Ichaía 19:1 - Tupanaarü Ore

¹ Dücax, Cori ya Tupana rü wüxi i caixanexü̃étügu Equítuanewa naxũ. Rü ngẽma Equítuanecüã̱xgüarü tupananetachicüna̱xãgü rü Cori ya Tupanaarü poracha̱xwa nidu̱xrue. Rü duü̃xü̃gü i Equítuanecüã̱xgü rü tá poraãcü inayayiãxẽ.

Ichaía 19:1 Referans Kwoze

Ínachoxü̃xü̃chiga 12:12

Erü choma rü ngẽma chütaxü̃ rü nua Equítuanewa tá chaxüpetü. Rü wüxichigü ya Equítuanecüã̱xarü ĩpatawa tá chayama̱x ya yimá nüxíraü̃cü ya nanegü rü nüxíraxü̃xü̃ i naxü̃naxacügü i yatüxü̃. Rü tá ngẽma Equítuanecüã̱xgüxü̃ nüxü̃ chadauxẽxẽ nax ngẽma namaxã natupanaã̱xgüxü̃ rü yangearü poraáxü̃ nax naétüwa nachogüxü̃. Erü chomatama ya Tupana nixĩ i chanaxueguxü̃ i ngẽma chaxüxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 1:7

¡Rü dücax, marü ningaica nax caixanexü̃gu ínanguxü̃ ya Cristu! Rü guxü̃táma i duü̃xü̃gü nüxü̃ nadau, rü woo ga yema nacanapacütüxü̃güxü̃ rü tá ta nüxü̃ nadaugü. Rü guxü̃ i duü̃xü̃gü i guxü̃ i nachixü̃anecüã̱x rü norü ngechaü̃maxã tá naxauxe i ngẽxguma ínanguxgu i nümax. Rü ngẽmaãcü tá nixĩ.

Joel 3:19

Rü Equítuane rü tá nachixe, rü Edóü̃ane rü wüxi i naane i ngextá taxúema íxãpataxü̃warüxü̃ tá nixĩ. Yerü Yudáchixü̃aneca̱x ínayaxüãchi rü nanadai ga duü̃xü̃gü ga taxuxü̃ma chixexü̃ ügüxü̃.

Yochué 2:11

Rü yexguma yemaxü̃ tacua̱xgügu rü poraãcü tamuü̃e, rü taxúema tügü ítarüpora nax pemaxã tügü tadaixü̃ca̱x. Erü yimá Cori ya perü Tupana rü guxãétüwa nangẽxma i daxũguxü̃ i naanewa rü ñoma i naanewa.

Echequié 30:13

Rü choma ya Cori ya Tupana rü ñacharügü: ‘Choma rü tá nagu chipogügü i ngẽma Equítuanearü tupananetachicüna̱xãgü. Rü ĩane ya Ménfiwa tá chayanaxoxẽxẽ i ngẽma tupananetagü i ngéma ngẽxmagüxü̃. Rü Equítuane rü tá nangearü ãẽ̱xgacüã̱x. Rü choma rü tá chanamuü̃xẽxẽ i guxü̃ma i ngẽma duü̃xü̃gü i ngéma maxẽxü̃.

Yeremía 51:44

Rü Babiróniawa tá chanapoxcu i norü tupananeta i Béx. Rü choma rü tá nüxna chanapuxü̃ i guxü̃ma i ngẽma nachixü̃anegü i naxme̱xwa ngẽxmagüxü̃. Rü ngẽma nachixü̃anegü rü tagutáma wena Babiróniawa naxĩ nax ngẽma tupananeta i Béxü̃ yacua̱xüü̃güxü̃ca̱x. Rü Babiróniaanearü poxeguxü̃tápü̱xgü rü marü niwa̱xgü.

Yeremía 50:2

Rü ñanagürü i ngẽma ore: —¡Guxü̃ma i ngẽma togü i nachixü̃anecüã̱xmaxã nüxü̃ ixu i ñaa ore nax mea nüxü̃ nacua̱xgüxü̃ca̱x! ¡Rü nawe̱xnagü i ngẽma orearü cua̱xruxü̃ ya wonera! ¡Rü taxṹ i peyacúxü̃ i ngẽma ore! ¡Rü ñapegügü: “Babirónia rü marü norü uanügüme̱xẽgu nangu! Rü ngẽma norü uanügü rü nüxü̃ nacugüe i Babiróniaanearü tupananeta i Béx. Rü ngẽma tupananeta i Mardúx rü poraãcü namuü̃. Rü ngẽma uanügü rü nüxü̃ nacugüe i guxü̃ma i Babiróniaanearü tupananetachicüna̱xãgü i ñu̱xma ãũcümaxü̃wa ngẽxmagüxü̃.

Ichaía 13:1

Ñaa nixĩ i ore i Cori ya Tupana Amú nane ya Ichaíaãẽwa ínguxẽẽxü̃ nachiga i ngẽma guxchaxü̃ i Babiróniaca̱x tá ínguxü̃:

Wiyaegü 104:3

Rü dexáétüwa cungexma rü ngẽxma dauxü̃gu cuxãchiü̃. Rü ngẽma caixanexü̃ rü cuwexü̃xü̃ cuyaxĩxẽxẽ. Rü yimá buanecü nixĩ ya nagu quixũcü.

Wenaxarü naxümatü ga Tupanaarü mugü 33:26

Rü yema namaxã yagúexẽẽãxü̃ ga norü dexa ga Moiché rü ñanagürü: —Pa Iraétanüxü̃x, rü nataxuma i to i perü Tupanamaxã wüxiguxü̃. Rü nüma rü norü poramaxã dauxü̃guxü̃ i caixanexü̃gu nixũ nax perü ngü̃xẽẽwa naxũxü̃ca̱x.

Chacaría 14:18

Rü ngẽxguma Equítuanecüã̱xgü rü tama ngéma naxĩxgu, rü Cori ya Tupana rü taxũtáma norü naanegu nanapuxẽxẽ. Rü ngẽxgumarüxü̃ ta i ngexü̃rüüxü̃ i to i nachixü̃ane i tama düxenügüchigaarü petawa ũxü̃ rü Tupana rü tá da̱xaweane naxca̱x ínanguxẽxẽ.

Chacaría 10:11

Rü ngẽma már i Equítuanewa ngẽxmaxü̃wa rü tá nichoü̃. Rü norü yuape rü tá ichayanaxoxẽxẽ. Rü taxtü i Níru rü tá chayapachitamaxẽxẽ. Rü Achíriaanecüã̱xgü i nügü icua̱xüü̃güxü̃ rü tá chanaxãneexẽxẽ. Rü tá ichanaxoxẽxẽ i Equítuanearü pora.

Yeremía 25:19

Rü yexgumarüxü̃ ta yema copuwa chayaxaxexẽẽgü ga Equítuanearü ãẽ̱xgacü ga Faraóü̃, rü norü ngü̃xẽẽruü̃gü, rü yema togü ga ãẽ̱xgacügü ga duü̃xü̃gümaxã icua̱xgüxü̃, rü ñu̱xũchi guxü̃ma ga norü duü̃xü̃gü.

Ichaía 21:9

Rü nüxü̃ chadau i wüxi ya caru ya taxre i cowarugü itúchigüne —ñanagürü. Rü nüma i ngẽma carugu aunagüxü̃ rü tagaãcü nica rü ñanagürü: —Ĩane ya Babirónia rü marü nanguxuchi. Rü guxü̃ma i norü tupanachicüna̱xãgü rü niwa̱xgü rü íxraxü̃gu napoü̃gü —ñanagürü.

Ichaía 19:16

Rü ngẽma ngunexü̃gu i Equítuanecüã̱xgü rü ñoma ngexü̃gürüxü̃ tá poraãcü namuü̃e. Rü tá naba̱i̱xãchie i ngẽxguma nüxü̃ nadaugügu i ngẽma Cori ya Tupana ya Guxãétüwa ngẽxmacüarü pora i namaxã napoxcueãxü̃.

Ichaía 13:7

Rü ngẽxguma i guxü̃ma i duü̃xü̃gü i Babiróniacüã̱x rü tá inarümaachitanü rü tá ningearü poraã̱x.

Wiyaegü 104:34

Rü chierüx Cori namaxã taãẽgu i ngẽma nagu charüxĩnüxü̃. Erü naxü̃taguxica nixĩ i nüxü̃ ichayangauxü̃ i chorü taãxẽ.

Wiyaegü 68:4

Pa Duü̃xü̃güx ¡Tupanaca̱x pewiyaegü rü perü wiyaewa penataxẽxẽ! ¡Rü nüxü̃ picua̱xüü̃gü ya yimá caixanexü̃étügu ixũcü! ¡Rü namaxã petaãẽgü ya yimá Cori, rü nape̱xewa petaãẽgü!

Yochué 2:24

Rü ñanagürügü: —Nüma ya Cori ya Tupana rü marü tüxna nanaxã i guxü̃ma i ngẽma naane. Rü ngẽmaca̱x i guxü̃ma i ngẽma nachixü̃anecüã̱x i duü̃xü̃gü rü poraãcü tüxü̃ namuü̃e —ñanagürügü.

Yochué 2:9

—Choma nüxü̃ chacua̱x rü Cori ya Tupana pexna nanaxã i ñaa naane, rü ngẽmaca̱x i toma rü poraãcü tamuü̃e. Rü ñu̱xma rü guxü̃ma i duü̃xü̃gü i daa ĩanecüã̱x rü poraãcü pexü̃ namuü̃e.

Wiyaegü 18:9

Rü ningena ga daxũguxü̃ ga naane rü nüma ga Tupana rü ñoma ga naanegu ínarüxĩ. Rü nacutütüü̃wa rü nataxüchi ga caixanexü̃ ga pamüemaxü̃ ga naxẽanexẽẽxü̃.

Yeremía 4:13

Dücax, ngẽma tórü uanügü rü ñoma caixanexü̃rüxü̃ ningaicamaetanü, rü ngẽma norü carugü i dairuxü̃ rü ñoma buanecü ya poracürüxü̃ nixĩgü. Rü ngẽma norü cowarugü rü ĩyüxü̃ narüporamaegü. Rü yíxema rü marü taxuacüma tibuxmü.

Yeremía 44:8

¿Rü tü̱xcüü̃ choxü̃ penuxẽxẽ namaxã i ngẽma chixexü̃ i pexügüxü̃ rü ngẽma nax pumarate̱xe naxca̱x pigugüxü̃ i norü tupananetagü i Equítuane i nawa pengugüxü̃ nax nua pemaxẽxü̃ca̱x? Rü ngẽma chixexü̃ i pexügüxü̃gagu rü pematama naxca̱x pedaugü i perü poxcu. Rü ngẽmaãcü wüxi i cua̱xruxü̃ tá pixĩgü naxca̱x i guxü̃ma i ngẽma togü i nachixü̃anegü i ñoma i naanewa ngẽxmagüxü̃. Rü tá chixexü̃maxã pexü̃ narüdaunü rü tá pexü̃ nacugüe.

Naúü̃ 1:1

Ñaa nixĩ ga yema ore ga Naúü̃ ga Ercúcüã̱x Tupanaxü̃tawa nayaxuxü̃ ga yexguma nango̱xetügu. Rü yema ore rü ĩane ga Nínibearü poxcuchiga nixĩ.

Naúü̃ 1:3

Rü nüma ya Cori ya Tupana rü woo nax naporaxü̃ natürü yáxna duü̃xü̃gümaxã naxĩnü. Natürü yíxema chixexü̃ ǘxe rü tama nüxü̃ narüngüma nax tüxü̃ napoxcuxü̃. Rü nüma rü yimá poracü ya buanecügu nixũ. Rü ngẽma caixanexü̃gü rü nacutügüarü caixanexü̃ nixĩgü.