Ichaía 43:6 - Tupanaarü Ore

^6-7 Rü ngẽma nachixü̃anegü i Nórtewa ngẽxmagüxü̃xü̃ rü ngẽma nachixü̃anegü i Súrwa ngẽxmagüxü̃xü̃ tá ñacharügü: “¡Penamuegutanü i ngẽma chorü duü̃xü̃gü! Rü guxü̃ma i chorü duü̃xü̃gü i guxü̃wama i ñoma i naanewa ngẽxmagüxü̃ rü chauéga ingegüxü̃ rü tá penawoeguxẽxẽ. Yerü choma nixĩ ga chanangóexẽxẽxü̃ nax choxü̃ yacua̱xüü̃güxü̃ca̱x” ñachagürü tá.

Ichaía 43:6 Referans Kwoze

Yeremía 3:14

Rü nüma ya Cori ya Tupana rü ñanagürü: —¡Cha̱u̱xca̱x pewoegu, Pa Chorü Duü̃xü̃gü ya Tama Ixĩnüechaü̃güxe! Erü choma nixĩ i perü yora chixĩxü̃. Rü wüxichigü ya ĩanewa rü wüxi i duü̃xü̃ tá chiyauxchigü, rü wüxichigü i natücumüwa rü taxre i duü̃xü̃ tá chiyauxchigü, rü ñu̱xũchi Chióü̃ca̱x tá chanawoeguxẽxẽ.

Ichaía 18:7

Rü ngẽma ngunexü̃gügu rü Cori ya Tupana ya Guxãétüwa ngẽxmacüxü̃tawa tá nanana i norü ãmaregü i ngẽma duü̃xü̃gü i máxchanexü̃ rü ingoracha̱xmüxü̃güxü̃ rü iporaxüchixü̃ rü nügü írütagüxü̃ rü guxãma ya to i nachixü̃anecüã̱xgü nüxü̃ muü̃xexü̃ i naane i natügü nawa muxũchixü̃gu ãpatagüxü̃. Rü ngẽma duü̃xü̃gü rü yima ma̱xpǘne ya Chióü̃ i Cori ya Guxãétüwa Ngẽxmacüxü̃ iyacua̱xüü̃guxü̃wa tá nanana i norü ãmaregü.

Wenaxarü naxümatü ga Tupanaarü mugü 30:4

Rü woo i pema i yáanegu pewoone, rü nüma ya perü Cori ya Tupana rü tá ngẽxma pexca̱x nayadau rü tá pexü̃ nawoeguxẽxẽ.

Ichaía 45:22

Rü pema i yáxü̃wa maxẽxe, rü cha̱u̱xca̱x pexĩ rü choma rü tá pexü̃ íchanguxü̃xẽxẽ, erü chaxicatama nixĩ ya Tupana chixĩxü̃ rü nataxuma i to.

Ichaía 49:12

Rü pema ya Iraétanüxü̃ rü tá yáxü̃wama ne pexĩ, rü ñuxre rü nórtewaama rü togü rü oéstewaama rü togü rü Equítuanearü súrwaama tá ne pexĩ.

Ichaía 49:22

Rü ñanagürü ta: —Choma rü tá chanamu i ngẽma togü i nachixü̃anegücüã̱x rü tá nüxna chanaxã i wüxi i cua̱xruxü̃ nax nua nachacüügügu nagagüãxü̃ca̱x i penegü rü naatügügu yagagüãxü̃ca̱x i pexacügü.

Ichaía 60:4

¡Rü dücax, pegücüwagu perüdaunü nax guxü̃ma i Iraétanüxü̃ naxĩtaque̱xexü̃ nax Yerucharéü̃ca̱x nawoeguxü̃! Rü penegü rü yáxü̃wa tá ne naxĩ, rü pexacügü rü duü̃xü̃gü rü tá ngĩchacüügu ngĩxü̃ ngéma ne nagagü.

Ichaía 66:20

Rü nua chorü ma̱xpǘne ya üünene ya Yerucharéü̃wa ngẽxmanewa tá nanagagü i ngẽma petanüxü̃ i guxü̃ i nachixü̃anegüwa ne nagagüxü̃. Rü nümaxü̃ rü tá cowaruétügu rü togü i carugu, rü togü i caruü̃gu rü togü i mulaétügu rü togü i caméyuétügu tá nua nanagagü, ñoma Iraétanüxü̃ naxpáü̃ i mexü̃gu norü ãmaregü chopata ya taxü̃newa ngẽgüxü̃rüxü̃ —ñanagürü.

Yeremía 23:8

Natürü ñapegürügü tá: “Namaxü̃ ya Cori ya Tupana ga nachixü̃ane ga nórtewaama yexmaxü̃wa rü yema togüama ga nachixü̃anegü ga nagu tawoonexü̃wa tüxü̃ ínguxü̃xẽẽcü i yíxema i Iraétanüxü̃”, ñapegürügü tá. Rü perü naanewa tátama peyamaxẽ —ñanagürü ya Tupana.

Yeremía 29:14

Rü choma rü tá pexü̃ charüngü̃xẽxẽxü̃ nax choxü̃ ipeyangaugüxü̃ca̱x. Rü tá pexü̃ charüngü̃xẽxẽxü̃ nax ngẽma ípengexmagüxü̃wa pewoeguxü̃ca̱x. Rü tá pexü̃ íchagaxü̃ nawa i ngẽma nachixü̃anegü i nagu pexü̃ chawoonexü̃. Rü wüxiwa tá pexü̃ changexmagüxẽxẽ nawa i ñaa nachica ga nawa pexü̃ íchawoxü̃xü̃. Rü chomatama ya Cori ya Tupana nixĩ i nüxü̃ chixuxü̃ i ngẽma.

Yeremía 31:8

Rü tá pexü̃ chawoeguxẽxẽ nüxna i ngẽma nachixü̃ane i nórtewa ngẽxmaxü̃ rü nüxna i ngẽma togü i nachixü̃anegü i guxü̃ i naanewa ngẽxmagüxü̃. Rü ngẽma woeguxü̃tanügu tá naxãgü i ngẽma ngexetüxü̃, rü ngẽma ichixeparaxü̃, rü ngẽma ngexü̃gü i tapütüwegüxü̃, rü ngẽma ngexü̃gü i marü ixíraxacügüxü̃. Rü ngẽmaãcü tá muxü̃tama i duü̃xü̃gü nawoegu naxca̱x i norü naane.

Echequié 36:24

Rü choma, Pa Iraétanüxü̃x, rü tá pexü̃ íchagaxü̃ nawa i guxü̃ma i ngẽma nachixü̃anegü i nawa pengẽxmagüxü̃. Rü wüxiwa tá pexü̃ chagagü, rü ñu̱xũchi perü naaneca̱x tá pexü̃ chawoeguxẽxẽ.

Echequié 37:21

Rü ngẽmawena rü duü̃xü̃gümaxã nüxü̃ ixu i chorü ore i ñaxü̃: ‘Choma rü tá íchanagaxü̃ i ngẽma Iraétanüxü̃ nawa i ngẽma nachixü̃anegü ga nawa nagagüãxü̃. Rü wüxiwa tá chanagagü i ngẽma Iraétanüxü̃ i ñu̱xma guxü̃ma i nachixü̃anegu woonemarexü̃. Rü choma rü tá norü naanewa chanagagü.

Joel 3:7

Natürü i choma rü ngẽma nachixü̃ane i nagu namaxã petaxegüxü̃wa tá íchayagaxü̃. Rü ngẽxguma i choma rü yematama ga ngúxü̃ ga nüxü̃ pingexẽẽgüxü̃ tá pexü̃ chingexẽxẽ.

Chacaría 6:6

Rü yima caru ya cowarugü iwaxüxü̃ itúgüne rü ngẽma nachixü̃ane i nórtewa ngẽxmaxü̃waama naxũ. Rü yima caru ya cowarugü icómüxü̃ itúgüne rü ngẽma nachixü̃ane i oéstewa ngẽxmaxü̃waama naxũ. Rü yima caru ya cowarugü i ãmatüxü̃ itúgüne rü ngẽma nachixü̃ane i súrwa ngẽxmaxü̃waama naxũ —ñanagürü.

Ichaía 11:12

Rü nüma ya Cori rü guxü̃ i nachixü̃anegüxü̃ tá nüxü̃ nadauxẽxẽ i wüxi i cua̱xruxü̃. Rü tá nanangutaque̱xexẽxẽ i ngẽma Iraétanüxü̃ i woonexü̃. Rü naanearü guxü̃wama tá ne nanagagü nax nanutaque̱xeãxü̃ i ngẽma duü̃xü̃gu i Yudáanecüã̱x ga woonemarexü̃.

Ichaía 27:13

Rü ngẽma ngunexü̃gu rü tá nagu nicue ya yimá cornéta ya tagane. Rü ngẽma Iraétanüxü̃ i Achíriaanegu woonexü̃ rü ñu̱xũchi ngẽma Equítuanewa gagüxü̃ rü tá Yerucharéü̃ca̱x nawoegu. Rü yima ma̱xpǘne ya üünenewa tá Cori ya Tupanaxü̃ nicua̱xüü̃gü.