Ichaía 59:3 - Tupanaarü Ore

³ Rü pema rü nagümaxã pixãũãchime̱xẽ nagagu nax pimáetagüxü̃. Rü pidorata̱xagü rü chixexü̃maxã pidexagü.

Ichaía 59:3 Referans Kwoze

Ichaía 1:15

Rü ngẽxguma pema pexunagüme̱xẽgüãcü peyumüxẽgügu, rü choma rü pexcha̱xwa chidaugachi. Rü woo namuxgu i perü yumüxẽ natürü i choma rü taxũtáma pexü̃ chaxĩnü, erü pema rü pemáeta rü pexme̱xgü rü nagümaxã nixãũãchi.

Echequié 13:8

Rü ngẽmaca̱x i choma i Cori ya Tupana rü ñachagürü pexü̃: ‘Rü ñu̱xma nax doraxü̃ pixugüxü̃, rü ñu̱xũchi ngẽma nüxü̃ pidaugüxü̃ rü tama aixcüma nax yixĩxü̃, rü ngẽmaca̱x i choma rü pemaxã chanu. Rü choma ya Cori ya Tupana nixĩ i nüxü̃ chixuxü̃ i ngẽma’.

Yeremía 2:34

Rü guxü̃wama cuxãũãchichiru tümagümaxã ya yíxema duü̃xẽ ya ingearü diẽruã́xẽ rü yíxema taxuxü̃ma i chixexü̃ ügüxe, rü yíxema i tama tümawa nüxü̃ cuyangauxe i ta̱xacürü chixexü̃ nax taxügüxü̃.

Yeremía 2:30

Rü choma rü chanapoxcu ga petanüxü̃gü, natürü tama chauga naxĩnüe, rü yemaacü natüca̱xmamare nixĩ nax chapoxcuexü̃. Rü pematama penadai ga perü orearü uruü̃gü, ñoma leóü̃gü i idüraexü̃ nada̱i̱xü̃rüxü̃.

Ichaía 1:21

Pemax, Pa Yerucharéü̃cüã̱x, noxri rü aixcüma meama Tupanaga pexĩnüe, natürü i ñu̱xma rü ñoma wüxi i ngexü̃ i naxü̃nemaxã taxexü̃rüxü̃ pixĩgü. Pema ga noxri rü mexü̃ ga nacümagu pemaxẽ, natürü i ñu̱xma rü máetaguxicatama perüxĩnüe.

Miquéa 7:2

Rü ñoma i naanewa rü marü nataxuma i duü̃xü̃gü i mexü̃gu rüxĩnüexü̃ rü Tupanamaxã ixaixcümagüxü̃. Rü wüxichigü rü naxca̱x nadau nax ñuxãcü guxchaxü̃ togueca̱x naxüxü̃. Rü ngẽxguma guxchaxü̃ ngẽxmagu, rü guxü̃ma rü ínamemare nax nügü nada̱i̱xü̃.

Miquéa 6:12

Rü ngẽma diẽruã̱xgüxü̃ i daa ĩanegu ãpatagüxü̃ rü poraãcü duẽxẽgüxü̃́ nangĩ́e. Rü guxü̃ma i daa ĩanewa maxẽxü̃ rü dorata̱xaxgüxü̃ rü womüxẽẽwa̱xegüxü̃ nixĩgü.

Ochéa 7:13

Rü taxü̃ i ãũcümaxü̃ tá nixĩ naxca̱x i ngẽma chorü duü̃xü̃gü yerü choxna nixĩgachitanü. Rü tá guxchaxü̃ naxca̱x ínangu erü tama chauga naxĩnüechaü̃. Rü choma rü íchamemarechire̱x nax íchananguxü̃xẽẽxü̃ca̱x, natürü i nümagü rü tama chomaxã nixaicümagü rü doraxü̃ chomaxã nixugümare.

Ochéa 4:2

Rü tamuxũchi ya natüca̱xma Tupanaégagu ixunetaxe rü nataxüchi i dora, rü máeta, rü ngĩ̱x, rü namu i nai i ngexü̃maxã ipegüxü̃, rü nügü daixü̃, rü máetagüechaxü̃.

Echequié 35:6

Rü cumaxã nüxü̃ chixu rü ñu̱xma nax aixcüma yixĩxü̃ nax chamaxü̃xü̃ i choma rü aixcüma tá nixĩ nax cuyuxü̃ rü curüxoxü̃. Erü cugagu nixĩ nax nayuexü̃ ga yema Iraétanüxü̃, rü ngẽmaca̱x tá cuwe ningechigü i ngẽma yu.

Echequié 9:9

Rü nüma ga Cori ya Tupana rü choxü̃ nangãxü̃ga rü ñanagürü: —Ngẽma Iraéanecüã̱xgüarü pecadu rü ngẽma Yudáanecüã̱xgüarü pecadu rü nataxüchi. Rü ngẽma nachixü̃ane rü máetagüxü̃maxã nanapá. Rü yima ĩane ya Yerucharéü̃wa rü norü duü̃xü̃gü rü chixeãcü nügümaxã inacua̱xgü. Rü nüma nagu naxĩnüegu rü marü nüxna chixũ i ngẽma nachixü̃ane, rü ngẽmaca̱x tama nüxü̃ chadau i ngẽma naxügüxü̃.

Echequié 7:23

Rü cumax, Pa Echequiéx ¡rü wüxi ya cadéna ínamexẽxẽ naxca̱x i chorü duü̃xü̃gü i Yerucharéü̃cüã̱xgü! Erü tá chanapoxcue naxca̱x nax poraãcü namáetagüxü̃. Rü yima norü ĩane ya Yerucharéü̃ rü poraãcü máetamaxã nanapá.

Yeremía 7:8

Rü pemax, Pa Yerucharéü̃cüã̱xgüx, nagu perüxĩnüe rü marü taxũtáma pexü̃ chapoxcue naxca̱x i perü chixexü̃ erü daa perü ĩanewa nangexma ya chopata. Natürü pegütama nagu pewomüxẽẽgümare i ngẽma perü ĩnü.

Nüxíraxü̃xü̃ ga popera ga Timutéuca̱x naxümatüxü̃ ga Pauru 4:2

Rü ngẽma duü̃xü̃gü i nüxü̃ rüxoexü̃ nax yaxõgüãxü̃ rü tá nüxü̃́ inarüxĩnüe i ngẽma duü̃xü̃gü i nawomüxẽẽgüxü̃ rü idorata̱xaxgüxü̃. Erü ngẽma duü̃xü̃gü i dorata̱xaxgüxü̃ rü düxwa namaxã nixü nax chixexü̃guxicatama naxĩnüexü̃.

Ore i mexü̃ ga Matéu ümatüxü̃ 27:4

Rü ñanagürü nüxü̃: —Choma rü marü chixexü̃ chaxü, erü naechita íchayaxuaxü̃ i wüxi i yatü i taxuxü̃ma i chixexü̃ üxü̃, rü ñu̱xma rü tá ngẽmagagu nayu —ñanagürü. Natürü nümagü ga ãẽ̱xgacügü rü nanangãxü̃gü, rü ñanagürügü: —Toma rü tama nüxü̃ tacuáxchaü̃ i ngẽma. Cugagutama nixĩ, rü cuma i nüxü̃ cucuáxü̃ nax ñuxãcü cugümaxã cunamexẽxẽxü̃ i ngẽma —ñanagürügü.

Ochéa 7:3

Rü nüma i duü̃xü̃gü rü norü diẽrumaxã rü womüxẽẽmaxã nanataãẽxẽxẽ i norü ãẽ̱xgacü rü norü ngü̃xẽẽruü̃gü.

Echequié 22:2

—Cumax, Pa Yatüx, ¡namaxã naxuegu i norü poxcu ya yima ĩane ya máxwa̱xéne ya Yerucharéü̃! ¡Rü guxü̃ma i ngẽma chixexü̃gü i ãũãchixü̃ i naxügüxü̃gagu rü ínaxuãü̃gü!

Yeremía 22:17

“Natürü i cuma rü naxca̱x cuxoegaãxẽ i ngẽma curü ngẽmaxü̃gü i chixexü̃wa cuyaxuxü̃. Rü cuyama̱x ya yíxema taxuxü̃ma i ta̱xacürü chixexü̃ ügüxe. Rü ñu̱xũchi chixri tümamaxã icucua̱x rü ngetanüãcü tüxü̃ cupuracüexẽxẽ ya yíxema curü duü̃xẽgü” —ñanagürü ga Cori ya Tupana.

Ichaía 3:8

Rü yima ĩane ya Yerucharéü̃ rü marü nanguxuchi rü Yudáanewa rü duü̃xü̃güchicaxica ínayaxü, erü duü̃xü̃gü rü chixri Cori ya Tupanachiga nidexagü rü nanaxügü i ta̱xacü i tama namaxã nataãẽxü̃, rü ngẽmaãcü tama naga naxĩnüe.

Ichaía 6:5

Rü yexguma ga chomax rü ñaxü̃gu charüxĩnü: —Ñu̱xmawaxix rü chaugümaxã changechaü̃ erü tá chayu. Erü choma nax duü̃xü̃ chixĩxü̃ rü chauxetümaxã nüxü̃ chadau ya yimá ãẽ̱xgacü ya Cori ya Guxãétüwa Ngẽxmacü. Rü chaua̱x rü naxãũãchi rü duü̃xü̃gü i ãũãchiarü dexaã̱xgǘxü̃tanüwa chamaxü̃ —ñaxü̃gu charüxĩnü.

Ichaía 9:15

Rü ngẽma naeru rü nachiga nixĩ i Iraéanearü ãẽ̱xgacügü rü norü ngü̃xẽẽruü̃gü. Rü ngẽma narexü̃ rü nachiga nixĩ i orearü uruü̃gü i doramaxã ngu̱xẽẽtaegüxü̃.

Ichaía 28:15

Pemax rü ñaperügügü: —Taxucürüwa i torü uanü toxü̃ nadai erü marü wüxi i uneta taxü nax tama tayuexü̃ca̱x rü togü toxü̃ ínapoxü̃xü̃ca̱x —ñaperügügü. Natürü ngẽma uneta rü yuwa tá pexü̃ nagagü erü wüxi i womüxẽẽmare nixĩ.

Ichaía 30:9

Ñaa duü̃xü̃gü rü duü̃xü̃gü i tama ixĩnüechaü̃xü̃ rü tama yaxõgüchaü̃xü̃ nixĩgü. Rü tama norü Coriarü ucu̱xẽgü inarüxĩnüechaxü̃.

Ichaía 44:20

Rü taxuwama name i norü ĩnü i ngẽma duü̃xü̃gü i nügü womüxẽẽgüxü̃ namaxã i wüxi i ĩnü i doramare ixĩxü̃. Rü ngẽma duü̃xü̃gü rü taxucürüwa nügütama ínanguxü̃xẽxẽ nawa i ngẽma nagu naxĩnüexü̃. Rü tama nüxü̃ nacua̱xgüéga nax ngẽma naxchicüna̱xãgü i naxügüxü̃ rü nüxü̃ yacua̱xüü̃güxü̃ rü doramare nax yixĩxü̃.

Ichaía 59:13

Rü tama Tupanaga taxĩnüe rü tama namaxã tixaixcümagü. Rü nüxna tixĩgachi. Rü máetachiga tidexagü rü tanaechitaegü. Rü duü̃xü̃güxü̃ tawomüxẽxẽ.

Ucu̱xẽgüchiga 6:17

Rü ñaagü nixĩ: yima naxetü ya nügü icua̱xü̃ne, rü yimá conü ya idoreta̱xácü, rü yima naxme̱x ya tüxü̃ imáxe ya duü̃xẽ ya taxuxü̃ma i chixexü̃ ǘxe, rü ngẽma naãxẽ i chixexü̃gu rüxĩnüxü̃, rü yima nacutügü ya paxa ixüãchine nax chixexü̃ naxügüxü̃ca̱x, rü ngẽma poxü̃ruxü̃neta i dorata̱xáxü̃, rü ngẽma daica̱x dauxü̃ i naenexẽgümaxã.

Yeremía 9:2

Rü chierü ngextá ínachianexü̃wa choxü̃́ nangẽxmagu i wüxi i nachica nax ngẽxma chaxãpataxü̃ca̱x nax ngẽmaãcü chorü duü̃xü̃güna yáxü̃wa changexmaxü̃ca̱x. Erü guxü̃ma chixexü̃gu namaxẽ, rü duü̃xü̃gü i naechitamare maxẽxü̃ nixĩgü.

Yeremía 9:7

Rü ngẽmaca̱x i choma ya Cori ya Tupana rü ñachagürü: “¿Ta̱xacü chi i to i namaxã chaxüxü̃ i ngẽma chorü duü̃xü̃gü nax nüxü̃ naxoexü̃ca̱x i norü chixexü̃? Rü ñu̱xma rü tá taxü̃ i guxchaxü̃ naxca̱x íchanguxẽxẽ nax ngẽmaãcü nüxü̃ naxoexü̃ca̱x i ngẽma chixexü̃ i nagu namaxẽxü̃.

Miquéa 3:4

Rü wüxi i ngunexü̃ rü tá nüxna pecagü ya Cori ya Tupana nax pexü̃ nangü̃xẽẽxü̃ca̱x, natürü i nüma rü taxũtáma pexü̃ nangãxü̃. Rü ngẽxguma i nüma rü tá pexcha̱xwa inicu̱x nagagu i ngẽma chixexü̃ i pexügüxü̃.