Ichaía 44:10 - Tupanaarü Ore

¹⁰ Rü yíxema naxchicüna̱xã tügüca̱x üxe nax ngẽmamaxã tatupanaã́xü̃ca̱x rü natüca̱xmamare nixĩ i ngẽma taxüxü̃.

Ichaía 44:10 Referans Kwoze

Yeremía 10:5

Rü ngẽma naxchicüna̱xãgü rü ñoma naanegu pugüxü̃ i duü̃xü̃chicüna̱xãgü i werigüarü muü̃xẽẽruü̃rüxü̃mare nixĩgü. Rü tama nidexagü, rü nanaxwa̱xe nax yangegüxü̃ erü taxuacüma inaxĩ. ¡Rü taxṹ i nüxü̃ pemuüẽxü̃! Erü taxúexü̃ma nachixexẽxẽ, rü taxúeca̱x mexü̃ naxü —ñanagürü.

Abacú 2:18

Rü wüxi i naxchicüna̱xã i naiwa üxü̃ ¿rü ta̱xacüwa namexü̃ ega marü yanguxgu? ¿Rü ta̱xacüwa namexü̃ i wüxi i tupananetachicüna̱xã i wüxi i doramare ixĩxü̃? Rü ngẽma tupananetachicüna̱xãgü rü tama nidexagü. ¿Rü ñuxãcü nüxü̃́ yaxõõxü̃ ya yima yatü ya nümatama naxücü i ngẽma naxchicüna̱xã?

Ngechuchuarü ngúexü̃gü ga yamugüxü̃arü puracüchiga 19:26

Rü marü nüxü̃ pedaugü rü nüxü̃ pexĩnüe nax ngẽma Pauru yaxucu̱xẽgüxü̃ i duü̃xü̃gü, rü namaxã nüxü̃ yaxuxü̃ nax tama aixcüma tupanagü yixĩxü̃ i ngẽma tupanagü i yixema ixügüxü̃. Rü ngẽmaãcü muxü̃ma i duü̃xü̃güxü̃ nüxü̃ narüxoexẽxẽ nax tama tórü tupanagüaxü̃́ yaxõgüãxü̃ca̱x. Rü tama núma Epéchiuwaxicatama ngexü̃ nawagü natürü wixguxüchi guxü̃ i Áchiaanewa ngẽmaãcü chixri nayaxucu̱xẽgü i duü̃xü̃gü.

1 Corintios 8:4

Rü ngẽma nax nangṍxü̃ i ngẽma namachi i tupananetachicüna̱xãgüca̱x daixü̃, rü meama nüxü̃ tacua̱x nax taxuwama namexü̃ i ngẽma tupananetachicüna̱xãgü, erü tama aixcüma Tupanaxü̃chi nixĩgü. Erü wüxixicatama nixĩ ya Tupana ixĩcü, rü nataxuma i to.

Danié 3:14

—¿Aixcüma yixĩxü̃ i pemax i tama nüxü̃ picua̱xüxü̃güxü̃ i ngẽma chorü tupanachicüna̱xãgü rü woo i ngẽma naxchicüna̱xã i máchanexü̃ i choma duü̃xü̃güxü̃ chaxüxẽxẽxü̃?

Danié 3:1

Rü nüma ga ãẽ̱xgacü ga Nabucudonochó rü norü duü̃xü̃güxü̃ namu nax naxügüã̱xü̃ca̱x ga wüxi ga naxchicüna̱xã ga úirunaxca̱x. Rü yema naxchicüna̱xã rü nüxü̃́ nayexma ga 30 metru ga norü máchane, rü norü taxü̃ne rü 3 metru nixĩ. Rü ñu̱xũchi nüma ga ãẽ̱xgacü rü norü duü̃xü̃güxü̃ namu nax metachinüxü̃ ga Dúragu ãégaxü̃gu nachixẽẽgüãxü̃ca̱x ga Babiróniaanewa.

Ichaía 41:29

Rü wüxichigü ga yema tupananetachicüna̱xãgü rü taxuxü̃ma nixĩ. Rü taxuxü̃ma naxügü erü naxchicüna̱xãgümare nixĩgü rü nangearü maxü̃ã̱x —ñanagürü.

Nüxíraxü̃xü̃ ga popera ga ãẽ̱xgacügüchiga 12:28

Rü norü ucu̱xẽruü̃güna naca ga yemachiga. Rü yemawena ga nüma ga ãẽ̱xgacü ga Yeruboáü̃ rü taxre ga wocaxacü ga úirunaxca̱x naxüxẽxẽ rü duü̃xü̃güxü̃ ñanagürü: —Pemax, Pa Iraéanecüã̱xgüx, rü wüxi i taxü̃ i guxchaxü̃ nixĩ nax Yerucharéü̃wa pexĩĩxü̃ nax ngéma Tupanapata ya taxü̃newa nüxü̃ peyarücua̱xüü̃güxü̃ca̱x. Rü dücax, ñaa wocaxacüchicüna̱xãgü nixĩ i perü tupanagü ga Equítuanewa pexü̃ ígaxü̃xü̃ —ñanagürü.

Wiyaegü 115:4

Rü ngẽma norü tupanachicüna̱xãgü i ngẽma tama yaxõgüxü̃, rü nümatama i duü̃xü̃gü naxme̱xmaxã nanaxügü. Rü úirumü rü diẽrumünaxca̱x nixĩ.

Ichaía 40:19

Rü wüxi i naxchicüna̱xãarü üruxü̃ rü nanadexẽxẽ i ngẽma nawa naxüaxü̃ i ngẽma naxchicüna̱xã. Rü wüxi i nga̱xãẽruxü̃ rü úirumaxã nanatüxüne rü diẽrumüwa nanaxü i nachagü.

Yeremía 16:19

Rü choma i Yeremía rü Cori ya Tupanana chacaama rü ñachagürü: —Pa Corix ya Chorü Poraxẽẽruxü̃ rü Chorü Tüpechitaruxü̃, rü cuma nixĩ i choxü̃ ícupoxü̃xü̃ i ngẽxguma ãũcümaxü̃wa changexmagu. Rü cuxü̃tawa tá naxĩ i nachixü̃anecüã̱xgü i naane iyacuáxü̃wa ne ĩxü̃, rü cuxü̃ tá ñanagürügü: “Yema nũxcümaü̃güxü̃ ga torü o̱xigü rü yema taxuwama mexü̃ rü ngearü poraáxü̃ ga tupananetachicüna̱xãgü nixĩ ga namaxã natupanaã̱xgüxü̃”, ñanagürügü tá.

Ichaía 45:20

Rü nüma ya Tupana rü ñanagürü ta: —Guxü̃ma i pema i togü i nachixü̃anewa íyaxügüxe rü name nixĩ nax pexĩtaque̱xexü̃ rü nua pexĩxü̃. Rü pema i naxchicüna̱xãgü i nainaxca̱x pingegüxü̃ rü nüxü̃ picua̱xüü̃güxü̃ rü tama peãẽxü̃ pecua̱x, erü ngẽma naxchicüna̱xãgü rü taxũtáma pexü̃ ínapoxü̃.