Ichaía 49:6 - Tupanaarü Ore

⁶ Rü nüma ya Tupana rü ñanagürü: —Choma rü cuxü̃ chamu nax cunanutaque̱xexü̃ca̱x i Acóbuarü duü̃xü̃gü rü nachixü̃aneca̱x cunawoeguxẽẽxü̃ca̱x i ngẽma Iraétanüxü̃. Rü naétü cuxü̃ chamu nax wüxi i omü quixĩxü̃ca̱x naxca̱x i guxü̃ma i nachixü̃anegü. Rü cuxü̃ chamu nax nüxü̃ nüxü̃ cucua̱xẽẽxü̃ca̱x i chorü ore i maxü̃ nüxna ãxü̃ i guxü̃ma i nachixü̃anecüã̱x woo ngẽma yáxü̃wa ngẽxmagüxü̃ —ñanagürü.

Ichaía 49:6 Referans Kwoze

Ngechuchuarü ngúexü̃gü ga yamugüxü̃arü puracüchiga 13:47

Yerü yemaacü toxü̃ namu ga Cori, rü ñanagürü: “Duü̃xü̃gü i tama Yudíugü ixĩgüxü̃arü nangóonexẽẽruxü̃ marü cuxü̃ chixĩxẽxẽ, nax guxü̃wama i ñoma i naanewa cunangexü̃ca̱x i chorü ore i maxẽxẽẽruxü̃”, —ñanagürü.

Ichaía 42:6

Rü choma ya Tupana nixĩ i cuxca̱x chacaxü̃ rü pora cuxna chaxãxü̃ nax duü̃xü̃gümaxã nüxü̃ cuyarüxuxü̃ca̱x nax mea nügümaxã inacuáexü̃ca̱x. Rü choma rü tá cuxme̱xgu chingĩ rü tá cuxna chadau. Rü cuxü̃ chamu nax chope̱xewa duü̃xü̃güétüwa cuchogüxü̃ca̱x rü ngẽmaãcü wüxi i omü nax quixĩxü̃ca̱x nape̱xewa i guxü̃ma i nachixü̃anegü.

Ore i mexü̃ ga Luca ümatüxü̃ 2:32

Rü nüma tá nixĩ i norü ngóonexẽẽruxü̃ i ngẽma duü̃xü̃gü i tama Iraétanüxü̃ ixĩgüxü̃. Rü daa bucü rü curü duü̃xü̃gü i Iraétanüxü̃arü poraxẽẽruxü̃ tá nixĩ”, ñanagürü.

Ichaía 52:10

Rü Tupana rü guxü̃ i nachixü̃anegüxü̃ nanawe̱x i norü pora. Rü guxü̃ i nachixü̃anegüwa tá nüxü̃ nacua̱xgü nax tórü Tupana tüxü̃ ínguxü̃xẽẽxü̃.

Ichaía 60:3

Rü guxü̃ma i nachixü̃anegü rü tá naxca̱x naxĩ i ngẽma ngóonexü̃ i pewa ngẽxmaxü̃. Rü ngẽma nachixü̃anegüarü ãẽ̱xgacügü rü pexü̃tawa tá naxĩ nax pexü̃ íyadaugüxü̃ca̱x nax wena nachixü̃ane i poraxü̃ pixĩgüxü̃.

Ngechuchuarü ngúexü̃gü ga yamugüxü̃arü puracüchiga 26:18

Rü cuxü̃ chamu nax ngẽma duü̃xü̃güxü̃ choxü̃ cucua̱xẽẽxü̃ca̱x rü nüxü̃ naxoexü̃ca̱x i nacüma i chixexü̃gü rü chauga naxĩnüexü̃ca̱x. Rü cuxü̃ chamu nax Chatanáme̱xẽwa ícunanguxü̃xẽẽxü̃ca̱x i ngẽma duü̃xü̃gü nax chowe naxĩxü̃ca̱x rü choxü̃́ yaxõgüãxü̃ca̱x nax choma nüxü̃́ nüxü̃ icharüngümaxü̃ca̱x i norü pecadugü, rü nüxü̃́ nangẽxmaxü̃ca̱x i nachica natanüwa i guxü̃ma i chorü duü̃xü̃gü i üünegüxü̃”, ñanagürü choxü̃ ga Cori.

Ichaía 11:10

Rü ngẽxguma yimá Dabítaxa ingucuchigu nax ãẽ̱xgacü yixĩxü̃ca̱x rü tá wüxi i cua̱xruxü̃ nixĩ naxca̱x i guxü̃ma i duü̃xü̃gü. Rü guxü̃ i nachixü̃anegücüã̱x rü tá naxca̱x nayadaugü rü naxca̱x nangutaque̱xegü. Rü ngẽma nachica i nawa nangẽxmaxü̃ rü tá naxüüne.

Norü taxre ga popera ga ãẽ̱xgacügüchiga 3:18

Rü ñaa nixĩ i wüxi i íxramarexü̃ i Cori ya Tupana pexü̃ wéxü̃ nax ngẽmawa nüxü̃ pecuáxü̃ca̱x nax nüxü̃́ natauxchaxü̃ nax ta̱xacü naxüxü̃. Rü naétü rü tá pexme̱xgu nanayixẽxẽ i ngẽma Moátanüxü̃ nax penada̱i̱xü̃ca̱x.

Norü taxre ga popera ga ãẽ̱xgacügüchiga 20:10

Rü nüma ga Echequía nanangãxü̃ rü ñanagürü: —Ngẽma üa̱xcüpechita nax naxĩnagüxü̃ rü natauxcha, natürü ngẽma nügü nax nataeguxü̃ nixĩ i guxchaxü̃ —ñanagürü.

Naanearü ügüchiga 49:10

Rü nüma ya Yudá rü taxúetama nüxna tanayaxu i ngẽma norü pora. Rü yimá naixmena̱xã ya norü poraarü cua̱xruxü̃ ya naxme̱xwa ngẽxmane rü taxúetama nüxna tanayaxu ñu̱xmatáta ínangu ya yimá naixmena̱xãarü yora ya guxü̃arü ãẽ̱xgacü ixĩcü. Rü yimága tá nixĩ i naxĩnüexü̃ i guxü̃ma i duü̃xü̃gü.

Wiyaegü 37:28

Erü nüma ya Cori ya Tupana rü nüxü̃ nangechaü̃ i ngẽma maxü̃ i we̱xguxü̃, rü taguma tüxü̃ ínawogü ya yíxema aixcüma nawe rüxĩxe. Rü guxü̃gutáma tüxna nadau. Natürü ngẽma chixexü̃gu maxẽxü̃, rü Tupana tá inayanaxoxẽxẽ i nanegü rü nataagü.

Wiyaegü 97:10

Rü nüma ya Cori ya Tupana rü tüxü̃ nangechaü̃ ya yíxema nüxü̃ oxe i ngẽma chixexü̃. Rü tüxna nadau ya yíxema aixcüma naga ĩnüexe rü tüxü̃ ínapoxü̃ naxme̱xwa i ngẽma chixexü̃gu maxẽxü̃ i duü̃xü̃gü.

Ichaía 42:10

Rü ñanagürü ga Ichaía: —¡Tupanaxü̃ picua̱xüü̃gü wüxi i ngexwaca̱xü̃xü̃ i wiyaemaxã! Rü guxü̃ma i nachixü̃anecüã̱x i ñoma i naanewa ngẽxmagüxü̃, rü guxü̃ma i duü̃xü̃gü i yáxü̃wa márcutüwa maxẽxü̃, rü guxü̃ma i duü̃xü̃gü i márgu yarüxĩĩxü̃, rü guxü̃ma i márwa maxẽxü̃, rü name nixĩ i Tupanaxü̃ nicua̱xüü̃gü.

Ichaía 45:22

Rü pema i yáxü̃wa maxẽxe, rü cha̱u̱xca̱x pexĩ rü choma rü tá pexü̃ íchanguxü̃xẽxẽ, erü chaxicatama nixĩ ya Tupana chixĩxü̃ rü nataxuma i to.

Ichaía 48:20

¡Ípechoxü̃ i Babiróniaanewa rü pibuxmü i ngẽma nachixü̃anewa! ¡Rü taãẽmaxã nüxü̃ pixu nax marü ípenguxü̃xü̃! ¡Rü guxü̃wama i ñoma i naanewa nüxü̃ pixu rü ñapegü: “Tupana rü norü duü̃xü̃gü i Acóbutanüxü̃xü̃ ínanguxü̃xẽxẽ”, ñapegü! —ñanagürü.

Ichaía 51:4

Rü ñanagürü ta ga Tupana: —Pa Chorü Duü̃xü̃güx ¡choxü̃́ iperüxĩnüe! ¡Rü chauga pexĩnüe, Pa Iraétanüxü̃x! Rü choma rü tá chanango̱xẽxẽ i ngẽma chorü ore. Rü chorü mugü rü guxü̃ i nachixü̃anegüarü nangóonexẽẽruxü̃ tá nixĩ.

Ichaía 55:5

Rü pemax, Pa Iraéanecüã̱xgüx, rü tá naxca̱x pengẽma i togü i nachixü̃anecüã̱xgü i tama pexü̃ cuáxü̃. Rü nümagü rü tá paxaãẽãcü pexca̱x naxĩ, erü choma i perü Tupana ya Üünecü rü guxü̃ma i ngẽma nachixü̃anegüétüwa pexü̃ changexmagüxẽxẽ —ñanagürü ya Cori ya Tupana.

Ichaía 62:11

Rü Tupana rü guxü̃ma i duü̃xü̃gü i ñoma i naanewa maxẽxü̃maxã nüxü̃ nixu rü ñanagürü: —¡Ĩane ya Chióü̃cüã̱xgümaxã nüxü̃ pixu rü marü ínangu i norü nguxü̃xẽxẽruxü̃! ¡Rü namaxã nüxü̃ pixu rü Tupana rü marü ínananguxü̃xẽxẽ rü nanawoeguxẽxẽ i norü duü̃xü̃gü ga norü uanügü gagüxü̃! —ñanagürü.

Yeremía 12:16

Rü aixcüma nixĩ ga nümagü ga noxri chorü duü̃xü̃güxü̃ nangúexẽẽxü̃ nax Baáxégagu inaxunetagüxü̃ca̱x. Natürü i ñu̱xma rü chorü duü̃xü̃gütanüwa tá chanangexmagüxẽxẽ i ngẽma duü̃xü̃gü ega aixcüma yaxõgüãgu i chorü ore i chorü duü̃xü̃gütanüwa ngẽxmaxü̃ rü aixcüma chauégagu inaxunetagügu rü ñagügu: “Tupana ya Maxü̃cüégagu cumaxã nüxü̃ chixu”, ñagügu.

Chacaría 8:22

Rü ngẽmaãcü tá muxü̃tama i duü̃xü̃gü i muxü̃ i nachixü̃anewa ne ĩxü̃ rü Yerucharéü̃wa tá naxĩ nax cha̱u̱xca̱x yadaugüxü̃ca̱x nax nüxü̃ charüngü̃xẽxẽxü̃ca̱x.

Wiyaegü 67:3

Pa Tupanax, rü name nixĩ nax guxü̃ma i duü̃xü̃gü i guxü̃ i nachixü̃anegüwa ngẽxmagüxü̃ cuxü̃ nicua̱xüü̃gü.

Ichaía 56:8

Rü choma rü tá nachixü̃aneca̱x chanawoeguxẽxẽ i ngẽma Iraétanüxü̃ i taxũta nachixü̃aneca̱x woeguxü̃. Rü tá chananutaque̱xe wüxigu namaxã i togü i nachixü̃anecüã̱x i duü̃xü̃gü. Rü choma ya Tupana nixĩ i nüxü̃ chixuxü̃ i ngẽma —ñanagürü.

Miquéa 5:3

Rü ñu̱xma ya Cori ya Tupana rü norü duü̃xü̃güna nixũgachi nax norü uanügü namaxã icuáxü̃ca̱x ñu̱xmatáta naxíxraxacü i ngẽma nge i wüxi ya ngĩne tá ngĩxü̃́ ngẽxmacü. Rü ngẽxguma tá nixĩ i ngẽma Iraétanüxü̃ i to i nachixü̃anegügu woonexü̃ rü tá nachixü̃aneca̱x nawoeguxü̃ nax wüxiwa nangẽxmagüxü̃ca̱x namaxã i natanüxü̃ ga nachixü̃anewatama yaxǘgüxü̃.