Ichaía 27:1 - Tupanaarü Ore

¹ Rü ngẽma ngunexü̃gu rü nüma ya Cori ya Tupana rü norü tara i tacü i ãũcümacü rü pora ngĩxü̃wa ngẽxmacümaxã, tá nanacua̱xi i ngẽma ngo̱xo i Lebiatáü̃ i ãxtape i wü̃xü̃güãcü paxa ixũxü̃. Rü ñu̱xũchi nüma ya Tupana rü tá nayama̱x i ngẽma ngo̱xo i dragóü̃ i márwa ngẽxmaxü̃.

Ichaía 27:1 Referans Kwoze

Echequié 29:3

¡Rü namaxã nüxü̃ ixu rü ñacurügü! “Cori ya Tupana rü ñanagürü cuxü̃: ‘Pa Faraóü̃ i Equítuanearü Ãẽ̱xgacüx, choma rü cumaxã nüxü̃ chixu nax curü uanü chixĩxü̃. Rü cuma rü ñoma wüxi i coyaarü ãũxü̃ i taxtü i Nílugu caxü̃rüxü̃ quixĩ. Rü cuma rü ñacurügü: Ngẽma taxtü i Níru rü choxrü nixĩ rü chomatama chanango̱xẽxẽ, ñacurügü.

Ichaía 51:9

¡Pa Tupanax, paxa nango̱xẽxẽ i curü pora! ¡Rü inawe̱x i curü pora ga yexguma nũxcüma icunawe̱xgurüxü̃! ¿Tama ẽ̱xna cuma yixĩxü̃ ga cunada̱i̱xü̃ ga yema Equítuanecüã̱xgü ga yexguma cuyapayexẽẽgu ga már rü natamawa cuyachoü̃xẽẽgu ga curü duü̃xü̃gü ga Equítuanecüã̱xme̱xẽwa ícunguxü̃xẽxẽxü̃?

Yema Cuáü̃ nüxü̃ dauxü̃ i yixcüra tá ngupetüxü̃chiga 12:3

Rü yemawena daxũwa nango̱x ga to ga cua̱xruxü̃. Rü yéma nayexma ga wüxi ga coya ga dauxü̃ ga taxüchixü̃ ga 7 ga naeru nüxü̃́ yexmaxü̃ rü 10 ga naxchata̱xcure. Rü wüxichigü ga naeruwa rü nüxü̃́ nayexma ga norü nga̱xcueruxü̃.

Ichaía 66:16

Erü Tupana rü üxümaxã rü taramaxã tá nanapoxcue i guxü̃ma i ñoma i naanewa maxẽxü̃ i duü̃xü̃gü. Rü tá namuxũchi i ngẽma poxcugu yuexü̃.

Wiyaegü 104:26

Rü ngẽmagu narüxĩĩxü̃ ya wapurugü ya taxüchine. Rü ngẽmawa nangẽxma i ngẽma Leviatáü̃ i taxüchixü̃ i cumatama cuxüxü̃ nax curü ĩnüca̱xwa̱xeruxü̃ yixĩxü̃ca̱x.

Yox 26:13

Rü wüxi i cue ñaxü̃maxã ínanangegü i daxũguxü̃ i naane. Rü naxme̱xmaxã nayama̱x i ngẽma ãxtape i paxãma iñaxwa̱xexü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 20:2

Rü yema Tupanaarü orearü ngeruxü̃ rü yema coyaxü̃ niyaxu. Rü yematama coya nixĩ ga yema nũxcümaü̃xü̃ ga ãxtape ga ngo̱xo ga Chataná ixĩxü̃. Rü yema orearü ngeruxü̃ rü 1,000 ga taunecügüca̱x cadénamaxã nayana̱i̱x.

Yema Cuáü̃ nüxü̃ dauxü̃ i yixcüra tá ngupetüxü̃chiga 19:21

Rü yema tara ga gumá cowaruétüwa rütocüa̱xwa ixũxũxü̃maxã nanadai ga yema ngo̱xogüarü churaragü. Rü guxü̃ma ga ngurucugü, rü yemamachimaxã nangãxcharaü̃gü.

Yeremía 51:34

Rü yima ĩane ya Yerucharéü̃ rü ñanagürü: —Nüma ga Babiróniaanearü ãẽ̱xgacü ga Nabucudonochó rü chaugu napogü rü nayagagü ga chorü duü̃xü̃gü rü nayana ga chorü ngẽmaxü̃gü rü ñoma wüxi i poratu ya ngeãcucürüxü̃ yéma choxü̃ nata̱x. Rü ñoma wüxi i ngo̱xo i márcüã̱xrüxü̃ choxü̃ ínaga rü nanayaxu ga guxü̃ma ga mexü̃gü ga choxü̃́ yexmaxü̃ ga nüxü̃́ ngúchaü̃xü̃ rü ñu̱xũchi ínanawogü ga yema íyaxügüxü̃. Rü ñu̱xma chanaxwa̱xe nax Babirónia naxütanüxü̃ naxca̱x ga yema chixexü̃ ga chomaxã naxüxü̃. Rü ñu̱xma chanaxwa̱xe nax ngẽma Cadéugü naxütanüxü̃ naxca̱x ga chorü duü̃xü̃gü ga nada̱i̱xü̃ —ñanagürü ya Yerucharéü̃.

Yox 40:19

Rü guxü̃ma i ngẽma naeü̃gü i chaxüxü̃tanüwa rü ngẽma ipopútamu nixĩ i yexeraãcü rüporamaexü̃. Rü choma i norü üruü̃xicatama nixĩ i nüxü̃ charüporamaexü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 17:15

Rü yema orearü ngeruxü̃ rü ñanagürü ta choxü̃: “Ngẽma taxü̃ i dexá i nüxü̃ cudauxü̃ i naétüwa natoxü̃ i ngẽma nge i naxü̃nemaxã taxexü̃, rü ngẽma nixĩ i naguxü̃raü̃xü̃ i ĩanegücüã̱x, rü naguxü̃raü̃xü̃ i duü̃xü̃gütücumü, rü naguxü̃raü̃xü̃ i nachixü̃anecüã̱x, rü naguxü̃raü̃xü̃ i duü̃xü̃gü i to i nagawa idexagüxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 17:1

Rü yema 7 ga orearü ngeruxü̃ ga daxũcüã̱x ga nüxü̃́ yexmagüxü̃ ga 7 ga copugü, rü yematanüwa rü wüxi rü cha̱u̱xca̱x nixũ, rü ñanagürü choxü̃: “¡Nua naxũ! Rü tá cuxü̃ nüxü̃ chadauxẽxẽ i ta̱xacü tá nixĩ i ngĩrü poxcu i ngẽma nge i naxü̃nemaxã taxexü̃ i dexáétüwa rütocü.

Yema Cuáü̃ nüxü̃ dauxü̃ i yixcüra tá ngupetüxü̃chiga 16:13

Rü nüxü̃ chadau rü yema coyaa̱xwa, rü yema nüxíraxü̃xü̃ ga ngo̱xoã̱xwa, rü yema orearü uruü̃netaa̱xwa, rü ínaxũxũ ga tomaepü̱x ga naãxẽgü ga chixexü̃ ga ñoma curururüxü̃ ixĩgüxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 13:11

Rü yemawena nüxü̃ chadau ga wüxi ga to ga ngo̱xo ga taxrechata̱xcurexü̃ ga waixü̃müanewa ixũxũxü̃. Rü yema naxchata̱xcu̱xre rü ñoma carnéruchatacu̱xrerüxü̃ nixĩ. Natürü ga naga rü ñoma coya ga taxüchixü̃garüxü̃ nixĩ.

Yema Cuáü̃ nüxü̃ dauxü̃ i yixcüra tá ngupetüxü̃chiga 13:4

Rü ga duü̃xü̃gü rü yema coya ga Chatanáxü̃ nicua̱xüü̃gü yerü yema ngo̱xoxü̃ naporaxẽxẽ nax ãẽ̱xgacü yixĩxü̃ca̱x. Rü nüma ga duü̃xü̃gü rü yexgumarüxü̃ ta yema ngo̱xoxü̃ nicua̱xüü̃gü, rü ñanagürügü: “¿Texé tangexma ya ñaa ngo̱xorüxü̃ poraxe? ¿Rü texé tapora nax namaxã tügü tadaixü̃?” ñanagürügü.

Yema Cuáü̃ nüxü̃ dauxü̃ i yixcüra tá ngupetüxü̃chiga 2:16

Rü ngẽmaca̱x chanaxwa̱xe i nüxü̃́ nüxü̃ cuxoo̱x i ngẽma ngu̱xẽẽtae. Rü ngẽxguma tama nüxü̃́ nüxü̃ cuxoo̱xgu, rü paxa tá ngéma cuxü̃tawa chaxũ, rü ngẽma tara i cha̱u̱a̱xwa íxũxũxü̃maxã tá ngẽma duü̃xü̃gümaxã togü tadai.

Yeremía 51:13

Rü cumax, Pa Babiróniax, nax taxtücutüwa cungexmaxü̃ rü cumuarü ngẽmaxü̃ã́xü̃, rü marü cuxca̱x ínangu nax cuyarüxoxü̃. Rü ngẽxma tá nayacua̱x nax wüxi ya ĩane quixĩxü̃.

Yeremía 47:6

Pa Tupanax, poraãcü ngúxü̃ tingegü. ¿Rü ñuxgura tá ta nüxü̃ curüchauxü̃ nax curü taramaxã toxü̃ cuda̱i̱xü̃? ¡Nachixü̃gu yaxǘcuchi i curü tara nax tama namaxã toxü̃ cuda̱i̱xü̃ca̱x!

Ichaía 65:25

Rü ngẽma airu i naixnecücüã̱x rü tá carnérumaxã wüxiwa nachibüe. Rü ngẽma leóü̃ rü wocarüxü̃ tá maxẽ nangõ̱x. Rü ngẽma ãxtape rü marü taxũtáma tüxü̃ nangõ̱x, erü ngẽma waixü̃mü tá nangõ̱x. Rü guxü̃wama ya yima ma̱xpǘne ya chopata nawa ngẽxmanewa rü taxúetama ya texé chixexü̃ taxü —ñanagürü. Rü nüma ya Cori ya Tupana nixĩ i ngẽma ñaxü̃.

Ichaía 26:21

Erü nüma ya Cori ya Tupana rü napatawa tá ínaxũxũ nax ñoma i naanecüã̱x i duü̃xü̃güxü̃ napoxcuexü̃ca̱x nagagu i norü pecadugü i nape̱xewa naxügüxü̃. Rü ñu̱xũchi ñoma i naane rü taxũtáma tüxü̃ nicu̱xgü ya yíxema nagu tüxü̃ nadaixe. Rü tá nango̱x i ngẽma máetagü ga ñoma ga naanewa naxügüxü̃.

Wiyaegü 45:3

Pa Poracüx ¡ẽcü cugücüwawa yanga̱xcuchi i ngẽma curü tara! Rü ngẽma nixĩ i curü poraarü cua̱xruxü̃ ixĩxü̃.

Yox 3:8

Rü ngẽma yuüxü̃gü ga Lebiatáü̃maxã icua̱xgüxü̃ rü chierüx chixexü̃ namaxã naxuegugügu ga yema ngunexü̃ ga nagu chabuxü̃.

Yox 41:1

Rü nüma ga Tupana rü ñanagürü ta: —Ngẽma yewaxe ¿rü cuxca̱x rü wüxi i poxwamaxã icuyayaxuxü̃? ¿Rü cuxü̃́ natauxchaxü̃ nax wüxi i naxĩnütamaxã cunawẽxarü conüã́xü̃?

Ichaía 65:12

Rü ngẽmaca̱x pemaxã chanaxuegu nax taragu tá peyuexü̃. Yerü yexguma pexca̱x chacaxgu rü tama choxü̃ pengãxü̃gü, rü yexguma pemaxã chidexagu rü tama choxü̃́ iperüxĩnüe. Rü penaxüama ga yema tama chanaxwa̱xexü̃ rü penayauxgü ga yema choxü̃ nuxẽẽxü̃ —ñanagürü ga Tupana.

Amúx 9:3

Rü woo ma̱xpǘnetape̱xe ya Carmérugu yanacu̱xgügu, rü choma rü tá ngẽxma naxca̱x chayadauama. Rü ngẽxguma mártamagu yanacu̱xgügu, rü choma rü tá chanamu i naeü̃ i taxüchixü̃ i düraxü̃ i márcüã̱x nax ngẽxma nagu nawagüxü̃ca̱x.