Ichaía 6:2 - Tupanaarü Ore

² Rü naétüwa nayexmagü ga daxũcüã̱xgü. Rü wüxichigü ga yema rü nüxü̃́ nayexma ga 6 ga naxpe̱xatügü. Rü taxre ga naxpe̱xatümaxã rü nügü nidüxchiwegü, rü guma nai ga taxre ga naxpe̱xatümaxã nügü nidüxparagü, rü guma nai ga taxremaxã rü nixüüxü̃.

Ichaía 6:2 Referans Kwoze

Yema Cuáü̃ nüxü̃ dauxü̃ i yixcüra tá ngupetüxü̃chiga 4:8

Rü yema ãgümücü ga daxũcüã̱x ga maxẽxü̃, rü wüxichigü nüxü̃́ nayexma ga 6 ga naxpe̱xatügü. Rü guxü̃wama ga naxpe̱xátüétüwa rü naxpe̱xátütüü̃wa rü namuxetü. Rü ngunecü rü chütacü rü ñanagürügüecha: “Naxüüne, naxüüne, naxüüne nixĩ ya tórü Cori ya Tupana ya Guxü̃étüwa Ngẽxmacü rü Woetama Yexmacü rü Ñu̱xma Ngẽxmacü rü Guxü̃gutáma Ngẽxmacü”, ñanagürügüecha.

Echequié 1:11

Rü yema ãgümücü ga querubíü̃gü rü wüxichigü nanangenagü ga taxre ga naxpe̱xatü rü namücüpe̱xatüpe̱xewa nayaxũ̱xgüchigü. Rü guma nai ga taxre ga naxpe̱xatügü rü naxü̃nearü düxruxü̃ nixĩgü.

Wiyaegü 104:4

Rü yimá buanecü nixĩ i yangegücü i cuga. Rü ngẽma üxüema nixĩ i naxüxü̃ i curü ngúchaü̃.

Wiyaegü 103:20

Pa Daxũcüã̱x i orearü Ngeruxü̃ i Poraexü̃ i Yanguxẽxẽgüxe i Ngẽma Tupana Pexü̃ Muxü̃ ¡rü mexü̃ Corimaxã pexuegugü!

Ichaía 6:6

Rü yexguma rü wüxi ga yema daxũcüã̱x rü chauxü̃tawa naña. Rü ãmarearü guruü̃wa wüxi ga ãchataxü̃maxã wüxi ga ã́xwe nayaxu.

Wiyaegü 18:10

Rü wüxi ga dauxü̃cüã̱x ga ãxpe̱xatüxü̃étügu naxaunagü rü yema namaxã nigoe. Rü buanecüemaétügu namaxã niña.

Yema Cuáü̃ nüxü̃ dauxü̃ i yixcüra tá ngupetüxü̃chiga 14:6

Rü ñu̱xũchi nüxü̃ chadau ga wüxi ga to ga orearü ngeruxü̃ ga daxũguxü̃ ga naanegu íxexeü̃xü̃ ga yangexü̃ ga Tupanaarü ore i guxü̃gutáma ixĩxü̃, nax namaxã nüxü̃ yaxuxü̃ca̱x ga duü̃xü̃gü ga ñoma ga naanewa maxẽxü̃, rü naguxü̃raü̃xü̃ ga duü̃xü̃gütücumü, rü naguxü̃raü̃xü̃ ga duü̃xü̃gü ga to ga nagawa idexagüxü̃, rü naguxü̃raü̃xü̃ ga ĩanegücüã̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 8:13

Rü yemawena ichadawenü rü nüxü̃ chaxĩnü ga wüxi ga ĩyü ga daxũgu íxexeü̃xü̃ ga tagaãcü ñaxü̃: “Nangechaü̃tümüü̃gü i ngẽma duü̃xü̃gü i naanewa maxẽxü̃ i ngẽxguma yacuegüãgu tá ya norü cornétagü i ngẽma togü i tomaepü̱x i Tupanaarü orearü ngeruü̃gü”, ñaxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 7:11

Rü guxü̃ma ga Tupanaarü orearü ngeruü̃gü ga daxũcüã̱x rü nüxü̃ ínachimaeguãchi ga yema tochicaxü̃ rü yema 24 ga ãẽ̱xgacügü rü yema ãgümücü ga daxũcüã̱x ga maxẽxü̃. Rü nüma ga yema Tupanaarü orearü ngeruü̃gü ga daxũcüã̱x rü yema tochicaxü̃pe̱xegu nanangücuchitanü, rü Tupanaxü̃ nicua̱xüü̃gü.

Echequié 10:21

Rü wüxichigü ga yema querubíü̃gü rü naxãgümücüchiwe rü naxãgümücüpe̱xatü. Rü guma naxpexatügütüü̃wa rü nanayatüme̱xẽgüraxü̃.

Echequié 1:24

Rü yexguma inaxĩãchigu rü nüxü̃ chaxĩnü ga naga ga guma naxpe̱xatügü. Rü ñoma natü i nagoxü̃chíüxü̃rüxü̃ nixĩ ga nax natagaxü̃. Rü yimá Cori ya Tupana ya Guxãétüwa Ngẽxmacügarüxü̃ nixĩ ga naga. Rü ñoma muxũchixü̃ i churaragügarüxü̃ nixĩ. Rü yexguma íyachaxãchitanügu rü narüweü̃ ga guma naxpe̱xatügü.

Echequié 1:6

Rü wüxichigü ga yema rü naxãgümücüpe̱xatü rü naxãgümücüchametü.

Yox 15:15

Rü nüma ya Cori ya Tupana rü tama nüxü̃́ nayaxõ i woo ngẽma norü orearü ngeruü̃gü i daxũcüã̱xgü erü woo nümagü rü ta ñuxguacü rü ínatüe. Rü bai i ngẽma dauxü̃guxü̃ i naane rü aixcüma nape̱xewa namexü̃, rü yexera taxũtáma nüxü̃́ nayaxõ i ngẽma yatü i chixexü̃gu maxü̃xü̃ rü chixexü̃gu rüxĩnüxü̃ ñoma ita̱xawa̱xgu rü dexágu rüxĩnüxü̃rüxü̃.

Yox 1:6

Rü wüxi ga ngunexü̃ ga yexguma Cori ya Tupanape̱xewa naxĩxgu ga norü orearü ngeruü̃gü ga daxũcüã̱x, rü nüma ga Chataná rü ta Cori ya Tupanape̱xewa nangu.

Nüxíraxü̃xü̃ ga popera ga ãẽ̱xgacügüchiga 22:19

Rü nüma ga Micaía rü nanangãxü̃ rü ñanagürü: —Chanaxwa̱xe i icurüxĩnü i ñaa to i norü ore ya Tupana. Rü nüxü̃ chadau ga Tupana ya norü tochicaxü̃wa rütocü, rü guxü̃ma i daxũcüã̱x i orearü ngeruxü̃ i naxü̃tagu chigüxü̃ ga norü tügünecüwawa rü norü to̱xwecüwawa.

Nüxíraxü̃xü̃ ga popera ga ãẽ̱xgacügüchiga 6:27

Rü nüma ga Charomóü̃ rü yema nachiã ga üünexü̃chixü̃gu nanachigüxẽxẽ. Rü yema taxre ga orearü ngeruü̃güchicüna̱xãgü rü nixuuchipe̱xatügü. Rü yema tügünecüwawa üxü̃ rü wüxi ga naxpe̱xatü rü ĩxtapü̱xwa nayaxũ̱x Rü yema to̱xwecüwawa üxü̃ rü wüxi ga naxpe̱xatü rü norü toxtapü̱xwa nayaxũ̱x. Rü guma nai ga naxpe̱xatügü rü meama yema naxmachixü̃arü ngãxü̃wa nügüpe̱xewa nayaxũ̱xgüpe̱xe.

Ínachoxü̃xü̃chiga 37:9

Rü yema naxchicüna̱xãgü rü nügüarü to̱xma̱xtawa nayexmagü, natürü ga nachametü rü yema naxátaü̃étüguama narüma̱xnü. Rü guma naxpe̱xatügümaxã nayadüxgü ga yema baúátaü̃.

Ínachoxü̃xü̃chiga 25:20

Rü ngẽma taxre i daxũcüã̱xchicüna̱xãgü rü tá nügüarü to̱xma̱xtawa nangẽxmagü. Rü naxã́taü̃étügu tá narüdaunü. Rü yima naxpe̱xatügü rü tá naxã́taü̃étügu narüxunü. Rü ngẽmaãcü tá nayadüxü i ngẽma baúátaü̃.

Wiyaegü 89:7

Erü cuma rü Tupana ya poracü rü ãũcümacü quixĩ. Rü curü orearü ngeruü̃gü i dauxü̃cüã̱x rü cuxü̃ ínachomaeguãchi.

Yox 4:18

Rü nüma ya Cori ya Tupana rü tama nüxü̃́ nayaxõ i woo ngẽma norü orearü ngeruü̃gü i daxũcüã̱xgü, erü woo nümagü rü ta ñuxguacü rü ínatüe.

Nüxíraxü̃xü̃ ga popera ga ãẽ̱xgacügüchiga 19:13

Rü yexguma yema nagaxü̃ naxĩnügu ga Ería, rü nügü nidüxchiwe norü gáuxü̃chirumaxã. Rü ínaxũxũ ga yema ma̱xpǘnearü ãxmaxü̃wa rü naa̱xgu nayachi. Rü yexma nachiyane rü nüxü̃ naxĩnü ga wüxi ga naga ga nüxü̃ ñaxü̃. —¿Ta̱xacü ngéma cuxü, Pa Eríax? —ñaxü̃.

Ínachoxü̃xü̃chiga 3:6

Rü ñanagürü ta: —Rü choma nixĩ i curü o̱xigüarü Tupana chixĩxü̃. Rü choma nixĩ ga Abraáü̃arü rü Ichaáarü rü Acóbuarü Tupana chixĩxü̃ —ñanagürü. Rü yexguma ga Moiché rü nügü nidüxchiwe, yerü namuü̃ nax Tupanaxü̃ nadawenüxü̃.

Naanearü ügüchiga 17:3

Rü yexguma ga Abráü̃ rü waixü̃müanegu nanangücuchi. Rü yoxni ga Tupana rü nidexachigüama rü ñanagürü: —Ñaãcü tá nixĩ i cumaxã nax ichaxügaxü̃. Rü cuma tá nixĩ i norü o̱xi quixĩxü̃ i muxü̃tama i nachixü̃anecüã̱x i duü̃xü̃gü.

Popera ga Yudíugü ga yaxõgüxü̃ca̱x ümatüxü̃ 1:7

Rü yexguma norü orearü ngeruü̃gü ga daxũcüã̱xchiga yadexaxgu ga Tupana, rü ñanagürü: “Choma rü chanamu i ngẽma chorü orearü ngeruü̃gü. Rü ñoma buanecürüxü̃ rü ñoma üxüemarüxü̃ chayaxĩgüxẽxẽ nax naxügüã̱xü̃ca̱x i chorü ngúchaü̃”, ñanagürü.

Ore i mexü̃ ga Luca ümatüxü̃ 1:10

Rü yema pumarate̱xe íyaguyane rü guxü̃ma ga duü̃xü̃gü ga düxétüwa yexmagüxü̃ rü ínayumüxẽgü.

Chacaría 3:4

Rü yexguma ga yema daxũcüã̱x ga duü̃xü̃ rü noxrü ngü̃xẽẽruü̃güxü̃ namu rü ñanagürü: —Ngẽma ãũãchixü̃ i Yochuéchiru ¡rü ípenacuxuchix! —ñanagürü. Rü ñu̱xũchi Yochuéxü̃ ñanagürü: —¡Dücax! rü marü cuxna chanayaxu i ngẽma curü pecadu rü ñu̱xma rü tá nga̱xãẽchirugu cuxü̃ chicu̱xẽxẽ —ñanagürü.

Danié 9:21

Rü yexguma íchayumüxẽyane rü cha̱u̱xca̱x nango̱x ga Tupanaarü orearü ngeruxü̃ ga dauxü̃cüã̱x ga Gábi ga ü̃pa cha̱u̱xca̱x ngócü ga yexguma Tupana choxü̃ ngo̱xetüxẽẽgu. Rü yagoeãcü yema íchayexmaxü̃wa nangu. Rü yema ora ga Tupanaca̱x ãmaregü yagugüxü̃ ga yáuanecü nixĩ ga chauxü̃tawa nanguxü̃.

Echequié 10:16

Rü yexguma naxĩã̱xãchitanügu ga yema querubíü̃gü rü yema ibochicuxü̃ rü ta naxĩã̱xãchitanü. Rü yexguma naxpe̱xatügümaxã yachü̱xüxãchitanügu ga yema querubíü̃gü, rü yema ibochicuxü̃ rü ta wüxigu namaxã nayachü̱xüxãchitanü.

Echequié 1:4

Rü to ga nüxü̃ chadauxü̃ nixĩ ga wüxi ga buanecü ga íxãũxẽmacü ga nórtewaama ne ũcü. Rü wüxi ga taxü̃ ga caixanexü̃wa nango̱x ga wüxi ga üxüema ga ãẽmacürüxü̃ ixĩxü̃. Rü norü guxü̃cüwawa rü poraãcü nangóone. Rü yema üxüemaarü ngãxü̃wa rü yéma nayexma ga wüxi ga ta̱xacü ga ñoma bróũcherüxü̃ iya̱u̱xracüüxü̃.

Neemía 9:6

Rü ñu̱xũchi ga nüma ga Édra rü nayumüxẽ rü ñanagürü: —Pa Tupanax, cuma nixĩ i Cori quixĩxü̃ rü nataxuma i to. Rü cuma nixĩ ga cunaxüxü̃ ga daxũguxü̃ i naane, rü ngẽma daxũguxü̃ i naaneétüwa ngẽxmaxü̃ rü guxü̃ma i ẽxtagü. Rü cuma nixĩ ga cunaxüxü̃ ga ñoma i naane, rü taxtügü, rü guxü̃ma i ta̱xacü i nawa ngẽxmaxü̃. Rü cuma nixĩ i maxü̃ nüxna cuxãxü̃ i guxü̃ma i ngẽma maxẽxü̃. Rü ngẽmaca̱x nixĩ i cuxü̃ yacua̱xüü̃güxü̃ ya ẽxtagü ya dauxü̃wa ngẽxmagüxü̃.