Ichaía 23:13 - Tupanaarü Ore

¹³ ¡Dücax, Pa Tírucüã̱x rü Chidóü̃cüã̱x, ga yema Babiróniamaxã ngupetüxü̃! Rü yema norü duü̃xü̃gü rü marü natauxe yerü yema Achíriaanecüã̱xgü rü naxca̱x ínayaxüãchi rü nagu napogüe ga guma ĩane wüxigu namaxã ga norü ãẽ̱xgacüpataxü̃gü. Rü ñu̱xma rü ngẽma naeü̃gü i idüraexü̃ i chianexü̃cüã̱x rü ngẽma nachicawa namaxẽ.

Ichaía 23:13 Referans Kwoze

Ngechuchuarü ngúexü̃gü ga yamugüxü̃arü puracüchiga 7:4

Rü yexguma ínaxũxũ ga Abraáü̃ nawa ga yema Cadéuanecüã̱xgüarü naane, rü Aráü̃arü naanegu nayaxãchiü̃. Rü yexguma nanatü yuxguwena, rü ñoma ga naane i ñu̱xma nagu pexãchiü̃xü̃wa naxũ, yerü Tupana núma nanaga.

Abacú 1:6

Rü choma rü tá ichanachigüxẽxẽ i ngẽma Cadéuanecüã̱xgü nax guxü̃wama dai naxügüxü̃ca̱x. Rü nümagü rü duü̃xü̃gü i tama togü i duü̃xü̃güxü̃ ngechaü̃güxü̃ nixĩgü, rü ínamemaregü nax nayauxanegüãxü̃ca̱x i ngẽma naanegü i tama noxrü ixĩxü̃.

Echequié 29:18

—Cumax, Pa Yatüx, rü marü nüxü̃ cucua̱x nax Babiróniaanearü ãẽ̱xgacü ga Nabucudonochó rü guxü̃ma ga norü churaragümaxã ĩane ga Tíruca̱x íyagoõchixü̃ nax yapuãxü̃ca̱x. Rü yema norü churaragü rü yéma nanana ga naxwetagü ga iyáxüchixü̃. Rü yemaca̱x düxwa ínañoxerugü rü ínañootügü, natürü woo nax yemaacü yaxĩgüxü̃ rü tama nüxü̃ nanguxü̃ nax yapugüãxü̃ ga guma ĩane.

Ichaía 13:19

Pa Babiróniax, cuma nax guxü̃ i nachixü̃anegüarü yexera quixĩxü̃, rü cumaxã nixĩ i nügü yacua̱xüü̃güxü̃ i curü duü̃xü̃gü i Cadéugü. Natürü tá icuyarüxo yexguma Chodóma rü Gomóraxü̃ chayarüxoxẽẽxgurüxü̃.

Ichaía 10:7

Natürü nüma i Achíriaanearü ãẽ̱xgacü rü tama ngẽmagu narüxĩnü rü tama naãẽwa nangẽxma i ngẽma. Rü ngẽma nüma nagu naxĩnüxü̃ nixĩ nax wüxicana duü̃xü̃güxü̃ nada̱i̱xü̃ rü muxü̃ma i nachixü̃anegümaxã inacuáxü̃.

Ichaía 10:5

Rü Cori ya Tupana rü ñanagürü: —Achíriaanearü ãẽ̱xgacü nixĩ ya chorü naixmena̱xã ya Iraétanüxü̃xü̃ namaxã chapoxcune. Rü yima nixĩ ya chauxne ya namaxã tá chorü numaxã chacuaixetane.

Wiyaegü 72:9

Rü ngẽma ãẽ̱xgacüarü uanügü i chianexü̃gu ãchiü̃güxü̃ rü name nixĩ i yimá ãẽ̱xgacüpe̱xewa waixü̃müte̱xegu nanangücuchigü.

Yox 1:17

Rü yema yatü rü ta taũtama yagúegayane rü yéma nangu ga norü tomaepü̱x ga yatü rü ñanagürü: —Tomaepü̱xtücumü i Cadéuanecüã̱xgü toxca̱x ínayaxüãchi rü naxca̱x nangĩ̱xgü i curü caméyugü rü taramaxã nanadai i chomücügü i puracütanüxü̃. Rü chaxicatama chiña nax cumaxã nüxü̃ chayarüxuxü̃ca̱x —ñanagürü.

Norü taxre ga to ga popera ga ãẽ̱xgacügüchiga ümatüxü̃ 33:11

Rü yemaca̱x ga Cori ya Tupana rü Achíriaanearü churaragüerugüxü̃ namu nax Manachéca̱x íyaxü̃ãchixü̃ca̱x. Rü yemagü nixĩ ga Manachéxü̃ iyauxgüxü̃. Rü nayachotamaraü̃gü, rü nayachotachacüxügü rü ñu̱xũchi cadéna ga bróũchenaxca̱xmaxã nanaxütü̱xügü. Rü yemaacü Babiróniaanewa nanagagü.

Norü taxre ga popera ga ãẽ̱xgacügüchiga 20:12

Rü yexgumaü̃cüxü rü nüma ga Babiróniaanearü ãẽ̱xgacü ga Merodá-baradáü̃ ga ãẽ̱xgacü ga Baradáü̃ nane ixĩcü, rü Echequíaxü̃tawa nanamugü ga ñuxre ga norü duü̃xü̃gü nax norü moxẽ yéma nangegüxü̃ca̱x rü ãmare nüxna yaxãgüxü̃ca̱x yerü nüxü̃ nacuáchiga ga nax yada̱xawexü̃.

Norü taxre ga popera ga ãẽ̱xgacügüchiga 17:24

Rü nüma ga Achíriaanearü ãẽ̱xgacü rü Iraéanecüã̱xgüchicüxü Chamáriaarü ĩanegüwa nanamugü ga duü̃xü̃gü ga Babiróniaanecüã̱x rü Cútaanecüã̱x rü Abáanecüã̱x, rü Amáanecüã̱x, rü Cheparabaíü̃anecüã̱x nax Chamáriaanegu naxãchiü̃güxü̃ca̱x nachicüxü ga yema Iraéanecüã̱x. Rü yemaacü ga yema togü ga duü̃xü̃gü rü Chamáriaanegu nachocu rü Iraéanecüã̱xarü ĩanegügu naxãchiü̃gü.

Naanearü ügüchiga 11:31

Rü Téra rü ĩane ga Úrwa ínaxũxũ ga Cadéuanewa nax Canaáü̃anewa naxũxü̃ca̱x. Rü yéma nanaga ga nane ga Abráü̃ rü nataxa ga Lox rü naneã̱x ga Charái. Natürü yexguma guma ĩane ga Aráü̃wa nangugügu rü yexma naxãchiü̃gü.

Naanearü ügüchiga 11:28

Rü gumá Aráü̃ rü ĩane ga Úr ga Cadéuanewa yexmanegu nayu. Rü nanatü ga Téraxü̃pa nayu nagutama ga guma ĩane ga nagu nabuxü̃ne.

Naanearü ügüchiga 11:9

Rü guma ĩane rü Babégu naxãéga yerü yema naanewa nixĩ ga Cori ya Tupana nango̱xẽẽxü̃ ga muxü̃ma ga toraxü̃xü̃ ga naga nax to ga nagawachigü yadexagüxü̃ ga ñoma ga naanecüã̱x ga duü̃xü̃gü. Rü yemaacü guxü̃ ga naanegu Tupana nanawoone.

Naanearü ügüchiga 2:14

Rü yema norü tomaepü̱x ga nachacüxü rü Tígrigu naxãéga, rü Achíriaarü naanearü éstewaama nada. Rü yema norü ãgümücü ga nachacüxü rü Eufrátegu naxãéga.

Ichaía 13:21

Rü ngéma tá namaxẽ i michigü i naixnecücüã̱x rü cüchanagümaxã tá nanapa ya ĩpatagü. Rü ngẽma naeü̃ i abetrúgü rü ngéma tá namaxẽ. Rü ngéma tá naxĩnüca̱xwa̱xegü i ngẽma dauxchitacüã̱x i chíbugü.

Ichaía 18:6

Rü ngẽxgumarüxü̃ tá ta nixĩ i ngẽma duü̃xü̃gü nax máxpü̱xanexü̃wa nawogümarexü̃ nax ngurucugü rü dauxchitacüã̱x i naeü̃gü namaxã ãwemügüxü̃ca̱x. Rü ngẽxguma taunecügu rü ngurucugü rü ngéma tá nangẽxmagü. Rü yimá tauemacügü i nagu nagáuanecügu rü guxü̃ma i ngẽma naeü̃gü i dauxchitacüã̱x rü ngéma tá namaxã naxãwemügü —ñanagürü ya Tupana.

Ichaía 43:14

Rü yima Iraétanüxü̃arü Tupana ya üünecü ya pexü̃ ínguxü̃xẽẽcü rü ñanagürü: —Ngẽma nax pexü̃ íchanguxü̃xẽẽxü̃ca̱x rü Babiróniaarü ĩanewa tá chanamugü i norü uanügüarü churaragü nax nagu yapogüexü̃ca̱x i norü poxeguxü̃arü ĩã̱xgü. Rü yima norü wapurugü ya namaxã nataãẽgüne i ngẽma Babiróniacüã̱x rü tá norü ngechaü̃xü̃ nananguxuchi.

Echequié 23:23

Rü Babiróniacüã̱x, rü guxü̃ma i Cadéugü, rü Pecóxcüã̱xgü, rü Choácüã̱xgü, rü Coácüã̱xgü, rü Achíriaanecüã̱xgü tá cuxca̱x ínayachoõchi. Rü guxü̃ma i nümagü rü ningextü̱xü̱x rü nimechametü. Rü ãẽ̱xgacügü nixĩgü rü churaragüerugü nixĩgü rü churaragü i meama daixü̃ cuáxü̃ nixĩgü. Rü guxü̃ma i nümagü rü meama nüxü̃ nicua̱x nax cowarugu naxĩxü̃.