Ichaía 5:25 - Tupanaarü Ore

²⁵ Rü ngẽmaca̱x nixĩ ya Cori ya Tupana i norü duü̃xü̃gümaxã nanuxü̃ rü düxwa napoxcueãxü̃. Rü ma̱xpǘnegü rü nidu̱xrugü, rü duü̃xẽgü ya yuexe rü ñoma guxchirerüxü̃ ĩanearü namagu tawoone. Natürü ya Cori ya Tupana rü tama inarüngü̃xmü rü nayadaxẽẽãma nax duü̃xü̃güxü̃ naxãxũnexü̃.

Ichaía 5:25 Referans Kwoze

Ichaía 10:4

Rü ngẽxguma tama perü uanügüme̱xẽwa pegü pengexmaxẽẽgu nax to i nachixü̃anewa pexü̃ nagagüxü̃ca̱x, rü tá pexü̃ nadai. Rü woo ngẽmaãcü napoxcueãxü̃ ya Cori ya Tupana, natürü tama Iraétanüxü̃maxã inarüngü̃xmü, rü yexeraãcü nayaxãxũnechigüama.

Ichaía 9:21

Rü Efraíü̃tanüxü̃ rü Manachétanüxü̃maxã tá nügü nadai. Rü ngẽmawena rü ngẽma taxre rü wüxigu tá Yudáaneca̱x ínayaxüãchi. Rü guxü̃ma ga yema chixexü̃ ga naxügüxü̃gagu rü nüma ya Cori ya Tupana rü tama Iraéanecüã̱xgümaxã inarüngü̃xmü, rü yexeraãcü nayaxãxũnechigüama.

Ichaía 9:17

Rü nüma ya Cori ya Tupana rü ngẽmaca̱x tama namaxã nixauxãchi i ngextü̱xüxü̃gü, rü ñu̱xũchi tama nüxü̃́ tangechaü̃tümüxü̃ ya taxcutagü rü yutegüxe. Erü guxü̃ma i duü̃xü̃gü rü chixexü̃arü üruü̃gü nixĩgü rü naechitamare chixexü̃ i dexamaxã nidexagü. Rü guxü̃ma ga yema chixexü̃ ga naxügüxü̃gagu rü nüma ya Cori ya Tupana rü tama Iraéanecüã̱xgümaxã inarüngüxmü, rü yexeraãcü nayaxãxũnechigüama.

Norü taxre ga popera ga ãẽ̱xgacügüchiga 9:37

Rü ngẽma ngĩmachi rü Yereéanegu tá namaxã nawo̱xegü nax ngẽmaãcü taxúema nüxü̃ cuáxü̃ca̱x ya yima ngĩxchina̱xãgü —ñanagürü.

Danié 9:16

Pa Cori Pa Tupanax, nüxü̃ tacua̱x rü cuma rü cumecümaxü̃chi. Rü ngẽmaca̱x cuxna taca nax namaxã icurüngüxmüxü̃ca̱x ya yima ĩane ya Yerucharéü̃cüã̱xgü. Erü yima ĩane rü cuxrü nixĩ, rü ngéma nangẽxma ya curü ma̱xpǘne ya üünene. Rü ñu̱xma rü guxü̃ma i ngẽma togü i nachixü̃anecüã̱xgü i duü̃xü̃gü rü nüxü̃ nacugüe i ngẽma curü duü̃xü̃gü rü nüxü̃ nacugüe ya yima Yerucharéü̃ nagagu i ngẽma chixexü̃gü i toma taxügüxü̃ rü torü o̱xigü ügüxü̃.

Yeremía 4:24

Rü ma̱xpǘnegügu chadawenü, rü nüxü̃ chadau nax yaxĩ̱ã̱xtanücüüxü̃ rü guxü̃ma ga ngüchitaerugüxü̃ rü yaxĩ̱ã̱xtanücüüxü̃.

1 Tesalonicenses 2:16

Rü ngẽxguma ngẽma duü̃xü̃gü i tama Yudíugü ixĩgüxü̃maxã nüxü̃ tixuxchaü̃gu i Tupanaarü ore nax nümagü rü ta nüxü̃́ nangẽxmagüxü̃ca̱x i maxü̃, rü ngẽma Yudíugü rü toxna nanachu̱xu. Rü ngẽmaãcü i ngẽma Yudíugü rü poraãcüxüchima chixexü̃ naxügü. Rü ngẽmaca̱x i ñu̱xma rü düxwa marü nüxna nangu i ngẽma Tupanaarü poxcu i ãũcümaxü̃chixü̃.

Naúü̃ 1:5

Rü yima ma̱xpǘnegü rü na̱xcha̱xwa nidu̱xrugü rü nape̱xewa inagü. Rü guxü̃ma i ñoma i naane rü guxü̃ma i duü̃xü̃gü i nawa maxẽxü̃ rü nape̱xewa niyoyogü norü muü̃maxã.

Yeremía 16:4

Rü da̱xaweanegü i ãũcümaxü̃maxã tá nayue, rü taxúetama naxca̱x taxauxe, rü bai tá texé inata̱xgüxü̃. Rü ñoma naü̃rüxü̃ tá waixü̃müanewa nawogümare. Rü daigu tá nayue, rü ñu̱xũchi taiyamaxã tá nayue. Rü ngẽma naxü̃negü rü ngurucugü rü naeü̃gü i idüraexü̃ tá nanangõ̱xgü —ñanagürü.

Wiyaegü 18:7

Rü yexguma rü poraãcü naxĩã̱xãchiane. Rü guma ma̱xpǘnegü rü naxĩã̱xãchitanü. Rü Cori ya Tupanaarü numaxã nixĩãtanücüxü.

Norü taxre ga to ga popera ga ãẽ̱xgacügüchiga ümatüxü̃ 36:16

Natürü nümagü ga yema duü̃xü̃gü rü nüxü̃ nacugüeama ga yema Tupanaarü orearü uruü̃gü rü tama nüxü̃́ inarüxĩnüechaü̃ ga yema namaxã nüxü̃ yaxugüxü̃ rü nagu nidauxcüraxü̃gü. Rü yemaca̱x ga nüma ga Tupana rü düxwa namaxã nanu ga yema norü duü̃xü̃gü rü taxúema Tupanaxü̃ ítayachaxãchixẽxẽ.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:11

Rü ñu̱xũchi nüxü̃ chadau ga wüxi ga taxü̃ ga tochicaxü̃ ga cómüxü̃, rü nüxü̃ chadau ga gumá nawa rütocü. Rü gumácha̱xwa nibuxmü ga ñoma ga naane rü guxü̃ma ga daxũwa nüxü̃ idauxü̃, rü inayarütauxe.

Chofonía 1:17

Rü nüma ya Cori ya Tupana rü ñanagürü: —Rü tá chanaxĩ̱xãchiãẽtanüxẽxẽ i ngẽma duü̃xü̃gü. Rü ñoma ngẽma nangexetüxü̃rüxü̃ tá inaxĩ erü chope̱xewa chixexü̃ naxügü. Rü yimá nagü rü tá naba ñoma waixü̃müte̱xe igüxüxü̃rüxü̃. Rü ngẽma namachi i ngẽma yuexü̃ rü tá naü̃rüxü̃ ngẽxma nanuquegü —ñanagürü ya Cori ya Tupana.

Abacú 3:10

Rü ngẽxguma cuxü̃ nadaugügu ya ma̱xpǘnegü rü nidu̱xruxe. Rü dauxü̃guxü̃ i naanewa rü tacü ya pucü narüngu. Rü ngẽma már i mátamaxü̃ rü poraãcü naxãũgaãchi namaxã ya norü yuape ya tacü.

Miquéa 1:4

Rü yima nawa yangachigüne ya ma̱xpǘnegü rü tá nadexe ñoma wera i guxü̃rüxü̃, rü tá narüpüxtegü ñoma dexá i poraü̃chiüxü̃ ngategü üxü̃rüxü̃. Rü ngẽmaãcü tá nixĩ i ngẽxguma núma naxũxgu ya Tupana.

Ochéa 14:4

Rü ñanagürü ya Cori ya Tupana: —Ngẽma duü̃xü̃gü i tama chauga ĩnüexü̃ rü tá chaugümaxã ichanangüxmüexẽxẽ. Rü tá nüxü̃ changechaü̃ama woo tamachire̱x ngẽma nixĩ i norü natanü. Erü marü choxü̃ nangupetü nax namaxã chanuxü̃.

Auxexü̃chiga 5:22

Natürü i cuma rü marü toxü̃ cuxoxochi. Yerü yema nax tomaxã cunuxü̃ rü nangupetüxüchi.

Yeremía 15:3

Rü choma ya Cori ya Tupana rü nüxü̃ chixu rü ñachagürü: —Naxãgümücüraü̃xü̃ i poxcu tá pexca̱x íchanguxẽxẽ. Rü daigu tá pexü̃ nadai, rü airugü tá pexü̃ nitúgü, rü ngurucugü tá pexü̃ nangõ̱xgü, rü ñu̱xũchi naeü̃gü i idüraexü̃ tá pexü̃ nangõ̱xcu.

Yeremía 9:22

Rü tümaxü̃negü ya duü̃xẽgü rü ñoma naü̃rüxü̃ naanewa ninuamare ñoma trigu i ngẽma yachexexü̃we iyietanüxü̃ rü taxúema dexü̃rüxü̃ —ngẽmaãcü ngechaü̃ãcü naxauxe. Rü nümatama ya Cori ya Tupana nixĩ i nüxü̃ yaxuxü̃ i ngẽma ore.

Yeremía 8:2

Rü ñu̱xũchi nüma i uanügü rü yima naxchina̱xãgü ga yema duü̃xü̃gü rü ü̱a̱xcüemagu, rü tauemacüemagu, rü guxü̃ma i ẽxtagüemagu tá nayapagü, yerü yema duü̃xü̃gü rü üa̱xcüxü̃ rü tauemacüxü̃ rü ẽxtagüxü̃ nixĩ ga nangechaxü̃güxü̃, rü nüxü̃́ napuracüexü̃, rü nawe naxĩxü̃, rü namaxã yadexagüxü̃, rü ñu̱xũchi nüxü̃ yacua̱xüü̃güxü̃. Rü taxúetama tanade ya yima naxchina̱xãgü nax itanata̱xgüxü̃ca̱x. Rü ngẽmaãcü tá ñoma naü̃rüxü̃ waixü̃müxü̃ nixũ.

Yeremía 4:8

¡Rü ngẽmaca̱x techaraxü̃ i naxchirugu picu̱xgü, rü pexauxe, rü ngechaü̃maxã aita pexüe! Erü Cori ya Tupanaarü nu rü tama tüxna nixũgachi —ñanagürü.

Wiyaegü 114:7

Rü cumax, Pa Ñoma i Naanex ¡rü Acóbuarü Tupanape̱xewa curü muü̃maxã idu̱xrux!

Wiyaegü 106:40

Rü nüma ga Tupana rü poraãcü namaxã nanu ga yema norü duü̃xü̃gü. Rü yemaca̱x noxtacüma nüxü̃ naxo.

Wiyaegü 78:38

Natürü woo nax yemaacü nax yixĩgüxü̃, rü nüma ga Tupana rü nüxü̃́ nangechaxü̃tümüxü̃güama. Rü nüxü̃́ nüxü̃ inarüngüma ga norü chixexü̃gü rü tama guxü̃xü̃ nadai. Rü mue̱xpü̱xcüna ga yexguma namaxã nanuxgu rü yáxna namaxã naxĩnü rü tama naga naxĩnü ga norü nu.

Wiyaegü 77:18

Rü yema cuga ga duruanexü̃rüxü̃ ixĩxü̃ rü buanecü ga íxã̱ũ̱xemacüwa inanaxũ. Rü guma ãẽmacü rü ñoma ga naanexü̃ nangóonexẽxẽ. Rü naxĩã̱xãchi ga ñaa naane.

Wiyaegü 68:8

Rü yexguma Tupana guma ma̱xpǘne ga Chinaíwa nguxgu, rü naxĩã̱xãchiane ga naane. Rü yima caixanexü̃gü rü inanaba ga dexá. Rü guma ma̱xpǘne rü naxĩã̱xãchi nape̱xewa ya Iraétanüxü̃arü Tupana.

Norü taxre ga popera ga ãẽ̱xgacügüchiga 13:3

Rü yemaca̱x ga Cori ya Tupana rü Iraéanecüã̱xgümaxã nanu. Rü Chíriaanearü ãẽ̱xgacü ga Achaéxaxü̃́ rü nane ga Ben-adáxaxü̃́ nanatauxchaxẽxẽ nax mucü ga taunecü Iraéanecüã̱xgüxü̃ naporamaegüxü̃ca̱x. Rü yemaacü Chíriaanearü ãẽ̱xgacügüme̱xẽwa nayexmagü.

Nüxíraxü̃xü̃ ga popera ga ãẽ̱xgacügüchiga 21:24

Rü ngẽma cutanüxü̃ i ĩanegu yuexü̃, rü airugü tá nanangṍmachi. Rü ngẽma cutanüxü̃ i ĩanearü düxétügu yuexü̃, rü ẽxchagü tá nanangṍmachigü”, ñanagürü ga Tupana —ñanagürü ga Ería.

Nüxíraxü̃xü̃ ga popera ga ãẽ̱xgacügüchiga 16:4

Rü ngexü̃rüüxü̃mare i cutanüxü̃ i ĩanegu yuxü̃ rü airugü tá nanangõ̱xgü, rü ngẽma cutanüxü̃ i naanegu yuxü̃ rü ngurucugü tá nanangõ̱xgü —ñanagürü ga Cori ya Tupana.

Nüxíraxü̃xü̃ ga popera ga ãẽ̱xgacügüchiga 14:11

Rü ngẽma cutanüxü̃ i ĩanegu yuexü̃ rü airugü tá nanangõ̱xgü rü ngẽma cutanüxü̃ i naanegu yuexü̃ rü ngurucugü tá nanangõ̱xgü erü choma i Cori ya Tupana rü ngẽmaãcü namaxã chanaxuegu”, ñaxü̃ —ñanagürü ga Aía.

Wenaxarü naxümatü ga Tupanaarü mugü 31:17

Rü ngẽxguma i choma rü tá namaxã chanu, rü tá nüxna chixũgachi rü nüxica tá ngéma chanawogü. Rü marü taxũtáma marü nüxü̃ chacuáxchaü̃ i ngẽma Iraétanüxü̃. Rü guxchaxü̃gü rü ngúxü̃gü tá naxca̱x ínangugü. Rü ngẽmaca̱x i nümagü rü düxwa tá nügümaxã ñanagürügü: “¿Ẽ̱xna ñaa ngúxü̃ rü taxca̱x ínangu erü tórü Cori ya Tupana rü marü tama taxü̃tawa nangẽxma?” ñanagürügü.

Ínachoxü̃xü̃chiga 7:19

Rü yexguma ga Cori ya Tupana rü Moichéxü̃ ñanagürü: —¡Aróü̃maxã nüxü̃ ixu rü nayauxã ya norü naixmena̱xã rü namaxã naxunagü naétügu i natügü rü natüxacügü rü naxtaagü rü dexáchiü̃gü i Equítuanewa ngẽxmagüxü̃ rü guxü̃ma i ta̱xacü i dexá nawa ngẽxmaxü̃ nax nagüxü̃ yanguxuchigüxü̃ca̱x i guxü̃ma i ngẽma dexágü! Rü ngẽma dexápaü̃ i nainaxca̱x rü nutanaxca̱x i dexámaxã ixããcuxü̃ rü tá nagüxü̃ nayanguxuchi —ñanagürü ga Tupana.

Ichaía 10:6

Rü choma tá nixĩ i Achíriaanearü ãẽ̱xgacüxü̃ chamuxü̃ nax duü̃xü̃gü i chixexü̃gu maxẽxü̃ca̱x rü wüxi i nachixü̃ane i choxü̃ nuẽẽxü̃ca̱x íyagoõchixü̃ca̱x nax nüxü̃́ nangĩ́xü̃ca̱x rü nüxna napuxü̃ãxü̃ca̱x i norü ngẽmaxü̃gü rü nagu napugüexü̃ca̱x ñoma ĩanearü namagüwa ngẽxmaxü̃ i ãcharaxü̃gu napugüexü̃rüxü̃.

Ichaía 14:19

Natürü i cuma rü cuxmaxü̃arü yáxü̃wa tá cuxü̃ nayata̱xgümare ñoma wüxi i guxchire iyixanexü̃rüxü̃ rü ñoma wüxi i yuxü̃ i nawa nangagümarexü̃rüxü̃. Rü duü̃xü̃gü i nada̱i̱xü̃ rü ínadaü̃naagüxü̃tanüwa tá cungexma nax wüxigu namaxã ngẽma ãxmaxü̃ i nutamaxã ããcuxü̃gu cuxü̃ yata̱xcuchigüxü̃ca̱x.

Ichaía 23:11

Rü nüma ya Cori ya Tupana rü márwa inanawe̱x i norü pora, rü nachixü̃anegüxü̃ namuü̃xẽxẽ. Rü nanamu nax nagu napogüexü̃ca̱x ya Canaáü̃arü ĩanegü ya meama ípoxegugüne.

Ichaía 25:11

Rü Moáane rü ñoma wüxi i wẽxgütaexü̃rüxü̃ pora naxü nax yexera naporaxü̃ca̱x. Natürü nüma ya Cori ya Tupana rü tá nayanaxoxẽxẽ nax nügü yacua̱xüxü̃xü̃.

Ichaía 42:25

Rü yemaca̱x ga Tupana rü poraãcü yema Iraétanüxü̃maxã nanu. Rü nanayexrü nax norü uanügümaxã nügü nada̱i̱xü̃ca̱x. Rü norü uanügü nüxü̃ narüporamae rü ínanagu ga norü ĩanegü. Natürü woo yemaacü nüxü̃ nangupetü rü nüma ga Iraétanüxü̃ rü tama inaxĩnüechaü̃ —ñanagürü ga Ichaía.

Ichaía 51:20

Pa Yerucharéü̃cüã̱x, pema rü ñoma cowügü i yütagu yixü̃rüxü̃ peturae rü namagüarü poxõchigüwa pecaquegü. Rü Tupanaarü nu rü pexna nangu rü ngẽmaca̱x ngúxü̃ pingegü.

Ichaía 64:3

Rü yexguma guma ma̱xpǘnegügu ícurüxĩ̱xgu rü Moichépe̱xewa cunaxüxgux ga yema ãũcümaxü̃ ga tama duü̃xü̃gü nagu irüxĩnüexü̃, rü guma ma̱xpǘnegü rü cupe̱xewa nixĩãxtanücüxü.

Ichaía 66:15

Rü nüma ya Tupana rü tá üxüemagu ínangu rü yima norü carugü ya daiwexü̃ rü ñoma wüxi ya buanecü ya íxã̱ũ̱xemacürüxü̃ tá nixĩgü. Rü tá nanapoxcue i norü uanügü, rü ngẽma norü poxcu rü ñoma üxüema iya̱u̱xraxü̃rüxü̃ tá nixĩ.

Ichaía 66:24

Rü ñanagürü ta: —Ngẽxguma ínachoxü̃gu i ngẽma chorü duü̃xü̃gü rü tá nüxü̃ nadaugü nax nayuexü̃ i ngẽma duü̃xü̃gü i chomaxã rüxuanügüxü̃. Rü ngẽma õ̱xmigü i nangõ̱xgüxü̃ rü taguma nayue, rü yima üxüema ya ínaguxü̃ne rü taguma nixo. Rü guxü̃ma i duü̃xü̃gü i ngéma chopetüxü̃ rü tá poraãcü naxã̱ũ̱ã̱xgü i ngẽxguma nüxü̃ nadaugügu —ñanagürü ga Tupana.

Yeremía 17:4

Rü perü pecadugügagu tá nüxna ípechoxü̃ i ngẽma naane ga pexna chaxãxü̃ nax perü yixĩxü̃ca̱x. Rü ngẽma perü uanügüme̱xẽwa tá pexü̃ changexmagüxẽxẽ nawa i wüxi i naane i tama nüxü̃ pecuáxü̃. Erü ngẽma chorü nu rü ñoma wüxi ya üxüemarüxü̃ ninai i pexü̃ tá íguxü̃ —ñanagürü.

Echequié 6:14

Rü choma rü chorü numaxã tá chawexnagüchacüxü nax chanapoxcuexü̃ca̱x i ngẽma duü̃xü̃gü i íyaxügüxü̃. Rü ngẽma nachixü̃ane rü nachicagü i duü̃xü̃gü nawa ngẽxmagüxü̃ rü tá chianexü̃xü̃ chayanguxuchixẽxẽ. Rü chianexü̃ i súrwaama ngẽxmaxü̃wa tá ichanaxügü rü ñu̱xmata yima ĩane ya Ribá ya nórtewa ngẽxmanewa nangu. Rü ngẽxguma i ngẽma duü̃xü̃gü rü tá nüxü̃ nicua̱xãchitanü nax choma chixĩxü̃ ya Cori ya Tupana —ñanagürü.

Echequié 30:25

Rü ñu̱xma rü tá chanaporaexẽxẽ ya nachacüxü i Babiróniaanearü ãẽ̱xgacü rü tá chanaturaexẽxẽ ya nachacüxü i Faraóü̃. Rü ngẽxguma Babiróniaanearü ãẽ̱xgacüme̱xẽwa chanaxǘxgu i chorü tara rü nüma rü Equítuaneca̱x íyagoõchigu rü ngẽxguma tá nixĩ i nüxü̃ yacua̱xãchitanüxü̃ nax choma yixĩxü̃ i Iraétanüxü̃arü Cori ya Tupana.

Amúx 8:8

Rü ngẽmaca̱x i ñoma i naane rü tá nixĩã̱xcüxü rü norü duü̃xü̃gü rü tá naxauxe. Rü ñaa naane rü tá naxĩnagüxü̃ rü ínarüxĩĩxü̃ ñoma taxtü i Níruarü yuape ya tacürüxü̃

Wenaxarü naxümatü ga Tupanaarü mugü 31:18

Natürü ngẽxguma ngẽma ngunexü̃wa nanguxgu i choma rü tá yexeraãcü nüxna chixũgachi i ngẽma Iraétanüxü̃ nagagu i ngẽma chixexü̃ i naxügüxü̃ rü ñu̱xũchi nagagu nax ngẽma tupananetagüxü̃ nax yacua̱xüü̃güxü̃.

Yox 9:13

Rü ngẽxguma nanuxgu ya Cori ya Tupana rü tama nixĩ i tauxchaãcüma nangüxmüxü̃. Rü nape̱xegu nixĩ i nacaxã́pü̱xügüxü̃ i ngẽma ngo̱xo i Raá rü norü ngü̃xẽẽruü̃gü.

Ichaía 9:11

Natürü nümatama ya Cori ya Tupana rü tá ngéma nanamu i ãũcümaxü̃chixü̃ i uanügü nax Iraétanüxü̃ca̱x íyaxüãchixü̃.

Ichaía 9:16

Rü ngẽma norü ãẽ̱xgacügü rü chixexü̃gu nanayixẽxẽ ga Iraétanüxü̃. Rü ngẽma duü̃xü̃gü i nawe rüxĩxü̃ rü düxwa inayarütauxe.

Yeremía 6:12

Rü yima tümapatagü, rü tümaanegü, rü tümama̱xgü rü ngẽma uanügüarü tá nixĩgü. Erü tá chanapoxcu i ngẽma duü̃xü̃gü i ñaa nachixü̃anewa maxẽxü̃. Rü choma ya Cori ya Tupana nixĩ i cumaxã nüxü̃ chixuxü̃ i ngẽma —ñanagürü.

Echequié 15:6

Rü ngẽmaca̱x i choma i Cori ya Tupana rü ñachagürü: “Rü ngẽma úbane i üxüxétüwa ita̱xcuchixü̃ nax yaya̱u̱xraxü̃ca̱x, rü ngẽxgumarüxü̃ tá ta nixĩ i ngẽma Yerucharéü̃cüã̱xgü nax üxüwa chayawocuxü̃.