoxü̃gagü, rü ngẽma duü̃xü̃gü i taxúema nüxü̃ cuáxchaxü̃xü̃ rü tá naxchi naxaie i ngẽma duü̃xü̃gü i tachigaxü̃.

Ichaía 4:4

Rü nüma ya Cori ya Tupana rü taxü̃ i norü ngechaü̃maxã rü norü poramaxã tá ínanapi namaxã ga yimá nagü ga Yerucharéü̃cüã̱xgü inabaxẽẽgücü, rü tá nanayaxu i norü ãũãchixü̃ i ngẽma Chióü̃cüã̱xgü i ngexü̃gü.

Ichaía 5:24

Rü ngẽmaca̱x i pema rü ñoma maxẽ i paxü̃ i üxüemawa ixaxü̃rüxü̃ tá iperüxo. Rü ñoma nai i yixchúma̱xaxü̃rüxü̃ rü ñoma nachacu i waixü̃müchicute̱xe yanguxuchixü̃rüxü̃ tá pixĩgü. Erü nüxü̃ pexo i norü ngu̱xẽẽtaegü rü norü mugü ya Cori ya Iraéarü Tupana ya Üünecü ya Guxãétüwa Ngẽxmacü.

Ichaía 10:6

Rü choma tá nixĩ i Achíriaanearü ãẽ̱xgacüxü̃ chamuxü̃ nax duü̃xü̃gü i chixexü̃gu maxẽxü̃ca̱x rü wüxi i nachixü̃ane i choxü̃ nuẽẽxü̃ca̱x íyagoõchixü̃ca̱x nax nüxü̃́ nangĩ́xü̃ca̱x rü nüxna napuxü̃ãxü̃ca̱x i norü ngẽmaxü̃gü rü nagu napugüexü̃ca̱x ñoma ĩanearü namagüwa ngẽxmaxü̃ i ãcharaxü̃gu napugüexü̃rüxü̃.

Ichaía 26:11

Rü cumax, Pa Corix, rü marü naxca̱x icunamexẽxẽ i ngẽma norü poxcu, natürü i nümagü rü tama nüxü̃ nacua̱xgüéga. Natürü ngẽxguma nüxü̃ nadaugügu i ngẽma curü ngechaü̃ i taxü̃ naxca̱x i curü duü̃xü̃gü i mea maxẽxü̃, rü tá naxãnee. ¡Chierüx cuma rü curü nuarü üxüemamaxã cunadaixgu i ngẽma curü uanügü!

Ichaía 33:14

Rü Chióü̃wa nidu̱xruxe i ngẽma chixexü̃gu maxẽxü̃. Rü ngẽma tama yaxõgüxü̃ rü poraãcü namuü̃e rü ñanagürügü: —¿Texé chi i tatanüwa tamaxama naétüwa ya yima üxü ya tüxü̃ iguxü̃ne ya guxü̃guma inaiechane? —ñanagürügü.

Ichaía 42:25

Rü yemaca̱x ga Tupana rü poraãcü yema Iraétanüxü̃maxã nanu. Rü nanayexrü nax norü uanügümaxã nügü nada̱i̱xü̃ca̱x. Rü norü uanügü nüxü̃ narüporamae rü ínanagu ga norü ĩanegü. Natürü woo yemaacü nüxü̃ nangupetü rü nüma ga Iraétanüxü̃ rü tama inaxĩnüechaü̃ —ñanagürü ga Ichaía.

Echequié 20:47

¡Rü namaxã nüxü̃ ixu i ñaa chorü ore i ñaxü̃! Pa Naixnecü i Súrwaama Ngẽxmaxü̃x, choma rü cuwa tá chayanaixẽxẽ ya wüxi ya üxü ya tá ínaguxü̃ne ya guxü̃nema ya curü naigü ya maxẽne rü yuene. Rü yima üxü rü tá niyaura rü taxũtáma nixo. Rü nórtewa rü ñu̱xmata súrwa tá nangu nax yaxãxü̃ i ngẽma naane.

Joel 2:3

Rü ngẽma munügü rü ñoma üxüema i guxü̃ma ixaxẽẽxü̃rüxü̃ nixĩgü. Rü nape̱xewa rü ñoma üxüema i guxü̃ma ĩ̱xãchigüxẽẽxü̃rüxü̃ nixĩgü. Rü naweama rü ngẽxgumarüü̃tama nixĩ. Rü naxü̃pa nax ngéma nangugüxü̃ i ngẽma munügü rü ngẽma naane rü ñoma Edéü̃rüxü̃ namexẽchi. Natürü nawena rü wüxi i nachica i chianexü̃ nixĩ. Rü ngẽma munügü rü taxuxü̃ma ínayaxüxẽẽgü.

Abdía 1:18

Rü ngẽma Acóbutaagü rü Yúchetaagü rü ñoma üxü rü üxüemarüxü̃ tá nixĩgü. Rü ngẽma Echaútaagü rü ñoma maxẽ ya pacürüxü̃ tá nixĩgü, rü tá ínanagu. Rü taxũtáma i Echaútaxa namaxü̃. Rü choma ya Cori ya Tupana rü marü ngẽmaãcü namaxã chanaxuegu —ñanagürü.

Chacaría 11:6

Rü ngẽxgumarüxü̃ ta i ngẽma duü̃xü̃gü i ñaa nachixü̃anewa maxẽxü̃ rü taxũtáma choxü̃́ nangechaü̃tümüxü̃gü. Rü to i nachixü̃aneme̱xẽgu rü ngẽmaarü ãẽ̱xgacüme̱xẽgu tá chanayixẽxẽ. Rü ngẽma ãẽ̱xgacü rü tá nanachixexẽxẽ i ñaa nachixü̃ane. Rü ngẽxguma i choma rü taxúexü̃táma naxme̱xwa íchapoxü̃. Rü choma i Cori ya Tupana nixĩ i nüxü̃ chixuxü̃ i ngẽma —ñanagürü.

Maraquía 4:1

Rü nüma ya Cori ya Tupana ya Guxãétüwa Ngẽxmacü rü ñanagürü: —Rü ningaica i ngẽma ngunexü̃ i ãũcümaxü̃ i nagu tá chanapoxcuexü̃ i ngẽma chixexü̃ ügüxü̃ ñoma üxüemawa yaxaexü̃rüxü̃. Rü guxü̃ma i ngẽma duü̃xü̃gü i nügü írütagüxü̃ rü chixexü̃ ügüxü̃ rü ñoma maxẽ i pacü i üxüxétüwa yata̱xcuchichapa̱xacürüxü̃ tá nixĩgü. Rü ngẽma ngunexü̃gu rü guxü̃táma nixae rü taxuxü̃táma ínayaxügü.

Lebítanüxü̃arü puracüchiga 26:26

Rü ngẽxguma guxchaxü̃ naxca̱x íchanguxẽẽgu i penetügü, rü tá nanoxretama i perü paũ. Rü 10 i ngexü̃gü rü wüxitama i paũarü guruü̃wa tá nayagugü i perü paũ. Rü ngẽma nax nanoxrexü̃ i perü paũ rü tá pexü̃ nixírachigü, rü ngẽmaca̱x taxũtáma pengãxpütüwegü.

Chacaría 11:9

Rü yema carnérugüxü̃ ñacharügü: —¡Tagutáma wena pexna chadau! ¡Ega ngẽxguma ngexü̃rüüxü̃ yuxgu rü noxtacüma nayu̱x! ¡Rü ngẽxguma texé yama̱xgu, rü noxtacüma yamáa! ¡Rü ngẽma maxẽxü̃ íyaxügüxü̃ rü noxtacüma nügü nangõ̱xcu —ñachagürü.