Ichaía 32:18 - Tupanaarü Ore

¹⁸ Rü ngẽma chorü duü̃xü̃gü rü wüxi i nachica i nu nawa taxuxü̃gu tá naxãchiü̃gü. Rü ĩpatagü ya itaixü̃newa tá namaxẽ. Rü yima ĩpatagüwa rü tá nataãẽgü.

Ichaía 32:18 Referans Kwoze

Chacaría 2:5

Natürü Tupana rü nüxü̃ nixu rü ñanagürü: ‘Chomatama tá nixĩ i norü poxeguxü̃ruxü̃ i üxüemanaxca̱x chixĩxü̃. Rü yima ĩanearü ngãxü̃wa tá chanango̱xẽxẽ i chorü pora rü chorü üüne’ ” —ñanagürü ya Tupana.

Yeremía 33:16

Rü ngẽxguma nawa nanguxgu i ngẽma ngunexü̃, rü Yudáane rü tá nüxna ínanguxuchi i norü guxchaxü̃gü, rü taxũtáma ãũcümaxü̃wa nangẽxma ya Yerucharéü̃. Rü ngẽmaca̱x ya yima ĩane rü tá ñaxü̃gu nanaxüéga: “Cori ya Tupana rü Meama Tamaxã Inacua̱x”, ñaxü̃gu.

Popera ga Yudíugü ga yaxõgüxü̃ca̱x ümatüxü̃ 4:9

Rü ngẽmaca̱x i ñu̱xma rü ta nangẽxma i wüxi i nachica i üünexü̃ i nagu tá nangü̃ẽxü̃ i ngẽma Tupanaarü duü̃xü̃gü ixĩgüxü̃.

Nüxíraxü̃xü̃ ga popera ga Cuáü̃ ümatüxü̃ 4:16

Rü ngẽmaãcü nüxü̃ tacua̱x rü tayaxõgü nax Tupana rü poraãcü tüxü̃ nangechaü̃xü̃. Rü nüma nixĩ i guxãxü̃ nangechaü̃xü̃. Rü yíxema tümaenexẽxü̃ ngechaü̃xe, rü Tupanaarü duü̃xü̃ tixĩ, rü nüma ya Tupana rü tümawa namaxü̃.

Chacaría 2:8

Rü Tupana ya Guxãétüwa Ngẽxmacü nixĩ ya nua choxü̃ mucü nax nüxü̃ chixuxü̃ca̱x i norü ore nachiga i ngẽma nachixü̃anegü ga pexü̃ ígagüxü̃ perü yemaxü̃gümaxã. Rü Tupana rü ñanagürü: —Yíxema texé chorü duü̃xü̃güxü̃ dauxe, rü ñoma chauxetügu tarüxuxü̃rüxü̃ tixĩ. Rü ngẽmaca̱x i choma rü tá chanapoxcue i guxü̃ma i ngẽma nachixü̃anegü. Rü choma rü tá ngẽma norü mugüruü̃xü̃ chamu nax naxca̱x nangĩ̱xgüxü̃ca̱x i ngẽma nachixü̃anegüarü ngẽmaxü̃gü —ñanagürü ya Tupana. Rü ngẽmaãcü ya Tupana ya Guxãétüwa Ngẽxmacü rü tá inanawe̱x i norü pora. Rü ngẽmaãcü i pema rü tá nüxü̃ picua̱xãchitanü nax nüma yixĩxü̃ i choxü̃ namuxü̃ nax pemaxã nüxü̃ chixuxü̃ca̱x i norü ore.

Ichaía 2:4

Rü nüma ya Cori ya Tupana rü tá nanamexẽxẽ i guxü̃ma i nachixü̃anegüarü guxchaxü̃gü. Rü ngẽma nachixü̃anegü i nügümaxã nuexü̃ rü Cori ya Tupana rü tá nügümaxã nanangüxmüexẽxẽ. Rü ngẽma naxnegü i namaxã nügü nada̱i̱xü̃ rü norü puracüruxü̃ tá nayaxĩgüxẽxẽ. Rü taxuxü̃táma i ĩanegü daigu nügümaxã narüxĩnüe rü bai tá i daica̱x nügü nax nangúexẽẽxü̃.

Ichaía 11:10

Rü ngẽxguma yimá Dabítaxa ingucuchigu nax ãẽ̱xgacü yixĩxü̃ca̱x rü tá wüxi i cua̱xruxü̃ nixĩ naxca̱x i guxü̃ma i duü̃xü̃gü. Rü guxü̃ i nachixü̃anegücüã̱x rü tá naxca̱x nayadaugü rü naxca̱x nangutaque̱xegü. Rü ngẽma nachica i nawa nangẽxmaxü̃ rü tá naxüüne.

Ichaía 14:3

Rü pemax, Pa Duü̃xü̃gü i Iraétanüxü̃x, rü ngẽxguma nüma ya Cori ya Tupana pexü̃ ínguxü̃xẽẽgu naxme̱xwa i ngẽma Babiróniaanearü ãẽ̱xgacü i ngúxü̃ pexü̃ ingegüxẽẽxü̃ rü ngechaü̃ pexna ãxü̃, rü ñaa oremaxã tá nüxü̃ pecugüe rü penaxuchi̱xẽ: —Dücax ¿ta̱xacüwa cungu i cuma nax cuchixecümaxü̃? rü ¿ta̱xacügu nayagu̱x i ngẽma nax cugü quicua̱xüxü̃xü̃?

Ichaía 26:3

Rü cumax, Pa Corix, rü tüxü̃ curüngü̃xmügüxẽxẽ ya yíxema mexü̃ i tümacüma tüxü̃́ ngẽxmaxe rü cuxna rüyoü̃xẽ.

Ichaía 26:12

Pa Cori ya Tupanax, cuma nixĩ i mexü̃ toxca̱x ícunguxẽẽxü̃, rü cuma nixĩ i toxü̃ curüngü̃xẽẽxü̃ nawa i guxü̃ma i torü puracügü.

Ichaía 28:12

Nüma rü marü pemaxã nüxü̃ nixu ga ü̃pa rü ñanagürü: —Nua nixĩ i nangẽxmaxü̃ i taãxẽ. ¡Rü nuxã perüngü̃gü! —ñanagürü. Natürü ga pema rü tama naga pexĩnüechaü̃.

Ichaía 30:15

Rü yimá Cori ya Iraétanüxü̃arü Tupana ya Üünecü rü ñanagürü: —¡Cha̱u̱xca̱x pewoegu rü chauga pexĩnüe rü ngẽmaãcü taxũtáma pexü̃ nangupetü! Rü ngẽxguma mea perüchogu rü chauga pexĩnüegu rü ngẽmaãcü tá nixĩ i pexü̃́ nangẽxmaxü̃ i perü pora —ñanagürü. Natürü i pema rü tama chauga pexĩnüechaü̃, rü ñaperügügüama: —Tomagü rü cowarugu tá tibuxmüama —ñaperügügü. Rü aixcüma tá nixĩ i ngẽmaãcü perü uanügücha̱xwa pibuxmüxü̃. Rü pema rü ñaperügügüama: —Cowarugü i poraexüchixü̃gu tá tibuxmüama —ñaperügügüama. Natürü perü uanügü i pewe ngẽgüxü̃ rü tá pexü̃ narüporamaegüama.

Ichaía 65:9

Rü ngẽma Acóbutaagü rü tá chayamuxẽxẽ. Rü tá chayamuxẽxẽ i Yudátanüxü̃ nax ma̱xpǘneanewa namaxẽxü̃ca̱x. Rü ngẽma duü̃xü̃gü i nüxü̃ chaxunetaxü̃na tá nixĩ i chanaxãxü̃ i ngẽma naane, rü ngéma tá namaxẽ i chorü duü̃xü̃gü.

Ichaía 65:21

Rü ngẽma chorü duü̃xü̃gü rü tá naxüpatagü rü napatagüwa tá namaxẽ. Rü naanegüwa tá namaxã natoegü i úbagü rü úbagümaxã tá naxãwemügü.

Chacaría 3:10

Rü ngẽxguma ngẽma ngunexü̃wa nanguxgu rü tá pegüna pixugü nax perü úbagüpechitawa rü perü igunecügüpechitawa pegümaxã petaãẽgüxü̃ca̱x. Rü choma ya Cori ya Tupana ya Guxãétüwa Ngẽxmacü nixĩ i nüxü̃ chixuxü̃ i ngẽma” —ñanagürü.

Ínachoxü̃xü̃chiga 9:26

Rü woo nax yema ngupetüxü̃ ga Equítuanewa, natürü yema Iraétanüxü̃ nawa yexmagüxü̃ ga naane ga Gochéü̃wa rü taxuxü̃ma ga gáuxü̃pütagü yexma nayi rü bai ga wüxi.

Wiyaegü 107:7

Rü yemawena rü mexü̃ ga namagu nayamugü nax nawa nangugüxü̃ca̱x ga guma ĩane ga nagu tá naxãchiü̃güne.

Ucu̱xẽgüchiga 24:15

¡Taxṹ i nagu curüxĩnüxü̃ nax tüxü̃ quitoxyepe̱xexü̃ ya yíxema mexü̃gu maxü̃́xẽ! Rü tama name nax guxchaxü̃ nawa cuxüxü̃ ya tümapata.

Ichaía 33:6

Rü nüma ya Cori ya Tupana rü guxü̃gutáma cuxna nadau. Rü yíxema tümaãẽxü̃ cuáxe rü cua̱x tüxü̃́ ngẽxmaxe, rü ngẽma rü wüxi i tümaarü meruxü̃ i maxü̃wa tüxü̃ gaxü̃ nixĩ. Rü ngẽma nax Cori ya Tupanaga taxĩnüxü̃ rü wüxi i tümaarü meruxü̃ nixĩ.

Echequié 34:28

Rü taxuxü̃táma i togü i nachixü̃anegü chorü duü̃xü̃gümaxã inacua̱x. Rü woo ngẽma naeü̃gü i düraexü̃ rü taxũtáma wena nanangõ̱xcu i chorü duü̃xü̃gü. Rü taãẽãcüma tá namaxẽ rü taxuca̱xtama namuü̃e.