Ichaía 60:3 - Tupanaarü Ore

³ Rü guxü̃ma i nachixü̃anegü rü tá naxca̱x naxĩ i ngẽma ngóonexü̃ i pewa ngẽxmaxü̃. Rü ngẽma nachixü̃anegüarü ãẽ̱xgacügü rü pexü̃tawa tá naxĩ nax pexü̃ íyadaugüxü̃ca̱x nax wena nachixü̃ane i poraxü̃ pixĩgüxü̃.

Ichaía 60:3 Referans Kwoze

Ngechuchuarü ngúexü̃gü ga yamugüxü̃arü puracüchiga 13:47

Yerü yemaacü toxü̃ namu ga Cori, rü ñanagürü: “Duü̃xü̃gü i tama Yudíugü ixĩgüxü̃arü nangóonexẽẽruxü̃ marü cuxü̃ chixĩxẽxẽ, nax guxü̃wama i ñoma i naanewa cunangexü̃ca̱x i chorü ore i maxẽxẽẽruxü̃”, —ñanagürü.

Ichaía 49:23

Rü ngẽma togü i nachixü̃anegüarü ãẽ̱xgacügü rü tá penatürücügü nixĩgü, rü ngẽma naxma̱xgü rü tá peerücügü nixĩgü. Rü pepe̱xegu tá nacaxã́pü̱xügü rü tá nanade̱xexgü i perü mairaxü̃chipatügü. Rü tá nüxü̃ picua̱xãchitanü nax chaxicatama Tupana chixĩxü̃ rü ngẽma choxü̃́ yaxõgüxü̃ rü tagutáma naxãneexü̃ —ñanagürü.

Yema Cuáü̃ nüxü̃ dauxü̃ i yixcüra tá ngupetüxü̃chiga 21:24

Rü yima ĩanearü ngóonexü̃gu tá naxĩ i ngẽma nachixü̃anecüã̱x i yaxõgüxü̃. Rü ngéma tá nangugü i ngẽma nachixü̃anegüarü ãẽ̱xgacügü rü Tupanana tá nanana i norü ngẽmaxü̃gü.

Ore i mexü̃ ga Cuáü̃ ümatüxü̃ 12:32

Rü ngẽxguma curuchawa chipotagu rü chaugüxü̃tawa tá chanagagü i guxü̃ma i duü̃xü̃gü —ñanagürü ga Ngechuchu.

Ichaía 45:14

Rü nüma ya Tupana rü Iraétanüxü̃xü̃ ñanagürü ta: —Ngẽma Equítuanecüã̱xgü i naanewa puracüexü̃, rü ngẽma Etiopíaanecüã̱xgü i taxetanüxü̃, rü ngẽma Chabácüã̱xgü i imáchanexü̃chixü̃ rü tá cuxme̱xwa nangẽxmagü. Rü cadénamaxã íchotachacüüãcü tá cuwe narüxĩ. Rü cupe̱xegu tá nacaxã́pü̱xügü rü ñanagürügü tá: “Aixcümaxü̃chi nixĩ i cutanüwa nangẽxmaxü̃ ya Tupana rü nataxuma i to ya Tupana”, ñanagürügü tá —ñanagürü ga Tupana.

Ngechuchuarü ngúexü̃gü ga yamugüxü̃arü puracüchiga 15:17

Rü ngẽmaãcü tá nüxü̃ charüngü̃xẽxẽxü̃ nax ngẽma duü̃xü̃gü i tama Yudíugü ixĩgüxü̃ rü cha̱u̱xca̱x nadaugüxü̃ca̱x, wüxigu namaxã i chorü duü̃xü̃gü i Yudíugü i choma chadexü̃.

Chacaría 2:11

Rü ngẽxguma nawa nanguxgu i ngẽma ngunexü̃ rü muxü̃tama i nachixü̃anegü rü tá Cori ya Tupanawe narüxĩ. Rü nüma rü ñanagürü tá: —Ngẽma nachixü̃anegüarü duü̃xü̃gü rü tá chorü duü̃xü̃gü nixĩgü. Rü choma rü tá natanüwa chamaxü̃ —ñanagürü. Rü ngẽmaãcü i pema rü tá nüxü̃ picua̱xãchitanü nax nüma yixĩxü̃ i choxü̃ namuxü̃ nax pemaxã nüxü̃ chixuxü̃ca̱x i norü ore.

Ichaía 49:12

Rü pema ya Iraétanüxü̃ rü tá yáxü̃wama ne pexĩ, rü ñuxre rü nórtewaama rü togü rü oéstewaama rü togü rü Equítuanearü súrwaama tá ne pexĩ.

Ichaía 11:10

Rü ngẽxguma yimá Dabítaxa ingucuchigu nax ãẽ̱xgacü yixĩxü̃ca̱x rü tá wüxi i cua̱xruxü̃ nixĩ naxca̱x i guxü̃ma i duü̃xü̃gü. Rü guxü̃ i nachixü̃anegücüã̱x rü tá naxca̱x nayadaugü rü naxca̱x nangutaque̱xegü. Rü ngẽma nachica i nawa nangẽxmaxü̃ rü tá naxüüne.

Wiyaegü 138:4

Rü guxü̃ i nachixü̃anegüarü ãẽ̱xgacügü rü tá cuxü̃ nicua̱xüü̃gü i ngẽxguma nüxü̃ naxĩnüegu nax aixcüma cuyanguxẽẽxü̃ i ngẽma curü unetagü i nüxü̃ quixuxü̃.

Wiyaegü 68:29

Rü yima cupata ya ma̱xpǘnewa ngẽxmane i Yerucharéü̃wa rü ngẽma togü i nachixü̃anegüarü ãẽ̱xgacügü rü cuxca̱x ngéma nanana i ãmaregü.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:15

Rü yema norü 7 ga Tupanaarü orearü ngeruxü̃, rü nayacue ga norü cornéta. Rü nayexma ga nagagü ga tagaxü̃ ga daxũguxü̃ ga naanewa inaxũgüxü̃ ga ñagüxü̃: “Ñu̱xma rü tórü Cori ya Tupana rü Nane ya Cristu nixĩ i namaxã icua̱xgücü i guxü̃ma i ñoma i naane. Rü nümagü rü guxü̃gutáma namaxã inacua̱xgü”, ñagüxü̃.

Ore i mexü̃ ga Luca ümatüxü̃ 24:47

Rü yematama ore i ümatüxü̃wa nüxü̃ nixu rü yimá Cristuégagu tá nixĩ i nüxü̃ yaxugüxü̃ i ore i mexü̃. Rü Yerucharéü̃wa tá inaxügü i ngẽma ñu̱xmatáta guxü̃ i naanewa nangu nax ngẽmaãcü duü̃xü̃gü nüxü̃ rüxoexü̃ca̱x i nacüma i chixexü̃ nax Tupana nüxü̃́ nüxü̃ rüngü̃maxü̃ca̱x i norü pecadugü.

Ore i mexü̃ ga Matéu ümatüxü̃ 28:19

Rü ñu̱xma rü chanaxwa̱xe i guxü̃ i nachixü̃anewa pexĩ i guxü̃ i duü̃xü̃gütanüwa. ¡Rü chorü duü̃xü̃güxü̃ peyaxĩgüxẽxẽ̱x! ¡Rü ípenabaiü̃xẽxẽ chauégagu rü Chaunatüégagu rü Naãxẽ ya Üünexü̃égagu!

Amúx 9:12

Rü ngẽmaãcü, Pa Iraétanüxü̃x, rü pexrü tá nixĩ i ngẽma íyaxüxü̃ i Edóü̃ane rü guxü̃ma i ngẽma nachixü̃anegü ga ü̃pa Iraétanüxü̃me̱xẽwa yexmagüxü̃. Rü choma ya Cori ya Tupana nixĩ i ngẽma ñachaxü̃. Rü choma rü tá chayanguxẽxẽ i ngẽma —ñanagürü.

Ichaía 66:12

Erü choma ya Cori ya Tupana rü ñachagürü: “Choma rü ñoma wüxi i natüarü dexá i mea iyaxü̃rüxü̃ tá Yerucharéü̃wa chananguxẽxẽ i taãxẽ. Rü togü i nachixü̃anegüarü ãmaregü rü tá paxa pexca̱x íchanangugüxẽxẽ ñoma wüxi i natü i poraü̃chíüxü̃rüxü̃. Rü ngẽmaãcü i pema, Pa Yerucharéü̃cüã̱xgüx, rü ñoma wüxi i õxchana i meama maixü̃rüxü̃ tá pengãxpütüwegü. Rü choma rü tá chauchacüxügu pexü̃ chigagü rü choperemawa tá pexü̃ chameãxẽ.

Ichaía 60:16

Rü ngẽma togü i nachixü̃anegü rü tá pexna nanana i ngẽma rümemaegüxü̃ i nawemügü rü ngẽma norü ãẽ̱xgacügü rü tá pexca̱x núma nanana i norü ngẽmaxü̃gü. Rü ngẽmawa tá nüxü̃ pecua̱x nax choma ya Tupana ya poracü yixĩxü̃ i pexü̃ íchapoxü̃xü̃ rü pexü̃ íchanguxü̃xẽẽxü̃, Pa Acóbutanüxü̃x.

Ichaía 60:10

Pa Yerucharéü̃cüã̱xgüx, choma rü pemaxã chanu ga noxri, rü yemaca̱x nixĩ ga pexü̃ chapoxcuxü̃. Natürü i ñu̱xmax rü tá pexü̃ chanawe̱x nax poraãcü pexü̃ changechaü̃xü̃. Rü to i nachixü̃anecüã̱xgü i duü̃xü̃gü rü tá wena nayamexẽẽgü i perü ĩanearü poxeguxü̃tápü̱x. Rü ngẽma togü i nachixü̃anearü ãẽ̱xgacügü rü tá pexü̃ narüngü̃xẽxẽ.

Wiyaegü 72:11

Rü guxü̃ma i togü i nachixü̃anegüarü ãẽ̱xgacügü, rü name nixĩ i torü ãẽ̱xgacüpe̱xegu nacaxã́pü̱xügü. Rü guxü̃ma i ngẽma togü i nachixü̃anegüarü duü̃xü̃gü, rü name nixĩ i torü ãẽ̱xgacüaxü̃́ napuracüe.

Wiyaegü 22:27

Rü Pa Guxãma i Pema i Ñoma i Naanewa Maxẽxex ¡rü nüxna pecua̱xãchie ya Cori ya Tupana rü naxca̱x pexĩ! ¡Rü nape̱xegu pecaxã́pü̱xügü rü nüxü̃ picua̱xüü̃gü!

Wiyaegü 2:10

Rü ngẽmaca̱x i pemax, Pa Nachixü̃anegüarü Ãẽ̱xgacügüx, rü pemax Pa Ãẽ̱xgacügü i Ñoma i Naanewa Duü̃xü̃gümaxã Ipecua̱xgüxü̃x ¡rü iperüxĩnüe i ñaa ucu̱xẽ rü naga pexĩnüe i ñaa pemaxã nüxü̃ chixuxü̃!

Naanearü ügüchiga 49:10

Rü nüma ya Yudá rü taxúetama nüxna tanayaxu i ngẽma norü pora. Rü yimá naixmena̱xã ya norü poraarü cua̱xruxü̃ ya naxme̱xwa ngẽxmane rü taxúetama nüxna tanayaxu ñu̱xmatáta ínangu ya yimá naixmena̱xãarü yora ya guxü̃arü ãẽ̱xgacü ixĩcü. Rü yimága tá nixĩ i naxĩnüexü̃ i guxü̃ma i duü̃xü̃gü.

Wiyaegü 102:22

Rü ngẽxguma ngẽma togü i nachixü̃anecüã̱xgü nüxü̃ naxĩnüechigagu rü tá Yerucharéü̃gu nangutaque̱xegü nax nüxü̃ yacua̱xüü̃güxü̃ca̱x ya Cori ya Tupana.

Ichaía 42:6

Rü choma ya Tupana nixĩ i cuxca̱x chacaxü̃ rü pora cuxna chaxãxü̃ nax duü̃xü̃gümaxã nüxü̃ cuyarüxuxü̃ca̱x nax mea nügümaxã inacuáexü̃ca̱x. Rü choma rü tá cuxme̱xgu chingĩ rü tá cuxna chadau. Rü cuxü̃ chamu nax chope̱xewa duü̃xü̃güétüwa cuchogüxü̃ca̱x rü ngẽmaãcü wüxi i omü nax quixĩxü̃ca̱x nape̱xewa i guxü̃ma i nachixü̃anegü.

Ichaía 45:22

Rü pema i yáxü̃wa maxẽxe, rü cha̱u̱xca̱x pexĩ rü choma rü tá pexü̃ íchanguxü̃xẽxẽ, erü chaxicatama nixĩ ya Tupana chixĩxü̃ rü nataxuma i to.

Ichaía 56:8

Rü choma rü tá nachixü̃aneca̱x chanawoeguxẽxẽ i ngẽma Iraétanüxü̃ i taxũta nachixü̃aneca̱x woeguxü̃. Rü tá chananutaque̱xe wüxigu namaxã i togü i nachixü̃anecüã̱x i duü̃xü̃gü. Rü choma ya Tupana nixĩ i nüxü̃ chixuxü̃ i ngẽma —ñanagürü.

Ichaía 62:2

Pa Yerucharéü̃x, ngẽxguma Tupana curü duü̃xü̃güxü̃ ínguxü̃xẽẽgu rü ngẽma togü i nachixü̃anegü tá nüxü̃ nadaugü. Rü guxü̃ma i ãẽ̱xgacügü i ñoma i naanewa maxẽxü̃ rü tá nüxü̃ nicua̱xãchitanü i curü pora. Rü ñu̱xũchi nüma ya Tupana rü tá wüxi i ngexwacaxü̃ i naéga cuxna naxã.