Ichaía 11:11 - Tupanaarü Ore

¹¹ Rü ngẽxguma yimá Dabítaxa ingucuchigu nax ãẽ̱xgacü yixĩxü̃ca̱x rü nüma ya Cori ya Tupana rü tá wena inanawe̱x i norü pora. Rü wena tá nanangutaque̱xexẽxẽ i norü duü̃xü̃gü i Achíriaanewa, rü Equítuanewa, rü Patróxanewa, rü Etiopíaanewa, rü Eráü̃anewa, rü Chináxanewa, rü Amáanewa rü nachixü̃anegü i márcutüwa ngẽxmagüxü̃wa. Rü tá wena Iraéaneca̱x nanawoeguxẽxẽ.

Ichaía 11:11 Referans Kwoze

Miquéa 7:12

Marü tá nawa nangu i ngẽma ngunexü̃ i nagu cuwa tá naxĩxü̃ i guxü̃táma i nachixü̃anecüã̱xgü. Rü Achíriaanewa rü ñu̱xmata Equítuanewa tá ne naxĩ nax cuwa naxĩxü̃. Rü natü i Níruwa rü ñu̱xmata natü ya Eufrátewa tá ne naxĩ nax cuwa naxĩxü̃. Rü guxü̃ma i márpechinüwa tá ne naxĩ rü guxü̃nema ya ma̱xpǘneanegüwa tá ne naxĩ nax cuwa naxĩxü̃ca̱x.

Romanos 11:26

Natürü ngẽmawena rü guxü̃táma i Iraétanüxü̃ rü tá ta nayaxõgü, rü tá nanayauxgü i maxü̃ i taguma gúxü̃. Erü Tupanaarü ore i ümatüxü̃wa rü ñanagürü: “Yimá Cristu ya ínanguxü̃xẽẽcü, rü Chióü̃wa tá ne naxũ. Rü nüma rü tá ngẽma Iraétanüxü̃güxü̃ chixexü̃wa ínanguxü̃xẽxẽ.

Ichaía 10:20

Rü ngẽma ngunexü̃gu rü ngẽma noxretama i Iraéanecüã̱xgü i Acóbutanüxü̃ i íyaxüxü̃, rü taxũtáma wena nüxü̃́ nayaxõgü i ngẽma chixri namaxã icuáxü̃. Rü tá Cori ya Tupana ya üünecü ya norü Tupanaca̱x nawoegu rü yimaaxü̃́ tá aixcüma nayaxõgü.

Ochéa 11:11

Rü ñoma werigürüxü̃ tá nidu̱xruãcü Equítuanewa ne naxĩ. Rü ñoma muxtucurüxü̃ Achíriaanewa tá ne naxĩ. Rü choma rü tá wena napatagüwa chanagagü nax wena nawa yamaxẽxü̃ca̱x. Rü choma ya Cori ya Tupana nixĩ i nüxü̃ chixuxü̃ i ngẽma —ñanagürü.

Ichaía 66:19

Rü wüxi i cua̱xruxü̃ tá nüxü̃ chawe̱x i ngẽma duü̃xü̃gü i maxẽxü̃. Rü togü i nachixü̃anegüwa tá chanamugü i Tárchixwa rü Líbiawa rü Lídiawa i ngextá mea würaarü maxü̃xü̃ ínacua̱xgüxü̃wa. Rü tá nawa chanamugü i Tubáxwa rü Gréchiawa rü ngẽma nachixü̃anegü i yáxü̃wa ngẽxmagüxü̃ i márpechinüwa i ngextá taguma chauchigaxü̃ ínaxĩnüexü̃wa rü taguma chorü poraxü̃ ínadaugüxü̃wa. Rü nümagü rü tá ngẽma nachixü̃anegüwa nüxü̃ nixugüe i chorü porachiga.

Ichaía 42:4

Rü nüma rü tagutáma inarüngü̃. Rü tagutáma nüxü̃ narüchau ñu̱xmatáta ñoma i naanewa maxẽxü̃ i duü̃xü̃gü mea nügümaxã inacuáxe. Rü woo ngẽma nachixü̃anegü i yáxü̃wa ngẽxmagüxü̃ i már arü tocutüwa rü tá mea nanayauxgü i norü ngu̱xẽẽtae —ñanagürü.

Ichaía 24:15

Rü éstewaama rü ñu̱xũchi ngẽma nachixü̃anegü i márpechinüwa ngẽxmagüxü̃wa rü Cori ya Iraétanüxü̃arü Tupanaxü̃ tá nicua̱xüü̃gü.

Ichaía 10:9

Rü guxü̃nema ya ĩanegü ga nüxü̃ charüporamaene rü cho̱xme̱xwa nangẽxmagü, rü ngẽxgumarüxü̃ ya ĩane ya Canú, rü ĩane ya Caquemí, rü ĩane ya Amá, rü ĩane ya Arpáx, rü ĩane ya Chamária, rü ĩane ya Damácu. Rü guxü̃nema ya yima rü cho̱xme̱xwa nangẽxmagü.

Naanearü ügüchiga 11:2

Rü ínachoxü̃ nawa ga yema naane ga éstewaama yexmaxü̃. Rü nawa nangugü ga wüxi ga naane ga metachinüxü̃ ga Chináxanewa yexmaxü̃. Rü yexma naxãchiü̃gü.

Naanearü ügüchiga 10:22

Rü Chéü̃ nanegü nixĩ ga Eráü̃, rü Achúx, rü Arpacháx, rü Lux rü ñu̱xũchi Aráü̃.

Naanearü ügüchiga 10:10

Rü guma ĩanegü ga itaxü̃ne ga Nimróxme̱xẽwa yexmagüne rü ĩanegü ga Babé rü Érex, rü Acáx rü Canéx nixĩ. Rü guma ĩanegü rü naane ga Chináxwa nayexmagü.

2 Corintios 3:16

Natürü ngẽxguma wüxi i duü̃xü̃ nüxü̃ rüxoxgu i nacüma i chixexü̃, rü tórü Coriaxü̃́ yaxõõgu, rü ngẽxguma nixĩ i nüxna ínanguxü̃ i ngẽma nüxü̃́ naguxchaxẽẽxü̃.

Romanos 11:15

Nüxü̃ tacua̱x rü ngẽma Yudíugü rü tama Cristuaxü̃́ nayaxõgüchaü̃ i ñu̱xmax. Rü ngẽmaca̱x ya Tupana rü nanade i ngẽma tama Yudíugü ixĩgüxü̃. ¿Natürü ñuxãcü tá nixĩ i ngẽxguma Tupana wena nadexgu i ngẽma Yudíugü? Rü wüxi i mexẽchixü̃ tá nixĩ, erü ñoma wüxi i duü̃xü̃ i yuxü̃ rü wenaxarü maxü̃xü̃rüxü̃ tá nixĩgü.

Chacaría 9:2

Rü ngẽxgumarüxü̃ ta Cori ya Tupanaarü nixĩgü ya yima ĩane ya Amá ya Chíriaarü üyewa ngẽxmane rü yima ĩanegü ya Tíru rü Chidóü̃ guxü̃ma i norü duü̃xü̃gü i nüxü̃ icua̱xüchixü̃maxã.

Chacaría 5:11

Rü yexguma nüma ga yema Tupanaarü orearü ngeruxü̃ i daxũcüã̱x rü choxü̃ nangãxü̃ rü ñanagürü: —Babiróniaanewa nanangegü erü ngẽxma tá nanaxügü ya wüxi ya napata. Rü ngẽxguma marü yanguxgu ya yima napata, rü wüxi i norü nachicaétügu tá nanaxǘgü ya yima pexchi —ñanagürü.

Chofonía 2:11

Rü nüma ya Cori ya Tupana rü poraãcü tá namaxã nanu. Rü nagu tá nipogügü i ngẽma nachixü̃anearü tupananetachicüna̱xãgü. Rü ñu̱xũchi guxü̃ i nachixü̃anegüwa rü tá Cori ya Tupanaxü̃ nicua̱xüü̃gü, rü woo ngẽma duü̃xü̃gü i capaxũgüwa maxẽxü̃ rü tá nüxü̃ nicua̱xüü̃gü.

Ochéa 1:11

Rü ngẽma ngunexü̃gu rü ngẽma Yudáanecüã̱xgü rü Iraéanecüã̱xgü rü wüxitama i nachixü̃ane tá nixĩ, rü wüxi tátama nixĩ i norü ãẽ̱xgacü. Rü yíxema to i nachixü̃anewa tüxü̃ nagagüxe rü tá wena Yerucharéü̃ca̱x tawoegu. Rü ngẽma Yereéarü ngunexü̃gu rü taxü̃ i taãxẽ tá nangẽxma.

Danié 11:18

Ngẽmawena i ngẽma nórteanearü ãẽ̱xgacü rü yima ĩanegü ya márpechinüwa ngẽxmagüneca̱x tá ínayagoõchi, rü muxü̃netáma napuxü̃ rü naxme̱xwa tá nangẽxmagü. Natürü wüxi i churaragüeru tá ínayachaxãchixẽxẽ. Rü ngẽmaãcü tá ngẽma Nórteanearü ãẽ̱xgacüxü̃ naxãnexẽxẽ.

Danié 8:2

Rü yema chaunegüwa rü Chúchaarü ĩanewa chayexma ga Eráü̃anewa ga natü ga Uráipechinüwa.

Echequié 30:14

Rü yima ĩane ya Patróx rü tá nagu chapogü, rü yima ĩane ya Choáü̃ rü tá chayagu, rü yima ĩane ya Téba rü tá chanapoxcu.

Echequié 27:6

Rü yima cuxẽ̱xmügü rü Bacháü̃wáü̃güxü̃ ga roblenaxca̱x nixĩgü. Rü ngẽma mürapewagü i namaxã cutüétüxü̃ rü Chíprewaü̃güxü̃ i nainaxca̱x nixĩ. Rü guxü̃ma i ngẽma rü marfíxmaxã nanga̱xãẽgü.

Yeremía 49:23

Rü ñanagürü ta: —Ñaa nixĩ i ore i Damácuca̱x ixĩxü̃. Rü yima ĩanegü ga Amá rü Arpáx rü naxoegaãẽgü, erü nachiga marü nüxna nangu i ore i chixexü̃. Rü poraãcü namuü̃e rü tama nataãẽgü.

Yeremía 44:1

Ñaa nixĩ i Tupanaarü ore ga Yeremíamaxã nüxü̃ yaxuxü̃ naxca̱x ga guxü̃ma ga yema Yudíugü ga Equítuanewa yexmagüxü̃ ga ĩanegü ga Midóxwa, rü Tafnéxwa, rü Ménfiwa, rü ñu̱xũchi yema Yudíugü ga Equítuanearü súrwa yexmagüxü̃.

Yeremía 31:10

Pa Duü̃xü̃gü i To i Nachixü̃anecüã̱xgüx, ¡Iperüxĩnüe i norü ore ya Cori ya Tupana, rü penaxunagü nawa i ngẽma pechixü̃anegü i yáxü̃wa ngẽxmagüxü̃ i márpechinüwa! ¡Rü ñapegürügü: “Cori ya Tupana rü noxri rü Iraétanüxü̃maxã nanawoone, natürü i ñu̱xma rü wena nananutaque̱xe. Rü nüma tá nüxna nadau ñoma wüxi i carnéruarü dauruxü̃ norü carnéruna dauxü̃rüxü̃”, ñapegürügü!

Yeremía 25:25

Rü guma bínuwa chayaxaxexẽẽgü ga guxü̃ma ga Zimríanearü ãẽ̱xgacügü, rü Eráü̃anearü ãẽ̱xgacügü, rü Médiaanearü ãẽ̱xgacügü.

Ichaía 45:14

Rü nüma ya Tupana rü Iraétanüxü̃xü̃ ñanagürü ta: —Ngẽma Equítuanecüã̱xgü i naanewa puracüexü̃, rü ngẽma Etiopíaanecüã̱xgü i taxetanüxü̃, rü ngẽma Chabácüã̱xgü i imáchanexü̃chixü̃ rü tá cuxme̱xwa nangẽxmagü. Rü cadénamaxã íchotachacüüãcü tá cuwe narüxĩ. Rü cupe̱xegu tá nacaxã́pü̱xügü rü ñanagürügü tá: “Aixcümaxü̃chi nixĩ i cutanüwa nangẽxmaxü̃ ya Tupana rü nataxuma i to ya Tupana”, ñanagürügü tá —ñanagürü ga Tupana.

Ichaía 42:12

Rü pema i nachixü̃anegü i márpechinüwa maxẽxü̃ i duü̃xü̃gü ¡rü nüxü̃ picua̱xüxü̃gü rü moxẽ nüxna pexãgü!

Ichaía 42:10

Rü ñanagürü ga Ichaía: —¡Tupanaxü̃ picua̱xüü̃gü wüxi i ngexwaca̱xü̃xü̃ i wiyaemaxã! Rü guxü̃ma i nachixü̃anecüã̱x i ñoma i naanewa ngẽxmagüxü̃, rü guxü̃ma i duü̃xü̃gü i yáxü̃wa márcutüwa maxẽxü̃, rü guxü̃ma i duü̃xü̃gü i márgu yarüxĩĩxü̃, rü guxü̃ma i márwa maxẽxü̃, rü name nixĩ i Tupanaxü̃ nicua̱xüü̃gü.

Ichaía 11:16

Rü ngẽxguma Achíriaanewa nawoegu̱xgu i ngẽma noxretama i Tupanaarü duü̃xü̃gü i íyaxügüxü̃ rü tá namaxã inayarüxĩ i wüxi i nama i taxü̃ ga yexguma norü o̱xigü ga Iraétanüxü̃ Equítuanewa ichoxü̃gu nagu naxĩxü̃raxü̃xü̃.

Wiyaegü 68:22

Rü nüma ya Tupana rü ñanagürü: —Pa Iraétanüxü̃x, choma rü tá Bacháü̃anewa ne chanagagü i perü uanügü, rü mártamawa tá ne chanagagü i ngẽma perü uanügü.

Naanearü ügüchiga 14:1

Rü yexguma Mamrégu naxãchiü̃gu ga Abráü̃, rü Amrapé rü ĩane ga Chináxarü ãẽ̱xgacü nixĩ, rü Arióx rü ĩane ga Eracháxarü ãẽ̱xgacü nixĩ, rü Queduraúme rü ĩane ga Eráü̃arü ãẽ̱xgacü nixĩ, rü Tidáx rü ĩane ga Goíü̃arü ãẽ̱xgacü nixĩ.

Ester 10:1

Rü nüma ga ãẽ̱xgacü ga Achuéru rü nanaxunagü nax nüxü̃́ naxütanügüãxü̃ca̱x ga yema nachixü̃anegü ga naxme̱xwa yexmagüxü̃ ga dauxchitaanewa rü márpechinüanewa yexmagüxü̃.

Ichaía 1:9

Ega ngẽxguma Cori ya Tupana ya Guxãétüwa Ngẽxmacü taxũchima ñuxre i yixema nua tüxü̃ yaxügüxẽẽgu, rü Yerucharéü̃ rü Chodómarüxü̃ rü Gomórarüxü̃ nixĩ.

Ichaía 19:21

Rü nüma ya Cori ya Tupana rü tá Equítuanecüã̱xgüxü̃ nügü nacua̱xẽxẽ, rü nümagü rü tá nüxü̃́ nayaxõgü. Rü tá naga naxĩnüe rü tá naxca̱x nangutaque̱xegü nax nüxü̃ yacua̱xüü̃güxü̃ca̱x. Rü tá naxü̃nagü naxca̱x nadai nax ngẽmaãcü ãmare nüxna naxãgüxü̃. Rü Cori ya Tupanamaxã tá inaxunetagü rü ñu̱xũchi aixcüma tá nayanguxẽẽgü i ngẽma uneta i Cori ya Tupanamaxã nüxü̃ yaxugüxü̃.

Ichaía 19:22

Rü Cori ya Tupana rü tá Equítuanearü duü̃xü̃güca̱x ngúxü̃ ínanguxẽxẽ. Natürü yixcama rü tá nanaxoxẽxẽ i ngẽma ngúxü̃ i yangegüxü̃. Rü nüma i Equítuanecüã̱xgü rü tá Cori ya Tupanaca̱x nawoegu, rü nüma rü tá nüxü̃́ nangechaü̃tümüü̃gü rü tá nayanaxoxẽxẽ i ngẽma ngúxü̃ i yangegüxü̃.

Ichaía 37:31

Rü ngẽma Yudáanewa íyaxügüxü̃ i duü̃xü̃gü rü tá nimu ñoma nanetügü i ãxchúmaxãxü̃ rü ixoxü̃rüxü̃.

Echequié 29:14

Rü choma rü tá íchananguxü̃xẽxẽ i ngẽma Equítuanecüã̱xgü i poxcuexü̃. Rü yema naane ga nagu nabuexü̃ i Equítuanearü súrwaama ngẽxmaxü̃wa tá nangugü. Rü ngéma rü wüxi i íxramarexü̃ i nachixü̃ane tá naxügü.

Echequié 32:24

Rü ngéma naxmaxü̃wa nangẽxma i Eláü̃ namaxã i guxü̃ma i norü churaragü i nacüwagu ta̱xgüxü̃. Rü guxü̃ma i nümagü i tama Tupanaaxü̃́ yaxõgüxü̃ rü daigu nayue rü nata̱xgü. Rü yexguma namaxẽgu rü poraãcü nanamuü̃xẽxẽ i duü̃xü̃gü natürü i ñu̱xma rü ngexü̃rüüxü̃mare i duü̃xü̃gürüxü̃ naxmaxü̃güwa nangẽxmagü.

Echequié 38:8

Rü mucü ya taunecü ngupe̱xtüguwena rü cuxca̱x tá ínangu i wüxi i mu nax naxca̱x ícuyagoõchixü̃ca̱x i wüxi i nachixü̃ane ga daiwa yexmaxü̃ natürü i ñu̱xma rü wenaxarü marü mexü̃. Rü yema duü̃xü̃gü rü noxri muxü̃ma ga nachixü̃anegu nawoonemare rü norü naane rü poraãcü nangeãcu. Natürü wenaxarü Iraéane i máxpü̱xanexü̃ca̱x nawoegu. Rü ñu̱xma rü guxü̃ma i nümagü rü ngéma nangẽxmagü rü taãẽãcü ngéma namaxẽ.

Danié 1:2

Rü nüma ga Cori ya Tupana rü Nabucudonochóaxü̃́ nanatauxchaxẽxẽ nax Yoaquíü̃xü̃ yayaxuxü̃ rü Babiróniaanewa nagaaxü̃ muxü̃ma ga natanüxü̃maxã. Rü yexgumarüxü̃ ta nayana ga Tupanapata ga taxü̃nearü yemaxü̃gü ga üünexü̃, rü norü tupanapatagu nananucu ga Babiróniaanewa.

Naanearü ügüchiga 2:13

Rü yema to ga nachacüxü rü Guióü̃gu naxãéga, rü yema natü rü Cúxarü naanegu nipogüchigü.

Wenaxarü naxümatü ga Tupanaarü mugü 9:29

Natürü nümagü i ngẽma Iraétanüxü̃ rü curü duü̃xü̃gü nixĩ, rü cuma nixĩ ga taxü̃ ga curü poramaxã Equítuanewa ícunanguxü̃xẽẽxü̃” —ñanagürü ga Moiché.

Norü taxre ga popera ga ãẽ̱xgacügüchiga 17:24

Rü nüma ga Achíriaanearü ãẽ̱xgacü rü Iraéanecüã̱xgüchicüxü Chamáriaarü ĩanegüwa nanamugü ga duü̃xü̃gü ga Babiróniaanecüã̱x rü Cútaanecüã̱x rü Abáanecüã̱x, rü Amáanecüã̱x, rü Cheparabaíü̃anecüã̱x nax Chamáriaanegu naxãchiü̃güxü̃ca̱x nachicüxü ga yema Iraéanecüã̱x. Rü yemaacü ga yema togü ga duü̃xü̃gü rü Chamáriaanegu nachocu rü Iraéanecüã̱xarü ĩanegügu naxãchiü̃gü.

Ichaía 21:2

Rü naxãũcümaxü̃chi nixĩ i ngẽma Cori ya Tupana choxü̃ wéxü̃. Rü ngẽma taechitawa̱xexü̃ rü nanaxü i ngẽma nagu naxĩnüxü̃. Rü ngẽma máxwa̱xexü̃ rü nayama̱x. ¡Pa Eráü̃cüã̱x, rü Pa Médiacüã̱x, paxa ipexĩãchi nax Babiróniaanearü ĩaneca̱x ípeyaxüãchixü̃! Rü choma rü tá chayacua̱xẽxẽ nax Babirónia ngúxü̃ nüxü̃ ingexẽẽgüxü̃ ya naigü ya ĩanegü.

Ichaía 22:6

Rü ngẽma Eráü̃cüã̱xgü rü marü ínanamexẽẽgü ya naxnegü, rü ñu̱xũchi marü norü carugu nichoü̃ rü norü cowarugügu nitoü̃. Rü ngẽma Quírucüã̱xgü rü nanade i norü poxü̃ruü̃gü nax daiwa naxĩxü̃ca̱x.

Ichaía 49:12

Rü pema ya Iraétanüxü̃ rü tá yáxü̃wama ne pexĩ, rü ñuxre rü nórtewaama rü togü rü oéstewaama rü togü rü Equítuanearü súrwaama tá ne pexĩ.

Ochéa 11:10

Rü choma rü ñoma wüxi i leóü̃rüxü̃ tá chataga rü chorü duü̃xü̃gü rü tá chauga naxĩnüe. Rü ngẽxguma tagaãcü naxca̱x chacaxgu rü nümagü rü nidu̱xruãcüma tá oéstewaama ne naxĩ.

Chacaría 8:7

Rü choma rü tá íchananguxü̃xẽxẽ i chorü duü̃xü̃gü naxme̱xwa i ngẽma nachixü̃ane i éstewaama ngẽxmaxü̃ rü ngẽma nachixü̃ane i oéstewaama ngẽxmaxü̃.