Ichaía 10:6 - Tupanaarü Ore

⁶ Rü choma tá nixĩ i Achíriaanearü ãẽ̱xgacüxü̃ chamuxü̃ nax duü̃xü̃gü i chixexü̃gu maxẽxü̃ca̱x rü wüxi i nachixü̃ane i choxü̃ nuẽẽxü̃ca̱x íyagoõchixü̃ca̱x nax nüxü̃́ nangĩ́xü̃ca̱x rü nüxna napuxü̃ãxü̃ca̱x i norü ngẽmaxü̃gü rü nagu napugüexü̃ca̱x ñoma ĩanearü namagüwa ngẽxmaxü̃ i ãcharaxü̃gu napugüexü̃rüxü̃.

Ichaía 10:6 Referans Kwoze

Ichaía 9:17

Rü nüma ya Cori ya Tupana rü ngẽmaca̱x tama namaxã nixauxãchi i ngextü̱xüxü̃gü, rü ñu̱xũchi tama nüxü̃́ tangechaü̃tümüxü̃ ya taxcutagü rü yutegüxe. Erü guxü̃ma i duü̃xü̃gü rü chixexü̃arü üruü̃gü nixĩgü rü naechitamare chixexü̃ i dexamaxã nidexagü. Rü guxü̃ma ga yema chixexü̃ ga naxügüxü̃gagu rü nüma ya Cori ya Tupana rü tama Iraéanecüã̱xgümaxã inarüngüxmü, rü yexeraãcü nayaxãxũnechigüama.

Chacaría 10:5

Rü nümagü rü tá ñoma churaragü i ãcharaxü̃gu nügü da̱i̱xü̃rüxü̃ nixĩgü. Rü tá naporae, erü Cori ya Tupana rü natanüwa nangẽxma. Rü ngẽmaãcü tá nanaxãnexẽxẽ i norü uanügüarü churaragü i cowarugu ĩxü̃.

Yeremía 34:22

Rü choma, Pa Yeremíax, rü tá chanamu i Babiróniaanearü ãẽ̱xgacüarü churaragü nax wena daa ĩaneca̱x nawoeguxü̃ca̱x. Rü tá naxca̱x ínayaxüãchi rü tá nagu nachocu, rü tá nayagugü. Rü yima naigü ga Yudáanearü ĩanegü rü chianexü̃xü̃ tá nixĩgü rü nataxutama i duü̃xü̃gü i nawa ngẽxmagüxü̃ —ñanagürü.

Yeremía 25:9

Rü naxca̱x tá changema i guxü̃ma i nachixü̃anegü i nórtewa ngẽxmagüxü̃ rü chorü mugüruxü̃ i Nabucudonochó ya Babiróniaanearü ãẽ̱xgacü. Rü nümagü rü tá nua naxĩ rü tá pexca̱x ínayaxüãchi, rü tá pexü̃ nadai, rü tá nanadai i guxü̃ma i nachixü̃anegü i perü ngaicamana ngẽxmagüxü̃. Rü ngẽmaãcü tá pexü̃ chagu̱xẽxẽ. Rü guxü̃gutáma pechicaxica tá ngéma nayaxǘ. Rü ngẽma duü̃xü̃gü i nüxü̃ daugüxü̃ rü tá poraãcü namaxã naba̱i̱xãchie rü namuü̃e.

Ichaía 19:17

Rü ngẽma Equítuanecüã̱xgü i duü̃xü̃gü rü Yudáanecüã̱xgüxü̃ tá namuü̃e. Rü ngẽxguma ngẽma Yudáanecüã̱xgüna nacua̱xãchiemaregu rü tá naba̱i̱xãchie, erü tá nüxna nacua̱xãchie i ngẽma ãũcümaxü̃ i poxcu i Cori ya Tupana ya Guxãétüwa Ngẽxmacü namaxã ueguxü̃ i Equítuane.

Ore i mexü̃ ga Matéu ümatüxü̃ 15:7

Pemax, Pa Duü̃xü̃güpe̱xewa Mea Maxẽnetaxü̃x, aixcüma nixĩ ga yema ore ga Tupanaarü orearü uruxü̃ ga Ichaía pechiga ümatüxü̃ ga ñaxü̃:

Miquéa 7:10

Rü ñu̱xũchi nüma i ngẽma chorü uanü rü tá nüxü̃ nadau i ñuxãcü Tupana choxü̃ rüngü̃xẽẽxü̃ rü ngẽmaca̱x tá poraãcü naxãnee. Rü nüma i ngẽma chorü uanü rü choxü̃ ñanagürüchire̱x: —¿Ngexcü nixĩ ya yimá curü Cori ya Tupana? —ñanagürüchire̱x. Natürü wüxi i ngunexü̃ rü tá chataãxẽ i ngẽxguma nüxü̃ chada̱u̱xgu nax nagu napúgüxü̃ i chorü uanü ñoma namaarü ãcharaxü̃gu napúgüxü̃rüxü̃.

Yeremía 4:14

Pa Yerucharéü̃cüã̱xgü, ¡nüxü̃ perüxoe i ngẽma chixexü̃ i nagu pemaxẽxü̃! Rü ngẽxgumaxicatama tá nixĩ i nüxna ípenguxü̃xü̃ i ngẽma ãũcümaxü̃ i pexca̱x ínguxchaü̃xü̃. ¿Rü ñuxguxüra tá ta nixĩ i pegüna peyaxũgachixẽẽxü̃ i ngẽma chixexü̃ i ĩnügü i peãẽwa ngẽxmagüxü̃?

Yeremía 3:10

Rü naétüwa ga yema chixexü̃ ga naxügüxü̃ ga yema Yudáanecüã̱xgü ga choxna ĩgüxü̃, rü choxü̃ nawomüxẽẽgümare rü tama aixcüma cha̱u̱xca̱x nawoegu. Rü chomatama ya Cori ya Tupana nixĩ i nüxü̃ chixuxü̃ i ngẽma —ñanagürü.

Ichaía 63:6

Rü poraãcü chanu rü ngẽmaca̱x chanadai i ngẽma togü i nachixü̃anecüã̱xgü. Rü yimá nagü rü waixü̃müanegu chayaya̱xẽxẽ —ñanagürü.

Ichaía 63:3

Rü choma rü chanadai i chorü uanügü rü chayapu̱xcutanü ñoma úbaarü bínu ixüxgurüxü̃. Rü chorü numaxã chayapu̱xcutanü, rü yimá nagü i chorü uanügü rü chauxchiruwa nacháixgü.

Ichaía 41:25

Rü nüma ga Cori ya Tupana rü nidexachigüama rü ñanagürü: —Éstewa chanango̱xẽxẽ ga wüxi ga yatü. Rü naégamaxã naxca̱x changema, rü nórtewa ne naxũ. Rü nüma rü tá nagu napúgü i ngẽma togü i ãẽ̱xgacügü ñoma üwechiruxü̃ waixü̃mügu púgüxü̃rüxü̃.

Ichaía 33:14

Rü Chióü̃wa nidu̱xruxe i ngẽma chixexü̃gu maxẽxü̃. Rü ngẽma tama yaxõgüxü̃ rü poraãcü namuü̃e rü ñanagürügü: —¿Texé chi i tatanüwa tamaxama naétüwa ya yima üxü ya tüxü̃ iguxü̃ne ya guxü̃guma inaiechane? —ñanagürügü.

Ichaía 29:13

Rü nüma ya Cori ya Tupana rü ñanagürü choxü̃: —Ñaa duü̃xü̃gü rü norü dexawaxicatama nügü nixugüe nax chorü duü̃xü̃gü yixĩgüxü̃, natürü tama chauga naxĩnüe. Rü naã̱xmaxãxicatama choxü̃ nicua̱xüü̃gü, natürü norü maxü̃newa rü tama chaugu narüxĩnüe. Rü ngẽma norü cua̱xüü̃gü rü duü̃xü̃güarü ĩnüwa nanayauxgü.

Ichaía 22:5

Erü nüma ya Cori ya Tupana ya Guxãétüwa Ngẽxmacü rü marü nanaxuegu nax wüxi i ngunexü̃gu rü ngẽma Yerucharéü̃arü doxonexü̃ ya Tupana naxca̱x choxü̃ ngo̱xetüxẽẽxü̃wa tá ínanguxü̃ i taxü̃ i muü̃ rü taxü̃ i dai rü ĩ̱xãchiãxẽ. Rü yima ĩanearü poxeguxü̃tápü̱x rü nagu ínapogüe. Rü ngẽma nax yaxaixchaxü̃ i duü̃xü̃gü rü máxpü̱xanexü̃wa nangu i naga.

Ichaía 9:19

Rü yimá Cori ya Tupana ya Guxãétüwa Ngẽxmacüarü nugagu nixĩ i yaxãxü̃ i Iraétanüxü̃arü naane, rü ngẽma üxüema nixĩ i yaguxü̃ ya ĩane. Rü duü̃xü̃gü rü taxũtáma nügüenexẽmaxã nügü nangechaü̃gü. Rü taiyamaxã tá nanaxĩ̱xãchiãẽgü. Rü yíxema norü tügünecüwagu ãchixü̃xẽ rü tá tümawemüca̱x nangĩ̱x rü noxtacüma nayaga, natürü tá nataiyaama. Rü ngẽma to rü tá yíxema norü to̱xwecüwagu ãchiü̃xẽ rü tá tüxna nanapu i tümaarü õna, natürü taxũtáma nüxü̃́ ningu. Rü duü̃xü̃gü rü düxwa tá naxacügümaxã nixãwemü.

Ichaía 5:29

Rü naga i ngẽma norü churaragü rü ñoma wüxi i leóü̃ i aexü̃xü̃ ingũ̱xunecüxüxü̃rüxü̃ nixĩgü. Rü nayange i naeü̃ rü taxúema tapora nax nüxna tanapuxü̃.

2 Chamué 22:43

Rü chanadai ñu̱xmata ñoma waixü̃müchicute̱xerüxü̃ yaxĩgü. Rü nawa changa ñoma ãcharaxü̃ i namawa ngaxü̃rüxü̃.

Ichaía 5:5

Rü dücax, rü ñu̱xma rü tá pemaxã nüxü̃ chixu i ngẽma nagu charüxĩnüxü̃ namaxã i ngẽma chorü úbanecü. Rü tá íchanapoxgü i ngẽma norü poxeguxü̃ nax ngẽmaãcü duü̃xü̃gü nagu pogüexü̃ca̱x i ngẽma úbanecü. Rü ngẽma norü poxeguxü̃ rü tá nagu chapogü nax duü̃xü̃gü nagu púgüexü̃ca̱x i ngẽma úbanecü.

Ichaía 5:25

Rü ngẽmaca̱x nixĩ ya Cori ya Tupana i norü duü̃xü̃gümaxã nanuxü̃ rü düxwa napoxcueãxü̃. Rü ma̱xpǘnegü rü nidu̱xrugü, rü duü̃xẽgü ya yuexe rü ñoma guxchirerüxü̃ ĩanearü namagu tawoone. Natürü ya Cori ya Tupana rü tama inarüngü̃xmü rü nayadaxẽẽãma nax duü̃xü̃güxü̃ naxãxũnexü̃.

Ichaía 7:17

Rü Cori ya Tupana rü cuxca̱x rü cuchixü̃aneca̱x rü cutanüxü̃güca̱x tá ínananguxẽxẽ i taxü̃ i guxchaxü̃. Rü yema ngunexü̃ ga Efraíü̃tanüxü̃ rü Yudátanüxü̃na yaxĩgachiguwena rü taguma nüxü̃ tadau i wüxi i guxchaxü̃ i ngẽma guxchaxü̃rüxü̃ ãũcümaxü̃. Erü nua Yudáanewa Tupana tá ínananguxẽxẽ i Achíriaanearü ãẽ̱xgacü nax pexca̱x íyagoõchixü̃ca̱x —ñanagürü ga Ichaía.

Ichaía 8:8

Rü ngẽma Achíriaanearü churaragü rü yimá mucü ya taxüchicü ya guxü̃wama yaba̱i̱xü̃anexẽẽcü rü ñu̱xmata duü̃xü̃günaxãwa ngucürüxü̃ tá nixĩ. Erü guxü̃ma i Yudáanewa tá nangugü i ngẽma churaragü. Rü ñoma wüxi i ĩyü i guxü̃ i naanegu nügü iwe̱xechipe̱xatüxü̃ rü ñoma i naanegu nügü yagoxẽẽxü̃rüxü̃ tá nixĩ i ngẽma Achíriaanearü churaragü, Pa Emanuéx —ñanagürü ga Tupana.

Ichaía 24:5

Rü ngẽma duü̃xü̃gü i nawa maxẽxü̃ i ñoma i naane rü chixexü̃maxã nanapáxẽẽgü, erü tama nayanguxẽẽgü i Tupanaarü mugü, rü tama naga naxĩnüe i norü ucu̱xẽgü. Rü woo Tupanamaxã nüxü̃ nixugüe nax guxü̃gutáma yanguxẽẽgüãxü̃ ga yema uneta ga Tupanamaxã naxügüxü̃, natürü tama aixcüma nayanguxẽẽgü.

Ichaía 32:6

Erü ngẽma duü̃xü̃ i chixexü̃gu maxü̃xü̃ rü chixexü̃maxã nidexa rü ñu̱xũchi naãẽwa rü chixexü̃ i ĩnügu narüxĩnü. Rü naxca̱x nadau nax namáetaxü̃ rü Cori ya Tupanachiga doraxü̃ nixu. Rü tama ta̱xacü tümamaxã nangau ya yíxema taiyaxe, rü tama tüxü̃ naxaxẽxẽ ya yíxema ita̱xawaxe.

Ichaía 33:1

Pa Achíriaanex, wüxi i ngechaü̃ tá nixĩ i cuxca̱x. Cuma rü cunadaiãcu i togü i ĩanegü, natürü taguma togü curü ĩane nadaiãcu. Cuma rü cutogüechitawa̱xe, natürü taguma togü nacuechitawa̱xegü. Natürü nawena nax togüxü̃ cuda̱i̱xü̃ rü cuma rü tá ta cuxü̃ nima̱xgü. Rü nawena nax cutogüechitawa̱xexü̃ rü cuma rü tá ta nacuechitawa̱xegü.

Ichaía 49:17

Rü ngẽma perü uanügü i perü ĩane chixexẽẽgüxü̃ rü paxa tá ínixĩ. Rü paxa tá ínangugü nax wena tá namexẽẽgüxü̃ ya perü ĩane.

Ichaía 49:25

Natürü choma ya Tupana rü ñachagürü: —Ngẽma churara i poraxü̃na tá nanapugü i ngẽma íyaxuxü̃. Rü ngẽma churaragüarü ãẽ̱xgacüna tá nanapugü i ngẽma napuxü̃chiréxü̃. Rü pemaxã nüxü̃ chixu, Pa Iraétanüxü̃x, rü chomatátama nixĩ i perü uanügüme̱xẽwa íchananguxü̃xẽẽxü̃ i penegü rü pexacügü.

Echequié 29:20

Rü ngẽmaãcü tá Nabucudonochóme̱xẽwa chanangexmaxẽxẽ i Equítuane nax ngẽmaãcü nüxü̃́ chanaxütanüxü̃ca̱x naxca̱x ga yema Tíruca̱x nax íyagoõchixü̃, yerü choxü̃́ nixĩ i napuracüxü̃. Rü choma ya Cori ya Tupana nixĩ i nüxü̃ chixuxü̃ i ngẽma.

Echequié 38:12

Rü guxü̃ma i ngẽma ngẽmaxü̃gü ya yima ĩanegüwa ngẽxmagüxü̃ rü tá chaugüxü̃́ chanade rü chayana. Rü tá naxca̱x íchayagoõchi ya yima ĩanegü ya ngexwaca yamexẽẽgüne i ngẽma duü̃xü̃gü ga noxri togü ga nachixü̃anegu woonexü̃ rü ñu̱xma wenaxarü nachixü̃aneca̱x woeguxü̃. Rü nümagü rü nüxü̃́ nangẽxma i muxü̃ma i wocagü rü ngẽmaxü̃gü, rü ñu̱xũchi nagu narüxĩnüe rü ñoma i naanearü ngãxü̃wa nixĩ i namaxẽxü̃’, ñacurügü.

Echequié 38:13

Natürü, Pa Góx, ngẽma duü̃xü̃gü i Chabácüã̱xgü rü Dedáü̃cüã̱xgü, rü ngẽma taxetanüxü̃ ya ĩane ya Tárchixcüã̱xgü rü ñu̱xũchi ngẽma duü̃xü̃gü i náigü ya ĩanecüã̱xgü, rü tá cuxna nacagüe rü tá ñanagürügü: ‘¿Ẽ̱xna ngĩ́xwa nixĩ i nua cuxũxü̃? ¿Rü ẽ̱xna cunanutaque̱xe i curü churaragü nax ngẽmamaxã pegüaxü̃́ penadexü̃ca̱x i diẽrumü, rü úiru, rü naxü̃nagü rü togü i ngẽmaxü̃gü nax ngẽmaãcü peyanaxü̃ca̱x i muxü̃ma i mexü̃gü?’ ” ñanagürü.

Abacú 1:12

Dücax, Pa Corix, Pa Chorü Tupanax ¿tama ẽ̱xna i cuma i guxü̃guma cungexmaechaxü̃? Erü cuma rü üünecü rü taguma yucü quixĩ. Pa Corix, Pa Chorü Poxü̃ruxü̃x, cuma nixĩ i pora nüxna cuxãxü̃ i ngẽma Cadéugü nax nawa cuyanguxẽẽxü̃ca̱x i ngẽma poxcu i tomaxã cuxueguxü̃.

Norü taxre ga popera ga ãẽ̱xgacügüchiga 18:25

¿Cuma nagu curüxĩnügu nax ngüxrümare nua chaxũxü̃ i choma nax ñaa nachixü̃anewa pexca̱x íchayagoõchixü̃ rü pexü̃ chadaixü̃ca̱x, rü tama Cori ya Tupanaarü ngü̃xẽẽmaxã yixĩxü̃? Rü, dücax, nüma nixĩ i choxü̃ namuxü̃ nax pexca̱x íchayagoõchixü̃ nax pexü̃ chadaixü̃ca̱x” —ñanagürü.

Ichaía 8:4

Rü yimá cune rü naxü̃pa nax nüxü̃ nacuáxü̃ nax “papa” rü “mama” ñaxü̃, rü yima ĩanegü ya Damácu rü Chamária rü tá norü uanügü nagu nachocu. Rü tá nanade i norü ngẽmaxü̃gü, rü Achíriaanearü ãẽ̱xgacüxü̃tawa tá nanana —ñanagürü.