Ichaía 40:2 - Tupanaarü Ore

² ¡Rü nüxü̃ pengechaü̃ãcüma ngẽma Yerucharéü̃cüã̱xgümaxã pidexagü! ¡Rü namaxã nüxü̃ pixu nax marü iyacuáxü̃ nax togüme̱xẽwa nangẽxmagüxü̃ rü marü nanaxütanü i norü chixexü̃gü! Rü guxü̃ma ga yema norü chixexü̃ ga naxügüxü̃ca̱x, rü taxree̱xpü̱xcüna nüxü̃ chanaxütanüxẽxẽ —ñanagürü ga Tupana.

Ichaía 40:2 Referans Kwoze

Chacaría 9:12

Rü pema i ñu̱xma yáxü̃gu pepoxcuexü̃, natürü ípenangu̱xẽẽama nax perü ĩaneca̱x tá pewoeguxü̃. ¡Rü ẽcü perü ĩaneca̱x pewoegu! Rü pemaxã nüxü̃ chixu rü pema i poraãcü ngúxü̃ nax pingegüxü̃ rü ngẽmaarü yexera tá poraãcü pexü̃ charüngü̃xẽxẽxü̃.

Ichaía 61:7

Rü pema, Pa Chorü Duü̃xü̃güx, rü taxree̱xpü̱xcüna ngúxü̃ pingegü rü chixexü̃ pemaxã nixugüe rü yemagagu ãne pingegü. Rü ngẽmaca̱x i ñu̱xmax rü taxree̱xpü̱xcüna tá penayaxu i ngẽma pexna üxü̃. Rü guxü̃gutáma petaãẽgü.

Ochéa 2:14

Rü ñanagürü ta: —Natürü i chomax, rü wena tá chaugüna chayapuexẽxẽ i ngẽma Iraéanecüã̱xgü. Rü chianexü̃wa tá chanagagü nax ngéma mea namaxã chidexaxü̃ca̱x rü wenaxarü choxü̃ nangechaü̃güxü̃ca̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 18:6

Rü ngẽma nax poraãcü chixexü̃ togüca̱x naxügüxü̃rüxü̃, rü ngẽxgumarüxü̃ tá ta nixĩ nax chixexü̃maxã nüxü̃́ penaxütanüxü̃ i pemax. ¡Rü taxree̱xpü̱xcüna chixexü̃maxã tá nüxü̃́ penaxütanü naxca̱x i ngẽma chixexü̃ i togüca̱x naxügüxü̃! ¡Rü ngẽma chixexü̃ ga yema ĩanecüã̱x togüca̱x mexẽẽgüxü̃, rü pema rü taxree̱xpü̱xcüna tá naxca̱x penamexẽxẽ i ngẽma chixexü̃!

Yeremía 16:18

Rü nawa tá ichanaxügü nax taxree̱xpü̱xcüna pexü̃ chapoxcuexü̃ naxca̱x i perü chixexü̃gü rü perü pecadugü. Erü penaxãũãchixẽxẽ i chorü naane namaxã i ngẽma perü tupananetachicüna̱xãgü i ingearü maxü̃ã́xü̃. Rü yema naane ga guxü̃guca̱x pexna chaxãxü̃wa rü penaxü ga yema chixexü̃gü ga naxchi chaxaixü̃ —ñanagürü ga Cori ya Tupana.

Ichaía 44:22

Rü choma nixĩ i pexü̃́ ichayanaxoxẽẽxü̃ i perü guxchaxü̃gü rü perü chixexü̃gü ñoma caixanexü̃ iyarüxoxgurüxü̃. ¡Rü ẽcü cha̱u̱xca̱x pewoegu! Erü choma nixĩ i pexü̃ íchanguxü̃xẽẽxü̃ nawa i perü chixexü̃” —ñanagürü.

Ichaía 43:25

Natürü i choma nax perü Tupana chixĩxü̃ rü tá íchanapigü rü nüxü̃ ichayarüngü̃ma i guxü̃ma i perü pecadugü rü chixexü̃gü i chope̱xewa pexüxü̃.

Abacú 2:3

Rü ñu̱xma rü taxũta nawa nangu nax yanguxü̃ ga yema cuxü̃ chawéxü̃. Natürü taxũtáma nangupetümare nax yanguxü̃. ¡Cumax rü mea ínanguxẽxẽ ega woo tama paxa yanguxgu! Erü aixcüma tá ningu i ngẽxguma norü ngunexü̃wa nanguxgux.

Yeremía 29:11

Rü choma rü nüxü̃ chacua̱x i ngẽma pexca̱x nagu charüxĩnüxü̃. Rü ngẽma chorü ĩnü rü perü mexü̃ca̱x nixĩ rü tama i perü chixexü̃ca̱x. Erü choma rü tá chapexü̃tagu ñu̱xmatáta naxüpetü i ngẽma guxchaxü̃gü i ñu̱xma pexü̃́ ngẽxmaxü̃. Rü ngẽmawena rü tá pexna chanaxã i wüxi i taãxẽ i aixcüma ixĩxü̃’, ñachagürü. Rü chomatama ya Cori ya Tupana nixĩ i nüxü̃ chixuxü̃ i ngẽma.

Ichaía 35:4

Rü ngẽma muü̃exü̃ rü nüxü̃ ñapegügü: —¡Piporae, rü taxṹ i pemuü̃exü̃! Rü daa nixĩ ya perü Tupana nax pexü̃ ínapoxü̃xü̃ca̱x. Rü nüma tá nanapoxcue i perü uanügü i guxchaxü̃ pexca̱x íngu̱xẽẽxü̃ —ñapegügü.

Ngechuchuarü ngúexü̃gü ga yamugüxü̃arü puracüchiga 1:7

Rü Ngechuchu nanangãxü̃, rü ñanagürü: —Pema rü taxuca̱xma nüxü̃ pecuáxchaü̃ i ñuxgu tá nixĩ i ngẽma ngunexü̃ i choxna naxca̱x pecaxü̃, erü Chaunatüxicatama nüxü̃́ nangẽxma i pora nax nüxü̃ naxunetaxü̃ i ngẽma ngunexü̃.

Danié 11:35

Rü ngẽxgumarüxü̃ ta i ñuxre i ngẽma nüxü̃ icuáxü̃ nax duü̃xü̃güxü̃ nangúexẽẽxü̃, rü norü uanügü rü tá nawe ningexü̃tanü. Rü ngẽmaãcü Tupana tá nüxü̃ naxü nax nape̱xewa yamexü̃ca̱x. Rü ngẽmaãcü nixĩ rü ñu̱xmata nawa nangu i ngẽma ngunexü̃ ya Tupana nagu unetaxü̃.

Ichaía 12:1

Rü ngẽma ngunexü̃gu rü tá ñacurügü: —Moxẽ cuxna chaxã, Pa Corix, yerü woo chomaxã cunu ga noxri, natürü curü nu rü marü nangupetü. Rü ngẽmaca̱x wena cha̱u̱xca̱x cunatáeguxẽxẽ ga yema taãxẽ ga noxri choxü̃́ yexmaxü̃.

Gálatas 4:4

Natürü yexguma nawa nanguxgu ga yema ngunexü̃ ga inaxunetaxü̃ ga Tupana, rü núma nanamu ga Nane. Rü duü̃xü̃gürüxü̃ wüxi ga ngewa nabu ga gumá Nane. Rü yema Moiché ümatüxü̃ ga mugütüü̃wa nayexma ga yexguma nabuxgu.

Ichaía 49:25

Natürü choma ya Tupana rü ñachagürü: —Ngẽma churara i poraxü̃na tá nanapugü i ngẽma íyaxuxü̃. Rü ngẽma churaragüarü ãẽ̱xgacüna tá nanapugü i ngẽma napuxü̃chiréxü̃. Rü pemaxã nüxü̃ chixu, Pa Iraétanüxü̃x, rü chomatátama nixĩ i perü uanügüme̱xẽwa íchananguxü̃xẽẽxü̃ i penegü rü pexacügü.

Ichaía 33:24

Rü ngẽma ngunexü̃gügu rü taxúxetáma ya Yerucharéü̃cüã̱x rü ñatagürü: —Chidaxawe —ñatagürü. Rü ngẽma Chióü̃cüã̱xarü pecadugü rü nüma ya Cori ya Tupana rü tá nüxü̃́ nüxü̃ narüngüma.

Wiyaegü 32:1

Rü tataãxẽ ya yíxema Tupana marü tüxü̃́ nüxü̃ irüngümaxẽ i tümaarü pecadugü.

Chacaría 1:15

Rü yexguma ñuxre ga taunecü namaxã chanuxgu ga chorü ĩane rü poxcu namaxã chaxuegu ga yema Yerucharéü̃cüã̱xgü. Natürü yema togü ga nachixü̃anegücüã̱x ga yéma chamugüxü̃ rü nanangupetüxẽxẽ ga yema poxcu ga Yerucharéü̃maxã chaxueguxü̃. Rü ngẽmaca̱x poraãcü namaxã chanu i ngẽma togü i nachixü̃anegü i nügü írüporaexü̃ rü taxuguma rüxĩnüexü̃.

Danié 12:9

Rü nüma rü choxü̃ nangãxü̃ rü ñanagürü: —Name i aixrügumarüxü̃ mea cumaxü̃, Pa Danié. Natürü cunaxwa̱xe nax taxúetama nüxü̃ cuáxü̃ i ngẽma ore ñu̱xmatáta nawa nangu i ngẽma ngunexü̃ i nagu yacuáxü̃.

Danié 12:4

¡Natürü i cumax, Pa Daniéx, rü cuxicatama nüxü̃ nacua̱x i ngẽma ore i cumaxã nüxü̃ chixuxü̃! ¡Rü ñu̱xũchi nañaxtachipe̱xe i ngẽma popera ñu̱xmatáta nawa nangu i ngẽma ngunexü̃ i nagu yacuáxü̃ i ngẽma guxchaxü̃gü! Rü muxü̃tama i duü̃xü̃gü rü guxü̃wama tá naxca̱x nadaugü i cua̱x nax ngẽmaãcü yexera nüxü̃ nacua̱xgüxü̃ca̱x i ngẽma tá ngupetüxü̃ —ñanagürü.

Danié 9:12

Rü yema nax toxca̱x núma cunamuxü̃ ga yema taxü̃ ga guxchaxü̃ rü yemamaxã cuyanguxẽxẽ ga yema poxcu ga tomaxã rü torü ãẽ̱xgacügümaxã cuxueguxü̃. Rü yema poxcu ga Yerucharéü̃na cunguxẽẽxü̃, rü taguma yemaacü cunapoxcu ga to ga ĩane.

Danié 9:2

Rü gumá taunecü ga nagu yangucuchicügu ga Daríu rü choma ga Danié rü nawa íchangu̱x ga yema popera ga Tupanaarü orearü uruxü̃ ga Yeremía ümatüxü̃. Rü yema ore ga nawa changúxü̃ rü nüxü̃ nixu nax 70 ya taunecü tá ninge nax chixexü̃wa nangẽxmaechaxü̃ ya Yerucharéü̃, yerü yemaacü nixĩ ga Cori ya Tupana Yeremíamaxã nüxü̃ yaxuxü̃.

Yeremía 17:18

¡Rü naxãneexẽxẽ i ngẽma chorü uanügü, rü taxṹ i choxü̃ cuxãnexẽxẽxü̃! Rü ngẽmaãcü i nümagü rü tá naxãnee, rü tama i chomax. ¡Rü taxü̃ i guxchaxü̃ naxca̱x ínanguxẽxẽ, rü wüxicana iyanaxoxẽxẽ!

Norü taxre ga to ga popera ga ãẽ̱xgacügüchiga ümatüxü̃ 30:22

Rü nüma ga Echequía rü yema Lebítanüxü̃na moxẽ naxã naxca̱x ga yema puracü ga mea norü ngúchaü̃maxã Cori ya Tupanaca̱x naxügüxü̃. Rü yema 7 ga ngunexü̃gu rü nanangõ̱xgü ga yema Üpetüchigaarü õna. Rü Tupanaca̱x ínanagu ga ãmaregü norü ngüxmüxẽẽruxü̃. Rü ñu̱xũchi nüxü̃ nicua̱xüü̃gü ya yimá Cori ya norü o̱xigüarü Tupana.

Naanearü ügüchiga 34:3

Rü nüma ga Chiquéü̃ rü poraãcü ngĩxü̃ nangẽ̱xẽ rü nüxü̃́ ingúchaü̃ rü yemaca̱x ngĩmaxã namecüma.

Ichaía 6:7

Rü gumá ã́xwe rü cha̱u̱a̱xwa nayaxũ̱xãchixẽxẽ, rü ñanagürü choxü̃: —¡Dücax! daa ã́xwe rü cua̱xwa nixũ̱xãchi rü ngẽmaca̱x i curü chixexü̃ rü marü inayarüxo. Rü ngẽma curü chixexü̃gü rü Tupana rü marü cuxü̃́ nüxü̃ narüngüma —ñanagürü.

Ichaía 14:3

Rü pemax, Pa Duü̃xü̃gü i Iraétanüxü̃x, rü ngẽxguma nüma ya Cori ya Tupana pexü̃ ínguxü̃xẽẽgu naxme̱xwa i ngẽma Babiróniaanearü ãẽ̱xgacü i ngúxü̃ pexü̃ ingegüxẽẽxü̃ rü ngechaü̃ pexna ãxü̃, rü ñaa oremaxã tá nüxü̃ pecugüe rü penaxuchi̱xẽ: —Dücax ¿ta̱xacüwa cungu i cuma nax cuchixecümaxü̃? rü ¿ta̱xacügu nayagu̱x i ngẽma nax cugü quicua̱xüxü̃xü̃?

Ichaía 53:5

Natürü tórü chixexü̃gagu nixĩ ga nacanapacütügüãxü̃. Rü tórü pecadugagu nixĩ ga ngúxü̃ yangexü̃. Natürü yema ngúxü̃ nax yangexü̃gagu nixĩ ga Tupana tamaxã rüngüxmüxü̃. Rü yema norü o̱xrigügagu nixĩ ga taxca̱x yataanegüxü̃.

Ichaía 53:6

Rü guxãma i yixema rü itarütauxe ñoma carnérugü irütauxexü̃rüxü̃. Yerü wüxichigü ga yixema rü nagu taxĩ ga tóxrütama ngúchaü̃. Natürü nüma ga Cori ya Tupana rü gumá norü duü̃cüxü̃ nayangexẽxẽ ga guxü̃ma ga tórü chixexü̃gü.

Ichaía 54:15

Rü ngẽxguma wüxi i nachixü̃ane pexca̱x íyaxüãchigu rü taxũtáma chorü mugagu nixĩ. Natürü pema rü tá nüxü̃ perüporamaegü.

Ichaía 54:17

Natürü taxúema tá tanaxü i wüxi i naxne i pexü̃ rüxoxẽẽxü̃. Rü pemax, Pa Iraétanüxü̃x, rü tá peyanangea̱xgüxẽxẽ i guxü̃ma i ngẽma pemaxã guxchaca̱x daugüxü̃, erü choma i Cori ya Tupana rü aixcüma nüxü̃ charüngü̃xẽxẽxü̃ i ngẽma chorü duü̃xü̃gü ixĩxü̃. Rü pemaxã chanaxuegu nax ngẽmaãcü tá yixĩxü̃ —ñanagürü ga Tupana.

Ichaía 55:7

Rü ngẽma duü̃xü̃ i chixecümaxü̃, rü name nixĩ i nüxü̃ narüxo i ngẽma nacüma i chixexü̃. Rü ngẽma duü̃xü̃ i chixexü̃gu rüxĩnüxü̃, rü name nixĩ i nüxü̃ narüxo i ngẽma chixexü̃ i nagu naxĩnüxü̃. ¡Rü Cori ya Tupanaca̱x pewoegu! Rü tá nüxü̃́ pengechaü̃tümüxü̃gü. ¡Rü naxca̱x pewoegu ya tórü Tupana! Erü nüma rü ínamemare nax pexü̃́ nüxü̃ nangümaxü̃ i perü chixexü̃gü.

Ichaía 66:13

Rü ñoma wüxi i mama i naxacüxü̃ meãẽxü̃rüxü̃ rü choma rü tá pexü̃ chataãẽxẽxẽ i Yerucharéü̃wa” —ñanagürü ga Tupana.

Yeremía 51:10

Rü nüma ya Cori ya Tupana rü marü taétüwa nachogü. ¡Ngĩxã Chióü̃wa taxĩ nax ngẽma duü̃xü̃gümaxã nüxü̃ ixuxü̃ca̱x i ngẽma taxca̱x naxüxü̃ ya tórü Cori ya Tupana!

Auxexü̃chiga 4:22

Pa Ĩane ya Chióü̃x, curü poxcu rü marü ngẽxma nayacua̱x. Rü nüma ya Cori ya Tupana rü taxũtáma wena to i nachixü̃anewa nanagagü i curü duü̃xü̃gü. Natürü cumax, Pa Edóü̃anearü Ĩane ya Taxü̃nex, rü curü chixexü̃ca̱x Tupana tá cuxü̃ napoxcu, rü ngóxü̃wa tá nanange i curü pecadugü.

Echequié 16:42

Rü ngẽxguma tá nixĩ i cumaxã icharüngü̃xmüxü̃ nax cumaxã chanuxü̃ rü cuxü̃ chinuxuxü̃. Rü ngẽxguma tá nixĩ i choxü̃ nangupetüxü̃ nax cumaxã chanuxü̃.

Chacaría 1:13

Rü nüma ga Cori ya Tupana rü nüxü̃ nangechaxü̃ãcüma mea yema daxũcüã̱x ga duü̃xü̃ ga chomaxã idexaxü̃xü̃ nangãxü̃.

Ínachoxü̃xü̃chiga 22:3

Natürü ngẽxguma ngunecü ítayanguéxü̃gu nax nangíxü̃ rü tayama̱xgu i ngẽma ngĩ́xta̱xaxü̃ rü tümawa nangẽxma i ngẽma guxcha naxca̱x i ngẽma nax tamáetaxü̃. Rü yíxema ngĩ́xe rü tanaxwa̱xe nax tanaxütanüxü̃ i ngẽma naxca̱x tangĩ́xü̃. Natürü ngẽxguma tangearü diẽruã̱xgu rü name nax tümamaxã itaxexü̃ nax ngẽmaãcü tanaxütanüxü̃ca̱x i ngẽma naxca̱x tangĩ́xü̃.

Wiyaegü 85:3

Rü yema nax tomaxã cunuxü̃ rü marü icurüngüxmüxü̃chi.

Ngu̱xẽẽtaeruü̃arü ore 3:4

Rü nangẽxma i ngunexü̃ i nagu ixaxuxü̃, rü ngunexü̃ i nagu icugüexü̃. Rü nangẽxma i ngunexü̃ i nagu iyutanüxü̃, rü ngunexü̃ i nagu ipetaexü̃.

Ichaía 27:9

Natürü nüma ya Cori ya Tupana rü tá nüxü̃́ nüxü̃ inayarüngüma i ngẽma Iraétanüxü̃arü chixexü̃gü rü tá ínanapi i norü pecadugü i ngẽxguma nagu napogüegu i norü tupananetagüarü ãmarearü guruü̃güarü nutagü, ñoma nuta ya cal íxraxü̃gu pocürüxü, rü ngẽxguma ínawogüãgu i ngẽma naigü i Acheráchicüna̱xãgü i namaxã natupanaã̱xgüxü̃ rü nagu napogüegu i ngẽma guruü̃gü i nawa norü tupananetagüca̱x pumarate̱xe ínagugüxü̃.

Ichaía 51:17

¡Peba̱i̱xãchie Pa Yerucharéü̃cüã̱xgüx! ¡Peba̱i̱xãchie rü íperüdagü i pema nax Tupana pemaxã nuxü̃! Rü poraãcü ngúxü̃ pingexü̃ rü ñu̱xma rü pengearü poraã̱x.

Ochéa 2:16

Rü ngẽxguma rü tá: “Pa Cuxü̃ Tangechaxü̃cüx”, ñanagürügü choxü̃ rü tama “Pa Torü Yora i Baáx”, ñanagürügü. Rü choma i Cori ya Tupana nixĩ i nüxü̃ chixuxü̃ i ngẽma.

Chofonía 3:15

Erü nüma ya Cori ya Tupana rü marü ínayachaxãchi nawa i ngẽma poxcu i pemaxã naxueguxü̃ rü marü ínanawoxü̃ i ngẽma perü uanügü. Rü nüma ya Cori ya Tupana ya Iraétanüxü̃arü ãẽ̱xgacü rü petanüwa nangẽxma, rü ngẽmaca̱x marü taxuca̱xma pemuü̃e.