Ichaía 42:16 - Tupanaarü Ore

¹⁶ Rü ngẽma ngexetügüxü̃ rü tá chanagagü nawa i namagü i taguma nüxü̃ nacua̱xgüxü̃ rü taguma nagu naxĩxü̃. Rü ngẽma waanexü̃ i nawa namaxẽ rü tá ngóonexü̃xü̃ chayaxĩxẽxẽ. Rü ngẽma naane i chixri i weanexü̃ rü tá mea ichanawe̱xãchianexẽxẽ. Rü guxü̃ma i ngẽma rü tá chanaxü erü tama nüxna chixũgachi i chorü duü̃xü̃gü i Iraétanüxü̃.

Ichaía 42:16 Referans Kwoze

Ichaía 30:21

Rü ngẽxguma namawa tügünewaama ícutüxgu rüe̱xna to̱xwewaama ícutüxgu, rü tá cuweama nüxü̃ cuxĩnü i wüxi i naga i cuxü̃ ñaxü̃: —Nuama nixĩ i nama. ¡Rü nuama naxũ! —ñaxü̃.

Ore i mexü̃ ga Luca ümatüxü̃ 3:5

Rü guxü̃ma i ngẽma ngatexü̃gü rü tá nanagütagü, rü guxü̃ma ya yima ma̱xpǘnegü rü ngüchitaerugü rü tá nayadoxochigüxẽxẽ. Rü ngẽma nama i wü̃xü̃ rü tá nayanawẽ̱xãchixẽxẽ, rü ngẽma ínaxãxmaagüxü̃wa rü tá nanagütagü.

Ichaía 35:8

Ngéma tá nangẽxma i wüxi i nama i “Nama i Üünexü̃gu” ãégaxü̃. Rü yíxema tama Tupanape̱xewa tügü mexẽẽ́xe rü taxucürüwa nagu tixũ. Rü ngẽxgumarüxü̃ ta i ngẽma chixexü̃arü üruü̃gü rü taxucürüwa nagu naxĩ.

Efesios 5:8

Rü ü̃pa ga pema rü ẽanexü̃wa pemaxẽ, yerü tama Tupanaxü̃ pecua̱x. Natürü i ñu̱xma nax Cori ya Tupanaxü̃ pecuáxü̃, rü ngóonexü̃wa pemaxẽ. Rü ngẽmaca̱x name i duü̃xü̃gü i ngóonexü̃wa ngẽxmagüxü̃ãcü pemaxẽxü̃.

Ichaía 32:3

Rü ngẽma ãẽ̱xgacügü rü tá mea nüxü̃ nadau i guxü̃ma i ngẽma nachixü̃anewa ngupetüxü̃. Rü ngẽxguma norü duü̃xü̃gü namaxã idexagügu rü tá mea nüxü̃́ inaxĩnüe. Rü taxũtáma ñu̱xãẽãcü norü duü̃xü̃gümaxã inacua̱xgü, natürü meamare tá namaxã inacua̱xgü. Rü ngẽxguma duü̃xü̃gümaxã yadexagügu rü tá mea nango̱x i norü dexa.

Popera ga Yudíugü ga yaxõgüxü̃ca̱x ümatüxü̃ 13:5

Rü tama name nax diẽruguama perüxĩnüexü̃. Rü name nixĩ i namaxã petaãẽgü i ngẽma marü pexü̃́ ngẽxmaxü̃. Yerü Tupana rü ñanagürü: “Tagutáma cuxna chixũ, rü tagutáma cuxü̃ íchata̱x”, ñanagürü.

Ichaía 29:18

Rü ngẽma ngunexü̃gu i ngẽma ngauchi̱xẽgüxü̃ rü tá nüxü̃ naxĩnüe ega ngẽxguma texé poperaxü̃ naxca̱x daumatügu, rü ngẽma ingexetüxü̃ rü tá nidaxuchitanü, rü taxũtáma waanexü̃wa nangẽxmagü.

Wiyaegü 94:14

Nüma ya Cori ya Tupana rü tagutáma ínanawogü i norü duü̃xü̃gü rü tagutáma nüxna nixũ nax nüxica ngéma nawogüxü̃ca̱x.

Ichaía 48:17

Rü choma ya Iraétanüxü̃arü Tupana ya Üünecü ya perü ngü̃xẽẽruxü̃ ixĩcü rü ñachagürü: —Pa Iraétanüxü̃x, choma nixĩ i perü Tupana chixĩxü̃, rü choma rü pexü̃ changúexẽxẽ i ngẽma pexü̃́ mexü̃, rü pemaxã nüxü̃ chixu i ngẽma chanaxwa̱xexü̃ nax penaxüxü̃.

Ichaía 45:2

Rü nüma ga Tupana rü Chíruxü̃ ñanagürü: —Choma rü tá cupe̱xegu chixũ, rü yima ma̱xpǘnegü rü tá chanadoxõchixẽxẽgü. Rü ngẽma ĩã̱xgü i bróũchenaxca̱x rü tá nagu chapogü. Rü ngẽma norü fierumena̱xãgü rü íxraxü̃gu tá ichanapóü̃gü.

Ichaía 35:5

Rü ngẽma ngunexü̃gu rü ngẽma ingexetüxü̃ rü tá nidauuchitanü, rü ngẽma ingauchiẽxü̃ rü tá ningo̱xnamachixẽgü.

Ochéa 2:14

Rü ñanagürü ta: —Natürü i chomax, rü wena tá chaugüna chayapuexẽxẽ i ngẽma Iraéanecüã̱xgü. Rü chianexü̃wa tá chanagagü nax ngéma mea namaxã chidexaxü̃ca̱x rü wenaxarü choxü̃ nangechaü̃güxü̃ca̱x.

Ochéa 2:6

Rü ngẽmaca̱x i choma rü tá tuxugümaxã chanapota i ngĩrü nama rü tá ngĩxü̃ íchapoxexü̃ nax tama nüxü̃ yangauxü̃ca̱x i ngẽma nama i nagu yaxũxü̃.

Ichaía 29:24

Rü ngẽma choxna ixĩgachixü̃ rü tá choxna nacua̱xãchie. Rü ngẽma chixri chauchiga idexagüxü̃ rü tá nanayauxgü i chorü ngu̱xẽẽtae —ñanagürü ya Tupana.

Yochué 3:4

Rü ngẽmaãcü tá nüxü̃ pecua̱x nax ngextáama pexĩxü̃ yerü ga ü̃pa rü taguma texé i petanüwa nagu tixũ i ngẽma nama. ¡Natürü taxúetama nüxna tangaicama i ngẽma baú! ¡Rü guxü̃gutáma wüxi i quirumétru tá nixĩ i nüxna peyáxü̃guxü̃! —ñanagürügü.

Echequié 14:23

Rü ngẽxguma nüxü̃ pedaugügu nax ñuxãcü chixexü̃gu namaxẽxü̃ i nümagü rü ngẽma chixexü̃ i naxügüxü̃ rü taxũtáma pengechaxü̃gü naxca̱x i guxü̃ma i ngẽma Yerucharéü̃maxã changupetüxẽẽxü̃. Rü ngẽxguma i pema rü tá nüxü̃ picua̱xãchitanü nax tama natüca̱xma nixĩ i Yerucharéü̃ca̱x íchanguxẽẽxü̃ i guxü̃ma i ngẽma poxcugü. Rü choma ya Cori ya Tupana nixĩ i cumaxã nüxü̃ chixuxü̃ i ngẽma —ñanagürü.

Ichaía 54:13

Rü choma tá chanangúexẽxẽ i guxü̃ma i penegü, rü ngẽmaãcü guxãtáma taãẽwa tamaxẽ.

Ichaía 41:3

Rü ngẽma ãẽ̱xgacü i éstewa ne ũxü̃ rü nama i taguma nagu yaxũxü̃gu paxãma nixũ. Rü tauxchaãcüma ngẽma togü i nachixü̃anegüxü̃ narüporamae rü taxúema ítayachaxãchixẽxẽ.

Ngu̱xẽẽtaeruü̃arü ore 7:13

Rü dücax, ¡mea nagu rüxĩnü rü mea nangugü i ngẽma Tupana üxü̃! ¿Rü texé tüxü̃́ nangẽxma i pora nax itayanawe̱xãchixẽẽxü̃ i ngẽma Tupana wü̃xẽxẽxü̃?

Ngu̱xẽẽtaeruü̃arü ore 1:15

Rü wüxi i ta̱xacü i wü̃xü̃ rü taxuacü itanawe̱xãchixẽxẽ. Rü ngẽma tama tüxü̃́ ngẽxmaxü̃ rü taxuacü tayaxugü.

Ngechuchuarü ngúexü̃gü ga yamugüxü̃arü puracüchiga 26:18

Rü cuxü̃ chamu nax ngẽma duü̃xü̃güxü̃ choxü̃ cucua̱xẽẽxü̃ca̱x rü nüxü̃ naxoexü̃ca̱x i nacüma i chixexü̃gü rü chauga naxĩnüexü̃ca̱x. Rü cuxü̃ chamu nax Chatanáme̱xẽwa ícunanguxü̃xẽẽxü̃ca̱x i ngẽma duü̃xü̃gü nax chowe naxĩxü̃ca̱x rü choxü̃́ yaxõgüãxü̃ca̱x nax choma nüxü̃́ nüxü̃ icharüngümaxü̃ca̱x i norü pecadugü, rü nüxü̃́ nangẽxmaxü̃ca̱x i nachica natanüwa i guxü̃ma i chorü duü̃xü̃gü i üünegüxü̃”, ñanagürü choxü̃ ga Cori.

Nüxíraxü̃xü̃ ga popera ga Pedru ümatüxü̃ 2:9

Natürü pema nixĩ i duü̃xü̃gü i tórü ãẽ̱xgacü ya Tupana pexü̃ dexü̃ nax norü puracü pexügüxü̃ca̱x. Rü pema nixĩ i duü̃xü̃gü i nape̱xewa ixüünexü̃, erü nümatama ya Tupana rü norü duü̃xü̃güxü̃ pexü̃ nixĩgüxẽxẽ nax nüxü̃ pixuxü̃ca̱x i ngẽma mexü̃gü i norü poramaxã naxüxü̃. Rü nümatama ya Tupana nixĩ ga ẽanexü̃wa pexü̃ ínanguxü̃xẽẽxü̃ nax norü ngóonexü̃ i mexẽchixü̃gu pechocuxü̃ca̱x.

Ichaía 26:7

Yíxema aixcüma Tupanape̱xewa mea maxẽ, rü tümacüma rü nawe̱xgu. Rü cumax, Pa Cori Pa Tupanax, rü tüxü̃ curüngü̃xẽxẽ nax yawéxü̃ca̱x i tümacüma.

Ichaía 30:18

Natürü nüma ya Cori ya Tupana rü pexü̃ ínanangu̱xẽxẽ nax naxca̱x pewoeguxü̃ nax ngẽmaãcü nüxü̃́ pengechaü̃tümüxü̃güxü̃ca̱x. Rü nüma rü ínamemare nax pexü̃ nawéaxü̃ nax poraãcü pexü̃ nangechaü̃xü̃. Erü nüma ya Cori ya Tupana rü aixcüma mexü̃ namaxã naxuegu i ngẽma naga ĩnüexü̃. Rü tá taãẽgü ya guxãma ya yíxema nüxü̃́ yaxõgüxe.

Ichaía 41:17

Rü yíxema ngearü diẽruã̱xgüxe rü tita̱xawae rü naxca̱x tadaugü i dexá natürü taxuxü̃ma itayangaugü. Rü ta̱xawamaxã tipaarü conüã̱x. Natürü choma ya Cori ya Tupana rü tá tüxü̃ charüngü̃xẽxẽxü̃, rü choma nax Iraétanüxü̃arü Tupana chixĩxü̃ rü taxũtáma tüxü̃ íchawogümare.

Ichaía 45:7

Rü choma nixĩ ga chanango̱xẽẽxü̃ ga ngóonexü̃ rü waanexü̃. Rü choma nixĩ i íchananguxẽẽxü̃ i mexü̃ rü guxchaxü̃. Rü chomatama ya Tupana nixĩ i chanaxüxü̃ i guxü̃ma i ngẽma —ñanagürü.

Ichaía 52:12

¡Natürü taxuca̱xma ñu̱xãẽãcü ípechoxü̃ rü pibuxmü! Erü nüma ya perü Tupana i pema i Iraétanüxü̃ rü tá pexna nadau i guxü̃ma i ãũcümaxü̃wa.

Ichaía 62:12

Rü ngẽma togü i nachixü̃anegü rü tá ñanagürügü: —Iraétanüxü̃ rü Tupanaarü Duü̃xü̃gü i Üünexü̃ nixĩgü. Rü nüma ya Tupana rü marü ínananguxü̃xẽxẽ. Rü yima norü ĩane ya Yerucharéü̃ rü Ĩane ya Poraãcü Ngúchaxü̃ne nixĩ rü Ĩane ya Tama Ngéma Ta̱xmarene nixĩ —ñanagürügü tá.

Amúx 5:8

Rü nüma ya Cori ya Tupana nixĩ ga naxüxü̃ i ngẽma ẽxtagütücumü i Préyadegu ãégaxü̃ rü ngẽma ẽxtagütücumü i Orióü̃gu ãégaxü̃. Rü ngẽxguma nachütagu rü nüma ínanangu̱xẽxẽ i ngóonexü̃. Rü ngẽxguma nangóonegu rü nüma rü ínanangu̱xẽxẽ i chütaxü̃. Rü nüma nixĩ i caixanexü̃xü̃ yanguxuchixẽẽãxü̃ i már arü dexá nax dauxü̃ naxĩxü̃ca̱x rü ñu̱xũchi ñoma i naanegu nax napuxẽẽãxü̃ca̱x. Rü naéga rü Cori ya Tupana nixĩ.