Ichaía 57:16 - Tupanaarü Ore

¹⁶ Pa Chorü Duü̃xü̃güx, marü taxũtáma pexü̃ chixuecha rü taxũtáma guxü̃guma pemaxã chanu. Erü ngẽxguma chi chanuechagu rü guxü̃ma i ngẽma duü̃xü̃gü i changóexẽẽxü̃ rü chi choxü̃ narüxoe.

Ichaía 57:16 Referans Kwoze

Miquéa 7:18

Rü nataxuma i to ya Tupana i curüxü̃ ixĩxü̃, erü cuma rü nüxü̃́ nüxü̃ curüngü̃ma i ngẽma norü chixexü̃gü, rü tama nagu curüxĩnüecha i ngẽma chixexü̃gü i cupe̱xewa naxügüxü̃ i ngẽma noxre i curü duü̃xü̃ i íyaxügüxü̃. Cuma rü toxü̃ cunawe̱x i curü ngechaü̃, rü tama guxü̃guma tomaxã cunuecha.

Wiyaegü 85:5

¿Ẽ̱xna cuyadaxẽxẽ nax guxü̃gutáma tomaxã cunuechaxü̃? ¿Ẽ̱xna guxü̃gutáma totaagümaxã cunuechaxü̃?

Popera ga Yudíugü ga yaxõgüxü̃ca̱x ümatüxü̃ 12:9

Rü yexguma ibuegu, rü tanatügü tüxü̃ taxucu̱xẽgü, rü yixema rü tümaga taxĩnüe rü tüxü̃ tangechaü̃gü. Rü ñu̱xma rü yexeraãcü tanaxwa̱xe nax naga ixĩnüexü̃ ya Tanatü ya daxũgucü nax ngẽmaãcü nayaxuxü̃ca̱x i maxü̃ i taguma gúxü̃.

Yeremía 10:24

¡Rü toxü̃ íyarüwe̱xãchixẽxẽgü, natürü tama cunuãcüma nax tama tayuexü̃ca̱x!

Iraétanüxü̃arü muxchiga 16:22

Natürü nüma ga Moiché rü Aróü̃ rü Tupanape̱xegu ñaxtüanegu nanangücuchitanü rü ñanagürügü nüxü̃: —Pa Tupanax, cuma nax cunamaxẽxẽẽxü̃ i guxü̃ma i duü̃xü̃gü, rü tama name i wüxitama i duü̃xü̃arü chixexü̃gagu rü guxü̃ma i duü̃xü̃gümaxã cunu —ñanagürügü.

Yeremía 38:16

Natürü nüma ga ãẽ̱xgacü ga Chedequía rü bexma nüxicatama Yeremíamaxã inaxuneta rü ñanagürü: —Yimá tüxü̃ maxẽxẽẽcü ya Cori ya Tupanaégagu cumaxã nüxü̃ chixu rü taxũtáma texéxü̃ chamu nax cuxü̃ yamáxü̃ca̱x, rü taxũtáma ngẽma cuxü̃ ima̱xgüchaü̃xü̃me̱xẽgu cuxü̃ changuxẽxẽ —ñanagürü.

Ichaía 42:5

Rü Cori ya Tupana rü ñanagürü: —Choma nixĩ ya Tupana chixĩxü̃, rü choma nixĩ i chanaxüxü̃ i dauxü̃guxü̃ i naane rü ñoma i naane rü guxü̃ma i nawa rüxügüxü̃. Rü choma nixĩ i maxü̃ nüxna chaxãxü̃, rü chayangü̃atanücüüxẽẽxü̃ i guxü̃ma i duü̃xü̃gü i ñoma i naanewa maxẽxü̃.

Naanearü ügüchiga 6:3

Natürü nüma ga Cori ya Tupana rü ñanagürü: —Taxũtáma guxü̃gu chanamaxẽxẽ ya yatü, erü nüma ya yatü rü namachimare nixĩ. Rü ngẽmaca̱x 120 ya taunecüxica tátama namaxẽ —ñanagürü.

Chacaría 12:1

Ñaa nixĩ i Cori ya Tupanaarü ore nachiga i Iraétanüxü̃. Rü nüma ya Cori ya Tupana nixĩ i nango̱xẽẽãxü̃ i daxũguxü̃ i naane rü naxüaxü̃ i ngẽma ñoma i naane nagu üxü̃ rü yatüna maxü̃ naxãxü̃, rü ñanagürü:

Ngu̱xẽẽtaeruü̃arü ore 12:7

Rü nawena nax cuyuxü̃ rü cuxune rü tá wenaxarü noxrirüxü̃ waixü̃mü nixĩ. Rü cuãxẽ rü tá Tupanaca̱x nataegu yerü nüma nixĩ ga cuxna naxããxü̃.

Echequié 18:4

Rü guxü̃ma i duü̃xü̃güarü maxü̃ rü cho̱xme̱xwa nangẽxma woo papagü rü woo nanegü. Rü yíxema chixexü̃ ǘxe rü tümaarü chixexü̃gagu tátama tayu.

Amúx 1:11

Rü Cori ya Tupana rü ñanagürü ta: —Yema Edóü̃cüã̱xgü rü poraãcü chixexü̃ naxügü rü ngẽmaca̱x taxũtáma íchayachaxãchi nax chanapoxcuexü̃. Yerü yema natanüxü̃ ga Iraétanüxü̃we nangegü taramaxã rü tama nüxü̃́ nangechaxü̃tümüxü̃güãcüma nanadaiama. Yerü poraãcü namaxã nanue rü tama namaxã narüngüxmügü.

2 Chamué 24:16

Rü yexguma yema Tupanaarü orearü ngeruxü̃ ga daxũcüã̱x inaxügüchaü̃gu ga nax nadaiaxü̃ ga yema Yerucharéü̃cüã̱xgü ga duü̃xü̃gü, rü Cori ya Tupanaaxü̃́ nangu̱x ga yema chixexü̃. Rü nüxna nachogü ga yema norü orearü ngeruxü̃ ga daxũcüã̱x ga duü̃xü̃güxü̃ daixü̃, rü ñanagürü nüxü̃: —¡Marü ngẽxmatama yacua̱xẽxẽ, rü taxṹ i cuyadaxẽxẽxü̃! —ñanagürü. Rü yexguma ga yema Cori ya Tupanaarü orearü ngeruxü̃ ga daxũcüã̱x rü Aráuna ga Yebútanüxü̃ trigu íbuxuxü̃wa nayexma.

Yox 12:10

Rü naxme̱xwa nixĩ i nangẽxmaxü̃ i guxü̃ma i ta̱xacü i maxẽxü̃arü maxü̃.

Ichaía 27:8

Rü aixcüma nixĩ nax Iraétanüxü̃xü̃ napoxcuxü̃ ga Tupana, rü wüxi ga norü cue ga ãũcümaxü̃maxã ínanawoxü̃ ga norü naanewa rü to ga nachixü̃anewa nanamugü. Rü yema norü cue, rü ñoma buanecü ya éstewaama ne ũcürüxü̃ nixĩ nax naporaxü̃.

Ichaía 30:18

Natürü nüma ya Cori ya Tupana rü pexü̃ ínanangu̱xẽxẽ nax naxca̱x pewoeguxü̃ nax ngẽmaãcü nüxü̃́ pengechaü̃tümüxü̃güxü̃ca̱x. Rü nüma rü ínamemare nax pexü̃ nawéaxü̃ nax poraãcü pexü̃ nangechaü̃xü̃. Erü nüma ya Cori ya Tupana rü aixcüma mexü̃ namaxã naxuegu i ngẽma naga ĩnüexü̃. Rü tá taãẽgü ya guxãma ya yíxema nüxü̃́ yaxõgüxe.

Ichaía 64:8

Natürü ngẽmaétüwa, Pa Corix Pa Tupanax, rü cuma nixĩ i Tonatü quixĩxü̃. Toma rü waixü̃mü tixĩgü rü cuma nixĩ i torü üruxü̃ quixĩxü̃. Rü guxãma i toma rü cumatama toxü̃ cuxü.