Ichaía 59:12 - Tupanaarü Ore

¹² Rü yixema rü Tupanamaxã ta̱xacü tixugüe rü ngẽma tórü chixexü̃gütama nixĩ i tüxü̃ íxuaxü̃xü̃. Rü ngẽma tórü chixexü̃ rü tawa nangẽxmagü, rü nüxü̃ tacua̱x i tórü pecadugü.

Ichaía 59:12 Referans Kwoze

Édra 9:6

Rü ñachagürü nüxü̃: —Pa Chorü Tupanax, Pa Chorü Tupanax, rü poraãcü chaxãnexü̃chi i cupe̱xewa. Rü tama nüxü̃ chacua̱x nax ta̱xacü chaxüxü̃ rü ñuxãcü cumaxã chidexaxü̃. Erü ngẽma torü chixexü̃ rü marü nangupetüxüchiama rü ngẽma torü pecadugü rü marü ñoma i naane namaxã nanapá.

Ochéa 5:5

Rü ngẽma Iraéanecüã̱xgü rü nügü nicua̱xüü̃gü rü nügü ínarütagü. Rü ngẽmagagu rü tá naxca̱x ínangu i guxchaxü̃. Rü ngẽma Efraíü̃tanüxü̃ rü norü chixexü̃gu tátama nayi. Rü ngẽma Yudáanecüã̱xgü rü tá ta noxrütama chixexü̃gu nayi.

Ochéa 4:2

Rü tamuxũchi ya natüca̱xma Tupanaégagu ixunetaxe rü nataxüchi i dora, rü máeta, rü ngĩ̱x, rü namu i nai i ngexü̃maxã ipegüxü̃, rü nügü daixü̃, rü máetagüechaxü̃.

Echequié 5:6

Natürü yema norü duü̃xü̃gü ya yima ĩane ya Yerucharéü̃ rü chomaxã nanue rü tama naga naxĩnüechaü̃ i chorü mugü rü ucu̱xẽgü. Rü guxü̃nema ya yima togü i nachixü̃anegüarü ĩanegü ya nüxna ngaicamanearü duü̃xü̃güarü yexera chixexü̃gu namaxẽ i ngẽma Yerucharéü̃cüã̱x rü tama naga naxĩnüe i ngẽma chorü mugü rü chorü ucu̱xẽgü.

Yeremía 14:7

Rü nüma ga Yeremía rü Cori ya Tupanaxü̃ ñanagürü: —¡Pa Corix, nüxü̃ tacua̱x nax cupe̱xewa poraãcü chixexü̃ taxüxü̃, natürü tanaxwa̱xe nax toxü̃ curüngü̃xẽẽxü̃ nax ngẽmaãcü i duü̃xü̃gü cuxü̃ natachigaxẽẽxü̃ca̱x. Rü muẽ̱xpü̱xcüna tama cuga taxĩnüe rü poraãcü cupe̱xewa chixexü̃ taxü.

Ichaía 1:4

Pa Duü̃xü̃gü i Chixexü̃ Ügüxü̃ rü Chixexü̃gu Ímaxẽxü̃x, ngúxü̃ pinge erü pema rü chixexü̃arü üruü̃gütaagü pixĩgü, rü nanegü i pecaduã̱xgüxü̃ pixĩgü. Pema rü marü nüxna pixĩgachi ya Iraétanüxü̃arü Tupana ya üünecü rü marü nüxü̃ perüxoe.

Ochéa 7:10

Rü woo choma rü Iraéanecüã̱xgüarü Tupana nax chixĩxü̃ rü tama cha̱u̱xca̱x nawoegu rü tama cha̱u̱xca̱x nadaugü. Rü ngẽma nax nügü yacua̱xüü̃güxü̃gagu rü tama cha̱u̱xca̱x nawoegu.

Echequié 7:23

Rü cumax, Pa Echequiéx ¡rü wüxi ya cadéna ínamexẽxẽ naxca̱x i chorü duü̃xü̃gü i Yerucharéü̃cüã̱xgü! Erü tá chanapoxcue naxca̱x nax poraãcü namáetagüxü̃. Rü yima norü ĩane ya Yerucharéü̃ rü poraãcü máetamaxã nanapá.

Yeremía 3:2

¡Rü dücax, mea nüxü̃ perüdaunü i ngẽma ngüchitaerugüxü̃ i íba̱i̱xchitaerugüxü̃! ¿Rü ngexü̃rüü̃xü̃ yixĩxü̃ ga tama tupananetachicüna̱xãgüxü̃ nawa picua̱xüü̃güxü̃? Rü ñoma ngexü̃ i Arábiaanecüã̱x i ngeãẽxü̃ i ínachianexü̃wa namacüwawa rütoxü̃ nax yatügüca̱x nadauxü̃ rü pema rü ngẽxgumarüxü̃ ta pixĩgü nax naxca̱x pedaugüxü̃ i ngẽma tupananetachicüna̱xãgü nax nüxü̃ picua̱xüü̃güxü̃ca̱x. Rü ñu̱xma nax choxna pixĩgachixü̃, rü perü chixexü̃maxã penapaxẽxẽ i perü naane.

Ichaía 3:9

Rü ngẽma duü̃xü̃gü rü nachametüwatama nango̱xama nax chixexü̃ naxügüxü̃. Rü ngẽma duü̃xü̃gü rü Chodómacüã̱xgürüxü̃ norü pecadumaxã nügü nicua̱xüxü̃, rü tama naxãnee. Rü wüxi i taxü̃ i ãũcümaxü̃chixü̃ nixĩ naxca̱x i ngẽma duü̃xü̃gü, erü nümagütama naxca̱x nadaugü i norü poxcu.

Neemía 9:33

Natürü tama cugagu nixĩ ga yema guxchaxü̃gü ga toxü̃ ngupetüxü̃ yerü meama niwe̱x i guxü̃ma i ngẽma cuxüxü̃. Natürü toma nixĩ ga chixexü̃ taxügüxü̃.

Édra 9:13

Rü nawena ga guxü̃ma ga yema guxchaxü̃gü ga toxü̃ ngupetüxü̃ nagagu ga yema torü chixexü̃gü ga cupe̱xewa taxüxü̃, Pa Torü Tupanax, rü tama yema torü chixexü̃ca̱x toxna üxü̃ i poxcuãcü toxü̃ cupoxcue rü yemaca̱x ñuxre toxü̃ ícuyaxüxẽxẽ.

Iraétanüxü̃arü muxchiga 32:23

Natürü ngẽxguma taxũtáma ngẽmaãcü penaxü̱xgux rü wüxi i taxü̃ i chixexü̃ tá pexüe Cori ya Tupanape̱xewa, rü nüma tá pexü̃ napoxcu ega tama peyanguxẽẽgu i ngẽma namaxã nüxü̃ pixuxü̃.

Wiyaegü 51:3

Rü naxca̱x íchicua̱x nax chixexü̃ chaxüxü̃. Rü ngẽma chorü pecadu rü guxü̃guma chauãẽwa nangẽxmaecha.

Ichaía 58:1

Rü Tupana rü Ichaíaxü̃ ñanagürü: —¡Tagaãcü aita naxü rü taxṹ i cumuü̃xü̃! ¡Rü nataga ñoma wüxi ya cornétarüxü̃! ¡Rü yangagü i ngẽma Acóbuarü duü̃xü̃gü i Iraétanüxü̃ nagagu i norü chixexü̃gü rü norü pecadugü!

Abacú 1:4

Rü duü̃xü̃gü rü tama aixcüma nagu namaxẽ i ngẽma Tupanaarü mugü rü tochixü̃anearü mugü. Rü ngẽma mugü i duü̃xü̃güétüwa idexaxü̃ rü tama naga naxĩnüe. Rü ngẽma duü̃xü̃gü i chixexü̃gu maxẽxü̃ rü tüxü̃ napoxcu ya yíxema mexü̃ ügüxe. Rü ngẽmaãcü ínayatoxẽẽgü i ngẽma aixcüma we̱xguxü̃ —ñanagürü.

Ichaía 64:4

Rü nũxcümacürüwa taguma texé nachiga taxĩnü rü texé nüxü̃ tadau i to i Tupana i naxüxü̃ i ngẽma cuma cuxüxü̃ tümaca̱x ya yíxema cuxü̃́ yaxõgüxe.

Echequié 7:16

Rü woo togü rü máxpüxanexü̃wa nabuxmügu ñoma muxtucugü i baixãchiexü̃rüxü̃, natürü guxãtáma tümaarü pecadugagu tayueama.