Ichaía 10:34 - Tupanaarü Ore

³⁴ Rü nüma ya Tupana rü ñoma wüxi i yuemamaxã muxũchixü̃ i naigü iyexü̃rüxü̃ tá wüxixü̃cüxü nanadai i ngẽma Achíriaanecüã̱xgü. Rü ñoma ocayiwa i máchanene i Líbanuwa ngẽxmane natuxuxü̃rüxü̃ tá nixĩgü.

Ichaía 10:34 Referans Kwoze

Ichaía 37:24

Rü ngẽma curü orearü ngeruü̃güwa rü chomaxã cuguxchiga rü ñacurügü: ‘Choma rü muxü̃nema ga chorü carugü ga daiwexü̃gümaxã ma̱xpǘnegüétügu chaxĩnagü ñu̱xmata yema pinunecüane ga Líbanuanewa yexmagünewa changu. Rü chayaye ga gumá ocayiwagü ga rümáchanemaegüne rü pinugü ga rümemaegüne. Rü ma̱xpǘnegü ga rümáchanemaegüneétügu chaxĩnagü nawa ga yema norü naixnecü ga mexẽchixü̃ ga ñoma putüraanecürüxü̃ ixĩxü̃.

Yema Cuáü̃ nüxü̃ dauxü̃ i yixcüra tá ngupetüxü̃chiga 18:21

Rü ñu̱xũchi wüxi ga Tupanaarü orearü ngeruxü̃ ga daxũcüã̱x rü nanangenagü ga wüxi ga nuta ga taxüchicü ga ñoma tríguarü caruü̃rüxü̃ ixĩcü. Rü yema orearü ngeruxü̃ rü márgü nanaña ga gumá nuta ga taxüchicü, rü ñanagürü: “Ngẽxgumarüxü̃ tá quixĩ nax icuyarüxoxü̃, Pa Ĩane ya Taxü̃ne ya Babiróniax, rü tagutáma texé wena cuxü̃ tadau.

Yema Cuáü̃ nüxü̃ dauxü̃ i yixcüra tá ngupetüxü̃chiga 10:1

Rü nüxü̃ chadau ga wüxi ga to ga Tupanaarü orearü ngeruxü̃ ga daxũguxü̃ ga naanewa írüxĩxü̃. Rü wüxi ga caixanexü̃arü ngãxü̃wa nayexma, rü wüxi ga chirapa naétügu nabo. Rü nachiwe rü ñoma üa̱xcürüxü̃ niyauracüxü. Rü naparagü rü ta ñoma üxüemarüxü̃ niyauracüxü.

2 Tesalonicenses 1:7

Rü pema i ñu̱xma ngúxü̃ pingegüxü̃ rü Tupana tá tüxü̃ inarüngü̃güxẽxẽ. Rü ngẽma tá nanaxü ya Tupana i ngẽxguma üxüemagu daxũwa ne naxũxgu ya tórü Cori ya Ngechuchu ya Cristu wüxigu namaxã i norü orearü ngeruü̃gü i poraexü̃.

Naúü̃ 1:12

Rü ngẽmaca̱x ya Cori ya Tupana rü norü duü̃xü̃güxü̃ ñanagürü: —Rü woo naporae rü namu i ngẽma Achíriaanecüã̱xgü, natürü tá chanadai rü tá inarüxo. Rü choma Pa Yudáanecüã̱xgüx, rü poraãcü ngúxü̃ pexü̃ chingexẽxẽ. Natürü marü taxũtáma wena ngẽmaãcü pemaxã chixĩ.

Danié 4:23

Pa Ãẽ̱xgacüx, rü yema to ga nüxü̃ cudauxü̃ ga yema cunegüwa, rü nüxü̃ cudau ga wüxi ga üünexü̃ ga dauxü̃cüã̱x ga dauruxü̃ ixĩxü̃ ga dauxü̃guxü̃ ga naanewa írüxĩxü̃ ga ñaxü̃: ‘¡Rü penatuxu̱x ya yimá nai rü nagu pechexgü! ¡Natürü ngẽma nachime rü naxchúma̱xãgü rü nüetama ngéma waixü̃müwa nangexma̱x! ¡Rü fierunaxca̱x rü bróũchenaxca̱x ya cadénamaxã penangãxü̃ rü ngéma naanearü maxẽanewa penata̱x nax cherena nagu nguxü̃ca̱x! Rü wüxigu naxü̃nagümaxã maxẽ nangṍxü̃ca̱x i 7 ya taunecü’, ñaxü̃.

Yeremía 48:2

Rü ngẽma Moáane ga noxri mexẽchixü̃ rü ñu̱xma rü marü nataxuma. Rü ĩane ya Ebóü̃wa rü ngẽma norü uanügü rü nagu narüxĩnüe nax iyanaxoxẽẽgüaxü̃ i ngẽma nachixü̃ane i Moá. Rü yima ĩane ya Maxméü̃ rü tá ta nagu napogüe. Rü guxü̃wama nangẽxma i dai rü tama ínayachaxãchi nax naxãxũnetaexü̃

Yeremía 22:7

Rü uanügü i ixãxnexü̃ tá cuxca̱x ngéma chamugü nax cugu yapogüexü̃ca̱x. Rü nagu tá nachexgüe ya yima curü caxtagü ya imexẽchine ya ocayiwanaxca̱x, rü ñu̱xũchi tá üxüétüwa nayawocu.

Ichaía 37:36

Rü yematama chütaxü̃gu rü wüxi ga daxũcüã̱x ga Tupanaarü orearü ngeruxü̃ rü nanadai ga 185,000 ga churaragü ga Achíriaanecüã̱x. Rü yexguma yangunegu rü guxü̃ma nayue.

Ichaía 31:8

Rü ngẽma Achíriaanecüã̱x rü taragu tá nayue, natürü taxũtáma duü̃xü̃güarü poragagu nayue, erü choma nixĩ i nüxü̃ charüporamaexü̃. Rü ngẽma daigagu rü norü churaragü rü tá nibuxmü, rü ngẽma norü ngextü̱xüxü̃gü i íyaxügüxü̃ rü perü puracütanüxü̃ tá nixĩgü.

Ichaía 10:18

Rü nüma ya Cori ya Tupana rü tá nayanaxoxẽxẽ i ngẽma Achíriaanearü ãẽ̱xgacüarü pora ñoma wüxi i üxüema i naixnecügü i mexẽchixü̃ ixaxẽẽxü̃rüxü̃ rü mexü̃ i nanetünecügü ixaxẽẽxü̃rüxü̃. Rü ngẽma norü churaragü rü ngéma tá nawogümare ñoma wüxi i duü̃xü̃ i da̱xawexü̃ i ngearü poraã́xü̃rüxü̃.

Wiyaegü 103:20

Pa Daxũcüã̱x i orearü Ngeruxü̃ i Poraexü̃ i Yanguxẽxẽgüxe i Ngẽma Tupana Pexü̃ Muxü̃ ¡rü mexü̃ Corimaxã pexuegugü!

Ichaía 2:13

Rü ngẽma ngunexü̃gu rü nüma ya Cori ya Tupana rü tá nanaxãneexẽxẽ i ngẽma duü̃xü̃gü i nügügu rüxĩnüexü̃ nax ñoma Líbanuanearü ocayiwarüxü̃ rü ñoma Bacháü̃anearü naigü i roblerüxü̃ naporaexü̃ rü natachigagüxü̃.

Ichaía 33:9

Rü Iraétanüxü̃ rü namae erü ngechaü̃wa nangẽxmagü. Rü Líbanuarü naixnecügü rü nipagü. Rü Charóü̃arü metachinüxü̃ rü naxnücüanexü̃ nayanguxuchi. Rü Bacháü̃wa rü ma̱xpǘne ya Carméruwa rü nabáianemare

Echequié 31:3

Rü dücax i ngẽma nachixü̃ane i Achíria i ñoma wüxi i Líbanuarü ocayiwarüxü̃ nata rü napora. Rü nataeta rü namáchane rü natape̱xe rü caixanexü̃wa nangu.