Ichaía 16:4 - Tupanaarü Ore

⁴ ¡Rü tauxcha nüxna naxã, Pa Ãẽ̱xgacüx, nax cuxü̃tagu yanacu̱xgüxü̃ca̱x i ngẽma Moátanüxü̃ i torü uanücha̱xwa ibuxmüxü̃! Rü ngẽxguma yacua̱xgu i ngẽma guxchaxü̃gü rü ngẽma uanü marü yaxũgachigu, rü nüma rü tá ñoma i naanewa inarütaxu —ñanagürügü.

Ichaía 16:4 Referans Kwoze

Maraquía 4:3

Rü ngẽma ngunexü̃ i ãũcümaxü̃ i nagu chapoxcuexü̃ i ngẽma chixexü̃ ügüxü̃ rü pema rü nawa tá pengagü i ngẽma chixexü̃ ügüxü̃ ñoma waixü̃müte̱xewa pengagüxü̃rüxü̃.

Ichaía 51:13

¿Ẽ̱xna marü choxü̃ curüngümae nax choma yixĩxü̃ ga cuxü̃ chango̱xẽxẽxü̃ rü chayangeechixü̃ ga daxũguxü̃ ga naane rü chanaxüxü̃ ga ñoma ga naane? ¡Rü taxṹ i nüxü̃ cumuü̃exü̃ i ngẽma uanügü i norü numaxã cuxü̃ daixchaü̃xü̃! ¿Natürü ngexü̃ nixĩ i guxü̃ma i ngẽma norü nu?

Ichaía 9:4

Yerü yema Madiáü̃anearü ãẽ̱xgacüme̱xẽwa toxü̃ ícunguxü̃xẽẽgurüxü̃ rü cuma rü toxü̃ ícunguxü̃xẽxẽ nawa ga yema ngúxü̃ ga tingegüxü̃ rü toxü̃ yaxĩ̱xãchitanüãẽxẽẽxü̃ ga yexguma naxme̱xwa tayexmagügu ga yema ãẽ̱xgacü ga chixri tomaxã icuáxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 11:2

¡Natürü ngẽma naa̱xtü ya Tupanapata ya taxü̃ne, rü taxũtáma cunangugü! Erü ngẽma duü̃xü̃gü i tama Tupanaaxü̃́ yaxõgüxü̃na marü nanaxã. Rü nümagü rü 42 ya tauemacü tá chixri namaxã inacua̱x ya yimá ĩane ya üünene.

Ore i mexü̃ ga Luca ümatüxü̃ 21:24

Rü norü uanügü rü taramaxã tá nanadai i ñuxre. Rü togü, rü tá ínanayauxü̃ nax to i nachixü̃anewa nagagüãxü̃ca̱x. Rü ñu̱xũchi i ngẽma norü uanügü rü tá nagu napogüe ya yima ĩane ya Yerucharéü̃. Rü ngẽmaãcü tá nangupetü ñu̱xmatáta nawa nangu i ngẽma ngunexü̃ i nagu Tupana ínawoxü̃xü̃ i ngẽma uanügü.

Chacaría 10:5

Rü nümagü rü tá ñoma churaragü i ãcharaxü̃gu nügü da̱i̱xü̃rüxü̃ nixĩgü. Rü tá naporae, erü Cori ya Tupana rü natanüwa nangẽxma. Rü ngẽmaãcü tá nanaxãnexẽxẽ i norü uanügüarü churaragü i cowarugu ĩxü̃.

Yeremía 48:18

Pa Ĩane ya Dibóü̃x nax mexü̃wa cungexmaxü̃, rü name nax curüxüexü̃ nawa i cuchica i mexü̃, ¡rü waixü̃müane i paxü̃wa rüto! Erü ngẽma Moáanearü chixexẽẽruxü̃ rü cuxca̱xama nixũ rü marü nayawa̱xgüxẽxẽ i curü poxegutapü̱xgü.

Yeremía 48:8

Rü guxü̃nema ya curü ĩanegüwa tá nangu nax nagu napogüexü̃, rü bai i wüxi tá íyaxüxü̃ne. Rü yima ĩanegü ya natügüarü doxonexü̃wa ngẽxmagüne rü yima ĩanegü ya ma̱xpǘnearü doxonexü̃wa ngẽxmagüne rü tá nachitaxü̃xica ínayaxügü. Rü choma ya Cori ya Tupana nixĩ i ngẽma ñachaxü̃.

Ichaía 33:1

Pa Achíriaanex, wüxi i ngechaü̃ tá nixĩ i cuxca̱x. Cuma rü cunadaiãcu i togü i ĩanegü, natürü taguma togü curü ĩane nadaiãcu. Cuma rü cutogüechitawa̱xe, natürü taguma togü nacuechitawa̱xegü. Natürü nawena nax togüxü̃ cuda̱i̱xü̃ rü cuma rü tá ta cuxü̃ nima̱xgü. Rü nawena nax cutogüechitawa̱xexü̃ rü cuma rü tá ta nacuechitawa̱xegü.

Ichaía 25:10

Rü yimá Cori ya Tupaname̱xẽ tá nixĩ i ma̱xpǘne ya Chióü̃xü̃ ípoxü̃ne. Natürü Moáxü̃ rü tá nayapuxcuchigü ñoma maxẽ i paxü̃ wüxi i guxchirepáü̃gu yapu̱xcuchixü̃rüxü̃.

Ichaía 15:6

Rü yimá puchugü ya Nimríü̃wa ngẽxmagücü rü nichegü, rü maxẽgü rü narüñẽ̱ẽ̱xgü, rü naigü rü nayue rü taxuxü̃ma i nai i ya̱u̱xátüxü̃xü̃ tadau.

Wenaxarü naxümatü ga Tupanaarü mugü 24:14

Rü tama name i tüxü̃ pepuracüxẽẽmare rü ñu̱xũchi tama tüxü̃́ penaxütanü i ngẽma puracü i taxüxü̃ ya yíxema duü̃xẽ ya perüxü̃ Iraétanüxü̃ ixĩxẽ ya ngearü diẽruã́xẽ. Rü ngẽxgumarüxü̃ ta name nixĩ nax mea tüxü̃́ penaxütanüxü̃ ya yíxema to i nachixü̃anecüã̱x ya wüxi ya perü ĩanegu ãpataxe.

Romanos 16:20

Rü ngẽxguma ngẽmaãcü mea pemaxẽgu rü nüma ya Tupana ya tüxü̃ taãẽxẽẽcü rü tá pexü̃ naporaexẽxẽ nax aixcüma nüxü̃ perüyexeraxü̃ca̱x i Chataná. Rü chanaxwa̱xe i tórü Cori ya Ngechuchu ya Cristu pemaxã inarüxã̱ũ̱x rü pexü̃ narüngü̃xẽxẽ.

Chacaría 9:8

Choma rü íchamemare nax íchanapoxü̃xü̃ i ngẽma chorü duü̃xü̃gü nape̱xewa i ngẽma norü uanügü. Rü ngẽma to i nachixü̃anearü ãẽ̱xgacü i noxri chixri namaxã icuáxü̃ rü tagutáma wena namaxã inacua̱x. Erü ñu̱xma rü chomaxü̃chima nüxna chadau i chorü duü̃xü̃gü —ñanagürü.

Ichaía 49:26

Rü ngẽma perü uanügü rü nügü tátama nangõ̱xcue, rü nagüwa tátama naxaxegü ñoma bínu yaxaxgüxü̃rüxü̃. Rü ngẽmaãcü i guxü̃ma i duü̃xü̃gü rü tá nüxü̃ nicua̱xãchitanü nax choma ya Cori ya Tupana ya Acóbuarü duü̃xü̃güarü ngü̃xẽẽruxü̃ ya poracü nax chixĩxü̃. Rü choma nixĩ i Iraétanüxü̃xü̃ íchanguxü̃xẽxẽxü̃ —ñanagürü ga Tupana.

Ichaía 54:14

Rü perü ãẽ̱xgacügü rü tá mea pemaxã inacua̱xgü rü ngẽmaãcü tá peporae. Rü taxũtáma togüme̱xẽwa pengẽxmagü rü taxũtáma ta̱xacüca̱x pemuü̃e.

Ichaía 58:7

Rü ngẽma chanaxwa̱xexü̃ nixĩ nax tüxü̃ pechibüexẽẽxü̃ ya yíxema taiyaexe, rü pepatawa tüxü̃ peyaxuxü̃ ya yíxema ngearü diẽruã̱xgüxe rü ngepatagüxe, rü tüxü̃ pixüxchiruxü̃ ya yíxema ngexchirugüxe, rü to̱xguã̱x tüxü̃ perüngü̃xẽẽgüxü̃.

Yeremía 40:11

Rü yema Yudíugü ga Moáanewa, rü Amóü̃anewa, rü Edóü̃anewa rü yema togü ga naanegüwa yexmagüxü̃ rü nüxü̃ nacuáchigagü ga Babiróniaanearü ãẽ̱xgacü nax Iraéanewa yaxügüxẽẽãxü̃ ga ñuxre ga Yudíugü. Rü ñu̱xũchi nüxü̃ naxunetaxü̃ ga Guedaría ga Aicáü̃ nane ga Chapáü̃taxa nax norü ãẽ̱xgacü yixĩxü̃ca̱x ga yema yéma yaxügüxü̃.

Abdía 1:14

Rü yema ngunexü̃ ga nagu ngúxü̃ íyangegüxü̃gu rü pema rü taxũchima name ga yema namagü ga nügüwa ídapetüxü̃wa tüxü̃ penanguxẽxẽ nax tüxü̃ pedaixü̃ca̱x ga guxema ibuxmüxẽ. Rü yema ngunexü̃ ga nagu ngúxü̃ tingegüxü̃ ga guxema tümaarü uanügücha̱xwa ĩgüxe rü pema rü taxũchima name ga tüxü̃ ípeyauxü̃ nax nüxna tüxü̃ pemugüxü̃ca̱x ga tümaarü uanügü.