Ichaía 41:1 - Tupanaarü Ore

¹ Nüma ya Cori ya Tupana rü ñanagürü: —¡Iperüchianegü rü choxü̃́ iperüxĩnüe, Pa Márpechinüwa Ngẽxmagüxü̃ i Nachixü̃anegücüã̱x! ¡Rü pemax, Pa Guxü̃ma i Nachixü̃anegücüã̱x, ẽcü peporaãẽgü! ¡Rü nua pexĩ rü ngĩxã nachiga tidexagü i ngẽma tá ngupetüxü̃! ¡Rü ngĩxã nuxã wüxigu tangutaque̱xegü nax nachiga idexagüxü̃ca̱x!

Ichaía 41:1 Referans Kwoze

Ichaía 1:18

¡Ẽcü nua pexĩ rü ngĩxã perü chixexü̃chiga tidexagü! Rü ngẽxguma chi perü maxü̃ rü woo nadauxuchigu namaxã i perü chixexü̃, natürü i choma rü ñoma gáuxü̃chara i cómüxü̃chixü̃rüxü̃ tá chayaxĩxẽxẽ. Rü ngẽxguma chi woo wüxi i naxchiru i waxüchixü̃rüxü̃ yixĩxgu i perü pecadugü, natürü i choma rü ñoma wüxi i carnéruta̱xa i cómüxü̃chixü̃rüxü̃ tá chanacómüxẽxẽ.

Abacú 2:20

Natürü nüma ya Cori ya Tupana ya Maxü̃cü rü napata ya üünenewa nangẽxma. Rü guxãma i pema i ñoma i naanecüã̱x rü name nixĩ i nape̱xewa pechianegümare.

Chacaría 2:13

Rü name nax Cori ya Tupanape̱xewa narüchianegüxü̃ i guxü̃ma i ñoma i naanearü duü̃xü̃gü. Erü nüma rü nachica i üünexü̃wa ne naxũ nax tatanüwa naxũxü̃ca̱x.

Wiyaegü 46:10

Rü nüma ya Tupana rü ñanagürü: —Pa Nachixü̃anegüarü Ãẽ̱xgacügüx ¡choxü̃́ iperüxĩnüe! ¡Rü nagu perüxĩnüe nax choma rü Tupana chixĩxü̃! Rü choma nixĩ i namaxã ichacuáxü̃ i guxü̃ma i nachixü̃anegü. Rü choma nixĩ i guxü̃ma i ñoma i naaneétüwa changexmaxü̃ —ñanagürü.

Ichaía 34:1

¡Pa Guxü̃ma i Nachixü̃anecüã̱x, dücax, nua pexĩ rü iperüxĩnüe i ngẽma tá pemaxã nüxü̃ chixuxü̃! ¡Rü nüxü̃ naxĩnü i ñoma i naane rü guxü̃ma i nawa ngẽxmagüxü̃! ¡Rü nüxü̃ naxĩnü i guxü̃ma i naane rü guxü̃ma i ngẽma nawa yaexü̃!

Ichaía 11:11

Rü ngẽxguma yimá Dabítaxa ingucuchigu nax ãẽ̱xgacü yixĩxü̃ca̱x rü nüma ya Cori ya Tupana rü tá wena inanawe̱x i norü pora. Rü wena tá nanangutaque̱xexẽxẽ i norü duü̃xü̃gü i Achíriaanewa, rü Equítuanewa, rü Patróxanewa, rü Etiopíaanewa, rü Eráü̃anewa, rü Chináxanewa, rü Amáanewa rü nachixü̃anegü i márcutüwa ngẽxmagüxü̃wa. Rü tá wena Iraéaneca̱x nanawoeguxẽxẽ.

Yox 38:3

Rü ñu̱xma ega cugü ícurüporagu, rü chanaxwa̱xe i choxü̃ cunawe̱x nax tama cumuü̃xü̃ nax choxü̃ cungãxü̃xü̃ i ngẽma cuxna tá naxca̱x chacaxü̃.

Ichaía 50:8

Rü yimá chorü poxü̃ruxü̃ rü chauxü̃tawa nangẽxma. Rü ngẽxguma chi texé tüxü̃́ nangẽxmagu i ta̱xacüca̱x choxü̃ ítaxuaxü̃xü̃, rü ngĩxã wüxigu ãẽ̱xgacüpe̱xewa taxĩ. Rü ngẽxguma chi texé choxü̃ ixuxchaü̃gu rü ẽcü nua taxũ rü chope̱xewa chomaxã nüxü̃ tixu.

Ichaía 49:1

Pema i nachixü̃anegü i márpechinüwa ngẽxmagüxü̃ rü pema i nachixü̃anegü i yáxü̃wa ngẽxmagüxü̃, ¡rü choxü̃́ iperüxĩnüe! Nüma ya Cori ya Tupana choxü̃ naxuneta naxü̃pa nax chabuxü̃. Rü nüxü̃ nixu i chauéga ga yexguma chaueanüwatama chayexmagu.

Ichaía 48:16

¡Rü nua pexĩ rü choxü̃́ iperüxĩnüe! Rü guxü̃ma ga yema nagu charüxĩnüxü̃ rü noxriarü ügügucürüwa rü taguma cúãcü nüxü̃ chixu. Rü yexguma Chíru Babiróniaxü̃ rüporamaegu rü choma rü yéma chayexma. Rü ñu̱xma i choma ya Cori ya Tupana ya Guxü̃étüwa Changexmaxü̃ rü chanamu i Chíru rü nüxna chanaxã i pora —ñanagürü.

Ichaía 40:31

Natürü yíxema aixcüma Cori ya Tupanaaxü̃́ yaxṍxe rü guxü̃gutáma tüxü̃́ ningexwaca̱xü̃chigü i tümaarü pora. Rü ñoma ĩyügürüxü̃ rü tá taporaama. Rü woo ngẽxguma poraãcü itañaãchigu rü taxũtáma nagu̱x i tümaarü pora. Rü woo ngẽxguma yáxü̃wa taxũxgu, rü taxũtáma tipa.

Ichaía 41:5

Rü yema márpechinüwa yexmagüxü̃ ga nachixü̃anegücüã̱x rü yexguma norü uanüxü̃ nadaugügu nax norü churaragümaxã yéma ne naxũxü̃ rü guxü̃wama ga naanewa muü̃maxã nidu̱xruxe ga duü̃xü̃gü —ñanagürü ya Tupana.

Ichaía 43:9

Rü guxãma i pema i guxü̃ i nachixü̃anecüã̱xgü, rü pengutaque̱xe rü wüxiwa pexĩ rü chomaxã nüxü̃ pixu, ¿Texé tixĩ i petanüwa ga naxü̃pa nüxü̃ cuáxe rü nüxü̃ ixuxe ga yema tá ngupetüxü̃? ¡Ẽcü, nua tanagagü ga yema nüxü̃ daugüxü̃ nax nüxü̃ yaxugüexü̃ca̱x nax aixcüma naxü̃pa nüxü̃ tacuáxü̃ rü nüxü̃ tixuxü̃ ga yema ngupetüxü̃! —ñanagürü.

Ichaía 43:26

Rü ngẽxguma chi nagu perüxĩnüegu nax dora yixĩxü̃ nax chixexü̃ chope̱xewa pexüxü̃, rü ngĩxã nachiga tidexagü nax nüxü̃ icuáxü̃ca̱x rü aixcüma yixĩxü̃ i nataxuxü̃ma i perü chixexü̃ i chope̱xewa pexüxü̃.