Ichaía 41:4 - Tupanaarü Ore

⁴ ¿Rü texé tixĩ ya nüxna namugüxe i ngẽma ãẽ̱xgacü i éstewa ne ũxü̃? ¿Rü texé tixĩ i namaxã icuáxe i guxü̃ma i ngẽma ñoma i naanewa ngupetüxü̃? Rü choma nax chaxicatama Tupana chixĩxü̃ nixĩ i chanaxüxü̃ i guxü̃ma i ngẽma. Rü choma rü woetama changexmaecha rü taguma icharüxo.

Ichaía 41:4 Referans Kwoze

Yema Cuáü̃ nüxü̃ dauxü̃ i yixcüra tá ngupetüxü̃chiga 22:13

Choma nixĩ i norü ügü i guxü̃ma, rü chowa nixĩ i yacuáxü̃, rü nataxuma i ta̱xacü i nüxíra ngẽxmaxü̃ rü nataxuma i ta̱xacü i choweama üxü̃.

Ichaía 48:12

Rü ñanagürü ga Tupana: —¡Perüxĩnüe Pa Acóbuarü Duü̃xü̃güx, Pa Iraétanüxü̃x! Choma nixĩ i pexü̃ chadexü̃. Rü chaxicatama nixĩ ya Tupana chixĩxü̃, rü guxü̃guma changexmaecha rü taguma icharüxo.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:17

Rü yexguma nüxü̃ chada̱u̱xgu, rü nape̱xegu chayangu ñoma chayuxü̃rüxü̃. Natürü ga nüma rü norü tügüneme̱xẽmaxã choxü̃ ningõgü, rü ñanagürü choxü̃: “¡Taxṹ i cumuü̃xü̃! Choma nixĩ i chaxíra chayexmaxü̃ rü guxü̃gutáma changexmaechaxü̃.

Ichaía 41:26

¿Rü noxriarü ügügutama texé tixĩxü̃ ga nüxü̃ ixuxe i ngẽma tá ngupetüxü̃ nax ngẽmaãcü nüxü̃ icuáxü̃ca̱x? ¿Rü texé tixĩxü̃ ga naxü̃pa nüxü̃ ixuxe i ngẽma tá ngupetüxü̃ nax ngẽmaãcü nüxü̃ tixugüxü̃ca̱x nax aixcüma yixĩxü̃ i ngẽma nüxü̃ tixuxü̃? Rü pema nax tupananetagü pixĩgüxü̃ rü petanüwa taxúema tixĩ ga nüxü̃ ixuxe i ngẽma tá ngupetüxü̃, rü bai ya texé nüxü̃ ĩnüxü̃ i wüxi i perü dexa nachiga i ngẽma tá ngupetüxü̃.

Ichaía 46:10

Rü choma rü noxriarü ügügutama rü ñu̱xmata norü gu̱xwa nangu rü nüxü̃ chixu i ngẽma tá wüxichigü i ngunexü̃ ngupetüxü̃. Rü naxü̃patama nüxü̃ chixu i ngẽma tá ínguxü̃. Rü choma nüxü̃ chixu, rü ngẽma nagu charüxĩnüxü̃ rü tá ningu. Rü ngẽma nüxü̃ chixuxü̃ rü tá chayanguxẽxẽ.

Ichaía 43:10

Rü ñanagürü ta ga Tupana: —Pemax, Pa Iraétanüxü̃x, rü chorü duü̃xü̃gü pixĩgü rü nüxü̃ pedau ga yema choma chaxüxü̃. Rü choma rü pexü̃ chidexechi nax choxü̃ pecuáxü̃ca̱x rü choxü̃́ peyaxõgüxü̃ca̱x rü nüxü̃ pecuáxü̃ca̱x nax chaxicatama Tupana chixĩxü̃. Rü chauxü̃pa rü nataxuma ga to ga nüxíra Tupana ixĩxü̃ rü chauwena rü tagutáma nangẽxma i to.

Ngechuchuarü ngúexü̃gü ga yamugüxü̃arü puracüchiga 17:26

Nüma rü wüxi ga duü̃xü̃watama nanaxü ga guxü̃ma ga duü̃xü̃gü nax guxü̃ i naanewa nangẽxmagüxü̃ca̱x. Rü nüma inaxuneta i ñuxgu tá nax nabuxü̃ i duü̃xü̃gü rü ngexta tá naxãchiü̃xü̃ i wüxichigü.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:8

Rü nüma ya tórü Cori ya Tupana ya Guxü̃étüwa Ngẽxmacü ya Guxü̃guma Yexmacü rü Ñu̱xma Ngẽxmacü, rü Guxü̃gutáma Ngẽxmaechacü rü ñanagürü: “Chowa nixĩ ga inaxügüxü̃ ga guxü̃ma, rü chowa nixĩ i yacuáxü̃”, ñanagürü.

Ichaía 42:24

¿Rü texé tixĩ ya guxema tauxcha nüxna ãxẽ ga yema Acóbutanüxü̃arü uanügü nax Iraégüxü̃ naporamaegüxü̃ rü ínayauxü̃ãxü̃? ¿Tama ẽ̱xna Cori ya Tupana yixĩxü̃? Yerü yema Iraétanüxü̃ rü Tupanape̱xewa chixexü̃ naxügü, rü tama Tupana naxwa̱xexü̃ãcü namaxẽ, rü tama naga naxĩnüechaü̃ ga yema norü ngu̱xẽẽtaegü.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:8

Rü yema chomaxã idexaxü̃ rü ñanagürü ta: “Chanaxwa̱xe i Echamírawa ngẽxmagüxü̃ i yaxõgüxü̃arü ãẽ̱xgacüca̱x cunaxümatü, rü ñacurügü tá: ‘Ñaa nixĩ i norü ore ya yimá Nüxíra Yexmacü rü Guxü̃guma Ngẽxmaechacü ga yucü rü wenaxarü maxü̃cü.

Ichaía 40:12

¿Rü texé ya tümachacume̱xẽmaxã inanguxe i már arü dexá, rüe̱xna tümatanüme̱xẽgümaxã nangugüxe i daxũguxü̃ i naanearü ta? ¿Rü texé wüxi i nguruü̃gu tanagücu i ñoma i naanearü waixü̃müte̱xe? ¿Rü texé yáruü̃wa tanayá ya guxü̃nema ya ma̱xpǘnegü?

Ngechuchuarü ngúexü̃gü ga yamugüxü̃arü puracüchiga 15:18

Rü yemaacü nüxü̃ nixu ga nüma ga Cori ya Tupana ga nũxcümama tüxü̃ nüxü̃ cua̱xẽẽcü ga yema” —ñanagürü ga yema ore ga nũxcüma ümatüxü̃.

Ore i mexü̃ ga Matéu ümatüxü̃ 28:20

¡Rü penangúexẽxẽ nax naga naxĩnüexü̃ca̱x i guxü̃ma i ngẽma pexü̃ chamuxü̃! Rü dücax, guxü̃gutáma pexü̃tawa changexmaecha ñu̱xmatáta nagú i naane —ñanagürü ga Ngechuchu.

Ore i mexü̃ ga Matéu ümatüxü̃ 1:23

“Rü tá tauemacü ngĩxü̃ inayarütaxu i ngẽma nge i taguma yatüxü̃ cua̱xcü. Rü tá nayatü. Rü Emanué tá nixĩ i naéga. Rü ngẽma naéga rü ‘Tupana rü tatanüwa nangẽxma’, ñaxü̃chiga nixĩ”, ñanagürü.

Ichaía 40:26

¡Dücax, daxũguxü̃ i naanegu perüdaunü rü nüxü̃ peda̱u̱x! ¿Rü texé tixĩ ya naxǘxe i guxü̃ma i ngẽma nüxü̃ pedauxü̃? Rü nüma ya Tupana nixĩ ga mea inanucü ga wüxichigü ga yema ẽxtagü rü woramacurigü rü ñu̱xũchi wüxichigü rü naégamaxã nüxna naca. Rü nataxüchi i norü pora rü mea guxü̃maxã inacua̱x, rü ngẽmaca̱x taguma wüxi i ẽxta natauxchica.

Wenaxarü naxümatü ga Tupanaarü mugü 32:39

Rü chaxicatama nixĩ ya Tupana chixĩxü̃, rü nataxuma i to i tupanagü i chauétüwa ngẽxmaxü̃. Rü choma nixĩ i pexna chanaxãxü̃ i maxü̃ rü ñu̱xũchi pexna chanayaxuxü̃. Rü choma nixĩ i ngúxü̃ pexca̱x íchanguxẽẽxü̃, rü ñu̱xũchi pexca̱x chayataanexẽẽxü̃. Rü tataxuma ya texé ya tama chorü poratüxü̃wa ngẽxmagüxe.

Wiyaegü 102:27

Natürü i cumax rü cunaxa̱i̱xrügumaraxü̃ rü curü taunecü rü taguma nagu̱x.

Ichaía 41:3

Rü ngẽma ãẽ̱xgacü i éstewa ne ũxü̃ rü nama i taguma nagu yaxũxü̃gu paxãma nixũ. Rü tauxchaãcüma ngẽma togü i nachixü̃anegüxü̃ narüporamae rü taxúema ítayachaxãchixẽxẽ.

Ichaía 43:13

Rü choma nixĩ i guxü̃guma Tupana chixĩxü̃. Rü cho̱xme̱xwa rü taxúema tümaarü poramaxã tügü ítapoxü̃. Rü ngẽma choma chaxüxü̃ rü taxúema tayanaxoxẽxẽ —ñanagürü.

Wiyaegü 102:28

Rü ngẽma nataagü i curü duü̃xü̃gü rü tá nüxna cudau. Rü ngẽma naane i toxna cuxãxü̃wa tá nangẽxmagüecha.