Ichaía 26:16 - Tupanaarü Ore

¹⁶ Rü yexguma guxchaxü̃ toxca̱x ínguxgu, Pa Corix, rü cuxca̱x tadaugüama naétüwa ga yema ngúxü̃ ga toxca̱x ícunguxẽẽxü̃ nax toxü̃ curüwe̱xãchigüxẽẽxü̃ca̱x.

Ichaía 26:16 Referans Kwoze

Ochéa 5:15

Rü ñu̱xũchi chopataca̱x tá chataegu, rü ngéma tá changexma ñu̱xmatáta nümatama nüxü̃ yacua̱xãchitanü nax chixexü̃ naxügüxü̃. Rü ngẽxguma ngúxü̃ yangegügu rü tá aixcüma cha̱u̱xca̱x nada̱u̱xgu —ñanagürü ga Tupana.

Wiyaegü 50:15

¡Rü cha̱u̱xca̱x peca ega ngẽxguma guxchaxü̃ pexü̃ ngupetügu! Rü choma rü tá pexü̃ íchapoxü̃ rü pema rü tá choxü̃ picua̱xüü̃gü —ñanagürü ya Tupana.

Yema Cuáü̃ nüxü̃ dauxü̃ i yixcüra tá ngupetüxü̃chiga 3:19

Choma rü tüxü̃ chaxucu̱xẽ rü tüxü̃ ichayarüwe̱xãchixẽxẽ ya guxãma ya yíxema tüxü̃ changechaü̃xẽ. Rü ngẽmaca̱x name nixĩ i nüxü̃ curüxo i cucüma i chixexü̃ rü Tupanaca̱x cutaegu.

Ochéa 7:14

Rü ngẽxguma yada̱xaweegu rü ngúxü̃ yangegügu, rü norü pechicaxü̃güwa ngü̃xẽẽca̱x choxna nacagüe, natürü tama aixcüma norü ngúchaü̃maxã choxna nacagüe. Rü nügü nayapiexẽxẽ nax ngẽmaãcü tríguca̱x rü bínuca̱x ínacagüxü̃ca̱x. Natürü tama aixcüma chauga naxĩnüe.

Auxexü̃chiga 2:19

¡Írüda! ¡Rü wüxichigü i chütaxü̃ rü wüxichigü i ora nayumüxẽ! ¡Rü Cori ya Tupanamaxã nüxü̃ ixu i curü guxchaxü̃gü! ¡Rü cugüwa ínaxũxü̃xẽxẽ i guxü̃ma i ngẽma nagu curüxĩnüxü̃, ñoma dexá iyáxü̃rüxü̃! Rü Tupanaca̱x dauxü̃ naxunagü rü curü yumüxẽwa curü buxü̃güca̱x ínaca nax tama ĩanearü namagügu taiyamaxã nayuexü̃ca̱x.

Yeremía 22:23

Rü ñu̱xma i cumax, Pa Ãẽ̱xgacüx, rü cutaãxẽ nawa ya yima mexü̃ne ya ãẽ̱xgacüpata i Líbanuwa ne naxü̃ i ocayiwamaxã pexcüwagüne. Natürü ngúxü̃ tá quinge i ngẽxguma ngẽma ãũcümaxü̃gü cuxca̱x íngugügu, ñoma wüxi ya ngexe ya íxraxacüxe i ngúxü̃ ingexerüxü̃ —ñanagürü ga Cori ya Tupana.

Ichaía 37:3

Rü Ichaíamaxã nüxü̃ nixugüe ga ãẽ̱xgacüarü ore ga ñaxü̃: —Ñu̱xma rü wüxi i taxü̃ma i ãũcümaxü̃wa tangexmagü, rü tórü uanügü rü tamaxã naguxchigagü rü tüxü̃ nacugüe. Rü poraãcü ngúxü̃ tingegü ñoma wüxi i ngexü̃ i ixraxacüchaü̃xü̃ rü turaxü̃rüxü̃.

Wiyaegü 142:2

Rü nape̱xewa naxca̱x chayarüdexa i ngẽma guxchaxü̃gü i choxü̃́ ngẽxmaxü̃. Rü ngẽxguma chauétü nanguxgu i ngẽma guxchaxü̃gü rü nape̱xewa nüxü̃ chixu nax poraãcü ngúxü̃ chingexü̃. Pa Corix, cuma nüxü̃ cucua̱x i chomaxü̃ i nagu chixũxü̃. Rü ngẽma nama i nagu chixũxü̃wa rü chorü uanügü rü ngẽxma chope̱xegu nanaxǘgü i wüxi i yauxruxü̃.

Wiyaegü 91:15

Rü ngẽxguma choxna tacaxgu rü choma rü tá tüxü̃ changãxü̃ rü tá tümaxü̃tawa changexma. Rü ngẽxguma guxchaxü̃ tüxü̃ üpetügu rü tá nawa tüxü̃ íchanguxuchixẽxẽ rü poraãcü tá tümamaxã chataãxẽ.

Wiyaegü 42:4

Rü ngẽxguma ngẽmagu charüxĩnügu rü marü tama yáxna namaxã chaxĩnü i ngẽma nax chaxaxuxü̃. Rü nüxna chacua̱xãchi ga yexguma Tupanapatawa chanagagügu ga yema muxü̃ma ga duü̃xü̃gü. Rü taãẽãcü moxẽ nüxna taxã rü tanatachigaxẽxẽ.

1 Chamué 1:15

Rü ngĩma ga Ána rü inangãxü̃ rü ngĩgürügü: —Tama nixĩ i changãxü̃xü̃, Pa Corix. Tama nixĩ i bínu chayaxaxüxü̃ rüe̱xna ta̱xacürü axchiü i ngúchiáxü̃ chixaxüxü̃. Rü ngẽma choxü̃ ngupetüxü̃ nixĩ nax changexacüxü̃ rü ngẽmaca̱x changechaü̃, rü Tupanamaxã nüxü̃ chixuxü̃ i ngẽma guxchaxü̃.

Iraétanüxü̃arü muxchiga 21:7

Rü nüma ga duü̃xü̃gü rü Moichéca̱x naxĩ rü ñanagürügü nüxü̃: —Aixcüma chixexü̃ taxügü yerü chixri cuchiga rü Corichiga tidexagü. ¡Rü nüxna nachogü ya Cori ya Tupana nax toxna yaxĩgachixẽẽãxü̃ca̱x i ñaa ãxtapegü! —ñanagürügü. Rü nüma ga Moiché rü Cori ya Tupanana naca nax Iraétanüxü̃axü̃́ nüxü̃ nangümaxü̃ca̱x ga norü chixexü̃gü.

Yeremía 2:27

Rü pemax, Pa Iraétanüxü̃x, rü wüxi ya nai rü ñaperügügü nüxü̃: “Cuma nixĩ i tonatü quixĩxü̃”, ñaperügügü nüxü̃. Rü wüxi ya nuta rü ñaperügügü nüxü̃: “Cuma nixĩ i toé”, ñaperügügü nüxü̃. Natürü i choma rü choxna pexãgüca̱xwexmare rü tama choxü̃ perüdaunüchaü̃. Natürü ngẽxguma ãũcümaxü̃wa pengẽxmagügu rü cha̱u̱xca̱x peca rü ñaperügügü: “¡Paxa nua naxũ nax toxü̃ curüngü̃xẽẽxü̃ca̱x!” ñaperügügü.

Ãẽ̱xgacügü ga guxchaxü̃güarü mexẽxẽruü̃gü 10:15

Rü yexguma ga Iraétanüxü̃ rü Corixü̃ nangãxü̃gü rü ñanagürügü: —Aixcüma nixĩ i chixexü̃ taxügüxü̃. ¡Rü tomaxã naxü i ngẽma yexera cuxca̱x rümemaexü̃, natürü tanaxwa̱xe i curü ngü̃xẽxẽ. ¡Rü toxü̃ ínanguxü̃xẽxẽ i ñu̱xmax! —ñanagürügü.

Wiyaegü 27:8

Rü chauãẽwa rü chaugümaxã ñachagürü: —Cori ya Tupanaca̱x tá chadau —ñachagürü. Rü ngẽmaca̱x i chomax, Pa Corix, rü cuxca̱x chadau.

Wiyaegü 77:3

Rü nüxna chacua̱xãchi ya Tupana rü chaxaxu. Rü Tupanaarü ngü̃xẽẽca̱x chadau, natürü changechaü̃ erü tama paxa ínangu i norü ngü̃xẽxẽ.

Wiyaegü 78:34

Rü yexguma Tupana napoxcueguama ga yema duü̃xü̃gü rü yexgumama poraãcü naxca̱x nadaugü rü naxca̱x nawoegu. Rü nüxna nacua̱xãchie ya yimá Tupana ya Guxü̃étüwa Ngẽxmacü ga norü dauruxü̃ rü norü poxü̃ruxü̃ ixĩcü.

Yeremía 29:12

Rü ngẽxguma marü wena naxca̱x pewoegu̱xgux i ngẽma naane i pexna chaxãxü̃, rü ngéma perü yumüxẽwa tá choxna pecagügu, rü choma rü tá pexü̃ chaxĩnü.