Ichaía 28:6 - Tupanaarü Ore

⁶ Rü nüma ya Tupana rü tá ngẽma guxchaxü̃güarü mexẽẽruü̃güna nanaxã i cua̱x nax tama chixri namexẽẽgüãxü̃ca̱x i duü̃xü̃güarü guxchaxü̃gü. Rü ngẽma churaragü ya ĩane ípoxü̃güxü̃, rü nüma ya Tupana rü tá nüxna nanaxã i pora nax tama namuü̃exü̃ca̱x.

Ichaía 28:6 Referans Kwoze

Ore i mexü̃ ga Cuáü̃ ümatüxü̃ 5:30

Choma rü taxucürüwa ta̱xacü chaxü chauechamatama ega tama choxü̃ naxüxẽẽãgu ya Chaunatü. Rü Chaunatü chomaxã nüxü̃ ixuxü̃ãcüma nixĩ i nüxna chacaxü̃ i duü̃xü̃gü i norü maxü̃chiga. Rü ngẽxguma nüxna chacaxgu rü aixcüma meama chanangugü i duü̃xü̃gü. Erü tama choxrütama ngúchaü̃ nixĩ i ngẽma chaxüxü̃, natürü Chaunatü ya nua choxü̃ mucüarü ngúchaü̃ nixĩ i ngẽma chaxüxü̃.

Yochué 1:9

Rü choma nixĩ i cuxü̃ chamuxü̃ nax cugü cuporaxẽẽxü̃ca̱x Rü tama name i cumuü̃xü̃ rü icuyarümaãchi, erü choma ya curü Cori ya Tupana rü tá cuxü̃tawa changexma i ngextá cuma ícuxũxü̃wa —ñanagürü ga Tupana.

Ore i mexü̃ ga Cuáü̃ ümatüxü̃ 3:34

Rü yimá Tupana núma namucü, rü Tupanaarü orexü̃ nixu. Erü Tupana rü nüxna nanamu i Naãxẽ ya Üünexü̃ nax guxü̃guma naxü̃tawa nangẽxmaxü̃ca̱x.

1 Corintios 12:8

Rü Naãxẽ ya Üünexü̃ rü tümaxü̃ nanaxã i tauxcha nax ucu̱xẽxü̃ tacuáxü̃ca̱x. Rü ngẽmatama Naãxẽ ya Üünexü̃ rü toguxeaxü̃́ nanatauxchaxẽxẽ nax nüxü̃ tacuáxü̃ nax mea tangúexẽẽtaexü̃ i Tupanaarü ore.

Ucu̱xẽgüchiga 20:8

Yimá ãẽ̱xgacü rü ngẽxguma norü tochicaxü̃wa nato̱xgu nax guxchaxü̃ namexẽẽxü̃ca̱x, rü wüxi i norü dawenümaxãtama nüxü̃ nacua̱x i ta̱xacürü chixexü̃ nangẽxmaxü̃.

Wiyaegü 46:1

Nüma ya Tupana rü tórü poxü̃ruxü̃ nixĩ rü tórü poraxẽẽruxü̃ nixĩ. Rü nüma rü tüxü̃ narüngü̃xẽxẽ ega guxchaxü̃ taxca̱x ínguxgux.

Norü taxre ga to ga popera ga ãẽ̱xgacügüchiga ümatüxü̃ 32:8

Rü nüma i Achíriaanearü ãẽ̱xgacü rü norü churaragüna narüyoe, natürü i yixema rü taxü̃tawa nangẽxma ya Tupana. Rü nüma tá nixĩ i tüxü̃ nangü̃xẽẽxü̃ i ngẽxguma namaxã yigü idaixgu —ñanagürü ga Yudáanearü ãẽ̱xgacü ga Echequía. Rü yexguma yemaxü̃ naxĩnüegu ga duü̃xü̃gü rü nayaporaãchitanü.

Nüxíraxü̃xü̃ ga popera ga ãẽ̱xgacügüchiga 3:28

Rü guxü̃ma ga Iraéanecüã̱xgü rü nüxü̃ nacuáchigagü ga yema ãẽ̱xgacü üxü̃ ga ñuxãcü nanamexẽẽãxü̃ ga yema taxüchixü̃ ga guxchaxü̃. Rü yemaca̱x nüxü̃ nangechaü̃gü yerü nüxü̃ nacuáchigagü ga ñuxãcü Tupana cua̱x nüxna ãxü̃ nax namexẽẽãxü̃ca̱x ga guxchaxü̃gü.

Wenaxarü naxümatü ga Tupanaarü mugü 20:4

Erü nüma ya perü Cori ya Tupana rü pexü̃tawa nangẽxma, rü nüma tá nixĩ i nadaiaxü̃ i ngẽma perü uanügü, rü tá nüxü̃ pexü̃ narüporamaegüxẽxẽ”, ñanagürü tá.

Wiyaegü 46:11

Rü Cori ya Tupana ya Guxãétüwa Ngẽxmacü rü tatanüwa nangẽxma. Rü nümatama i Acóbuarü Tupana nixĩ i tórü poxü̃ruxü̃ yixĩxü̃.

Norü taxre ga to ga popera ga ãẽ̱xgacügüchiga ümatüxü̃ 32:6

Rü ñu̱xũchi nüma ga Echequía rü norü churaragüerugüxü̃ namu nax yema duü̃xü̃gümaxã icuáxü̃ca̱x. Rü guma ĩanearü ĩã̱xü̃tawa yemaxü̃ ga plazawa namaxã nangutaque̱xe ga yema duü̃xü̃gü. Rü ñanagürü nüxü̃: —¡Peporae rü taxṹ i pemuü̃exü̃ rü perümaãchitanüxü̃ nape̱xewa i ngẽma Achíriaanearü ãẽ̱xgacü rü norü churaragü i muxũchixü̃! Erü yixema rü tüxü̃́ nangẽxma i tamaxã icuáxü̃ i yexera rüporamaexü̃.

Ichaía 4:4

Rü nüma ya Cori ya Tupana rü taxü̃ i norü ngechaü̃maxã rü norü poramaxã tá ínanapi namaxã ga yimá nagü ga Yerucharéü̃cüã̱xgü inabaxẽẽgücü, rü tá nanayaxu i norü ãũãchixü̃ i ngẽma Chióü̃cüã̱xgü i ngexü̃gü.

Ichaía 25:4

Rü yíxema ngearü poraã̱xgüxeca̱x rü cumax, Pa Corix, rü tümaarü poxü̃ruxü̃ quixĩ. Rü cuma rü tümaarü ngü̃xẽẽruxü̃ quixĩ ya yíxema taxúema tüxü̃ rüngü̃xẽẽgüxe. Rü cuma rü tümaétüwa cuchogü ya yíxema guxchaxü̃wa ngẽxmagüxe. Rü cuma rü tümaarü gáuxpechitaruxü̃ quixĩ ya yíxema üa̱xcüarü naiemaxü̃ tüxü̃ iguxe. Rü tüxü̃ ícupoxü̃ nüxna i ngẽma duü̃xü̃gü i poraãcü chixecümagüxü̃ i ñoma taxüchicü ya buanecü ya pucümaxã íngucürüxü̃ ixĩgüxü̃.

Ichaía 33:5

Nüma ya Cori ya Tupana ya Guxãétüwa Ngẽxmacü rü daxũguxü̃ i naanewa nixĩ i nangẽxmaxü̃. Rü nüma nixĩ i mugü i we̱xguxü̃ rü aixcüma mexü̃ Chióü̃arü duü̃xü̃güca̱x naxueguxü̃.

Chacaría 12:5

Rü ngẽxguma ngẽmaxü̃ nadaugügu i Yudáanearü ãẽ̱xgacügü rü nügümaxã tá ñanagürügü: “Cori ya Guxãxétüwa Ngẽxmacü nixĩ i Yerucharéü̃cüã̱xgüarü Tupana, rü nüma nixĩ i pora nüxna naxãxü̃”, ñanagürügü.