Ichaía 7:4 - Tupanaarü Ore

⁴ Rü ñaa orexü̃ namaxã ixu: “¡Naxuãxẽ rü cugüna nadau! Natürü tama name nax cubaixãchixü̃ rü cumuü̃xü̃ rü icurümaãchixü̃ naxca̱x i ngẽma Chíriaanearü ãẽ̱xgacü i Rechíü̃ rü ñu̱xũchi Peca i Remaría nane i pemaxã nuexü̃. Erü ngẽmagü rü ñoma taxre i üxüchametü irücaixgüxü̃rüxü̃ nixĩgü, natürü paxa tá nixogü.

Ichaía 7:4 Referans Kwoze

Ichaía 35:4

Rü ngẽma muü̃exü̃ rü nüxü̃ ñapegügü: —¡Piporae, rü taxṹ i pemuü̃exü̃! Rü daa nixĩ ya perü Tupana nax pexü̃ ínapoxü̃xü̃ca̱x. Rü nüma tá nanapoxcue i perü uanügü i guxchaxü̃ pexca̱x íngu̱xẽẽxü̃ —ñapegügü.

Auxexü̃chiga 3:26

Rü name nixĩ i bexma ítanangu̱xẽẽgü ya Cori ya Tupanaarü ngü̃xẽxẽ.

Ichaía 30:15

Rü yimá Cori ya Iraétanüxü̃arü Tupana ya Üünecü rü ñanagürü: —¡Cha̱u̱xca̱x pewoegu rü chauga pexĩnüe rü ngẽmaãcü taxũtáma pexü̃ nangupetü! Rü ngẽxguma mea perüchogu rü chauga pexĩnüegu rü ngẽmaãcü tá nixĩ i pexü̃́ nangẽxmaxü̃ i perü pora —ñanagürü. Natürü i pema rü tama chauga pexĩnüechaü̃, rü ñaperügügüama: —Tomagü rü cowarugu tá tibuxmüama —ñaperügügü. Rü aixcüma tá nixĩ i ngẽmaãcü perü uanügücha̱xwa pibuxmüxü̃. Rü pema rü ñaperügügüama: —Cowarugü i poraexüchixü̃gu tá tibuxmüama —ñaperügügüama. Natürü perü uanügü i pewe ngẽgüxü̃ rü tá pexü̃ narüporamaegüama.

Wenaxarü naxümatü ga Tupanaarü mugü 20:3

“Pa Iraétanüxü̃, ¡Choxü̃́ iperüxĩnüe! Ñu̱xma rü tá perü uanügümaxã pegü pedai, natürü tama name i peyarümaãchitanü, rü pemuü̃e, rü naxcha̱xwa pidu̱xrue rü peba̱i̱xãchie.

Ore i mexü̃ ga Matéu ümatüxü̃ 24:6

Rü tá nüxü̃ pexĩnüechiga nax nügü nada̱i̱xü̃ i ñuxre i nachixü̃anegü rü nügü nax nadaixchaü̃xü̃ i togü i nachixü̃anegü. ¡Natürü taxũtáma ngẽmaca̱x peba̱i̱xãchiãẽgü! Erü woetama ngẽmaãcü tátama nangupetü i noxrix. Natürü taxũtáma naanearü gu̱x nixĩ i ngẽma.

Chacaría 3:2

Rü nüma ga yema Tupanaarü duü̃xü̃ i daxũcüã̱x rü Chatanáxü̃ ñanagürü: —¡Nüma ya Cori ya Tupana cuxü̃ nangax! ¡Rü yimátama Cori ya Tupana ya Yerucharéü̃xü̃ ngechaxü̃cü rü cuxü̃ nangax! Erü ñaa yatü rü ñoma wüxi ya ã́xwe ya üxüétüwa yaxuxcürüxü̃ Babiróniawa taeguxü̃ nixĩ —ñanagürü.

Norü taxre ga to ga popera ga ãẽ̱xgacügüchiga ümatüxü̃ 20:17

¡Natürü taxṹ i namaxã pegü pedaixü̃! ¡Rü ngéma peyachaxãchitanü! Rü tá nüxü̃ pedau nax ñuxãcü ya Tupana rü tá namaxã nügü nada̱i̱xü̃ rü pexü̃ ínapoxü̃xü̃. Pa Yudáanecüã̱xgü rü Pa Yerucharéü̃cüã̱xgüx, ¡taxṹ i pemuü̃exü̃ rü peba̱i̱xãchiexü̃! ¡Rü moxü̃ naxca̱x perüchoxü̃ erü Cori ya Tupana rü tá pemaxã nangẽxma!” —ñanagürü ga Yachié.

Amúx 4:11

Rü wüxi ga taxü̃ ga guxchaxü̃ pexca̱x íchanguxẽxẽ yema Chodómaca̱x rü Gomóraca̱x íchanguxẽẽxü̃rüxü̃. Rü pema rü ñoma nai i üxüwa ixaxü̃ rü nawa íyaxuchixü̃rüxü̃ pixĩgü. Natürü ga pema rü tama cha̱u̱xca̱x pewoegu —ñanagürü ya Cori ya Tupana.

Ichaía 30:7

Natürü natüca̱xma nixĩ i ngéma nanaãxü̃ i norü ngẽmaxü̃gü rü norü diẽrugü, erü Equítuane rü tama napora nax nüxü̃ nangüxẽẽxü̃ca̱x. Rü ngẽmaca̱x nixĩ i: —Ngo̱xo i natüca̱xma ixĩxü̃ i Taxuxü̃ma Üxü̃gu chanaxüégaxü̃ —ñanagürü ga Tupana.

Ichaía 10:24

Rü Cori ya Tupana ya Guxãétüwa Ngẽxmacü rü ñanagürü: —Pa Chorü Duü̃xü̃gü i Ma̱xpǘne i Chióü̃gu Ãpatagüxü̃x ¡rü taxṹ i nüxü̃ pemuü̃exü̃ i ngẽma Achíriaanecüã̱xgü woo norü naixmena̱xãmaxã pexna nacua̱i̱xcaãgu rü chixri pemaxã inacua̱xgügu yema Equítuanecüã̱xgü ü̃pa chixri pemaxã icua̱xgügurüxü̃!

Ichaía 8:4

Rü yimá cune rü naxü̃pa nax nüxü̃ nacuáxü̃ nax “papa” rü “mama” ñaxü̃, rü yima ĩanegü ya Damácu rü Chamária rü tá norü uanügü nagu nachocu. Rü tá nanade i norü ngẽmaxü̃gü, rü Achíriaanearü ãẽ̱xgacüxü̃tawa tá nanana —ñanagürü.

Ichaía 7:8

Rü Damácu nixĩ ya Chíriaanearü ĩane ya taxü̃ne, rü Rechíü̃ nixĩ i Damácuwa ãẽ̱xgacü ixĩxü̃. Rü Chamária nixĩ ya Efraíü̃tanüxü̃arü ĩane ya taxü̃ne, rü Remaría nane nixĩ i Chamáriawa ãẽ̱xgacü ixĩxü̃. Natürü ngẽxguma marü 65 ya taunecüwa nanguxgu rü ngẽma Efraíü̃tanüxü̃ rü tá inarüxo nax wüxi i nachixü̃ane nax yixĩxü̃. Rü ngẽxguma pema rü taxũtáma aixcüma choxü̃́ peyaxõgügu, rü pema rü tá ta iperüxo” —ñanagürü ya Tupana.

1 Chamué 17:32

Rü yexguma ga Dabí rü Chaúxü̃ ñanagürü: —Tama name nax texé oegaãẽxü̃ nagagu i ñaa Firitéu, erü chomax i cuxü̃́ puracüxe nax chixĩxü̃, Pa Ãẽ̱xgacüx, rü ngéma tá chaxũ rü namaxã tá togü tadai —ñanagürü.

Ore i mexü̃ ga Matéu ümatüxü̃ 10:28

¡Rü taxṹ i nüxü̃ pemuü̃exü̃ i ngẽma duü̃xü̃gü i taxü̃nexü̃ imáxü̃! Erü taxucürüwa nayama̱x i taãxẽ. Natürü name nixĩ i nüxü̃ pemuü̃e ya yimá Tupana. Erü nüma nüxü̃́ nangẽxma i pora nax napoxcuãxü̃ca̱x i pexene rü peãxẽ rü ta nagu ya yimá üxü ya taguma ixoxü̃ne.

Ichaía 41:14

Rü choma ya Cori ya Tupana rü aixcüma pemaxã nüxü̃ chixu rü ñachagürü: —Pa Iraétanüxü̃x Pa Acóbutanüxü̃, rü woo nax penoxrexü̃ rü perü uanügüpe̱xewa peturaexü̃, natürü ¡taxṹ i pemuü̃exü̃! Erü choma rü tá pexü̃ charüngü̃xẽxẽxü̃. Rü choma ya perü Tupana ya üünecü nax chixĩxü̃ rü perü nguxü̃xẽẽruxü̃ chixĩ.

Ichaía 7:1

Rü Chíriaanearü ãẽ̱xgacü ga Rechíü̃, rü ñu̱xũchi Iraéanearü ãẽ̱xgacü ga Péca ga Remaría nane, rü ĩane ga Yerucharéü̃ca̱x ínayaxüãchi nax nagu nachocuxü̃ca̱x. Natürü ga yema taxre ga ãẽ̱xgacügü rü tama nüxü̃́ natauxcha nax yapugüãxü̃. Rü yema nangupetü ga yexguma Acháx ga Yotáü̃ nane ga Uchía nataxa ãẽ̱xgacü ixĩxgu ga Yudáanewa.

Norü taxre ga popera ga ãẽ̱xgacügüchiga 15:27

Rü yexguma 52 ga taunecü Yudáanearü ãẽ̱xgacü yixĩxgu ga Acharía, rü yexguma nixĩ ga yexwacax Iraéanewa yaxücuxü̃ ga Péca nax Iraéanearü ãẽ̱xgacü yixĩxü̃ca̱x. Rü nüma ga Péca ga Remaría nane rü 20 ga taunecü Chamáriawa ãẽ̱xgacü nixĩ.

Ichaía 8:6

—Choma rü ngẽma dexá i meamare puchu i Chiloéwa ne yáxü̃rüxü̃ nüxü̃ charüngü̃xẽẽchaü̃ i ngẽma Yudáanecüã̱xgü, natürü choxü̃ naxoe erü ãẽ̱xgacügü ga Rechíü̃xü̃ rü Remaría nane ga Pécaxü̃ namuü̃e.

Abacú 2:3

Rü ñu̱xma rü taxũta nawa nangu nax yanguxü̃ ga yema cuxü̃ chawéxü̃. Natürü taxũtáma nangupetümare nax yanguxü̃. ¡Cumax rü mea ínanguxẽxẽ ega woo tama paxa yanguxgu! Erü aixcüma tá ningu i ngẽxguma norü ngunexü̃wa nanguxgux.