Ichaía 12:1 - Tupanaarü Ore

¹ Rü ngẽma ngunexü̃gu rü tá ñacurügü: —Moxẽ cuxna chaxã, Pa Corix, yerü woo chomaxã cunu ga noxri, natürü curü nu rü marü nangupetü. Rü ngẽmaca̱x wena cha̱u̱xca̱x cunatáeguxẽxẽ ga yema taãxẽ ga noxri choxü̃́ yexmaxü̃.

Ichaía 12:1 Referans Kwoze

Wiyaegü 30:5

Erü ngẽma norü nu rü paxaãchimare nixĩ, natürü ngẽma norü ngü̃xẽxẽ rü taguma inayagu̱x. Rü woo chütacü ixauxegu, natürü moxü̃ãcü rü taãẽãcü tingunexü̃gü.

Ichaía 25:1

Pa Corix, cuma nixĩ i chorü Tupana quixĩxü̃. Rü choma rü cuxü̃ chicua̱xüxü̃ rü mexü̃maxã cuxü̃ chixuchiga, erü ngẽma nũxcümacürüwatama nagu curüxĩnüxü̃ rü aixcüma cuyanguxẽxẽ rü taguma cunaxüchicüxü i ngẽma nüxü̃ quixuxü̃.

Ichaía 54:8

Rü yexguma pemaxã chanuxgu rü paxaxãchi pexna chixũgachi. Natürü pemaxã nüxü̃ chixu rü paxãma choxü̃́ pixauxãchitümüxü̃gü erü pexü̃ changechaü̃ rü ngẽma chorü ngechaü̃ rü tagutáma nagu̱x —ñanagürü ya perü ngü̃xẽẽruxü̃ ya Tupana.

Chacaría 14:9

Rü ngẽma ngunexü̃gu rü nüma ya Cori ya Tupana rü ãẽ̱xgacü tá nixĩ nawa i ñoma i naane. Rü nüxica tátama nixĩ ya Tupana yixĩxü̃ rü nataxutama i to i naéga i duü̃xü̃gü nüxü̃ icua̱xüü̃güxü̃.

Ochéa 6:1

Rü Tupana rü ñanagürü ta: —Ngẽma Iraéanecüã̱xgü rü ñanagürügü tá: “Pa Chomücügüx, ¡ngĩxã guxãma Cori ya Tupanaca̱x tawoegu! Rü woo nümatama tüxü̃ nawoone rü guxchaxü̃ tüxna naxã, natürü wena táxarü tüxü̃ nawoeguxẽxẽ nax ngẽmaãcü itaãẽgüxü̃ca̱x. Rü nüma rü ngúxü̃ tüxü̃ ningexẽẽgü, natürü tá tüxü̃́ inanaxoxẽxẽ i ngẽma ngúxü̃ i ingegüxü̃.

Ichaía 51:3

Rü woo guxchawa nangẽxma ya Chióü̃ rü choma rü tá chanataãẽxẽxẽ i norü duü̃xü̃gü. Rü yima ĩane ya ñu̱xma chixene rü ĩane ya mexẽchine tá chayanguxuchixẽxẽ. Rü yema ori̱xnecü ga Edéü̃gu chatogüxü̃rüxü̃ tá namexẽchi. Rü yima ĩanewa tá nangẽxma i taãxẽ rü norü duü̃xü̃gü rü tá taãẽãcü napaetagü rü norü wiyaegümaxã tá choxü̃ nicua̱xüü̃gü —ñanagürü.

Ichaía 14:3

Rü pemax, Pa Duü̃xü̃gü i Iraétanüxü̃x, rü ngẽxguma nüma ya Cori ya Tupana pexü̃ ínguxü̃xẽẽgu naxme̱xwa i ngẽma Babiróniaanearü ãẽ̱xgacü i ngúxü̃ pexü̃ ingegüxẽẽxü̃ rü ngechaü̃ pexna ãxü̃, rü ñaa oremaxã tá nüxü̃ pecugüe rü penaxuchi̱xẽ: —Dücax ¿ta̱xacüwa cungu i cuma nax cuchixecümaxü̃? rü ¿ta̱xacügu nayagu̱x i ngẽma nax cugü quicua̱xüxü̃xü̃?

Ichaía 49:13

¡Pa Daxũguxü̃ i Naanex, taãẽãcü Tupanaxü̃ icua̱xüxü̃! ¡Rü Pa Ñoma i Naanex, poraãcüma nataãxẽ! ¡Rü Pa Ma̱xpǘnegüx, taãxẽãcü Tupanaxü̃ picua̱xüxü̃gü! Erü nüma ya Cori ya Tupana rü nanataãẽxẽxẽ i norü duü̃xü̃gü i ngúxü̃ ingegüxü̃, erü nüxü̃́ nangechaü̃tümüxü̃gü.

Ichaía 25:9

Rü ngẽma ngunexü̃gu i ngẽma duü̃xü̃gü rü ñanagürügü tá: —Daa nixĩ ya tórü Tupana ya nagu yaxõgücü rü tüxü̃ ínguxü̃xẽẽcü. ¡Ngĩxã tá taãẽgü rü nüxü̃ ticua̱xüü̃gü erü nüma tüxü̃ ínanguxü̃xẽxẽ! —ñanagürügü tá.

Romanos 11:15

Nüxü̃ tacua̱x rü ngẽma Yudíugü rü tama Cristuaxü̃́ nayaxõgüchaü̃ i ñu̱xmax. Rü ngẽmaca̱x ya Tupana rü nanade i ngẽma tama Yudíugü ixĩgüxü̃. ¿Natürü ñuxãcü tá nixĩ i ngẽxguma Tupana wena nadexgu i ngẽma Yudíugü? Rü wüxi i mexẽchixü̃ tá nixĩ, erü ñoma wüxi i duü̃xü̃ i yuxü̃ rü wenaxarü maxü̃xü̃rüxü̃ tá nixĩgü.

Chacaría 14:20

Rü ngẽma ngunexü̃gu rü ngẽma cowarugünaawa rütugüxü̃ i campanaxacügü rü ñaxü̃ tá nagu naxümatü Coriarü Ixĩxü̃, ñaxü̃. Rü ngẽma buetaregü i Tupanapata ya taxü̃newa ngẽxmagüxü̃ rü tá nixüüne ngẽma tacháũgü i ãmarearü guruü̃pe̱xegu nuxü̃rüxü̃.

Ochéa 11:8

Natürü taxucürüwa pexna chixũgachi, Pa Efraíü̃tanüxü̃x. Rü taxucürüwa pexü̃ íchawogü, Pa Iraéanecüã̱xgüx. Rü taxucürüwa pexü̃ chadai yexgumarüxü̃ ga yema Axmácüã̱xgüxü̃ chadaixgurüxü̃. Rü taxucürüwama pexü̃ charüxoxẽxẽ guma ĩane ga Cheboíü̃xü̃ charüxoxẽẽxü̃rüxü̃. Erü daa chorü maxü̃newa rü pexü̃ changechaü̃ rü íchamemare nax choxü̃́ pengechaü̃tümüxü̃güxü̃.

Ichaía 66:13

Rü ñoma wüxi i mama i naxacüxü̃ meãẽxü̃rüxü̃ rü choma rü tá pexü̃ chataãẽxẽxẽ i Yerucharéü̃wa” —ñanagürü ga Tupana.

Ichaía 26:1

Rü ngẽma ngunexü̃ ya Tupana nagu napoxcuexü̃ i norü uanügü rü ngẽma Yudáanecüã̱xgü, rü tá nawiyaegü nagu i ñaa wiyae: —Tüxü̃́ nangẽxma ya daa tórü ĩane ya porane ya tüxü̃ ípoxü̃ne nüxna i tórü uanügü. Erü nüma ya Cori ya Tupana rü tüxü̃ narüngü̃xẽxẽ rü taixü̃ i naxtapü̱xmaxã ínanapoxegu ya daa tórü ĩane.

Ichaía 11:16

Rü ngẽxguma Achíriaanewa nawoegu̱xgu i ngẽma noxretama i Tupanaarü duü̃xü̃gü i íyaxügüxü̃ rü tá namaxã inayarüxĩ i wüxi i nama i taxü̃ ga yexguma norü o̱xigü ga Iraétanüxü̃ Equítuanewa ichoxü̃gu nagu naxĩxü̃raxü̃xü̃.

Ichaía 10:25

Erü marü noxretama i ngunexü̃ nataxu nax naxca̱x íchananguxẽẽxü̃ i norü poxcu, rü ngẽma chorü numaxã tá chanadai.

Ichaía 2:11

Rü ngẽma ngunexü̃ i nagu ínanguxü̃ ya Cori ya Tupana, rü ngẽma nügü icua̱xüü̃güxü̃ rü nape̱xewa tá naxãnee, rü ngẽma nügü írütagüxü̃ rü nape̱xewa rü tá taxuwama nime. Rü nüxicatama ya Cori ya Tupana rü tá inanawe̱x i norü pora i ngẽma ngunexü̃gu.

Ichaía 10:4

Rü ngẽxguma tama perü uanügüme̱xẽwa pegü pengexmaxẽẽgu nax to i nachixü̃anewa pexü̃ nagagüxü̃ca̱x, rü tá pexü̃ nadai. Rü woo ngẽmaãcü napoxcueãxü̃ ya Cori ya Tupana, natürü tama Iraétanüxü̃maxã inarüngü̃xmü, rü yexeraãcü nayaxãxũnechigüama.

Yox 13:16

Rü ngẽxguma nüxü̃ chixuxgu i chorü guxchaxü̃gü rü ngürüãchi ngẽmaãcü tá chaugü íchanguxuchixẽxẽ, erü wüxi i chixexü̃arü üruxü̃ rü taxũtáma naxü̃tawa nangu.

Wiyaegü 9:1

Pa Cori Pa Tupanax, guxü̃ ya chorü maxü̃nemaxã tá cuxü̃ chicua̱xüxü̃. Rü tá nüxü̃ chixuchiga i guxü̃ma i ngẽma mexü̃gü i curü poramaxã cuxüxü̃.

Wiyaegü 71:21

Rü chanaxwa̱xe i noxriarü yexera choxü̃ cuporaxẽxẽ rü wena táxarü choxü̃ cutaãẽxẽxẽ.

Ichaía 54:9

Rü Tupana rü Iraétanüxü̃xü̃ ñanagürü: —Yema Noémaxã chanaxueguxü̃rüxü̃ nax tagutáma wena taxüchicü ya mucümaxã chanadaixü̃ i duü̃xü̃gü, rü ngẽxgumarüxü̃ ta i ñu̱xma rü pemaxã chanaxuegu nax tagutáma wena pemaxã chanuxü̃ rü pexü̃ chaxãxũnexü̃.

Ichaía 61:10

Choma rü Tupanamaxã chataãxẽ. Rü aixcüma poraãcü namaxã chataãxẽ i chorü Tupana erü nüma choxü̃ ínanguxuchixẽxẽ rü pora choxna naxã nax nüxü̃ charüporamaexü̃ca̱x i chorü uanügü. Rü ñoma wüxi i ãxma̱xchaü̃xü̃rüxü̃ chamexchiruxüchi rü ñoma wüxi i ãtechaü̃xü̃rüxü̃ chaugü changa̱xãẽ.

Ichaía 64:5

Rü cuma rü tüxü̃ cuyaxu ya yíxema tümaarü taãẽmaxã mexü̃ üxe rü nüxna cua̱xãchixe nax tanaxüxü̃ i ngẽma cuma cunaxwa̱xexü̃. Natürü i ñu̱xma rü tomaxã cunu erü cupe̱xewa chixexü̃ taxügü rü nũxcümacürüwatama tama cuga taxĩnüe.

Ichaía 65:18

Rü name nixĩ nax guxü̃guma namaxã petaãẽgüxü̃ i ngẽma tá chaxüxü̃. Erü tá chanaxü ya wüxi ya ngexwacaxü̃ne ya Yerucharéü̃ i taxuxü̃ma i chixexü̃ nawa ngẽxmane. Rü ngẽma duü̃xü̃gü i nawa maxẽxü̃ rü tá aixcüma nataãẽgü.

Yeremía 30:19

Rü chorü duü̃xü̃gü rü tá norü wiyaewa choxna moxẽ naxãgü rü tá nacugüe rü tá nataãẽgü. Rü taxũtáma ínarüxĩ i norü mu, erü choma rü tá chayamuxẽxẽ. Rü ngẽma togü i duü̃xü̃gü rü taxũtáma nüxü̃ naxoe erü choma rü tá chanatachigaxẽxẽ i ngẽma chorü duü̃xü̃gü.

Chacaría 8:11

Natürü i ñu̱xma rü tümaca̱x ya yíxema daa ĩane ya Yerucharéü̃wa íyaxügüxe, rü taxũtáma yema ngunexü̃gü ga ngupetügüxü̃rüxü̃ pemaxã chixĩ. Rü choma ya Cori ya Tupana ya Guxãétüwa Ngẽxmaxe nixĩ i nüxü̃ chixuxü̃ i ngẽma.

Neemía 8:10

Rü ñanagürü ta ga Édra: —¡Ẽcü mea peyachibüe rü bínu ya maixcuracü peyaxagü! ¡Rü tümamaxã pengau ya texé ya tüxü̃́ nataxúxe i tümaarü õna nax wüxigu petaãẽgüxü̃ca̱x! Erü ñoma i ngunexü̃ rü woetama Cori ya Tupanaca̱x ítanaxǘxüchi. Rü ngẽmaca̱x tama name nax pengechaü̃güxü̃ erü ngẽma taãxẽ i tórü Cori ya Tupana tüxna ãxü̃ rü tórü poxü̃ruxü̃ nixĩ —ñanagürü.

Yox 11:16

Rü ngẽxguma nüxü̃ quixuxgu i curü chixexü̃ rü tá nüxü̃ curüngü̃ma i ngẽma ngúxü̃ i quingexü̃. Rü ñoma dexá i ya̱xpetüxü̃rüxü̃ tá nangupetü i ngẽma curü guxchaxü̃gü i ñu̱xma cuxü̃́ ngẽxmagüxü̃.

Wiyaegü 85:4

Pa Tupana ya Torü Maxẽxẽxẽruxü̃, rü ñu̱xma rü tanaxwa̱xe i wenaxarü toétüwa cuchogü. Rü tama name i tomaxã cunuecha.

Wiyaegü 86:17

¡Rü choxü̃ rüngü̃xẽxẽ! ¡Rü choxna naxã i wüxi i cua̱xruxü̃ nax ngẽmawa nangóxü̃ca̱x nax chomaxã cumecümaxü̃ rü ngẽma chauxchi aiexü̃ naxãneexü̃ca̱x i ngẽxguma nüxü̃ nadaugügu! Erü cumax, Pa Corix, rü guxü̃guma choxü̃ curüngü̃xẽxẽ rü choxü̃ cutaãẽxẽxẽ.

Ichaía 60:10

Pa Yerucharéü̃cüã̱xgüx, choma rü pemaxã chanu ga noxri, rü yemaca̱x nixĩ ga pexü̃ chapoxcuxü̃. Natürü i ñu̱xmax rü tá pexü̃ chanawe̱x nax poraãcü pexü̃ changechaü̃xü̃. Rü to i nachixü̃anecüã̱xgü i duü̃xü̃gü rü tá wena nayamexẽẽgü i perü ĩanearü poxeguxü̃tápü̱x. Rü ngẽma togü i nachixü̃anearü ãẽ̱xgacügü rü tá pexü̃ narüngü̃xẽxẽ.

Yeremía 31:13

Rü ngẽma pacügü rü tá taãẽãcüma íiyayüxe, rü ngẽxgumarüxü̃ ta i ngẽma ngextü̱xücügü rü yaxguã̱xgü. Rü choma rü tá chanataãẽxẽxẽ. Rü ngẽma norü ngechaü̃ rü tá taãẽxü̃ chananguxuchixẽxẽ. Rü tá nüxna chanaxã i wüxi i taãxẽ i ngẽma nüxü̃́ ngúxü̃arü yexera ixĩxü̃.

Chacaría 1:16

Natürü ngẽma choxü̃́ nangechaü̃tümüxü̃gagu ya Yerucharéü̃, rü naxca̱x chataegu. Rü tá nüxü̃́ chanangúchaü̃xẽxẽ i norü duü̃xü̃gü nax wena namexẽẽgüãxü̃ca̱x ya chopata ya taxü̃ne, rü guxü̃nema ya yima ĩane —ñanagürü ga Tupana.