Ichaía 26:15 - Tupanaarü Ore

¹⁵ Pa Corix, cuma nixĩ i toxü̃ quimuxẽẽxü̃ nax ngẽmaãcü cuxü̃ ticua̱xüü̃güxü̃ca̱x. Rü ñu̱xũchi toxü̃́ nüxü̃ cutaneta i guxü̃ma i tochixü̃anearü üyeanegü.

Ichaía 26:15 Referans Kwoze

Ichaía 9:3

Rü ñu̱xmax, Pa Cori Pa Tupanax, rü poraãcü taãxẽ toxca̱x ícunguxẽxẽ rü ngẽma taãxẽ rü aixcüma nataxüchi. Rü guxãma tataãẽgü i cupe̱xewa ñoma tonetüarü o tibuxgügurüxü̃ rü ñoma churaragü i norü uanügüarü ngẽmaxü̃gü nügümaxã itoyegurüxü̃.

Ore i mexü̃ ga Cuáü̃ ümatüxü̃ 17:1

Rü yema ñaxguwena rü Ngechuchu daxũgu nadawenü, rü ñanagürü: —Pa Chaunatüx, marü nawa nangu i ngunexü̃ nax duü̃xü̃güarü pecaduca̱x chayuxü̃. Rü chanaxwa̱xe nax duü̃xü̃güxü̃ nüxü̃ cucua̱xẽẽxü̃ nax choma rü aixcüma Cune chixĩxü̃. Rü ngẽmaãcü i choma rü tá nüxü̃ nüxü̃ chacua̱xẽxẽ nax cuma rü aixcüma Tupana nax quixĩxü̃.

Ore i mexü̃ ga Cuáü̃ ümatüxü̃ 15:8

Rü ngẽxguma muxü̃ i duü̃xü̃gü cha̱u̱xca̱x pegagügu, rü ngẽmawa tá nango̱x i Chaunatüarü pora. Rü ngẽmaãcü i pema rü aixcüma chorü ngúexü̃gü tá pixĩgü.

Echequié 36:24

Rü choma, Pa Iraétanüxü̃x, rü tá pexü̃ íchagaxü̃ nawa i guxü̃ma i ngẽma nachixü̃anegü i nawa pengẽxmagüxü̃. Rü wüxiwa tá pexü̃ chagagü, rü ñu̱xũchi perü naaneca̱x tá pexü̃ chawoeguxẽxẽ.

Echequié 5:12

Rü wüxi i norü tomaepü̱xtücumü i curü duü̃xü̃gü rü da̱xaweanemaxã rü taiyamaxã tá cugu nayue, Pa Yerucharéü̃x. Rü ngẽma to i tomaepü̱xtücumü rü cucüwagu tá norü uanügü nanadai. Rü ngẽma to i tomaepü̱xtücumü i íyaxügüxü̃ rü guxü̃ i naanegu tá chanawoone. Rü choma rü tá ngẽma duü̃xü̃güweama chixũchigü namaxã i wüxi i tara i cho̱xme̱xgu tá chingexü̃.

Yeremía 32:37

Rü yexguma chorü duü̃xü̃gümaxã poraãcü chanuxgu rü muxü̃ma ga nachixü̃anegu chanawoone. Natürü wena tá chananutaque̱xe i ngẽma chorü duü̃xü̃gü rü daa Yerucharéü̃cax tá chanawoeguxẽxẽ. Rü ngẽxguma i nümagü rü taãẽãcüma tá namaxẽ rü taxũtáma ãũcümaxü̃wa nangẽxmagü.

Yeremía 30:19

Rü chorü duü̃xü̃gü rü tá norü wiyaewa choxna moxẽ naxãgü rü tá nacugüe rü tá nataãẽgü. Rü taxũtáma ínarüxĩ i norü mu, erü choma rü tá chayamuxẽxẽ. Rü ngẽma togü i duü̃xü̃gü rü taxũtáma nüxü̃ naxoe erü choma rü tá chanatachigaxẽxẽ i ngẽma chorü duü̃xü̃gü.

Ichaía 60:21

Rü guxü̃ma i ngẽma Yerucharéü̃wa maxẽxü̃ rü duü̃xü̃gü i aixcüma mexü̃gu rüxĩnüexü̃ tá nixĩgü. Rü guxü̃gutáma nachixü̃anearü yora tá nixĩgü. Rü ngẽma duü̃xü̃gü rü ñoma wüxi i nanetü i chomatama ichatoxü̃rüxü̃ tá nixĩgü rü ngẽmatanüwa tá nango̱x i chorü pora.

Ichaía 44:23

¡Pa Daxũguxü̃ i Naanex, taãẽãcü Tupanaxü̃ icua̱xüxü̃ naxca̱x i guxü̃ma i ngẽma naxüxü̃! ¡Rü Pa Ñoma i Naanearü Doxonexü̃gü i Taxü̃x, nüxü̃ picua̱xüü̃güx! ¡Rü pemax Pa Ma̱xpǘnegüx rü Pa Naixnecügüx, rü taãẽãcü nüxü̃ picua̱xüü̃gü ya Tupana, yerü nüma nixĩ ga norü poramaxã ínanguxü̃xẽẽãxü̃ ga Iraétanüxü̃ ga Acóbuarü duü̃xü̃gü naxme̱xwa ga norü uanügü!

Ichaía 33:17

Rü wenaxarü tá nüxü̃ pedau ya ãẽ̱xgacü ya norü ãẽ̱xgacüchirugu icúcü. Rü ngẽma norü üyeanegü i tachixü̃ane rü yáxü̃wa nangu.

Neemía 9:23

Rü ñu̱xũchi namaxã cunaxuegu nax yamuxacüxü̃ca̱x ñoma ẽxtagü ya daxũwa ngẽxmagücürüxü̃. Rü nawa cunagagü ga torü o̱xigü nax napugüãxü̃ca̱x ga yema naane ga noxri norü o̱xigümaxã cuxueguxü̃ nax norü yixĩgüxü̃ca̱x.

Wenaxarü naxümatü ga Tupanaarü mugü 10:22

Rü yexguma Equítuanewa nangugügu ga yema nũxcümaü̃güxü̃ ga perü o̱xigü, rü 70 icatama yema nangugü. Natürü i ñu̱xma i pemax rü perü Cori ya Tupana pexü̃ nimuxẽxẽ, rü ngẽmaca̱x ñoma ẽxtagü i daxũxü̃wa nüxü̃ idauxü̃rüxü̃ pemuxũchi.

Iraétanüxü̃arü muxchiga 23:10

Rü ñoma ãte̱xexü̃rüxü̃ namuxũchi, ¿rü texé tá tüxü̃́ natauxcha nax tayaxugüxü̃? ¿Rü texé tá nüxü̃ cuáxü̃ i norü mu? Chierüx ngẽma duü̃xü̃gü i mexü̃rüxü̃ chixĩxgu i choma ñu̱xmatáta chayu̱x. Rü ngẽmawena rü chanaxwa̱xe nax Tupana ngẽma duü̃xü̃güxü̃ yaxuxü̃rüxü̃, choxü̃ yaxuxü̃ —ñanagürü.

Naanearü ügüchiga 12:2

Erü tá nüxü̃ curüngü̃xẽxẽ i cutaxa nax yamuxü̃ca̱x rü wüxi i taxü̃ i nachixü̃ane nawa ngóxü̃ca̱x. Rü tá mexü̃ cumaxã chaxuegu rü tá cuxü̃ chatachigaxẽxẽ. Rü cugagu tá mexü̃ nayauxgü i togü.

Ore i mexü̃ ga Luca ümatüxü̃ 21:24

Rü norü uanügü rü taramaxã tá nanadai i ñuxre. Rü togü, rü tá ínanayauxü̃ nax to i nachixü̃anewa nagagüãxü̃ca̱x. Rü ñu̱xũchi i ngẽma norü uanügü rü tá nagu napogüe ya yima ĩane ya Yerucharéü̃. Rü ngẽmaãcü tá nangupetü ñu̱xmatáta nawa nangu i ngẽma ngunexü̃ i nagu Tupana ínawoxü̃xü̃ i ngẽma uanügü.

Ichaía 10:22

Pa Iraétanüxü̃x, woo curü duü̃xü̃gü rü namuxũchi ñoma naxnecüchicute̱xe i márpechinüwa ngẽxmacürüxü̃, rü ngẽmatanüwa rü noxre tátama nixĩ i Tupanaca̱x woeguxü̃. Rü ngẽma poxcu rü marü naxuegu nagagu i ngẽma chixexü̃ i pexüxü̃.

Norü taxre ga popera ga ãẽ̱xgacügüchiga 23:27

Rü yemaca̱x ga Tupana rü ñanagürü: —Ñu̱xmax, rü tá nüxna chixũgachi i Yudáanearü duü̃xü̃gü yema Iraéanearü duü̃xü̃güna chixũgachixü̃rüxü̃. Rü taxũtáma nawa changexmaxü̃ ya yima ĩane ya Yerucharéü̃ ya nüxü̃ chaxunetachiréne. Rü ngẽxgumarüxü̃ ta taxũtáma nawa changexma ya yima chopata ya taxü̃ne ga ü̃pa nüxü̃ chixuxũne nax nawa tá changexmaxü̃ —ñanagürü ga Tupana.

Norü taxre ga popera ga ãẽ̱xgacügüchiga 17:23

Rü yemaca̱x ga Cori ya Tupana rü düxwa Iraéanecüã̱xgüna nixũgachi, yema guxü̃ma ga norü orearü uruxü̃güwa nüxü̃ yaxuxü̃rüxü̃. Rü yemaacü ga yema Iraéanecüã̱xgü, rü Achíriaanewa nanagagü. Rü yexguma nachiga naxümatügu rü yématama nayexmagü.

Norü taxre ga popera ga ãẽ̱xgacügüchiga 17:6

Rü yexguma 9 ga taunecü marü ãẽ̱xgacü yixĩxgu ga Ochéa, rü nüma ga Achíriaanearü ãẽ̱xgacü rü nanapu ga guma ĩane. Rü Achíriaarü naanewa nanagagü ga yema Iraéanecüã̱xgü. Rü ĩane ga Arágu nayanu ga natü ga Abócutüwa ga Gocháü̃anewa. Rü togü rü Médiatanüxü̃arü ĩanegügu nayanu.

Nüxíraxü̃xü̃ ga popera ga ãẽ̱xgacügüchiga 8:46

Rü ngẽxguma curü duü̃xü̃gü guxü̃ i duü̃xü̃gürüxü̃ cupe̱xewa chixexü̃ naxügügu rü ngẽmaca̱x namaxã cunuxgu, rü norü uanügüme̱xẽgu cunayixẽẽgu nax ngẽmaãcü to i nachixü̃ane i yáxü̃guxü̃wa rüe̱xna ngaicamaguxü̃wa nagagüãxü̃ca̱x,

Wenaxarü naxümatü ga Tupanaarü mugü 28:64

Rü nüma ya Cori ya Tupana rü togü i nachixü̃anegü i yáxü̃wa ngẽxmagüxü̃gu tá nanawoone. Rü ngẽma nachixü̃anegüwa rü tá nüxü̃ nicua̱xü̃gü i tupananetagü i nainaxca̱x rü nutanaxca̱x ga woo cuma rü woo curü o̱xigü taguma nüxü̃ cua̱xgüxü̃.

Wenaxarü naxümatü ga Tupanaarü mugü 28:25

Rü nüma ya Cori ya Tupana rü tá perü uanügüme̱xẽgu pexü̃ nayixẽxẽ. Rü pema rü tá meama naxca̱x pichiyechimüü̃ãcü perü uanügüca̱x ípeyaxüãchi nax namaxã pegü pedaixü̃ca̱x. Natürü i pema rü tá naxcha̱xwa pibuxmü rü pegü pewoonemare. Rü guxü̃ma i togü i nachixü̃anegü i ñoma i naanewa ngẽxmagüxü̃ rü tá pemaxã naba̱i̱xãchie.

Naanearü ügüchiga 13:16

Rü choma rü tá chayamuxẽxẽ i cutaagü rü ñoma naxnücüte̱xerüxü̃ tá namuxũchi. Rü ngẽmaãcü taxúetama tayaxugü i ngẽma cutaagü.

Yox 12:23

Nüma rü nayamuxẽxẽ i ngẽma duü̃xü̃gütücumügü rü ñu̱xũchi inayanaxoxẽxẽ. Rü nanawoone rü ñu̱xũchi wenaxarü wüxigu nanangutaque̱xexẽxẽ.

Ichaía 40:5

Rü ngẽxguma i nüma ya Cori ya Tupana rü tá nügü nango̱xẽxẽ nax ñuxãcü naporaxüchixü̃. Rü guxü̃ma i duü̃xü̃gü rü tá nüxü̃ nadaugü i ngẽma norü pora. Rü Cori ya Tupanatama nixĩ i ngẽma ñaxü̃ —ñanagürü.