Ichaía 34:2 - Tupanaarü Ore

² Erü nüma ya Cori ya Tupana rü guxü̃ma i nachixü̃anegümaxã nanu. Rü ngẽxgumarüxü̃ ta namaxã nanu i guxü̃ma i norü churaragü. Rü ngẽmaca̱x namaxã nanaxuegu nax nadaiaxü̃ nax nayuexü̃ca̱x.

Ichaía 34:2 Referans Kwoze

Chofonía 3:8

¡Rü ngẽmaca̱x choxü̃ ípeyangu̱xẽxẽ ñu̱xmata nawa nangu i ngẽma ngunexü̃ i nagu tá pexna naxca̱x chaca̱xü̃ i perü chixexü̃gü! Rü choma ya Cori ya Tupana rü ñachagürü: “Wüxigu tá chanangutaque̱xexẽxẽ i guxü̃ma i nachixü̃anecüã̱xgü rü guxü̃ma i ãẽ̱xgacügü nax chanapoxcuexü̃ca̱x naxca̱x i ngẽma chixexü̃ i naxügüxü̃. Rü guxü̃táma i ñoma i naane rü tá inayarüxo rü ngẽma chorü üxüema tá nayagu”, ñachagürü.

Chacaría 14:3

Natürü ngẽmawena i nüma ya Cori ya Tupana rü tá ngẽma nachixü̃anegümaxã nügü nadai ñoma churaragü norü uanügümaxã nügü daixgurüxü̃.

Ichaía 30:25

Rü ngẽxguma ínanguxgu i ngẽma ngunexü̃ i nagu Cori ya Tupana tá tümaarü uanüxü̃ daixü̃ rü yima ĩanearü poxeguxü̃ tá niwa̱xgü. Rü guxü̃nema ya itaxü̃ne ya ma̱xpǘnegüwa rü ngüchitaeruxü̃wa tá inarüyaegü i natügü rü dexá i poraü̃chiüxü̃.

Ichaía 13:5

Rü ngẽma churaragü rü nachixü̃ane i yáxü̃wa ngẽxmaxü̃wa ne naxĩ i ñaa naanearü tuãchiarü yexerawa. Rü Cori ya Tupana rü norü churaragümaxã ngéma ne naxũ nax norü numaxã napoxcuãxü̃ca̱x i guxü̃ma i Babiróniaarü naane.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:15

Rü guma naxtaxa ga üxümaxã iya̱u̱xrachiünewa nawoü̃ ga yema tama nawa ngo̱xégagüxü̃ i Tupanaarü popera i nagu yawǘgüxü̃ i ngẽma nüxü̃́ ngẽxmagüxü̃ i maxü̃ i taguma gúxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:9

Rü ngẽmaãcü i ngẽma churaragü rü tá ñoma i naanearü tagu ninguuchi. Rü tá Tupanaarü duü̃xü̃güxü̃ rü yima ĩane ya Tupana nüxü̃ ngechaxü̃ne ya Yerucharéü̃xü̃ ínachoeguãchi. Natürü Tupana rü daxũwa tá nanayixẽxẽ ya üxü, rü yimamaxã tá nixae i guxü̃ma i ngẽma namaxã rüxuanügüxü̃.

Romanos 1:18

Rü Tupana rü norü numaxã daxũguxü̃ i naanewa ne nanamu i norü poxcu naxca̱x i guxü̃ma i ngẽma duü̃xü̃gü i tama naga ĩnüexü̃ rü chixexü̃gu maxẽxü̃ rü ngẽma norü chixexü̃maxã togüaxü̃́ naguxchaxẽẽgüxü̃ nax tama yaxõgüãxü̃ca̱x i ngẽma ore i aixcüma ixĩxü̃.

Ichaía 10:5

Rü Cori ya Tupana rü ñanagürü: —Achíriaanearü ãẽ̱xgacü nixĩ ya chorü naixmena̱xã ya Iraétanüxü̃xü̃ namaxã chapoxcune. Rü yima nixĩ ya chauxne ya namaxã tá chorü numaxã chacuaixetane.

Ichaía 13:6

¡Rü pixauxe, Pa Babiróniacüã̱x, erü Cori ya Tupanaarü ngunexü̃ rü marü ningaica nax ínanguxü̃! Rü nüma ya Cori ya Tupana ya Guxãétüwa Ngẽxmacü rü tá ínangu nax Babiróniagu yapogüxü̃ca̱x.

Ichaía 26:20

Dücax, Pa Chorü Duü̃xü̃güx, rü name nixĩ i nagu pechocu ya yima pepatagü rü penawãtagü i perü ĩã̱xgü. ¡Rü paxaãchi ngẽxma picu̱xgü ñu̱xmata nüxü̃́ nangupetü i norü nu ya Cori ya Tupana!

Ichaía 61:2

Rü choxü̃ namu nax nüxü̃ chixuxü̃ca̱x rü daa nixĩ ya taunecü ya Tupana nüxü̃ unetacü nax nagu tüxü̃ ínanguxü̃xẽẽxü̃ rü nadaiaxü̃ i tórü uanügü. Rü choxü̃ namu nax tüxü̃ chataãẽxẽẽgüxü̃ca̱x ya guxãma ya yíxema ngechaü̃güxe.

Ichaía 63:6

Rü poraãcü chanu rü ngẽmaca̱x chanadai i ngẽma togü i nachixü̃anecüã̱xgü. Rü yimá nagü rü waixü̃müanegu chayaya̱xẽxẽ —ñanagürü.

Ichaía 65:12

Rü ngẽmaca̱x pemaxã chanaxuegu nax taragu tá peyuexü̃. Yerü yexguma pexca̱x chacaxgu rü tama choxü̃ pengãxü̃gü, rü yexguma pemaxã chidexagu rü tama choxü̃́ iperüxĩnüe. Rü penaxüama ga yema tama chanaxwa̱xexü̃ rü penayauxgü ga yema choxü̃ nuxẽẽxü̃ —ñanagürü ga Tupana.

Ichaía 66:14

Rü ngẽxguma tá ngẽmaxü̃ pedaugügu, rü perü maxü̃newa rü tá petaãẽgü. Rü ñoma maxẽ i ngexwaca̱xü̃xü̃rüxü̃ tá pexü̃́ nangẽxma i ngexwaca̱xü̃xü̃ i maxü̃. Rü nüma ya Cori ya Tupana rü tá norü duü̃xü̃güxü̃ nanawe̱x i norü pora. Natürü norü uanügüxü̃ rü tá nanawe̱x i norü nu.

Yeremía 25:32

Rü nüma ya Cori ya Tupana ya Guxãétüwa Ngẽxmacü rü ñanagürü: —Ngẽma taxü̃ i guxchaxü̃ rü nachixü̃anegüwa tá ninguchigü. Rü ngẽma taxü̃ i guxchaxü̃ i ãũcümaxü̃ rü naane íyacuáxü̃wa tá ne naxũ —ñanagürü.

Yeremía 25:33

Rü ngẽma ngunexü̃gu rü ngẽma duü̃xü̃gü i Cori ya Tupana daixü̃ rü guxü̃wama i ñoma i naanegu tá nawoone. Rü taxúetama naxca̱x taxauxe, rü taxúetama texe tanade i ngẽma naxü̃negü nax itanata̱xgüxü̃ca̱x. Rü ñoma naü̃rüxü̃ tá waixü̃müanewa nawogümare.

Ínachoxü̃xü̃chiga 8:14

Rü ga duü̃xü̃gü rü nanade ga yema yuexü̃ ga cururugü, rü nananutaque̱xe. Rü guxü̃wama namaxã nayipetüane.

Yochué 11:20

Rü nüma ga Cori ya Tupana rü nananuexẽxẽ ga yema uanügü nax Iraétanüxü̃maxã nügü nada̱i̱xü̃ca̱x. Rü yemaca̱x Iraétanüxü̃axü̃́ nanatauxchaxẽxẽ nax nadaiaxü̃ca̱x ga guxü̃ma ga yema duü̃xü̃gü rü taxuxü̃ma nüxü̃́ ngechaxü̃tümüxü̃güxü̃ yerü yemaacü nixĩ ga Cori ya Tupana ga Moichémaxã nüxü̃ yaxuxü̃.

Wiyaegü 2:5

Rü ñu̱xũchi norü numaxã ínanaba̱i̱xgü rü nugaãcü nayangagü rü ñanagürü nüxü̃:

Ichaía 66:16

Erü Tupana rü üxümaxã rü taramaxã tá nanapoxcue i guxü̃ma i ñoma i naanewa maxẽxü̃ i duü̃xü̃gü. Rü tá namuxũchi i ngẽma poxcugu yuexü̃.

Yeremía 25:31

Rü ngẽma naga i ñoma duruanexü̃rüxü̃ ixĩxü̃ rü guxü̃ i naanewa nangu, erü nüma ya Cori ya Tupana rü taxü̃ i poxcu tá naxca̱x ínanguxẽxẽ i guxü̃ma i nachixü̃anecüã̱x i duü̃xü̃gü. Rü norü chixexü̃ca̱x tá nüxna nicachigü i guxü̃ma i duü̃xü̃gü i ñoma i naanewa maxẽxü̃, rü tá yu namaxã naxuegu i ngẽma chixexü̃gu maxẽxü̃. Rü nümatama ya Cori ya Tupana nixĩ i nüxü̃ ixuxü̃ i ngẽma” —ñanagürü.

Echequié 36:5

Erü Cori ya Tupana rü ñanagürü: Choma rü chorü numaxã chidexa ga yexguma poxcu namaxã chaxueguxgu ga yema togü ga nachixü̃anegü. Rü yexera yema Edóü̃chixü̃aneca̱x nixĩ i ngẽma poxcu yerü taãẽãcüma nügüaxü̃́ nanayauxgü ga chorü naane rü ñu̱xũchi chorü duü̃xü̃gü ga Iraétanüxü̃xü̃ nacugüeãcüma norü naanegüwa nayabuxgü ga nanetügüarü o rü nayagagü ga naxü̃nagü’ ” —ñanagürü.