Ichaía 34:16 - Tupanaarü Ore

¹⁶ ¡Rü ngẽma Cori ya Tupanaarü orewa pengúe! Rü taxũtáma wüxi i ngẽma naeü̃gü rü ngéma nangeéga, rü taxuxü̃táma nayangemücü i ngexewa. Erü nümatama ya Cori ya Tupana rü ngẽmaãcü nanaxwa̱xe, rü wüxi cue ñaxü̃maxã tá nixĩ i wüxiwa nagagüãxü̃.

Ichaía 34:16 Referans Kwoze

Wiyaegü 33:9

Yerü nüma rü norü dexamaxã guxü̃ma naxü. Rü nanamu rü guxü̃ma mea inanu.

Yochué 1:8

¡Rü guxü̃gutáma nawa cungu̱x i ngẽma nüxü̃ chixuxü̃ i chorü mugüpanewa! Rü name nixĩ i cuma rü chütacü rü ngunecü rü nagu curüxĩnü i ngẽma chorü ore nax ngẽmaãcü mea cunaxüxü̃ca̱x i ngẽma cumaxã nüxü̃ chixuxü̃, rü mea cuxü̃́ ínanguxuchixü̃ca̱x i guxü̃ma i ta̱xacü ícuxüxü̃wa.

Ore i mexü̃ ga Matéu ümatüxü̃ 5:18

Rü aixcüma pemaxã nüxü̃ chixu, rü ñu̱xma nax nangẽxmagüxü̃ i daxũguxü̃ i naane rü ñoma i naane rü bai i írarüwa tá naxüchicüxü i ngẽma mugü ñu̱xmatáta yangu i guxü̃ma i ngẽma mugü nüxü̃ ixuxü̃.

Wiyaegü 33:6

Rü nüma ga Cori ya Tupana rü norü dexamaxã nanaxü ga daxũguxü̃ i naane rü norü cue ñaxü̃maxã nanaxü ga guxü̃ma i ẽxtagü i ngéma ngẽxmagüxü̃.

Ichaía 30:8

Rü yexguma ya Cori ya Tupana rü Ichaíaxü̃ ñanagürü: —¡Nua naxũ rü duü̃xü̃güpe̱xewa wüxi i mürapewatachinügu naxümatü i ñaa dexagü nax ngéma nangẽxmaechaxü̃ca̱x rü guxü̃guma ngẽmawa duü̃xü̃gü nüxna nacua̱xãchiexü̃ca̱x i ngẽma nüxü̃ chixuxü̃! —ñanagürü.

Ore i mexü̃ ga Cuáü̃ ümatüxü̃ 10:35

Rü ngẽmaãcü Tupanaarü orewa rü nüxü̃ nixu nax tupanagü tixĩgüxü̃ ya guxãma ya yíxema nayauxgüxe i norü ore. Rü nüxü̃ tacua̱x rü taxucürüwama texé itayanaxoxẽxẽ i ngẽma Tupanaarü ore i ümatüxü̃wa nüxü̃ yaxuxü̃.

Ucu̱xẽgüchiga 23:12

¡Nayaxu rü nagu namaxü̃ i ngẽma ngu̱xẽẽtae i mexü̃, rü ngẽma ucu̱xẽgü i cua̱xwa cuxü̃ gaxü̃! -12-

Ore i mexü̃ ga Luca ümatüxü̃ 21:33

Dauxü̃guxü̃ i naane rü ñoma i naane rü tá nagu̱x. Natürü chorü ore rü tagutáma inayarüxo.

Maraquía 3:16

Natürü yema duü̃xü̃gü ga Tupanaga ĩnüexü̃ rü wüxichigü namücümaxã nidexa ga Cori ya Tupanachiga. Rü nüma ga Cori ya Tupana rü inarüxĩnü ga yema nüxü̃ yaxugüxü̃. Rü Tupanape̱xewa rü wüxi ga poperagu nanaxümatü ga naéga ga yema duü̃xü̃gü ga naga ĩnüexü̃ rü namaxã taãẽgüxü̃.

Amúx 3:7

Rü nüma ya Cori ya Tupana rü taguma ta̱xacü naxü ega tama noxri norü orearü uruxü̃gümaxã nüxü̃ yaxuxgu.

Danié 10:21

Ñu̱xma rü tá cumaxã nüxü̃ chixu i ñuxü̃ ñaxü̃ i ngẽma popera i nagu naxümatüxü̃ i ngẽma ore i aixcüma ixĩxü̃. Rü ngẽxguma ngẽma uanügümaxã togü tadaixgu rü Miguére ya Tupanaarü orearü ngeruxü̃ i Iraétanüxü̃arü dauruxü̃xicatama nixĩ ya choxü̃ rüngü̃xẽẽcü —ñanagürü.

Norü taxre ga popera ga Pedru ümatüxü̃ 1:19

Rü yemaacü nüxü̃ tadau nax aixcüma yixĩxü̃ ga yema ore ga nũxcümaü̃güxü̃ ga Tupanaarü orearü uruü̃gü nüxü̃ ixugügüxü̃. Yerü yema nüxü̃ yaxugügüxü̃rüü̃tama nixĩ ga nüxü̃ tadauxü̃. Rü name nixĩ i pema rü ta aixcüma mea nagu perüxĩnüe i ngẽma ore, erü wüxi i omü i ẽanexü̃wa ibáxixü̃rüxü̃ nixĩ. Rü ngẽma ore rü tá pexü̃ nüxü̃ nacua̱xẽxẽ i Tupanachiga ñu̱xmatáta ínangu ya tórü Cori ya Ngechuchu ya Cristu ya yimá woramacuri ya ngunetüxü̃ ngócürüxü̃ ixĩcü. Rü ngẽxguma ínanguxgu i nüma rü tá perü maxü̃gu nabáxi.

Ichaía 1:20

Natürü ngẽxguma taxũtáma penaxwa̱xegu nax chauga pexĩnüexü̃, rü daigu perü uanügüme̱xẽgu tá peyue —ñanagürü ga Tupana.

Naanearü ügüchiga 6:17

Erü núma tá chanamu ya taxüchicü ya mucü nax guxü̃wama inanguanexü̃ca̱x, rü nayuexü̃ca̱x i guxü̃ma i ta̱xacü i maxü̃ã́xü̃ i guxü̃ i naanewa. Rü guxü̃táma nayue.

Ore i mexü̃ ga Cuáü̃ ümatüxü̃ 5:39

Pema meama nawa pengúe i Tupanaarü ore i ümatüxü̃, erü nagu perüxĩnüe rü ngẽmawa tá nüxü̃ ipeyangau i perü maxü̃ i taguma gúxü̃. Natürü woo ngẽmatama Tupanaarü ore i ümatüxü̃wa rü chauchiga mea nax yadexaxü̃, natürü i pemax, rü tama choxü̃́ peyaxõgüchaü̃ nax ngẽmaãcü penayauxgüxü̃ca̱x i ngẽma maxü̃.

Wenaxarü naxümatü ga Tupanaarü mugü 31:21

Natürü ngẽxguma naxca̱x tá ínanguxgu i naguxü̃raü̃xü̃ i ngúxü̃gü rü guxchaxü̃gü, rü ñaa wiyaewa tá nüxna nacua̱xãchie nax chixexü̃ naxügüxü̃. Erü ngẽma nataagü rü tá nüxna nacua̱xãchi i ñaa wiyae rü tá nagu nawiyaegü. Rü choma rü naxü̃pa nax nagu chanachocuxẽẽxü̃ i ngẽma Iraétanüxü̃ nawa i ngẽma naane ga namaxã chaxueguxü̃ rü marü nüxü̃ chacua̱x nax ta̱xacürü chixexü̃gu tá yixĩxü̃ ga naxĩnüexü̃ —ñanagürü ga Tupana.

Ichaía 14:31

¡Rü pegümaxã pengechaü̃güx, Pa Firitéutanüxü̃arü Ĩanegüx, rü wáita pexüe naxcha̱xwa i ngẽma ngúxü̃ i tá pexca̱x ínguxü̃, rü muü̃maxã pidu̱xrue! Erü nórtewaama ne naxĩ i churaragü i ñoma buanecü i wanagüemaxü̃rüxü̃ ixĩxü̃. Rü ngẽma churaragü i ngéma ne ĩxü̃ rü ínamemaregü nax pexü̃ nada̱i̱xü̃.

Ichaía 40:5

Rü ngẽxguma i nüma ya Cori ya Tupana rü tá nügü nango̱xẽxẽ nax ñuxãcü naporaxüchixü̃. Rü guxü̃ma i duü̃xü̃gü rü tá nüxü̃ nadaugü i ngẽma norü pora. Rü Cori ya Tupanatama nixĩ i ngẽma ñaxü̃ —ñanagürü.

Ichaía 40:26

¡Dücax, daxũguxü̃ i naanegu perüdaunü rü nüxü̃ peda̱u̱x! ¿Rü texé tixĩ ya naxǘxe i guxü̃ma i ngẽma nüxü̃ pedauxü̃? Rü nüma ya Tupana nixĩ ga mea inanucü ga wüxichigü ga yema ẽxtagü rü woramacurigü rü ñu̱xũchi wüxichigü rü naégamaxã nüxna naca. Rü nataxüchi i norü pora rü mea guxü̃maxã inacua̱x, rü ngẽmaca̱x taguma wüxi i ẽxta natauxchica.

Ichaía 21:17

Rü ngẽma norü churaragü i tama muü̃wa̱xegüxü̃ i würamaxã daixü̃ cuáxü̃ rü noxre tátama ínayaxü —ñanagürü. Rü Cori ya Iraétanüxü̃arü Tupana nixĩ ya ngẽma ñacü.

Chacaría 4:6

Rü nüma ga daxũcüã̱x rü nayadaxẽxẽ ga nax yadexaxü̃ rü ñanagürü: —Rü ñaa nixĩ i Cori ya Tupanaarü ore i Chorobabéca̱x ixĩxü̃ i ñaxü̃: “Tama churaragüarü poramaxã rü bai i ta̱xacürü to i poramaxã, natürü Chauãẽarü poramaxã tá naxü ya chopata ya taxü̃ne” —ñanagürü ya Cori ya Tupana ya Guxãétüwa Ngẽxmacü.