Ichaía 53:3 - Tupanaarü Ore

³ Rü duü̃xü̃gü rü tama nüxü̃ nacua̱xgüchaü̃, rü nüxü̃ naxoe. Rü nüma rü wüxi ga duü̃ ga poraãcü ngúxü̃ ingecü nixĩ, rü namaxã nixü nax ngúxü̃ yangexü̃. Rü yixema rü tama nüxü̃ tadaugüchaü̃ rü ñoma wüxi i duü̃xü̃ i taxuwama mexü̃rüxü̃ tayaxĩxẽxẽ. Rü yemaacü nüxü̃ taxoe rü tama tanayauxgüchaü̃.

Ichaía 53:3 Referans Kwoze

Ore i mexü̃ ga Matéu ümatüxü̃ 26:67

Rü yexguma rü Ngechuchuchiwewa nacua̱i̱xgüe. Rü nüxna nanacua̱i̱xcagü. Rü togü rü nanapegüchiwegü.

Ichaía 53:10

Rü woetama Cori ya Tupanaarü ĩnü nixĩ nax ngúxü̃ yangexü̃. Rü nüma rü nügü inaxã naxca̱x ga tórü chixexü̃gü. Rü ngẽmaca̱x tá nama̱x i norü maxü̃ rü tá namuxũchi i ngẽma nüxü̃́ yaxõgüxü̃. Rü nagagu tá nixĩ i mea ínanguxuchixü̃ i ngẽma Tupana nagu rüxĩnüxü̃.

Ichaía 49:7

Rü nüma ya Iraétanüxü̃arü Tupana ya Üünecü ya nüxü̃ rüngü̃xẽẽcü rü ñanagürü ta: —Pa Iraétanüxü̃x, ñu̱xma rü ngẽma togü i nachixü̃anecüã̱xgü rü poraãcü pexü̃ nacugüe, rü pexchi naxaie rü nügüme̱xẽwa penangexmagüxẽxẽ rü norü ãẽ̱xgacügüarü puracütanüxü̃ pixĩgü. Natürü wüxi i ngunexü̃ rü wenatáxarü peporae rü ngẽxguma pexü̃ nadaugügu i ngẽma togü i nachixü̃anegüarü ãẽ̱xgacügü rü pepe̱xegu tá nacaxã́pü̱xügü erü choma ya perü Tupana ya üünecü nax chixĩxü̃ rü pexü̃ chaxuneta nax chorü duü̃xü̃gü pixĩgüxü̃ca̱x. Rü choma rü guxü̃guma chayanguxẽxẽ i ngẽma nüxü̃ chixuxü̃ —ñanagürü.

Ore i mexü̃ ga Márcu ümatüxü̃ 14:34

Rü yexguma rü ñanagürü nüxü̃: —Poraãcü changechaü̃ rü chanaxĩ̱xãchiãxẽ, rü nagu charüxĩnü nax ngẽmamaxã tá chayuxü̃. ¡Rü nuxã perücho i pemax, rü ipedaue! —ñanagürü.

Ichaía 53:4

Natürü nüma rü nayange ga tórü da̱xaweanegü rü tórü guxchaxü̃gü rü yemagagu nixĩ ga ngúxü̃ yangexü̃. Rü yixema nagu rüxĩnüegu rü noxrütama chixexü̃gagu nixĩ ga Tupana ngúxü̃ nüxü̃ ingexẽẽxü̃ rü napoxcuãxü̃ rü ãne nüxü̃ yangexẽẽxü̃.

Popera ga Yudíugü ga yaxõgüxü̃ca̱x ümatüxü̃ 5:7

Rü yexguma Cristu ñoma ga naanewa maxü̃gu, rü poraãcü nayumüxẽ rü tagaãcü rü naxauxãcü Tupanana naca nax nüxü̃ nangü̃xẽẽxü̃ca̱x nax naga naxĩnüxü̃ca̱x, yerü Tupana rü naporachire̱x nax nawa ínanguxuchixẽẽãxü̃ca̱x ga yema yu. Rü Tupana rü Cristuxü̃ naxĩnü yerü Tupanaga naxĩnü.

Ichaía 50:6

Rü chauca̱xwe̱x nüxna chaxã nax choxü̃ nacua̱i̱xgüxü̃ca̱x. Rü yexguma choxü̃ natuxchinagugügu rü tama nüxna chayanuxü̃. Rü tama chidaugachi ga yexguma chauchametüwa nacua̱i̱xgügu rü chixexü̃ chomaxã yaxugügügu.

Popera ga Yudíugü ga yaxõgüxü̃ca̱x ümatüxü̃ 4:15

Rü nüma ya Ngechuchu ya torü poxü̃ruxü̃ ya chacherdótearü ãẽ̱xgacü ixĩcü rü nüxü̃ nacua̱x nax tüxü̃ ínapoxü̃xü̃ i ngẽxguma Chataná tüxna ĩnügu, yerü nüma ga Chataná rü nüxna rü ta naxĩnü ngẽma tüxna nax naxĩnüxü̃rüxü̃. Natürü nüma ga Ngechuchu rü taguma pecadu naxü.

Ore i mexü̃ ga Luca ümatüxü̃ 9:22

Rü ñanagürü nüxü̃ ga norü ngúexü̃gü: —Tupana Nane ya duü̃xü̃xü̃ ixĩcü rü poraãcü ngúxü̃ tá ninge. Rü tá nüxü̃ naxõõ̱xgü i Yudíugüarü ãẽ̱xgacügü, rü chacherdótegüarü ãẽ̱xgacügü, rü ngẽma ngúexẽẽruü̃gü i Moichéarü mugüwa ngu̱xẽẽtaegüxü̃. Rü tá nayama̱xgü, natürü tomaepü̱x i ngunexü̃gu rü wena táxarü namaxü̃ —ñanagürü.

Ore i mexü̃ ga Luca ümatüxü̃ 16:14

Natürü ga yema Parichéugü rü poraãcü norü diẽruguama narüxĩnüe. Rü yemaca̱x Ngechuchuxü̃ nacugüe ga yexguma nüxü̃ naxĩnüegu ga guxü̃ma ga yema ore.

Ore i mexü̃ ga Luca ümatüxü̃ 8:53

Natürü ga yema duü̃xü̃gü rü Ngechuchuxü̃ nacugüeama, yerü ngĩxü̃ nadaugü nax aixcüma marü nayuxü̃.

Ore i mexü̃ ga Márcu ümatüxü̃ 15:19

Rü wüxi ga naixmena̱xãmaxã naeruwa nanacua̱i̱xcagü, rü nüxna nacua̱i̱xgüe. Rü nape̱xegu nacaxã́pü̱xügü rü nüxü̃ nicua̱xüü̃güneta.

Ore i mexü̃ ga Márcu ümatüxü̃ 9:12

Rü Ngechuchu nanangãxü̃, rü ñanagürü nüxü̃: —Aixcüma nixĩ i Ería tá nüxíra núma naxũxü̃ nax chauxü̃pa namexẽxẽãxü̃ca̱x i guxü̃ma. ¿Natürü tü̱xcüü̃ i ore i ümatüxü̃wa i ñaxü̃: “Tupana Nane ya duü̃xü̃xü̃ ixĩcü rü tá ngúxü̃ ninge, rü duü̃xü̃gü rü tá nüxü̃ naxoe”, ñaxü̃?

Ore i mexü̃ ga Cuáü̃ ümatüxü̃ 11:35

Rü naxaxu ga Ngechuchu.

Ore i mexü̃ ga Cuáü̃ ümatüxü̃ 8:48

Rü yexguma ga yema Yudíugü rü ñanagürügü nüxü̃: —Aixcüma nixĩ ga yema torü ore ga yexguma ñatagügügu: “Cuma rü wüxi i Chamáriaanecüã̱x quixĩ, rü ngo̱xo cuwa nangẽxma”, ñatagügügu —ñanagürügü.

Ore i mexü̃ ga Matéu ümatüxü̃ 27:63

Rü ñanagürügü nüxü̃: —Pa Corix, nüxna tacua̱xãchie ga yema yatü ga Ngechuchu ga idorata̱xáxü̃ rü yexguma namaxü̃gu rü ñanagürü tomaxã: “Ngẽxguma chayu̱xgu rü tomaepü̱x i ngunexü̃guwena rü wena táxarü ícharüda”, ñanagürü tomaxã.

Miquéa 5:1

¡Rü ñu̱xma, Pa Yerucharéü̃x, ínamexẽxẽ i curü poxü̃ruxü̃! Erü marü cuxü̃ ínachomaeguãchi i curü uanügü. Rü poraãcü tá ngúxü̃ nüxü̃ ningexẽẽgü ya yimá Iraétanüxü̃arü ãẽ̱xgacü.

Chacaría 11:8

Rü wüxi ga tauemacügutama rü íchanawoxü̃ ga tomaepü̱x ga norü dauruü̃gü, yerü tama yáxna namaxã chaxĩnü, rü chauxchi naxaie.

Wenaxarü naxümatü ga Tupanaarü mugü 32:15

Natürü pema ga Iraétanüxü̃ ga guxü̃ma ga yema õnamaxã pingüe rü nüxna pixĩgachi ga Cori ya Tupana ya pexü̃ ngo̱xẽẽcü. Rü nüxü̃ pexo ya yimá perü dauruxü̃ rü perü poxü̃ruxü̃ ixĩcü.

Ore i mexü̃ ga Luca ümatüxü̃ 19:41

Rü yexguma Yerucharéü̃arü ngaicamana nanguxgu ga Ngechuchu, rü gumá ĩaneca̱x naxaxu.

Wiyaegü 69:29

Natürü i choma nax chida̱xawexü̃ rü chanaxĩ̱xãchiãẽxü̃ ¡rü choxü̃ írüdaxẽxẽ rü choxü̃ ínapoxü̃, Pa Chorü Tupanax!

Ore i mexü̃ ga Márcu ümatüxü̃ 10:33

Rü ñanagürü nüxü̃: —Pema nüxü̃ pecua̱x nax marü ingaicaxü̃ nax Yerucharéü̃wa ingugüxü̃. Rü ngéma rü Tupana Nane ya duü̃xü̃xü̃ ixĩcü rü tá chacherdótegüarü ãẽ̱xgacügüna rü mugüwa ngúexẽẽtaegüxü̃na nanamugü. Rü nümagü rü tá yu namaxã naxuegugü, rü ñu̱xũchi tá ngẽma Rómacüã̱xgüna nanamugü.

Ore i mexü̃ ga Márcu ümatüxü̃ 10:34

Rü ngẽmagü tá nagu nidauxcüraxü̃gü. Rü tá nüxna nacua̱i̱xgüe, rü tá nanacua̱i̱xgü, rü tá nayama̱xgü. Natürü tomaepü̱x i ngunexü̃guwena rü tá wena namaxü̃ —ñanagürü.

Ichaía 52:14

Natürü muxü̃ma i duü̃xü̃gü rü tá namaxã naba̱i̱xãchie i ngẽxguma nüxü̃ nadaugügu i nachiwe i poraãcü napíxü̃ rü ãũxü̃ rü ngẽmagagu marü tama nanaduü̃xẽchametüraxü̃.

Wiyaegü 88:4

Rü duü̃xü̃güca̱x rü marü yuexü̃tanüwa changexma erü marü nataxuma i chorü pora.