Ichaía 60:2 - Tupanaarü Ore

² Rü ẽanexü̃wa nangema i ñoma i naane, rü guxü̃ma i nachixü̃anegüca̱x rü nawaane. Natürü nüma ya Cori ya Tupana rü tá pexca̱x nanangóonexẽxẽ rü pewa tá inanawe̱x i norü pora.

Ichaía 60:2 Referans Kwoze

Colosenses 1:13

Yerü nüma ga Tupana rü marü Chatanáme̱xẽwa tüxü̃ ínanguxü̃xẽxẽ rü Nane ya nüxü̃ nangechaü̃cüme̱xẽwa tüxü̃ nangẽxmagüxẽxẽ.

Nüxíraxü̃xü̃ ga popera ga Pedru ümatüxü̃ 2:9

Natürü pema nixĩ i duü̃xü̃gü i tórü ãẽ̱xgacü ya Tupana pexü̃ dexü̃ nax norü puracü pexügüxü̃ca̱x. Rü pema nixĩ i duü̃xü̃gü i nape̱xewa ixüünexü̃, erü nümatama ya Tupana rü norü duü̃xü̃güxü̃ pexü̃ nixĩgüxẽxẽ nax nüxü̃ pixuxü̃ca̱x i ngẽma mexü̃gü i norü poramaxã naxüxü̃. Rü nümatama ya Tupana nixĩ ga ẽanexü̃wa pexü̃ ínanguxü̃xẽẽxü̃ nax norü ngóonexü̃ i mexẽchixü̃gu pechocuxü̃ca̱x.

Ngechuchuarü ngúexü̃gü ga yamugüxü̃arü puracüchiga 26:18

Rü cuxü̃ chamu nax ngẽma duü̃xü̃güxü̃ choxü̃ cucua̱xẽẽxü̃ca̱x rü nüxü̃ naxoexü̃ca̱x i nacüma i chixexü̃gü rü chauga naxĩnüexü̃ca̱x. Rü cuxü̃ chamu nax Chatanáme̱xẽwa ícunanguxü̃xẽẽxü̃ca̱x i ngẽma duü̃xü̃gü nax chowe naxĩxü̃ca̱x rü choxü̃́ yaxõgüãxü̃ca̱x nax choma nüxü̃́ nüxü̃ icharüngümaxü̃ca̱x i norü pecadugü, rü nüxü̃́ nangẽxmaxü̃ca̱x i nachica natanüwa i guxü̃ma i chorü duü̃xü̃gü i üünegüxü̃”, ñanagürü choxü̃ ga Cori.

Maraquía 4:2

Natürü i pemax nax aixcüma choxü̃ pengechaü̃güxü̃ rü chaucüma tá meama pewa nango̱x ñoma üa̱xcü nangóanexẽẽxü̃rüxü̃ rü taãxẽ ixãxü̃rüxü̃. Rü pemax rü taãẽmaxã tá piyuxnagütanü ñoma wocaxacügü naxpüü̃wa iyayi̱xü̃rüxü̃.

2 Corintios 3:18

Rü ngẽmaca̱x guxãma i yixema nax Cristuaxü̃́ yaxõgüxü̃ rü ñoma woruarüxü̃ tixĩgü, rü tawa nango̱x nax ñuxãcü namexẽchixü̃ ya tórü Cori, rü ñu̱xma rü nataxuma i ta̱xacü i tüxü̃ idüxüxü̃ naxcha̱xwa. Rü nüma ya tórü Cori i Naãxẽ ya Üünexü̃ ixĩcü, rü guxü̃guma yexeraãcü tüxü̃ nimexẽẽchigü nax naxrüxü̃ imexü̃ca̱x.

Ngechuchuarü ngúexü̃gü ga yamugüxü̃arü puracüchiga 17:23

Erü ngẽxguma perü ngutaque̱xechicagüwa chixüpetüchigügu, rü nüxü̃ chadau i naxchicüna̱xãgü i nüxü̃ picua̱xüü̃güxü̃. Rü wüxi i nachicawa namaxã chayarüxũ i wüxi i Tupanaarü ãmarearü guruxü̃ i nagu ümatüxü̃ i naéga i ñaxü̃: “Tupana ya tama nüxü̃ icuácü”, ñaxü̃. Rü yimá Tupana ya tama nüxü̃ pecuáãcüma nüxü̃ picua̱xüü̃gücü nixĩ ya choma pemaxã nüxü̃ chixuchigacü.

Ngechuchuarü ngúexü̃gü ga yamugüxü̃arü puracüchiga 14:16

Rü nũxcüma nixĩ ga Tupana ga yáxna namaxã naxĩnüxü̃ ga duü̃xü̃gü ga woo nümagü nanaxwa̱xegüxü̃ naxügügu.

Ore i mexü̃ ga Cuáü̃ ümatüxü̃ 8:55

Natürü i pema rü tama nüxü̃ pecua̱x ya Chaunatü ya Tupana. Natürü i choma rü ngẽmáacü nüxü̃ chacua̱x. Rü ngẽxguma chi: “Tama nüxü̃ chacua̱x”, ñachagu, rü pexrüxü̃ chi wüxi i dorata̱xáxü̃ chixĩ. Natürü i choma rü aixcüma nüxü̃ chacua̱x ya Chaunatü ya Tupana, rü naga chaxĩnü i norü ore.

Ore i mexü̃ ga Cuáü̃ ümatüxü̃ 1:18

Taguma texé ñuxgu nüxü̃ tadau ga Tupana. Natürü Nane ya nügümaxã wüxicacü nixĩ ya tüxü̃ nüxü̃ cua̱xẽẽcü. Rü yimá Nane rü Tupanaxü̃chi nixĩ, rü Nanatümaxã wüxiwa nangẽxmagü.

Ore i mexü̃ ga Cuáü̃ ümatüxü̃ 1:14

Rü nüma ya yimá Nane ya Tupanaarü Oregu ãégacü rü duü̃xü̃xü̃ nügü nixĩxẽxẽ. Rü totanüwa namaxü̃ rü nüxü̃ tadaugü ga norü üüne ga Nanatüxü̃tawa nayaxuxü̃, yerü Nane ga nügümaxã wüxicacü nixĩ. Rü nüma ga Nane rü poraãcü duü̃xü̃güxü̃ nangechaxü̃ rü aixcüma nixĩ ga norü ore.

Echequié 10:4

Rü yexguma ga yema Tupanaarü üüne rü yema querubíü̃güétüwa nayachü̱xüxãchi rü guma Tupanapata ga taxü̃neca̱x íxücuxü̃waama naxũ. Rü yema caixanexü̃maxã nayapa ga guma Tupanapata. Rü yema naa̱xtü ga guma Tupanapata ga taxü̃ne rü Cori ya Tupanaarü üünemaxã nangóone.

Iraétanüxü̃arü muxchiga 16:19

Rü nüma ga Coré rü Moichémaxã rü Aróü̃maxã nananuexẽxẽ ga duü̃xü̃gü. Rü yemaca̱x Tupanapatape̱xegu nangutaque̱xegü ga guxü̃ma ga yema duü̃xü̃gü. Rü Tupanaarü üüne rü naxca̱x nango̱x.

Lebítanüxü̃arü puracüchiga 9:23

Rü yemawena ga Moiché rü Aróü̃maxã Tupanapatagu nachocu. Rü yexguma ínachoxü̃gu rü Iraétanüxü̃maxã mexü̃ naxuegugü. Rü yexguma ga Cori ya Tupana rü guxü̃ma ga duü̃xü̃güxü̃ nanawe̱x ga norü pora.

Ore i mexü̃ ga Cuáü̃ ümatüxü̃ 1:1

Naxü̃pa ga guxü̃ma, rü marü nayexma ga Tupana Nane. Rü Tupanamaxã nayexma rü woetama Tupana nixĩ ga nümax. Nüma rü Tupanaarü Ore nixĩ i naéga.

Ore i mexü̃ ga Matéu ümatüxü̃ 23:19

Pema rü pengeãẽgü rü ñoma pengexetügüxü̃rüxü̃ pixĩgü. ¿Pexca̱x rü ta̱xacü nixĩ i yexera rümemaexü̃, rü ngẽma ãmare i ãmarearü guruü̃wa ngẽxmaxü̃ rüe̱xna nümatama ya ãmarearü guruxü̃ i nagagu naxüünexü̃ i ngẽma ãmare?

Ore i mexü̃ ga Matéu ümatüxü̃ 15:14

Rü nüetama i ngẽma Parichéugü, erü nümagü rü namaarü cua̱xruü̃gü i ngexetüxü̃ nixĩgü. Rü ngẽxguma wüxi i ngexetüxü̃ rü naxrüxü̃ ngexetüxü̃maxã inacua̱xgu rü ngürüãchi ngẽma taxre rü wüxi i ãxmaxü̃gu tá nügümaxã nayayicu —ñanagürü.

Yeremía 13:16

¡Rü Cori ya Tupanaxü̃ picua̱xüxü̃gü naxü̃pa nax nüma waanexü̃ ínanguxẽẽxü̃ rü naxü̃pa nax yima ma̱xpǘnegü ya waanexü̃wa ngẽxmagünegu peyacaipetütanüxü̃, rü naxü̃pa nax waanexü̃ i ãũcümaxü̃xü̃ yanguxuchixẽxẽãxü̃ i ngẽma ngóonexü̃ i ípenanguxẽxẽxü̃!

Wiyaegü 80:1

Pa Cori Pa Tupana Pa Iraétanüxü̃arü Dauruxü̃x, rü cuma nixĩ i carnérugürüü̃ãcü Yúchetanüxü̃maxã icucuáxü̃. Rü cuma nax ngẽma taxre i daxũcüã̱xchicüna̱xãgü i ixãxpe̱xatüxü̃arü ngãxü̃wa nax curütoxü̃ ¡rü nüxü̃ naxĩnü i torü yumüxẽ! ¡Rü toxü̃ nangechaxü̃ãcüma mea nüxü̃ nadawenü ya Efraíü̃tanüxü̃ rü Bẽyamíü̃tanüxü̃ rü Manachétanüxü̃! ¡Rü inachi, rü nua naxũ nax curü poramaxã toxü̃ ícunguxü̃xẽẽxü̃ca̱x!

Nüxíraxü̃xü̃ ga popera ga ãẽ̱xgacügüchiga 8:11

Rü nagagu ga yema caixanexü̃ rü nüma ga yema chacherdótegü rü taxuacüma yexma narücho nax Tupanaxü̃ yacua̱xüü̃güxü̃ca̱x, yerü Cori ya Tupanaarü üünemaxã nanapa ga guma Tupanapata ga taxü̃ne.

Ore i mexü̃ ga Matéu ümatüxü̃ 23:24

Pa Cua̱xruü̃gü i Ngexetügüxü̃x, pema rü guxü̃ma i mugü i woo íraxüchixü̃ rü meama penaxaure, natürü tama Tupana naxwa̱xexü̃ãcüma pemaxẽ. Pema rü ñoma duü̃xü̃ i wüxi i tunüca̱x norü axexü̃ bapetüxü̃ rü ñu̱xũchi wüxi i caméyu íga̱xaxü̃rüxü̃ pixĩgü.

Ichaía 2:5

Pa Acóbutanüxü̃x i Duü̃xü̃güx, ¡Ngĩxã, Cori ya Tupanaga taxĩnüe rü nüma nanaxwa̱xexü̃ãcüma nagu tamaxẽ i norü ore!

Ichaía 4:5

Rü ngẽma duü̃xü̃gü i ma̱xpǘne ya Chióü̃gu ngutaque̱xegüxü̃xétüwa rü Cori ya Tupana rü wüxi i caixanexü̃ i waxüxü̃ tá nango̱xẽxẽ i ngunecü. Rü ngẽxguma nachütagu rü tá nangóone erü üxüema i yauraxü̃ tá nango̱xẽxẽ. Rü nüma ya Cori ya Tupanaarü Üüne rü ngẽmaétüwa tá nangẽxma, nax ngẽmaãcü norü duü̃xü̃güna nadauxü̃ca̱x rü ínapoxü̃ãxü̃ca̱x. Rü ngunecü i ngẽma caixanexü̃ i waxü̃ i naétügu chüxüxü̃ rü duü̃xü̃güarü gáuxchipetaruxü̃ tá nixĩ, rü norü poxü̃ruxü̃ tá nixĩ na̱xcha̱xwa ya pucü rü buanecü.

Ichaía 66:11

Rü pema Pa Yerucharéü̃cüã̱xgüx, rü tá poraãcü petaãẽgü, ñoma wüxi i õxchana i norü mama meama maixü̃ rü ngãxpütüwexü̃rüxü̃.

Ichaía 8:22

Rü ñu̱xũchi tá ñaa waixü̃müanegu narüdaunü, rü ngẽma nüxü̃ nadaugüxü̃ tá nixĩ nax nataxuma i ta̱xacürü õna. Rü ẽanexü̃xü̃xica tá nadaugü rü ngúxü̃ tá ningegü. Rü guxü̃watáma nachüta rü nawaanemare.

Ichaía 58:8

Rü yíxema ngẽmaãcü aurexe rü ñoma ngexwaca yangóonexü̃rüxü̃ tá nango̱x nax aixcüma namexü̃ i tümaarü maxü̃, rü ngẽma tümaarü o̱xrigü rü tá paxa nixegü. Rü ngẽxguma ngẽmaãcü pexauregu rü duü̃xü̃gü tá nüxü̃ nadaugü nax aixcüma yawéxü̃ i pecüma. Rü choma rü chorü poramaxã tá pexna chadau.

Ichaía 62:1

Pa Chióü̃x, poraãcü cuxü̃ changechaü̃ rü ngẽmaca̱x taxũtáma ichayarüchiane. Rü Pa Yerucharéü̃x, taxũtáma charüngü̃ ñu̱xmatáta Tupana cuxü̃ rüporamaexẽxẽ. Rü ngẽxguma Tupana cuxü̃ rüporamaexẽẽgu rü ñoma ngexwaca ya ngunexü̃rüxü̃ tá cuxca̱x ningóone. Rü ngẽxguma Tupana curü uanügüme̱xẽwa curü duü̃xü̃güxü̃ ínguxü̃xẽẽgu rü ñoma wüxi i omü i cuxü̃ báxixü̃rüxü̃ tá nixĩ nax ngóonexü̃wa cungẽxmaxü̃.