Ichaía 51:4 - Tupanaarü Ore

⁴ Rü ñanagürü ta ga Tupana: —Pa Chorü Duü̃xü̃güx ¡choxü̃́ iperüxĩnüe! ¡Rü chauga pexĩnüe, Pa Iraétanüxü̃x! Rü choma rü tá chanango̱xẽxẽ i ngẽma chorü ore. Rü chorü mugü rü guxü̃ i nachixü̃anegüarü nangóonexẽẽruxü̃ tá nixĩ.

Ichaía 51:4 Referans Kwoze

Nüxíraxü̃xü̃ ga popera ga Pedru ümatüxü̃ 2:9

Natürü pema nixĩ i duü̃xü̃gü i tórü ãẽ̱xgacü ya Tupana pexü̃ dexü̃ nax norü puracü pexügüxü̃ca̱x. Rü pema nixĩ i duü̃xü̃gü i nape̱xewa ixüünexü̃, erü nümatama ya Tupana rü norü duü̃xü̃güxü̃ pexü̃ nixĩgüxẽxẽ nax nüxü̃ pixuxü̃ca̱x i ngẽma mexü̃gü i norü poramaxã naxüxü̃. Rü nümatama ya Tupana nixĩ ga ẽanexü̃wa pexü̃ ínanguxü̃xẽẽxü̃ nax norü ngóonexü̃ i mexẽchixü̃gu pechocuxü̃ca̱x.

1 Corintios 9:21

Rü yexguma natanüwa chayexmagu ga yema duü̃xü̃gü ga tama Yudíugü ixĩgüxü̃, rü yema duü̃xü̃gümaxã chaugü chawüxiguxẽxẽ nax yemaacü nüxü̃ charüngü̃xẽẽxü̃ca̱x nax Cristuaxü̃́ yaxõgüãxü̃ca̱x. Natürü taguma íchanange̱x i Tupanaarü mugü. Rü guxü̃guma Cristuarü mugütüü̃wa changexma.

Ichaía 2:3

Rü muxü̃tama i duü̃xü̃gü tá ínangugü rü ñanagürügü tá: —¡Ngĩxã, rü yima ma̱xpǘne i Cori ya Tupana íngexmaxü̃gu taxĩgü rü yima Acóbuarü Tupanapata ya taxü̃nena tangaicamagü nax nüma ngéma tüxü̃ nangúexẽẽxü̃ca̱x i norü ngúchaü̃ rü ngẽmaãcü nüma nanaxwa̱xexü̃ãcüma imaxẽxü̃ca̱x! —ñanagürügü tá. Erü yima ma̱xpǘne ya Chióü̃wa tá nango̱x i Cori ya Tupanaarü ngu̱xẽẽtae rü Yerucharéü̃wa tá ínaxũxũ i norü ore.

Ichaía 49:6

Rü nüma ya Tupana rü ñanagürü: —Choma rü cuxü̃ chamu nax cunanutaque̱xexü̃ca̱x i Acóbuarü duü̃xü̃gü rü nachixü̃aneca̱x cunawoeguxẽẽxü̃ca̱x i ngẽma Iraétanüxü̃. Rü naétü cuxü̃ chamu nax wüxi i omü quixĩxü̃ca̱x naxca̱x i guxü̃ma i nachixü̃anegü. Rü cuxü̃ chamu nax nüxü̃ nüxü̃ cucua̱xẽẽxü̃ca̱x i chorü ore i maxü̃ nüxna ãxü̃ i guxü̃ma i nachixü̃anecüã̱x woo ngẽma yáxü̃wa ngẽxmagüxü̃ —ñanagürü.

Ichaía 42:6

Rü choma ya Tupana nixĩ i cuxca̱x chacaxü̃ rü pora cuxna chaxãxü̃ nax duü̃xü̃gümaxã nüxü̃ cuyarüxuxü̃ca̱x nax mea nügümaxã inacuáexü̃ca̱x. Rü choma rü tá cuxme̱xgu chingĩ rü tá cuxna chadau. Rü cuxü̃ chamu nax chope̱xewa duü̃xü̃güétüwa cuchogüxü̃ca̱x rü ngẽmaãcü wüxi i omü nax quixĩxü̃ca̱x nape̱xewa i guxü̃ma i nachixü̃anegü.

Miquéa 4:2

Rü muxũchixü̃tama i duü̃xü̃gü tá ngéma nangugü rü ñanagürügü tá: —¡Nua pexĩ rü ngĩxã daa ma̱xpǘnewa dauxü̃ taxĩgü nax nawa ingugüxü̃ca̱x ya yima Acóbutanüxü̃arü Tupanapata ya taxü̃ne nax nüma tüxü̃ nangúexẽẽxü̃ca̱x i ngẽma mexü̃ i nacüma nax ngẽmagu ixĩxü̃ca̱x! —ñanagürügü tá. Erü daa ma̱xpǘne ya Chióü̃wa tá nixĩ ya Cori ya Tupana i tüxü̃ nangúexẽxẽxü̃. Rü Yerucharéü̃wa tá nixĩ i ne naxũxü̃ i norü ore.

Wiyaegü 78:1

Pa Chorü Duü̃xü̃güx ¡naga pexĩnüe i ñaa ore i pexü̃ changúexẽxẽxü̃! ¡Rü iperüxĩnüe i ñaa pemaxã nüxü̃ chixuxü̃!

Ore i mexü̃ ga Luca ümatüxü̃ 2:32

Rü nüma tá nixĩ i norü ngóonexẽẽruxü̃ i ngẽma duü̃xü̃gü i tama Iraétanüxü̃ ixĩgüxü̃. Rü daa bucü rü curü duü̃xü̃gü i Iraétanüxü̃arü poraxẽẽruxü̃ tá nixĩ”, ñanagürü.

Ichaía 26:2

¡Rü peyawãxna̱x i ngẽma norü ĩã̱xgü ya daa ĩane nax nachocuxü̃ca̱x i ngẽma duü̃xü̃gü i Tupanape̱xewa mexü̃ rü aixcüma naga ĩnüexü̃!

Ucu̱xẽgüchiga 6:23

Ngẽma mugü rü ngu̱xẽẽtaegü rü ñoma wüxi i omü i naixü̃rüxü̃ tá cuxca̱x nanangóonexẽxẽ. Rü ngẽma ucu̱xẽgü rü tá cuxü̃ inayarüwe̱xãchixẽxẽ nax nawe̱xguxü̃ca̱x i curü maxü̃.

Wiyaegü 147:20

Natürü yema togütücumü ga duü̃xü̃gü rü taguma nüxü̃ nüxü̃ nacua̱xẽxẽ ga yema norü ore rü norü mugü. ¡Rü ngĩxã nüxü̃ ticua̱xüü̃gü ya Cori ya Tupana!

Wiyaegü 50:7

Rü nüma ya Tupana rü ñanagürü: —Pa Chorü Duü̃xü̃gü i Iraétanüxü̃x ¡rü iperüxĩnüe! Rü ñu̱xma rü tá pemaxã chanangõ̱xẽxẽ i ngẽma perü chixexü̃. Rü chaxicatama nixĩ ya Tupana chixĩxü̃. Rü chomatama nixĩ i perü Tupana chixĩxü̃.

Wiyaegü 33:12

Rü nataãẽgü i ngẽma duü̃xü̃gü i Cori ya Tupanamaxã Tupanaã̱xgüxü̃ rü ngẽma duü̃xü̃gü ya Cori ya Tupana nügüxü̃́ dexü̃.

Ínachoxü̃xü̃chiga 33:13

Rü ngẽxguma chi aixcüma yixĩxgux i ngẽma ¡rü choxü̃ nüxü̃ nacua̱xẽxẽ i ngẽma nagu curüxĩnüxü̃, nax ngẽmaãcü cuxü̃́ chayaxõxü̃ca̱x, rü ngẽmaãcü taguma iyanaxoxü̃ca̱x nax chomaxã cutaãẽxü̃! ¡Rü nagu rüxĩnü rü cuxrü nax yixĩxü̃ i ñaa duü̃xü̃gü! —ñanagürü.

Ínachoxü̃xü̃chiga 19:6

Rü pema tá nixĩ i wüxi i duü̃xü̃gü i üünegüxü̃ i chomatama pexü̃ chadexü̃ nax choxrüxüchi pixĩgüxü̃ca̱x”. Rü guxü̃ma i ngẽma cumaxã nüxü̃ chixuxü̃ rü ¡namaxã nüxü̃ ixu i ngẽma Iraétanüxü̃! —ñanagürü.

Wenaxarü naxümatü ga Tupanaarü mugü 18:18

Rü choma rü tá ngẽma Iraétanüxü̃tanüwa chanango̱xẽxẽ ya wüxi ya curüxü̃ orearü uruxü̃. Rü nüma rü wüxi ya natanüxü̃ ixĩxcü tá nixĩ. Rü nüma rü tá mea duü̃xü̃gümaxã nüxü̃ nixu i ngẽma choma namaxã nüxü̃ chixuxü̃, rü tá namaxã nüxü̃ nixu i ngẽma choma chanamuxü̃.

Ichaía 1:27

Rü ngẽma Chióü̃cüã̱x i duü̃xü̃gü i wenaxarü chauga ĩnüexü̃ rü choma rü tá chorü poramaxã norü uanügüme̱xẽwa íchananguxü̃xẽxẽ.

Ichaía 26:8

Pa Corix, ngẽxguma naga taxĩnüegu i curü mugü rü taxuca̱xma taxoegaãẽgü. Rü ngẽma guxü̃arü yexera nagu tarüxĩnüexü̃ nixĩ nax cuga taxĩnüexü̃ rü cuxü̃ ticua̱xüü̃güxü̃.

Ichaía 33:22

Erü nüma ya Cori ya Tupana rü tórü guxchaxü̃güarü mexẽẽruxü̃ nixĩ. Rü nüma nixĩ i tamaxã inacuáxü̃. Rü nüma nixĩ i tórü ãẽ̱xgacü yixĩxü̃. Rü nüma nixĩ i tórü poxü̃ruxü̃ yixĩxü̃.

Ichaía 42:21

Rü nüma ya Tupana rü wüxi ya Tupana ya ípoxü̃wa̱xecü nixĩ, rü ngẽmaca̱x nanatachigaxẽẽchaü̃ i norü ngu̱xẽẽtaegü i mexẽchixü̃.

Ichaía 55:3

¡Rü cha̱u̱xca̱x pexĩ, rü choxü̃́ iperüxĩnüe! ¡Chauga pexĩnüe rü tá pemaxẽ! Rü choma rü tá pemaxã chanaxü i wüxi i uneta i taguma gúxü̃. Rü ngẽmaãcü tá chayanguxẽxẽ ga yema chorü uneta ga ãẽ̱xgacü ga nüxü̃ changechaü̃xü̃chicü ga Dabímaxã nüxü̃ chixuxü̃.

Ichaía 63:8

Rü Tupana rü ñanagürü: —Nümagü rü chorü duü̃xü̃gü nixĩgü, rü chaunegü i aixcüma chauga ĩnüexü̃ nixĩgü —ñanagürü. Rü ngẽmaca̱x norü uanügüme̱xẽwa ínananguxü̃xẽxẽ.