Ichaía 42:1 - Tupanaarü Ore

¹ Nüma ya Cori ya Tupana rü ñanagürü: —Daa nixĩ ya yimá chorü duü̃ ya chaporaxẽẽcü rü nüxü̃ chaxunetacü rü namaxã chataãẽcü. Rü nüxna nixĩ i chanamuxü̃ i Chauãxẽ i Üünexü̃ nax ngẽmaãcü guxü̃ i nachixü̃anegümaxã mea inacuáxü̃ca̱x.

Ichaía 42:1 Referans Kwoze

Ore i mexü̃ ga Luca ümatüxü̃ 3:22

Rü Tupanaãxẽ ya Üünecü rü wüxi ga muxtucurüxü̃ inanago rü Ngechuchuna nangu. Rü daxũwa inanaxũ ga wüxi ga naga ga ñaxü̃: —Cuma nixĩ, Pa Chaunex, i cuxü̃ changechaü̃xü̃chixü̃ rü cumaxã chataãẽxü̃ —ñaxü̃.

Ichaía 61:1

Tupanaãxẽ i Üünexü̃ rü chowa nangẽxma, erü Tupana rü choxü̃ naxuneta rü choxü̃ inamuãchi nax yíxema ngearü diẽruã̱xgüxemaxã nüxü̃ chixuxü̃ca̱x i mexü̃ i ore rü tüxü̃ chataãẽxẽẽgüxü̃ca̱x ya yíxema naxĩ̱xãchiãẽgüxe. Rü choxü̃ naxuneta nax yíxema to i nachixü̃anewa gagüxemaxã nüxü̃ chixuxü̃ca̱x nax paxa tá ítanguxü̃xü̃ rü yíxema poxcupataxü̃wa ngẽxmagüxe rü tá ta ítanguxü̃xü̃

Ichaía 52:13

Rü nüma ya Cori ya Tupana rü ñanagürü: —Yimá chorü duü̃ rü tá norü uanüxü̃ narüporamae rü tá chanatachigaxẽxẽ.

Filipenses 2:7

Rü yemaca̱x yéma nanata̱x ga norü mexü̃gü ga daxũguxü̃ ga naanewa. Rü wüxi i mugüruxü̃ nügü nixĩxẽxẽ. Rü ñoma wüxi i duü̃xü̃rüxü̃ ñoma ga naanegu nabu. Rü yexguma marü duü̃xü̃ yixĩxgu ga nümax, rü ñoma taxuxü̃ma yixĩxü̃rüxü̃ nügü nixĩxẽxẽ. Rü Tupanaga naxĩnü ñu̱xmata curuchagu nayu.

Ichaía 43:10

Rü ñanagürü ta ga Tupana: —Pemax, Pa Iraétanüxü̃x, rü chorü duü̃xü̃gü pixĩgü rü nüxü̃ pedau ga yema choma chaxüxü̃. Rü choma rü pexü̃ chidexechi nax choxü̃ pecuáxü̃ca̱x rü choxü̃́ peyaxõgüxü̃ca̱x rü nüxü̃ pecuáxü̃ca̱x nax chaxicatama Tupana chixĩxü̃. Rü chauxü̃pa rü nataxuma ga to ga nüxíra Tupana ixĩxü̃ rü chauwena rü tagutáma nangẽxma i to.

Ore i mexü̃ ga Matéu ümatüxü̃ 17:5

Rü yexguma íyadexayane ga Pedru rü wüxi ga caixanexü̃ ga nangóonexẽẽxü̃ rü natanügu nayanga̱i̱xema. Rü yema caixanexü̃wa inanaxũ ga wüxi ga naga ga ñaxü̃: —Daa nixĩ ya Chaune ya nüxü̃ changechaü̃xü̃chicü rü namaxã chataãẽxü̃chicü. ¡Rü naga pexĩnüe! —ñanagürü.

Ichaía 53:11

Natürü nawena nax ngúxü̃ yangexü̃, rü tá nataãxẽ erü nüxü̃ nacua̱x nax norü yugagu muxü̃ma i duü̃xü̃gü tá nanayauxgü i maxü̃ i taguma gúxü̃. Rü nüma ya Cori ya Tupanaarü duü̃ ya mecü rü tá Tupanape̱xewa nayamexẽxẽ i muxü̃ma i duü̃xü̃gü rü tá nayange i norü pecadugü.

Nüxíraxü̃xü̃ ga popera ga Pedru ümatüxü̃ 2:4

Rü ñu̱xma rü name nixĩ i nüxna pengaicamagü ya Cristu ya nuta ya maxü̃cü. Rü duü̃xü̃gü nüxü̃ oecü, natürü Tupanaca̱x rü namexẽchi rü natatanü. Rü yimá nixĩ ya Tupana nayaxucü nax namaxã inaxügüãxü̃ca̱x ya napata.

Efesios 3:8

Rü chaugüca̱x rü choma nixĩ i guxü̃ i Tupanaarü duü̃xü̃güarü ñaxtüwaama chaxüxü̃. Natürü Tupana choxü̃ nangechaü̃ rü choxna nanaxã i ngẽma puracü i mexü̃ nax ngẽma tama Yudíugü ixĩgüxü̃maxã nüxü̃ chixuxü̃ca̱x ga yema mexü̃gü ga taguma iyagúxü̃ ga taxca̱x naxüxü̃ ga Cristu.

Ichaía 41:8

Rü yexguma ga Cori ya Tupana rü ñanagürü: —Iperüxĩnüe, Pa Iraétanüxü̃x. Pema rü chorü duü̃ ya Acóbu ya nüxü̃ chaxunetacüarü duü̃xü̃gü pixĩgü rü chomücü ya Abraáü̃taagü pixĩgü.

Efesios 1:6

Rü yemaacü nanaxü ga Tupana nax guxü̃guma nüxü̃ icua̱xüü̃güxü̃ca̱x naxca̱x i norü ngechaü̃ rü norü mecüma ga yexguma taxca̱x núma namuãxgu ga Nane ya nüxü̃ nangechaü̃xü̃chicü.

Ore i mexü̃ ga Cuáü̃ ümatüxü̃ 3:34

Rü yimá Tupana núma namucü, rü Tupanaarü orexü̃ nixu. Erü Tupana rü nüxna nanamu i Naãxẽ ya Üünexü̃ nax guxü̃guma naxü̃tawa nangẽxmaxü̃ca̱x.

Colosenses 1:13

Yerü nüma ga Tupana rü marü Chatanáme̱xẽwa tüxü̃ ínanguxü̃xẽxẽ rü Nane ya nüxü̃ nangechaü̃cüme̱xẽwa tüxü̃ nangẽxmagüxẽxẽ.

Efesios 1:4

Rü taxũtáma naane uxgu, rü Cristugagu Tupana tüxü̃ nade nax ixüünegüxü̃ca̱x rü nax nataxuxü̃ca̱x i tórü chixexü̃ i nape̱xewa. Rü nüma ya Tupana rü poraãcü tüxü̃ nangechaü̃, rü yemaca̱x nũxcümamatama tüxü̃ naxuneta nax Ngechuchugagu naxacügüxü̃ tüxü̃ nadexü̃ca̱x. Rü yemaacü nanaxü ga Tupana yerü yema nixĩ ga norü ngúchaü̃.

Ngechuchuarü ngúexü̃gü ga yamugüxü̃arü puracüchiga 10:38

Rü pema nüxü̃ pecua̱x nax Tupana naporaxẽẽxü̃ ga Ngechuchu ya Nacharétucüã̱x rü nüxna namuaxü̃ ga Naãxẽ ya Üünecü. Rü nüma ga Ngechuchu rü mexü̃ naxü ga yema íyaxũgüxü̃wa, rü nanameexẽxẽ ga guxü̃ma ga yema ngo̱xome̱xẽwa yexmagüxü̃, yerü Tupana nüxü̃ narüngü̃xẽxẽ.

Ichaía 59:21

Rü nüma ya Tupana rü ñanagürü: —Ñaa nixĩ i chorü uneta i ngẽma duü̃xü̃gümaxã nüxü̃ chixuxü̃: “Rü ngẽma Chauãxẽ i cuwa ngẽxmaxü̃, rü ngẽma chorü ore i cua̱xwa ngẽxmaxü̃ rü tagutáma cuxna rü cunegüna rü cutaagüna nixũgachi” —ñanagürü ya Cori ya Tupana.

Nüxíraxü̃xü̃ ga popera ga Pedru ümatüxü̃ 2:6

Rü Tupana rü norü ore i ümatüxü̃wa rü ñanagürü: “Choma rü Chióü̃gu chanaxǘ ya wüxi ya nuta, rü yimá nixĩ ya nuta ya mexẽchicü ya chomatama chanayaxucü nax chopata namaxã ichaxügüxü̃ca̱x. Rü yíxema nüxü̃́ yaxṍxe, rü taxũtáma tüxü̃ chawomüxẽxẽ rü aixcüma tá tanayaxu i maxü̃ i taguma gúxü̃ i tümamaxã ichaxunetaxü̃”, ñanagürü.

Ngechuchuarü ngúexü̃gü ga yamugüxü̃arü puracüchiga 28:28

Rü ñanagürü ta ga Pauru: —Rü name nixĩ nax nüxü̃ pecuáxü̃ nax ñu̱xmawena ngẽma tama Yudíugü ixĩgüxü̃maxã nüxü̃ ixuxü̃ i ñaa Tupanaarü ore i tüxü̃ maxẽxẽẽxü̃. Rü nümagü tá nixĩ i aixcüma inaxĩnüexü̃ —ñanagürü.

Ngechuchuarü ngúexü̃gü ga yamugüxü̃arü puracüchiga 9:15

Natürü nüma ga Cori rü ñanagürü nüxü̃: —¡Ngéma naxũ! Erü choma chanayaxu i ngẽma yatü nax choxü̃ yaxuchigaxü̃ca̱x namaxã i togü i nachixü̃anecüã̱xgü i duü̃xü̃gü rü norü ãẽ̱xgacügü, rü ngẽma Iraétanüxü̃.

Ore i mexü̃ ga Luca ümatüxü̃ 9:35

Rü yema caixanexü̃wa inanaxũ ga wüxi ga naga ga ñaxü̃: “Daa nixĩ ya Chaune ya nüxü̃ changechaü̃xü̃chicü. ¡Rü naga pexĩnüe!” ñaxü̃.

Chacaría 3:8

¡Rü dücax, Pa Yochuéx, rü mea rüxĩnü i cuma nax chacherdótegüarü ãẽ̱xgacü quixĩxü̃! Rü ngẽxgumarüxü̃ ta i cumücügü rü name nax mea inaxĩnüexü̃, erü pema rü wüxi i cua̱xruxü̃ pixĩgü nachiga ya yíxema tá nua chanaxũxẽxẽcü. Erü paxa tá nua petanüwa chanamu i wüxi i choxrü duü̃xü̃ i Dabítaxa i perü ãẽ̱xgacü tá ixĩcü.

Ichaía 2:4

Rü nüma ya Cori ya Tupana rü tá nanamexẽxẽ i guxü̃ma i nachixü̃anegüarü guxchaxü̃gü. Rü ngẽma nachixü̃anegü i nügümaxã nuexü̃ rü Cori ya Tupana rü tá nügümaxã nanangüxmüexẽxẽ. Rü ngẽma naxnegü i namaxã nügü nada̱i̱xü̃ rü norü puracüruxü̃ tá nayaxĩgüxẽxẽ. Rü taxuxü̃táma i ĩanegü daigu nügümaxã narüxĩnüe rü bai tá i daica̱x nügü nax nangúexẽẽxü̃.

Ngechuchuarü ngúexü̃gü ga yamugüxü̃arü puracüchiga 11:18

Rü yexguma yema orexü̃ naxĩnüegu ga yema yaxõgüxü̃ ga Yerucharéü̃cüã̱x, rü nachianegümare. Rü Tupanaxü̃ nicua̱xüü̃gü. Rü ñanagürügü: —Rü ngẽmawa nüxü̃ tacua̱x nax Tupana tüxü̃ dexü̃ ya yíxema woo tama Yudíugü ixĩgüxe. Rü ngẽxguma nüxü̃ tarüxoegu i tümaarü chixexü̃ rü Tupanaca̱x tadaugügu, rü nüma tüxna nanaxã i maxü̃ i taguma gúxü̃ —ñanagürügü.

Ore i mexü̃ ga Cuáü̃ ümatüxü̃ 16:32

Rü nawa tá nangu i ngunexü̃ rü ñu̱xmatátama nixĩ i nax pegü pewoonexü̃. Rü wüxichigü i pema rü tá pepatawa pexĩ, rü chaxica tá nua choxü̃ peta̱x. Natürü tama chaxica changexma, erü Chaunatü rü chauxü̃tawa nangẽxma.

Ore i mexü̃ ga Cuáü̃ ümatüxü̃ 6:27

¡Taxṹ i naxca̱x pexoegaãẽgüxü̃ i õna i paxãma gúxü̃! Rü narümemae nixĩ i naxca̱x pexoegaãẽgü i ngẽma õna i maxü̃ i taguma gúxü̃ pexna ãxü̃. Rü ngẽma nixĩ i maxü̃ ya Tupana Nane ya duü̃xü̃xü̃ ixĩcü tá pexna ãxü̃, erü Chaunatü ya Tupana rü marü nanango̱xẽxẽ nax aixcüma Nane chixĩxü̃ —ñanagürü.

Maraquía 1:11

Rü guxü̃ma i nachixü̃anegü i ñoma i naanecüã̱x rü duü̃xü̃gü choxü̃ nicua̱xüü̃gü, rü pumarate̱xe cha̱u̱xca̱x nigugü rü ãmare choxna naxãgü.

Ichaía 32:16

Rü ngẽma nachixü̃anewa rü guxü̃watama i duü̃xü̃gü rü we̱xgu tá namaxẽ rü tá aixcüma nügümaxã namecümagü.

Ore i mexü̃ ga Luca ümatüxü̃ 4:18

“Cori ya Tupanaãxẽ rü chowa nangẽxma. Rü nüma rü choxü̃ naxuneta nax nüxü̃ chixuxü̃ca̱x i ore i mexü̃ namaxã i ngẽma duü̃xü̃gü i ngearü diẽruã̱xgüxü̃. Rü choxü̃ namu nax yema duü̃xü̃gü ga norü uanügü to ga nachixü̃anewa gagüxü̃maxã nüxü̃ chixuxü̃ca̱x rü tá nax ínanguxü̃xü̃. Rü choxü̃ namu nax ngẽma ingexetügüxü̃ chidauuchixẽẽxü̃ca̱x rü nax íchananguxü̃xẽẽxü̃ca̱x i ngẽma duü̃xü̃gü i togüme̱xẽwa ngẽxmagüxü̃.

Ore i mexü̃ ga Luca ümatüxü̃ 4:19

Rü núma choxü̃ namu nax duü̃xü̃gümaxã nüxü̃ chixuxü̃ca̱x nax Tupana tá nüxü̃ rüngü̃xẽẽxü̃”, ñanagürü ga yema ore.

Naanearü ügüchiga 49:10

Rü nüma ya Yudá rü taxúetama nüxna tanayaxu i ngẽma norü pora. Rü yimá naixmena̱xã ya norü poraarü cua̱xruxü̃ ya naxme̱xwa ngẽxmane rü taxúetama nüxna tanayaxu ñu̱xmatáta ínangu ya yimá naixmena̱xãarü yora ya guxü̃arü ãẽ̱xgacü ixĩcü. Rü yimága tá nixĩ i naxĩnüexü̃ i guxü̃ma i duü̃xü̃gü.

Ichaía 41:9

Rü choma nixĩ ga yema nachixü̃ane ga yáxü̃guxü̃wa pexü̃ íchanguxü̃xẽẽxü̃. Rü yema naane ga yáxü̃wa yexmaxü̃wa nixĩ ga pexca̱x chacaxü̃ rü pexü̃ ñachaxü̃: “Pema rü chorü duü̃xü̃gü pixĩxgü”, ñachaxü̃. Choma nixĩ ga pexü̃ chadexü̃ rü tama pexü̃ chaxoxü̃.

Ichaía 42:2

Rü nüma rü namecüma. Rü tagutáma nipura, rü taxúexü̃táma nanga i ĩanemaxü̃güwa.

Aguéu 2:23

Natürü i cuma nax chorü duü̃ quixĩxü̃, Pa Chorobabé i Charatié Nanex, rü ngẽma ngunexü̃gu rü choma rü tá cuxna chadau ngẽma chorü ãnera i chauéga nawa ngẽxmaxü̃rüxü̃, yerü choma nixĩ ga cuxü̃ chaxunetaxü̃. Rü choma i Cori ya Tupana ya Guxãétüwa Ngẽxmacü nixĩ i cumaxã nüxü̃ chixuxü̃ i ngẽma” —ñanagürü.

Wiyaegü 72:4

Rü chanaxwa̱xe i nüma ya ãẽ̱xgacü rü mea tümamaxã inacua̱x ya yíxema ingearü ngẽmaxü̃ã̱xgüxe, rü tüxü̃ narüngü̃xẽxẽ ya tümaxacügü ya yíxema tüxü̃́ nataxúxe, rü napoxcueã i ngẽma chixri norü duü̃xü̃gümaxã icua̱xgüxü̃.

Wiyaegü 89:4

—Rü tá cutaagümaxã chanaxuegu nax nümagü tá yixĩxü̃ i guxü̃gutáma cuchicüxü ãẽ̱xgacügü yixĩgüxü̃ i Iraétanüwa —ñacurügü nüxü̃.

Ichaía 50:10

Rü pema nax Tupanaxü̃ pemuü̃exü̃ rü norü duü̃xü̃ga pexĩnüexü̃, rü ngẽxguma waanexü̃wa i omü ínataxuxü̃wa pexĩxgu rü ¡Tupanagu perüxĩnüe rü nüxü̃́ peyaxõgü!

Ichaía 63:1

—¿Texé tixĩ ya yíxema tümachiru i daucharaxü̃maxã ĩane ya Bochráwa ne ũxẽ i Edóü̃arü naanewa? ¿Rü texé tixĩ ya poraãcü rü nuãcü tümachiru i mexẽchixü̃maxã ngéma ne ũxẽ? Rü choma i Iraétanüxü̃arü Tupana chixĩ i nüxü̃ chixuxü̃ nax charüporamaexü̃. Rü choxü̃́ nangẽxma i pora nax íchananguxü̃xẽẽxü̃.