Ichaía 47:6 - Tupanaarü Ore

⁶ Rü yexguma namaxã chanuxgu ga yema chorü duü̃xü̃gü ya Iraétanüxü̃ rü pexna chanawogü nax namaxã ipecuáxü̃ca̱x. Natürü ga pemax, Pa Babiróniaanecüã̱xgüx, rü tama pexü̃́ nangechaü̃tümüxü̃gü, rü woo ga guxema norü yaxguã̱xgü rü chixri tümamaxã ipecua̱x.

Ichaía 47:6 Referans Kwoze

Chacaría 1:15

Rü yexguma ñuxre ga taunecü namaxã chanuxgu ga chorü ĩane rü poxcu namaxã chaxuegu ga yema Yerucharéü̃cüã̱xgü. Natürü yema togü ga nachixü̃anegücüã̱x ga yéma chamugüxü̃ rü nanangupetüxẽxẽ ga yema poxcu ga Yerucharéü̃maxã chaxueguxü̃. Rü ngẽmaca̱x poraãcü namaxã chanu i ngẽma togü i nachixü̃anegü i nügü írüporaexü̃ rü taxuguma rüxĩnüexü̃.

Norü taxre ga to ga popera ga ãẽ̱xgacügüchiga ümatüxü̃ 28:9

Rü yéma Chamáriawa nayexma ga wüxi ga Cori ya Tupanaarü orearü uruxü̃ ga Odégu ãégaxü̃. Rü nüma rü yema churaragüca̱x nixũ ga yexguma Chamáriagu nachocuxgu. Rü ñanagürü nüxü̃: —Yimá Cori ga perü o̱xigüarü Tupana rü Yudáanecüã̱xgümaxã nanu, rü ngẽmaca̱x nixĩ i pexme̱xgu nayixẽẽãxü̃. Natürü i pemax rü poraãcü namaxã penue i ngẽma duü̃xü̃gü rü penadai i muxü̃ma. Rü ngẽmaca̱x ya Tupana rü tá pexna naxca̱x naca i ngẽma pexüxü̃, erü tama pexü̃́ nangechaü̃tümüxü̃gü i ngẽma duü̃xü̃gü.

Wenaxarü naxümatü ga Tupanaarü mugü 28:50

Rü ngẽma nachixü̃anecüã̱x i duü̃xü̃gü rü ninuchiwe, rü taxũtáma tüxü̃ nangechaü̃gü i yaxguã̱xgü rü woo buxegü rü taxũtáma nüxü̃́ tangechaü̃tümüü̃gü.

Abdía 1:10

Rü pemax, Pa Edóü̃anecüã̱xgüx, chixri namaxã pechopetü ga petanüxü̃ ga Acóbutanüxü̃ rü penadai. Rü ngẽmaca̱x tá pexü̃ chaxãneexẽxẽ rü tá pexü̃ chadaixüchi.

Popera ga Chantiágu ümatüxü̃ 2:13

Erü guxãma ya yíxema tama tümamücügü tüxü̃́ ngechaü̃tümüü̃güxe, rü Tupana rü taxũtáma nüxü̃́ tangechaü̃tümüü̃güãcüma tüxna naca i tümaarü maxü̃chiga. Natürü yíxema tümamücügü tüxü̃́ ngechaü̃tümüü̃güxe, rü taxũtáma tamuü̃e i ngẽxguma Tupana tüxna caxgux, erü nüxü̃́ tangechaü̃tümüü̃güãcüma tá tüxna naca.

Wiyaegü 69:26

Erü nümagü rü tümawe ningẽxü̃tanü ya yíxema cuma tüxü̃ cunaxĩ̱xãchiãẽxẽẽ́xẽ. Rü tüxü̃ nacugüe ya yíxema ngúxü̃ ngẽgüxe nagagu nax tüxü̃ cunapi̱xẽẽxü̃.

Abdía 1:16

Rü ñanagürü ta: —Pema, Pa Iraétanüxü̃x, rü chorü ma̱xpǘne ga chopata nawa yexmanewa rü poraãcü ngúxü̃ pingegü. Rü ngẽxgumarüxü̃ tá ta i ngẽma to i nachixü̃anegü rü ngúxü̃ ningegü rü ngẽmaãcü tá inayarüxogü. Rü ñoma taguma ñoma i naanewa nax nangóexü̃rüxü̃ tá nixĩgü.

Ichaía 10:6

Rü choma tá nixĩ i Achíriaanearü ãẽ̱xgacüxü̃ chamuxü̃ nax duü̃xü̃gü i chixexü̃gu maxẽxü̃ca̱x rü wüxi i nachixü̃ane i choxü̃ nuẽẽxü̃ca̱x íyagoõchixü̃ca̱x nax nüxü̃́ nangĩ́xü̃ca̱x rü nüxna napuxü̃ãxü̃ca̱x i norü ngẽmaxü̃gü rü nagu napugüexü̃ca̱x ñoma ĩanearü namagüwa ngẽxmaxü̃ i ãcharaxü̃gu napugüexü̃rüxü̃.

Ore i mexü̃ ga Matéu ümatüxü̃ 7:2

Erü ngẽxgumarüxü̃ nax toguxexü̃ pixuxü̃ rü togü tá pexü̃ nixu. Rü ngẽma dexa i namaxã tüxü̃ pixuxü̃, rü ngẽmatama dexamaxã tá pexü̃ tixu.

Echequié 28:16

Natürü yema nax cumuarü ngẽmaxü̃ã́xü̃gagu rü poraãcü cumáeta rü ngẽmaãcü chixexü̃gu cungu. Rü yemagagu chaugüxü̃tawa cuxü̃ íchata̱xüchi nawa ya yima chorü ma̱xpǘne. Rü yema chorü orearü ngeruxü̃ i daxũcüã̱x ga cuxna dauchiréxü̃ rü cuxü̃ ínamuxũchi nawa ga yema nachica ga mexẽchixü̃ ga nawa cuyexmaxü̃.

Echequié 24:21

Rü choxü̃ namu nax pemaxã nüxü̃ chixuxü̃ca̱x i norü ore i ñaxü̃: “Pa Iraétanüxü̃x, pema rü namaxã pegü picua̱xüü̃gü ya yima chopata ya taxü̃ne ya namaxã pegü íperüporaene. Natürü woo nax nüxü̃ pingechaü̃xü̃chixü̃ rü perü meruxü̃ nax yixĩxü̃ rü choma rü tá nagu chapogü. Rü ngẽma Yerucharéü̃wa yaxǘgüxü̃ ga penegü rü pexacügü rü taramaxã tá nayue.

Auxexü̃chiga 2:2

Rü Cori ya Tupana rü noxtacüma guxü̃nema ga Acóbutanüxü̃patagü rü nayachixexẽxẽ, rü taxúnema ínayaxüxẽxẽ. Rü norü numaxã nagu napogüe ga norü poxeguxü̃ ga guma Yudáanearü ĩanegü ga imexẽchine. Rü guma ĩanegüarü ãẽ̱xgacügüxü̃ naxãneexẽxẽ namaxã ga norü ngü̃xẽẽruü̃gü.

Ichaía 43:28

Rü ngẽma perü ãẽ̱xgacügü rü chixexü̃ nawa naxügü ga chopata ya taxü̃ne. Rü yemaca̱x nixĩ ga nüxna chixũgachixü̃ ga Acóbuarü duü̃xü̃gü ga Iraétanüxü̃ nax norü uanügü nada̱i̱xü̃ca̱x rü chixexü̃ namaxã yaxugüexü̃ca̱x —ñanagürü ya Tupana.

Ichaía 13:16

Rü tümape̱xegügu tá tümaxacügüxü̃ waixü̃müanegu nichi̱xgü. Rü tümapatagüwa tá nanade i tümaarü ngẽmaxü̃gü. Rü tümama̱xgü rü tá tümamaxã namaxẽ.

2 Chamué 24:14

Rü Gáxü̃ nangãxü̃ ga Dabí rü ñanagürü: —Wüxi i taxü̃ i guxchaxü̃ i ãũcümaxü̃wa changexma. Rü name nixĩ nax Cori ya Tupaname̱xẽwa íngexmagüxü̃ erü norü ngechaü̃ rü nataxüchi, rü tama i yatügüme̱xẽwa —ñanagürü.

Yeremía 50:42

Rü würagümaxã rü wocaegümaxã naxãxne. Rü nidürae rü taxúema nüxü̃́ tangechaxü̃tümüü̃gü. Rü ngẽxguma aita naxüegu rü ñoma már arü yuapegügarüxü̃ nixĩ nax natagaxü̃. Rü cowarugüétügu naxĩ. Rü ínamemaregü nax Babiróniacüã̱xmaxã nügü nada̱i̱xü̃.

Auxexü̃chiga 1:14

Rü Cori ya Tupana rü marü nüxü̃ nadau i chorü pecadu i nümatama chowa yanaxĩcuchixü̃ ñoma wüxi i naixmena̱xã i toxcunaxãruxü̃. Rü ngẽma pecadu rü ñoma toxcunaxãruxü̃ ya yáxü̃nerüxü̃ choxü̃́ nayá. Rü marü nagu̱x i chorü pora. Rü nüma ya Cori ya Tupana rü chorü uanügüme̱xẽgu choxü̃ nanguxẽxẽ, rü ngẽmaca̱x taxucürüwa chaugü íchapoxü̃.

Auxexü̃chiga 1:21

Rü guxü̃ma ga duü̃xü̃gü rü choxü̃ naxĩnüe ga nax chaxaxuxü̃, natürü tataxuma nax texé choxü̃ yataãẽxẽẽxü̃. Rü guxü̃ma i ngẽma chorü uanügü rü nüxü̃ nacua̱xgü nax ngúxü̃ choxü̃ quingexẽẽxü̃, Pa Chorü Corix. Rü ngẽmaca̱x nataãẽgü. ¡Rü naxca̱x ínanguxẽxẽ i ngẽma poxcu i namaxã cuxueguxü̃ nax nümagü rü ta chaurüxü̃ ngúxü̃ yangegüxü̃ca̱x!

Auxexü̃chiga 5:12

Rü torü ãẽ̱xgacügü rü nachacüügu ínanatugüxẽxẽ. Rü torü ãẽ̱xgacügü ga yaxguã̱xgü rü tümagu nidauxcüraxü̃gü.

Norü taxre ga to ga popera ga ãẽ̱xgacügüchiga ümatüxü̃ 10:11

Rü aixcüma nixĩ ga chaunatü rü poraãcü taxü̃ ga diẽru petanüwa nayaxuxü̃, natürü i choma rü tá yexeraãcü taxü̃ i diẽru petanüwa chayaxu. Rü chaunatü rü goyexü̃maxã pexü̃ nicua̱i̱xgü, natürü i choma rü tá cua̱i̱xruü̃gü i fierumaxã ãpe̱xexü̃maxã tá pexü̃ chicua̱i̱xgü” —ñanagürügü nüxü̃.

Norü taxre ga to ga popera ga ãẽ̱xgacügüchiga ümatüxü̃ 36:17

Rü yemaca̱x nüma ga Cori ya Tupana rü Cadéugüarü ãẽ̱xgacüxü̃ namu nax nadaiaxü̃ca̱x ga yema Yudáanecüã̱xgüarü ngextü̱xüxü̃gü ga Tupanapata ga taxü̃newa yexmagüxü̃. Rü tama nüxü̃́ nangechaü̃tümüxü̃gü ga yema ngextü̱xüxü̃gü, rü paxü̃gü, rü yaxguã̱xgü, rü yema ichixeparaxü̃. Rü yemaacü ga nüma ga Cori ya Tupana rü guxü̃ma ga Yudáanecüã̱xgüxü̃ Cadéugüme̱xẽgu nayixẽxẽ.

Norü taxre ga to ga popera ga ãẽ̱xgacügüchiga ümatüxü̃ 36:20

Rü yemawena rü yema Yudáanecüã̱xgü ga íyaxügüxü̃ rü Babiróniawa nanagagü nax ãẽ̱xgacüarü rü nanegüarü puracütanüxü̃ yixĩgüxü̃ca̱x. Rü yemaacü yéma namaxẽ rü ñu̱xmata Pérchiaanearü ãẽ̱xgacüme̱xẽgu nayi ga Cadéugü.

Édra 5:12

Rü nüxü̃ nixugügü ta rü ñanagürügü: “Rü torü o̱xigü rü Tupana ya daxũcüã̱xü̃ nanuxẽẽgü rü yemaca̱x nüma ga Tupana rü ãẽ̱xgacü ga Nabucudonochóme̱xẽgu nanayixẽxẽ. Rü nüma ga Nabucudonochó rü nagu napogü ga guma Tupanapata ga taxü̃ne, rü yema duü̃xü̃gü rü ínanayauxü̃ rü Babiróniaanewa nanagagü”, ñanagürügü.

Auxexü̃chiga 4:16

Rü nümatama ga Cori ya Tupana rü nanawoonemare, rü tama nüxü̃ narüngü̃xẽxẽ. Rü taxúema naga taxĩnüe ga yema chacherdótegü rü taxúema nüxü̃ tangechaü̃ ga yema ãẽ̱xgacügü.

Chacaría 1:12

Rü nüma ga yema Cori ya Tupanaarü duü̃xü̃ ga daxũcüã̱x rü ñanagürü: —Pa Corix, Pa Tupana ya Guxãétüwa Ngẽxmacüx, rü marü 70 ya taunecüwa nangu nax Yerucharéü̃maxã rü ngẽma togü i Yudáanearü ĩanegümaxã cunuxü̃. ¿Rü ñuxre ya taunecü taxuxü̃ nax wenaxarü cuxü̃́ nangechaü̃tümüxü̃güxü̃? —ñanagürü.