Ichaía 5:26 - Tupanaarü Ore

²⁶ Rü Cori ya Tupana rü wüxi ya wonera nanawaĩ̱xnagü rü norü cuemaxã naxca̱x naca i wüxi i nachixü̃ane i yáxü̃guxü̃. Rü norü churaragü i ngẽma nachixü̃ane i yáxü̃wama ngẽxmaxü̃ rü paxa tá nua nangugü.

Ichaía 5:26 Referans Kwoze

Chacaría 10:8

Rü choma rü tá naxca̱x changema rü wüxiwa tá chanagagü, yerü choma nixĩ ga íchananguxü̃xẽẽxü̃. Rü nümagü rü wena tá nimu noxrirüxü̃.

Ichaía 7:18

Rü ngẽma ngunexü̃gu rü nüma ya Tupana rü tá ñoma murenügü i muxũchixü̃rüxü̃ tá cuxca̱x ínanangugüxẽxẽ i ngẽma churaragü i Equítuanearü natügü i yáxü̃guxü̃wa ne ĩxü̃. Rü ngẽxgumarüxü̃ tá ta cuxca̱x ínanangugüxẽxẽ i ngẽma Achíriaanecüã̱x i churaragü i ñoma beruretanü i muxũchixü̃rüxü̃ ixĩxü̃.

Ichaía 18:3

Rü guxãma i pemax, Pa Ñoma i Naanecüã̱xgü Ixĩgüxe, rü ma̱xpǘnechitaeruwa tá nüxü̃ pedau ya yima wonera ya ngéma wã̱ĩ̱xnagücü, rü tá nüxü̃ pexĩnüe i ngẽxguma naxãgagu ya yima cornéta.

Wenaxarü naxümatü ga Tupanaarü mugü 28:49

Rü Cori ya Tupana rü wüxi i nachixü̃ane i yáxü̃wama ngẽxmaxü̃ i tama nagaxü̃ cucuáxü̃ tá cuxca̱x ínayachoõchixẽxẽ, ñoma wüxi i ĩyü i goexü̃ i poraxüchixü̃rüxü̃.

Ichaía 11:12

Rü nüma ya Cori rü guxü̃ i nachixü̃anegüxü̃ tá nüxü̃ nadauxẽxẽ i wüxi i cua̱xruxü̃. Rü tá nanangutaque̱xexẽxẽ i ngẽma Iraétanüxü̃ i woonexü̃. Rü naanearü guxü̃wama tá ne nanagagü nax nanutaque̱xeãxü̃ i ngẽma duü̃xü̃gu i Yudáanecüã̱x ga woonemarexü̃.

Maraquía 1:11

Rü guxü̃ma i nachixü̃anegü i ñoma i naanecüã̱x rü duü̃xü̃gü choxü̃ nicua̱xüü̃gü, rü pumarate̱xe cha̱u̱xca̱x nigugü rü ãmare choxna naxãgü.

Abacú 1:8

Rü norü cowarugü rü aixü̃ narüporamaegü, rü naixnecücüã̱x i airugüarü yexera nidürae. Rü norü churaragü i cowarugu ĩxü̃ rü muxü̃ inaxĩ. Rü nümagü rü ñoma ĩyü i naeü̃ca̱x yáxü̃wa ne ñaxü̃rüxü̃ nixĩgü.

Joel 2:7

Rü ngẽma munügü rü ñoma churaragü i tama muü̃wa̱xegüxü̃ i daiwa ĩxü̃rüxü̃ ínaxüãchi. Rü ĩanearü poxeguxü̃wa naxĩgü rü we̱xgu naxĩmare. Rü tama ngextáama naxĩmare.

Auxexü̃chiga 4:19

Rü torü uanügü i towe ingẽxü̃tanüxü̃ rü ĩyürüxü̃ niporaxüchi. Rü máxpü̱xanexü̃wa towe ningẽxü̃tanü rü chianexü̃wa yütagü toxca̱x ninuagü.

Yeremía 51:27

¡Daiarü cua̱xruxü̃ ya wonera penawe̱x rü nachixü̃anegüwa peyacue i cornétagü nax Babiróniaanearü ĩaneca̱x ípeyaxüãchixü̃ca̱x i pema i togü i nachixü̃anegüarü ãẽ̱xgacügü i Araráanearü ãẽ̱xgacü, rü Miníanearü ãẽ̱xgacü, rü Aquenáanearü ãẽ̱xgacü! ¡Rü nüxü̃ pexuneta i wüxi i churaragüeru nax namaxã inacuáxü̃ca̱x i ngẽma churaragü i daiwa ĩxü̃! ¡Rü inaxĩãchi i ngẽma churaragü i cowaruétügu ĩxü̃ i ñoma munügü i guxü̃ i chixexẽẽxü̃rüxü̃ ixĩgüxü̃!

Yeremía 5:15

Rü nüma ya Cori ya Tupana rü nüxü̃ nixu rü ñanagürü: —Pa Iraétanüxü̃x, petanüwa tá chanamugü i duü̃xü̃gü i yáxü̃wa ne ĩxü̃. Rü nümagü rü duü̃xü̃gü i poraexü̃ i nũxcüma yexmagüxü̃ nixĩgü. Pemax rü tama nüxü̃ pecua̱x i ngẽma naga i nawa yadexagüxü̃, rü bai i nüxü̃ pexĩnüexü̃ i ngẽma nüxü̃ yaxugüxü̃.

Yeremía 4:13

Dücax, ngẽma tórü uanügü rü ñoma caixanexü̃rüxü̃ ningaicamaetanü, rü ngẽma norü carugü i dairuxü̃ rü ñoma buanecü ya poracürüxü̃ nixĩgü. Rü ngẽma norü cowarugü rü ĩyüxü̃ narüporamaegü. Rü yíxema rü marü taxuacüma tibuxmü.

Ichaía 39:3

Rü yemawena ga nüma ga orearü uruxü̃ ga Ichaía rü ãẽ̱xgacü ga Echequíaxü̃tawa naxũ rü nüxna nayaca rü ñanagürü: —¿Ngextá ne naxĩ i ngẽma yatügü i cuxü̃tawa ngugüxü̃, rü ta̱xacüxü̃ yixĩxü̃ i cumaxã yaxugüxü̃? —ñanagürü. Rü nüma ga Echequía rü nanangãxü̃ rü ñanagürü: —Ngẽma duü̃xü̃gü rü yáxü̃guxü̃ i nachixü̃ane i Babiróniawa ne naxĩ —ñanagürü.

Ichaía 13:5

Rü ngẽma churaragü rü nachixü̃ane i yáxü̃wa ngẽxmaxü̃wa ne naxĩ i ñaa naanearü tuãchiarü yexerawa. Rü Cori ya Tupana rü norü churaragümaxã ngéma ne naxũ nax norü numaxã napoxcuãxü̃ca̱x i guxü̃ma i Babiróniaarü naane.

Ichaía 13:2

—¡Ma̱xpǘne ya máchaneétüwa penawe̱xnagü ya wonera ya daica̱x ícacü! ¡Rü penamuãchitanü i churaragü nax nügü nada̱i̱xü̃ca̱x! ¡Rü pewe̱xnagüchacüügü nax ngẽmaãcü Babiróniaarü ĩanegu pechocuxü̃ca̱x nawa i ngẽma ĩã̱xgü i ãẽ̱xgacügü nawa ichocuxü̃!

Wiyaegü 72:8

Rü nüma ya ãẽ̱xgacü rü name nixĩ i namaxã inacuáxü̃ i guxü̃ma i naanegü i márwa ixüxgüxü̃ rü ñu̱xmata to i márwa nangu. Rü ngẽma nixĩ i naanegü i taxtü i Eufrátewa ixügüxü̃ rü ñu̱xmata naane íyacuáxü̃wa nangu.

Wiyaegü 60:4

Rü ñu̱xma i toma nax cuga taxĩnüexü̃ ¡rü toxca̱x inaxü i wüxi i cua̱xruxü̃ nax ngẽmawa nüxü̃ tacuáxü̃ca̱x nax aixcüma tá toxü̃ ícupoxü̃xü̃ nüxna i torü uanügüarü naxnegü!

Ichaía 10:3

¿Rü ta̱xacü tá pexügüxü̃ i ngẽxguma Tupana pexna caxgux naxca̱x i guxü̃ma i ngẽma chixexü̃ i pexüxü̃ rü ngẽxguma nüxü̃ peda̱u̱xgu nax yáxü̃wa pexca̱x ne naxũxü̃ i poxcu? ¿Rü texéca̱x tá pibuxmüxü̃ nax ngü̃xẽẽca̱x ípecaxü̃ca̱x? ¿Rü ngextá tá peyacu̱xgü i perü ngẽmaxü̃gü i ngẽxguma ínangugügu i perü uanügü?

Ichaía 13:3

Rü choma ya Cori ya Tupana rü naxca̱x chaca i ngẽma nüxü̃ chaxunetaxü̃ i chorü churaragü i tama muü̃exü̃. Rü chanamu i ngẽma churaragü nax nadaiaxü̃ca̱x i ngẽma Babiróniacüã̱x rü ngẽmaãcü nataãẽgüxü̃ca̱x i ngẽxguma nüxü̃ chanaporamaexẽẽgügu —ñanagürü ga Tupana.

Ichaía 13:4

Rü mápü̱xanexü̃wa rü nüxü̃ taxĩnü i muxũchixü̃ i duü̃xü̃gü i ngéma aixta üexü̃. Rü nüxü̃ taxĩnü nax naxãũgaãchitanüxü̃ i nachixü̃anegü rü ĩanegü i wüxigu ngutaque̱xexü̃. Rü nüma ya Cori ya Tupana ya Guxãétüwa Ngẽxmacü rü nüxü̃ nidaugü i norü churaragü i daica̱x ímemaregüxü̃.

Ichaía 31:9

Rü ngẽma norü ãẽ̱xgacü rü muü̃maxã tá niña, rü ngẽma norü churaragüerugü rü norü wonerana tá ngéma nibuxmü. Rü ngẽma nixĩ i nüxü̃ yaxuxü̃ ya Cori ya Tupana nax Yerucharéü̃wa nüxü̃́ nangẽxmaxü̃ ya wüxi ya taxü̃ne ya üxü nax namaxã napoxcuãxü̃ca̱x i norü uanügü.

Echequié 38:17

Rü choma ya Cori ya Tupana rü nüxü̃ chixu rü ñacharügü: “Pa Góx, cuchiga nixĩ ga chidexaxü̃ ga yexguma ü̃pa chorü duü̃xü̃gü i Iraéanearü orearü uruü̃güwa chidexagu. Rü yexguma ga nümagü rü nanaxunagügü nax Iraéanewa tá cuxü̃ chaxũxẽxẽxü̃ nax naxca̱x ícuyagoõchixü̃ca̱x i ngẽma Iraétanüxü̃”, ñachagürü.