Ichaía 47:11 - Tupanaarü Ore

¹¹ Natürü tá pexca̱x ínangu i guxchaxü̃gü. Rü taxũtáma ípenapoxü̃ woo nax piyuüechiréxü̃ rü ẽxü̃guxü̃xü̃ picuáxü̃. Rü pexca̱x tá ínangu i wüxi i taxü̃ i guxchaxü̃ i taxucürüwa na̱xcha̱xwa pibuxmüxü̃. Rü wüxi i guxchaxü̃ i tama nagu perüxĩnüexü̃ tá ngürüãchi pexca̱x ínangu.

Ichaía 47:11 Referans Kwoze

1 Tesalonicenses 5:3

Rü ngẽxguma duü̃xü̃gü nagu írüxĩnüegu nax guxü̃ma mexü̃ rü taxuxü̃ma nüxü̃ üpetüxü̃, rü ngẽma ngunexü̃gu rü ngürüãchi tá ínangu i taxü̃ i guxchaxü̃gü. Rü ñoma wüxi i ngecü i ãxacücü rü ngürüãchi ngĩxacümaxã ngu̱xnecacürüxü̃ tá nixĩ nax taxúema naxcha̱xwa iñaxü̃ i ngẽma.

Yema Cuáü̃ nüxü̃ dauxü̃ i yixcüra tá ngupetüxü̃chiga 3:3

¡Rü nüxna nacua̱xãchi ga yema ngu̱xẽẽtae ga mexü̃ ga noxri nüxü̃ cuxĩnüxü̃ rü cuyaxuxü̃, rü nagu ixũ! ¡Rü nüxü̃ rüxo i ngẽma chixexü̃ i cuxüxü̃ rü Tupanaca̱x nataegu! Natürü ngẽxguma tama nüxü̃ curüxoxgu i curü chixexü̃, rü ñoma wüxi i ngĩ́ta̱xáxü̃ i ngürüãchi ínguxü̃rüxü̃ tá cuxü̃tawa chaxũ. Rü taxũtáma nüxü̃ cucua̱x nax ñuxguacü yixĩxü̃.

Ore i mexü̃ ga Luca ümatüxü̃ 12:59

Rü cumaxã nüxü̃ chixu rü ngẽxma poxcuchicagu tá curüxã̱ũ̱x ñu̱xmatáta ngĩxü̃ cuxütanü i guxcü i diẽru i nüxü̃́ ngĩxü̃ cungetanücü —ñanagürü ga Ngechuchu.

Wiyaegü 50:22

¡Dücax i pemax nax choxü̃ iperüngümaexü̃, name nixĩ i nagu perüxĩnüe i ngẽma pemaxã nüxü̃ chixuxü̃! ¡Rü cha̱u̱xca̱x pewoegu naxü̃pa nax pexü̃ chada̱i̱xü̃ rü taxúema pexü̃ ípoxü̃xü̃!

Neemía 4:11

Rü yema torü uanügü rü nagu narüxĩnüe nax taxũchima nüxü̃ tacua̱xgüxü̃ rü nüxü̃ tadauxü̃ ga yexguma chi bexma totanügu nachocuxgu nax toxü̃ nada̱i̱xü̃ca̱x, rü yemaacü nax íyachaxãchigüxẽẽãxü̃ca̱x ga yema puracü.

Ore i mexü̃ ga Matéu ümatüxü̃ 18:34

Rü poraãcü nanu ga yema ãẽ̱xgacü. Rü nanamu nax napoxcugüãxü̃ca̱x ga yema yatü ñu̱xmata guxü̃ nüxü̃́ naxütanü ga yema nüxü̃́ nangetanüxü̃ —ñanagürü ga Ngechuchu.

Ichaía 37:36

Rü yematama chütaxü̃gu rü wüxi ga daxũcüã̱x ga Tupanaarü orearü ngeruxü̃ rü nanadai ga 185,000 ga churaragü ga Achíriaanecüã̱x. Rü yexguma yangunegu rü guxü̃ma nayue.

Ore i mexü̃ ga Luca ümatüxü̃ 17:27

Rü yexguma ga duü̃xü̃gü rü nachibüe, rü naxaxegü, rü nixãma̱xgü, rü nixütexacügü ñu̱xmata nawa nangu ga yema ngunexü̃ ga Noé naweü̃gu nagu ixüexü̃. Rü ínangu ga mucü ga taxüchicü, rü guxü̃ma ga yema duü̃xü̃gü rü nayue.

Wiyaegü 35:8

¡Rü ẽcü ngürüãchi guxchaxü̃gu nayi̱xixẽxẽ nax ngẽma nümatama namexẽẽgüxü̃ i ãxmaxü̃gu nayi̱xixü̃ca̱x rü ngẽmaãcü nagu yanachixexü̃ca̱x!

Wiyaegü 55:15

Rü ngẽma chorü uanügü rü chanaxwa̱xe i noxtacüma naxca̱x ínangu i ngẽma yu rü maxü̃ãcü naxmaxü̃gu nayicu. Erü nümagü rü guxü̃guma chixexü̃gu namaxẽ.

Wiyaegü 73:19

Rü ngürüãchimare tá narüxo. Rü norü muü̃maxã tá nayue. Rü ngẽxguma ícurüdaxgu, Pa Corix, ñoma wüxíe pewa írüdaxü̃rüxü̃, rü cuma rü tá nüxü̃ cuxo erü tama aixcüma mea cupe̱xewa namaxẽ.

Ucu̱xẽgüchiga 13:21

Pecaduã̱xgüxü̃we ningẽchigü i ngẽma chixexü̃. Natürü ngẽma mexü̃gu maxẽxü̃, rü mexü̃maxã tá nüxü̃́ naxãtanü.

Ichaía 13:6

¡Rü pixauxe, Pa Babiróniacüã̱x, erü Cori ya Tupanaarü ngunexü̃ rü marü ningaica nax ínanguxü̃! Rü nüma ya Cori ya Tupana ya Guxãétüwa Ngẽxmacü rü tá ínangu nax Babiróniagu yapogüxü̃ca̱x.

Ichaía 29:5

Natürü ngẽxguma tátama ngürüãchimare Cori ya Tupana ya Guxãétüwa Ngẽxmacü rü taxü̃ i duruanegümaxã, rü ĩã̱xãchianegümaxã, rü ãẽmacü i tagacümaxã, rü buanecü ya íxã̱ũ̱xẽmacümaxã, rü pucü ya tacümaxã, rü üxüema i tüxü̃ imáxü̃maxã tá nanapoxcue i ngẽma curü uanügü. Rü ngẽma muxũchixü̃ i curü uanügü i cuxca̱x íyaxüãchixü̃ rü ñoma waixü̃müchicute̱xerüxü̃ tá nixĩgü. Rü ñoma maxẽ ya pacü ya buanecü ngextá cuegücürüxü̃ tá nixĩgü.

Ichaía 30:13

Rü ngẽmaca̱x pegagu nixĩ i ngẽma tá pexü̃ üpetüxü̃. Rü ñoma wüxi i naxtapü̱x i máchanexü̃ rü ngǘxtexü̃ rü ngürüãchi iwáxü̃rüxü̃ pixĩgü.

Ichaía 45:7

Rü choma nixĩ ga chanango̱xẽẽxü̃ ga ngóonexü̃ rü waanexü̃. Rü choma nixĩ i íchananguxẽẽxü̃ i mexü̃ rü guxchaxü̃. Rü chomatama ya Tupana nixĩ i chanaxüxü̃ i guxü̃ma i ngẽma —ñanagürü.

Ichaía 47:9

Natürü pemaxã nüxü̃ chixu rü ngürüãchi wüxitama i ngunexü̃gu tá pexca̱x ínangu i ngẽma taxre i chixexü̃ nax nayuexü̃ i perü ãẽ̱xgacügü i poraexü̃ rü nayuexü̃ i pexacügü. Rü ñoma wüxi i ngexü̃ i yutexü̃rüxü̃ tá pixĩgü rü woo nax peyuüechiréxü̃ rü naguxü̃raü̃xü̃ i ẽxü̃guxü̃ i chixexü̃xü̃ nax pecuáxü̃.

Ichaía 48:8

Rü pema rü taguma nüxü̃ pexĩnüechiga rü tama nüxü̃ pecua̱x i ngẽma, erü choma rü nüxü̃ chacua̱x nax tama chomaxã pixaixcümagüxü̃, rü noxritama pengóegu rü taguma chauga pexĩnüexü̃.

Ichaía 57:1

Rü ngẽxguma nayu̱xgu i wüxi i duü̃xü̃ i mecümaxü̃ rü duü̃xü̃güaxü̃́ nanataxuraü̃mare. Rü ngẽxguma nayuegu i duü̃xü̃gü i mecümaxü̃ rü taxúema nüxü̃ tacua̱xéga nax nawa ínanguxü̃xü̃ i ñoma i naanearü chixexü̃.

Yeremía 51:8

Natürü Babirónia rü ngürüãchi norü uanügüme̱xẽgu tá nangu, rü nümagü rü tá nüxü̃ narüporamae. ¡Rü naxca̱x pexauxe ya yima ĩane! ¡Rü nua penange i üxüxü̃ naxca̱x i norü o̱xrigü rü bexmana tá naxca̱x yataane!

Yeremía 51:29

Rü poraãcü nidu̱xruane erü Cori ya Tupana rü nayanguxẽxẽ i ngẽma nagu naxĩnüxü̃. Rü Babiróniaanearü ĩane rü chianexü̃xü̃ tá nayangucuchixẽxẽ, rü taxúetama ya texé ngéma tamaxẽ.

Yeremía 51:43

Rü Babiróniaanearü ĩanegü rü nangeãcu. Rü chianegüxü̃ i paanexü̃ nixĩgü. Rü taxúxema ya texé ngéma tamaxẽ rü bai nachicagüwa taxüpetü.

Auxexü̃chiga 1:21

Rü guxü̃ma ga duü̃xü̃gü rü choxü̃ naxĩnüe ga nax chaxaxuxü̃, natürü tataxuma nax texé choxü̃ yataãẽxẽẽxü̃. Rü guxü̃ma i ngẽma chorü uanügü rü nüxü̃ nacua̱xgü nax ngúxü̃ choxü̃ quingexẽẽxü̃, Pa Chorü Corix. Rü ngẽmaca̱x nataãẽgü. ¡Rü naxca̱x ínanguxẽxẽ i ngẽma poxcu i namaxã cuxueguxü̃ nax nümagü rü ta chaurüxü̃ ngúxü̃ yangegüxü̃ca̱x!

Echequié 7:26

Rü nügüwe tá naxãgü i ngẽma guxchaxü̃gü i Yerucharéü̃cüã̱xgüca̱x ínguxü̃. Rü ngẽxgumarüxü̃ ta i ngẽma chixexü̃ i nachigagü rü tá nügüwe naxãgü. Rü tá naxca̱x nadaugü i wüxi i chorü orearü uruxü̃ nax ngẽma namaxã nüxü̃ ixuxü̃ca̱x nax ta̱xacüchiga yixĩxü̃ i ngẽma ngupetüxü̃. Natürü i ngẽma rü tá natüca̱xmamare nixĩ. Rü nataxutama i chacherdótegü i nangúexẽxẽxü̃ rü bai i yaxguã̱xgü i tayaxucu̱xẽgüxü̃.