Ichaía 27:12 - Tupanaarü Ore

¹² Rü ngẽma ngunexü̃ i Cori ya Tupana nagu yadexechixü̃ i Iraétanüxü̃, rü natü i Eufrátewa tá inanaxügü ñu̱xmatata Equítuarü natügu yacuáx nax nanutaque̱xeãxü̃ i Iraétanüxü̃ ñoma trigu wüxipü̱xüchigü naxchirena inuxü̃xü̃rüxü̃.

Ichaía 27:12 Referans Kwoze

Naanearü ügüchiga 15:18

Tupana rü yematama ngunexü̃gu Abráü̃maxã inaxuneta rü ñanagürü nüxü̃: —Choma tá cutaagüna chanaxã i guxü̃ma i ñaa naane i Equítuanearü natüwa inaxügü rü ñu̱xmatáta ngẽma natü i Eufrátewa nangu.

Ichaía 56:8

Rü choma rü tá nachixü̃aneca̱x chanawoeguxẽxẽ i ngẽma Iraétanüxü̃ i taxũta nachixü̃aneca̱x woeguxü̃. Rü tá chananutaque̱xe wüxigu namaxã i togü i nachixü̃anecüã̱x i duü̃xü̃gü. Rü choma ya Tupana nixĩ i nüxü̃ chixuxü̃ i ngẽma —ñanagürü.

Ore i mexü̃ ga Cuáü̃ ümatüxü̃ 10:16

Rü choxü̃́ nangẽxmagü ta i togü i carnérugü i tama ñaa naxpüü̃wa ngẽxmagüxü̃. Rü ngẽmagü rü tá ta nua chanagagü, rü tá chauga naxĩnüe. Rü wüxitücumü tátama nixĩ rü choma tátama nixĩ i norü dauruxü̃ chixĩxü̃.

Ore i mexü̃ ga Cuáü̃ ümatüxü̃ 6:37

Rü guxãma ya yíxema duü̃xẽgü ya Chaunatü choxna tüxü̃ mugüxe rü chorü duü̃xü̃gü tixĩgü. Rü texé ya choxü̃́ yaxõgüxe rü taxũtáma tüxü̃ chaxoo̱x.

Ore i mexü̃ ga Luca ümatüxü̃ 15:4

—¿Texé i petanüwa rü ngẽxguma tüxü̃́ nangẽxmagu i 100 i tümaarü carnérugü rü wüxi tüxü̃́ iyarütaxu̱xgu, rü taux ẽ̱xna i nachitaxü̃wa tanawogüxü̃ i ngẽma 99, rü naxca̱x tayadauxü̃ i ngẽma tüxü̃́ iyarütaxuxü̃ ñu̱xmata nüxü̃ itayangau?

Amúx 9:9

Rü tá chanamu nax nawooneãxü̃ca̱x i ngẽma Iraétanüxü̃ i chixexü̃gu maxẽxü̃ ngẽxgumarüxü̃ i trigu i norü papetüxü̃wa ipapetüxü̃ nax ínayixü̃ca̱x i ngẽma norü üxaxü̃. Natürü yima mexü̃ne ya napüxüchire rü taxunetáma waixü̃mügu nangu.

Yeremía 3:14

Rü nüma ya Cori ya Tupana rü ñanagürü: —¡Cha̱u̱xca̱x pewoegu, Pa Chorü Duü̃xü̃gü ya Tama Ixĩnüechaü̃güxe! Erü choma nixĩ i perü yora chixĩxü̃. Rü wüxichigü ya ĩanewa rü wüxi i duü̃xü̃ tá chiyauxchigü, rü wüxichigü i natücumüwa rü taxre i duü̃xü̃ tá chiyauxchigü, rü ñu̱xũchi Chióü̃ca̱x tá chanawoeguxẽxẽ.

Ichaía 17:6

Rü ngẽma noxretama i oribugü i ngéma yaxüxü̃rüxü̃acü tá nixĩ i ngẽma noxre i duü̃xü̃gü ya yima ĩanegüwa yaxǘgüxü̃. Rü norü buxwena rü ngẽma taxre rüe̱xna tomaepü̱x i oribuarü o i natanüpe̱xewa rüe̱xna ngẽma ãgümücü rüe̱xna wüxime̱e̱xpü̱x i nachacüüpe̱xewa yaxüxü̃rüxü̃ tá nixĩ. Rü Cori ya Tupana ya Iraétanüxü̃arü Tupana nixĩ ya ngẽma ñacü.

Wiyaegü 72:8

Rü nüma ya ãẽ̱xgacü rü name nixĩ i namaxã inacuáxü̃ i guxü̃ma i naanegü i márwa ixüxgüxü̃ rü ñu̱xmata to i márwa nangu. Rü ngẽma nixĩ i naanegü i taxtü i Eufrátewa ixügüxü̃ rü ñu̱xmata naane íyacuáxü̃wa nangu.

Wiyaegü 68:22

Rü nüma ya Tupana rü ñanagürü: —Pa Iraétanüxü̃x, choma rü tá Bacháü̃anewa ne chanagagü i perü uanügü, rü mártamawa tá ne chanagagü i ngẽma perü uanügü.

Ichaía 49:5

Rü nüma ya Cori ya Tupana rü chauéanüwa choxü̃ nango̱xẽxẽ nax norü duü̃xü̃ chixĩxü̃ca̱x rü ngẽmaãcü Iraétanüxü̃ i Acóbuarü duü̃xü̃güxü̃ naxca̱x chawoeguxẽẽxü̃ca̱x nax wenaxarü norü duü̃xü̃gü yixĩgüxü̃ca̱x. Rü Tupanape̱xewa rü poraãcü nüxü̃́ chame rü ngẽmaca̱x choxü̃ naporaxẽxẽ. Rü ngẽma nixĩ i nagu charüxĩnü.

Yeremía 44:28

Rü noxre tátama tixĩ ya yíxema naétüwa maxẽxe i ngẽma dai rü ñu̱xũchi woeguxe nüxna i Equítuane nax wena Yudáanewa taxĩxü̃ca̱x. Rü guxü̃ma ga yema duü̃xü̃gü ga Yudáanewa íyaxügüxü̃ rü Equítuanewa ĩxü̃ nax ngéma namaxẽxü̃ca̱x, rü tá nüxü̃ nadaugü nax texéarü ore tá aixcüma inguxü̃, choxrü ore, rüe̱xna ngẽma duü̃xü̃güarü̃ ore.

Echequié 20:34

Rü choma rü tá pexü̃ chade natanüwa i ngẽma duü̃xü̃gü rü nachixü̃anegü i ñu̱xma nagu pewoonexü̃. Rü chorü poramaxã rü chorü numaxã tá pexü̃ chapoxcu rü ngẽmaãcü tá pemaxã ichacua̱x.

Echequié 20:41

Rü ngẽxguma pexü̃ íchagaxü̃gu nawa i ngẽma nachixü̃anegü rü yima ĩanegü i ñu̱xma nagu pewoonene, rü tá pexü̃ chayaxu ñoma ãmare i chi̱xemaxü̃rüxü̃. Rü ngẽmaãcü guxü̃ i togü i nachixü̃anecüã̱xpe̱xewa tá ichanawe̱x i chorü üüne i petanüwa tá chango̱xẽxẽxü̃.

Echequié 39:25

Natürü i ñu̱xma i choma ya Cori ya Tupana rü nüxü̃ chixu rü ñachagürü: Ñu̱xma rü tá choxü̃́ naxãũxãchitümüxü̃gü i guxü̃ma i ngẽma Iraétanüxü̃ i Acóbutaagü ixĩgüxü̃. Rü ñu̱xma rü tá yáxna namaxã chaxĩnü nax ngẽmaãcü nüxü̃ yacua̱xüü̃güxü̃ca̱x i chauéga i üünexü̃.

Echequié 47:19

Rü ngẽma Iraéanearü üyeane i súrwaama daxü̃ rü ĩane ya Tamárawa inaxügü. Rü Meribá-cadéarü nataxawa nadapetü rü Equítuanearü natüanacügu nida ñu̱xmata Már i Mediteráneuwa nangu. Rü ngẽma tá nixĩ i Iraéanearü üyeane i súrwaama ngẽxmaxü̃.

Chacaría 8:7

Rü choma rü tá íchananguxü̃xẽxẽ i chorü duü̃xü̃gü naxme̱xwa i ngẽma nachixü̃ane i éstewaama ngẽxmaxü̃ rü ngẽma nachixü̃ane i oéstewaama ngẽxmaxü̃.

Nüxíraxü̃xü̃ ga popera ga ãẽ̱xgacügüchiga 8:65

Yexguma nixĩ ga yexma Charomóü̃maxã nangutaque̱xegü ga muxũchixü̃ma ga duü̃xü̃gü ga guxü̃wama ga Iraéanewa ne ĩxü̃. Rü Amáwa inaxügü ga nórtewaama ne ĩxü̃ rü ñu̱xmata Equítuarü natüwa nangu ga súrwaama ne ĩxü̃. Rü yexguma naxüchigagüãgu ga guma Tupanapata ga taxü̃ne, rü 7 ga ngunexü̃ nagu ningegü. Rü yexgumarüxü̃ ta Tupanaarü cua̱xüü̃xü̃ca̱x nanaxüchigagü ga düxenüchiga ga to ga 7 ga ngunexü̃ nagu yangegüxü̃. Rü yemaacü guxü̃wama 14 ga ngunexü̃wa nangu nax naxüchigagüãxü̃.