Ichaía 1:4 - Tupanaarü Ore

⁴ Pa Duü̃xü̃gü i Chixexü̃ Ügüxü̃ rü Chixexü̃gu Ímaxẽxü̃x, ngúxü̃ pinge erü pema rü chixexü̃arü üruü̃gütaagü pixĩgü, rü nanegü i pecaduã̱xgüxü̃ pixĩgü. Pema rü marü nüxna pixĩgachi ya Iraétanüxü̃arü Tupana ya üünecü rü marü nüxü̃ perüxoe.

Ichaía 1:4 Referans Kwoze

Ichaía 5:24

Rü ngẽmaca̱x i pema rü ñoma maxẽ i paxü̃ i üxüemawa ixaxü̃rüxü̃ tá iperüxo. Rü ñoma nai i yixchúma̱xaxü̃rüxü̃ rü ñoma nachacu i waixü̃müchicute̱xe yanguxuchixü̃rüxü̃ tá pixĩgü. Erü nüxü̃ pexo i norü ngu̱xẽẽtaegü rü norü mugü ya Cori ya Iraéarü Tupana ya Üünecü ya Guxãétüwa Ngẽxmacü.

Yeremía 2:17

Rü yema pexü̃ nangupetü nagagu nax choxna pixĩgachixü̃ i choma i perü Cori ya Tupana chixĩxü̃. Rü choma nixĩ ga namawa pemaxã ichacuáxü̃.

Yeremía 2:13

Rü ngẽma chorü duü̃xü̃gü rü taxre ga pecadu nixĩ ga chope̱xewa naxügüxü̃. Rü choxna nixĩgachi ga choma nax dexá i maxü̃xü̃ chixĩxü̃. Rü ñu̱xũchi nügüca̱x nanaxügü ga norü puchugü ga tama dexá nawa yexmaechaxü̃.

Romanos 8:7

Rü yíxema tümaxü̃nearü ngúchaü̃ca̱x daugüxe rü Tupanamaxã tarüxuanügü. Erü tama Tupanaarü mugüga taxĩnüe rü tama tayanguxẽxẽ.

Ore i mexü̃ ga Matéu ümatüxü̃ 3:7

Natürü yexguma Cuáü̃ nüxü̃ da̱u̱xgu ga naxü̃tawa nax nangugüxü̃ ga muxü̃ma ga ãẽ̱xgacügü ga Parichéugü rü Chaduchéugü nax ínabaiü̃xẽẽãxü̃ca̱x, rü Cuáü̃ ñanagürü nüxü̃: “Pa Ãxtapearü Duü̃xü̃güx, ¿rü texé pemaxã nüxü̃ tixu nax na̱xcha̱xwa pibuxmüxü̃ i Tupanaarü poxcu i ãũcümaxü̃ i marü pexca̱x ingaicaxü̃?

Yeremía 7:19

Natürü ngẽma nax choxü̃ nachixeãẽgüxü̃ rü naétü nügütama nachixeãẽgü rü ngẽmaãcü taxü̃ i ãne nügüca̱x ínanguxẽẽgü. Rü chomatama ya Cori ya Tupana nixĩ i nüxü̃ chixuxü̃ i ngẽma.

Yeremía 2:19

Rü ngẽma perü chixexü̃gagu tátama nixĩ i pepoxcuexü̃, rü ngẽma nax tama choxü̃ pengechaxü̃xü̃gagu tá nixĩ i ngúxü̃ pingegüxü̃. ¡Nagu perüxĩnü rü tá nüxü̃ pedau nax poraãcü nachixexü̃ rü nangúxü̃ nax choxna pixĩgachixü̃ rü tama choxü̃ picua̱xüü̃güxü̃ i choma nax perü Cori ya Tupana chixĩxü̃! Rü choma ya Cori ya Tupana ya Guxãétüwa Ngẽxmacü chixĩ rü pemaxã nüxü̃ chixu i ngẽma.

Ichaía 5:19

Rü pema rü ñaperügügü: —¡Paxa naxü ya Cori ya Tupana i ngẽma naxüxchaü̃xü̃, nax nüxü̃ idauxü̃ca̱x! ¡Rü Tupana ya Üünecü ya Iraéanearü Tupana rü paxa yanguxẽẽã i ngẽma nagu naxĩnüxü̃ nax nüxü̃ icuáxü̃ca̱x i ngẽma tá naxüxü̃! —ñaperügügü.

Colosenses 1:24

Rü ñu̱xma nax pexca̱x ngúxü̃ chingexü̃ rü chataãxẽ erü nüxü̃ chacua̱x rü ñaa chaxunemaxã choma rü ta chayanguxẽxẽ ga yema ngúxü̃ ga Cristu ingexü̃ naxca̱x i norü duü̃xü̃gü i yaxõgüxü̃.

1 Corintios 10:22

¿Rü ñuxũ ñapegüxü̃ i ñu̱xmax? ¿Ẽ̱xna penanuxẽẽchaü̃ ya tórü Cori? ¿Ẽ̱xna pexca̱x rü nüxü̃ tarüporamaegü i yixemax?

Ore i mexü̃ ga Matéu ümatüxü̃ 23:33

Pa Ãxtapearü Duü̃xü̃güx, pema rü poraãcü pichixe. ¿Ñuxãcü tá naxcha̱xwa pibuxmü ya yimá üxü ya taguma ixoxü̃ne?

Ore i mexü̃ ga Matéu ümatüxü̃ 11:28

¡Rü nua chauxü̃tawa pexĩ i guxãma i pema ya ipaexe nagagu i perü guxchaxü̃gü rü perü ĩ̱xãchiãẽgü! Rü choma rü tá pexü̃ icharüngü̃güxẽxẽ.

Echequié 16:33

Rü guxü̃ma i ngẽma ngexü̃gü i naxü̃nemaxã taxexü̃ rü nüxü̃́ tanaxütanü. Natürü ga cuma rü ãmaregü nüxna cuxã ga guxü̃ma ga yema cumaxã ngeãẽgüxü̃. Rü nüxü̃́ cunaxütanügü nax cuxü̃tawa naxĩxü̃ca̱x ga yema togü ga nachixü̃anecüã̱xgü nax cumaxã yangeãẽgüxü̃ca̱x.

Yeremía 51:5

Natürü ngẽma Iraéanecüã̱xgü rü Yudáanecüã̱xgü rü woo poraãcü chope̱xewa chixexü̃ naxügügu rü woo pecadumaxã napaxẽẽgüãgu i norü naane, natürü choma ya Cori ya Guxãétüwa Ngẽxmacü ya Iraétanüxü̃arü Tupana ya üünecü nax chixĩxü̃ rü tama nüxna chixũgachi.

Yeremía 50:29

Rü Cori ya Tupana rü ñanagürü: —¡Naxca̱x pengẽma i guxü̃ma i ngẽma churaragü i würaã́xü̃ nax Babiróniaca̱x íyaxü̃ãchixü̃ca̱x! ¡Rü nüxü̃ ínachomaeguãchi ya yima ĩane nax taxuxü̃ma iñaxü̃ca̱x! ¡Ngẽma nixĩ i norü natanü naxca̱x ga yema chixexü̃ ga naxügüxü̃! ¡Rü yema nümagü naigü ga ĩanegümaxã naxügüxü̃rüxü̃ namaxã penaxü i ngẽma Babiróniacüã̱x! Yerü nügü ínarüporae nax chomaxã nanuexü̃ i choma nax Cori ya Iraétanüxü̃arü Tupana ya üünecü nax chixĩxü̃.

Yeremía 7:26

Natürü ga pemax rü tama chauga pexĩnüexü̃ rü tama choxü̃́ ipexĩnüechaü̃, rü yema nũxcümaü̃güxü̃ ga petanüxü̃arü yexera chomaxã penue rü chixri pemaxẽ —ñanagürü.

Yeremía 2:33

Rü cumax, Pa Yudáanex, rü mea nüxü̃ cucua̱xüchi nax naxca̱x cudauxü̃ i togü i nachixü̃anegüarü ngü̃xẽxẽ. Rü woo i ngẽma ngexü̃gü i chixri maxẽxü̃ rü cuwa nixĩ i nangúexü̃.

Yeremía 2:31

Rü pemax i ñomaü̃cüxü maxẽxü̃ i duü̃xü̃gü ¡ẽcü iperüxĩnüe i chorü ore! Pa Iraétanüxü̃x ¿pexca̱x rü ñoma wüxi i naane i paanexü̃rüxü̃ chixĩ? ¿Pexca̱x rü ñoma wüxi i naane i waanexü̃rüxü̃ chixĩ? Pa Chorü Duü̃xü̃güx ¿ta̱xacüca̱x ñaperügügü choxü̃: “Tomagü rü taxúeme̱xẽwa tangexmagü rü marü tagutáma cuxca̱x tawoegu”, ñaperügügü?

Yeremía 2:5

Rü nüma ya Cori ya Tupana rü ñanagürü pexü̃: —¿Ta̱xacü rü chixexü̃ chowa nüxü̃ nadaugü ga perü o̱xigü rü yemaca̱x choxna yaxĩgachixü̃ rü nawe naxĩxü̃ ga tupananetachicüna̱xãgü ga ngearü maxü̃ã̱xgüxü̃? Rü yemagagu taxuwama nügü namexẽẽgü.

Ichaía 65:3

Rü ngẽma duü̃xü̃gü rü guxü̃guma ngúxü̃ choxü̃ ningexẽẽgü namaxã i norü chixexü̃gü. Rü putüraanecügüwa naxü̃na ínagugü naxca̱x i norü tupananetagü. Rü norü guruxü̃ i ladriyunaxca̱xwa nayagugü i pumarate̱xe.

Ichaía 41:16

Rü ñoma trigu ípecuexechite̱xe rü buanecü naxchire yanaxü̃rüxü̃ tá peyabuxmüxẽxẽ i perü uanügü. Rü ngẽxguma i pemax, Pa Iraétanüxü̃x, rü tá chomaxã petaãẽgü rü tá choxü̃ picua̱xüü̃gü i choma nax perü Tupana ya üünecü chixĩxü̃.

Ichaía 41:14

Rü choma ya Cori ya Tupana rü aixcüma pemaxã nüxü̃ chixu rü ñachagürü: —Pa Iraétanüxü̃x Pa Acóbutanüxü̃, rü woo nax penoxrexü̃ rü perü uanügüpe̱xewa peturaexü̃, natürü ¡taxṹ i pemuü̃exü̃! Erü choma rü tá pexü̃ charüngü̃xẽxẽxü̃. Rü choma ya perü Tupana ya üünecü nax chixĩxü̃ rü perü nguxü̃xẽẽruxü̃ chixĩ.

Ichaía 37:23

¿Rü texéchiga nixĩ ga chixri quidexaxü̃ rü texémaxã nixĩ ga cuguxchigaxü̃? ¿Rü texémaxã nixĩ ga quipuraxü̃ rü cunuxetüxü̃? Rü cumaxã nüxü̃ chixu rü chomaxã nixĩ i cunuxü̃ i choma i Iraétanüxü̃arü Tupana ya Üünecü.

Ichaía 30:15

Rü yimá Cori ya Iraétanüxü̃arü Tupana ya Üünecü rü ñanagürü: —¡Cha̱u̱xca̱x pewoegu rü chauga pexĩnüe rü ngẽmaãcü taxũtáma pexü̃ nangupetü! Rü ngẽxguma mea perüchogu rü chauga pexĩnüegu rü ngẽmaãcü tá nixĩ i pexü̃́ nangẽxmaxü̃ i perü pora —ñanagürü. Natürü i pema rü tama chauga pexĩnüechaü̃, rü ñaperügügüama: —Tomagü rü cowarugu tá tibuxmüama —ñaperügügü. Rü aixcüma tá nixĩ i ngẽmaãcü perü uanügücha̱xwa pibuxmüxü̃. Rü pema rü ñaperügügüama: —Cowarugü i poraexüchixü̃gu tá tibuxmüama —ñaperügügüama. Natürü perü uanügü i pewe ngẽgüxü̃ rü tá pexü̃ narüporamaegüama.

Ichaía 30:9

Ñaa duü̃xü̃gü rü duü̃xü̃gü i tama ixĩnüechaü̃xü̃ rü tama yaxõgüchaü̃xü̃ nixĩgü. Rü tama norü Coriarü ucu̱xẽgü inarüxĩnüechaxü̃.

Ichaía 29:19

Rü ngẽma iraxü̃ nüxü̃́ ngẽxmagüxü̃ rü Cori ya Tupanamaxã tá nataãẽgü. Rü woo i ngẽma ngearü diẽruã̱xgüxü̃ rü tá Iraétanüxü̃arü Tupana ya üünecümaxã nataãẽgü.

Ichaía 14:20

Rü taxũtáma mea cuxü̃ inata̱xgü ngẽma togü i ãẽ̱xgacügürüxü̃, erü cuma rü chixexü̃wa cunangexmaxẽxẽ i cuchixü̃ane, rü ñu̱xũchi cunadai i curü ĩanecüã̱x i duü̃xü̃gü. Rü taxúema tá nüxna tacua̱xãchi i cutaagü erü cuma rü chixecümaxü̃ quixĩ.

Ichaía 10:6

Rü choma tá nixĩ i Achíriaanearü ãẽ̱xgacüxü̃ chamuxü̃ nax duü̃xü̃gü i chixexü̃gu maxẽxü̃ca̱x rü wüxi i nachixü̃ane i choxü̃ nuẽẽxü̃ca̱x íyagoõchixü̃ca̱x nax nüxü̃́ nangĩ́xü̃ca̱x rü nüxna napuxü̃ãxü̃ca̱x i norü ngẽmaxü̃gü rü nagu napugüexü̃ca̱x ñoma ĩanearü namagüwa ngẽxmaxü̃ i ãcharaxü̃gu napugüexü̃rüxü̃.

Ichaía 3:8

Rü yima ĩane ya Yerucharéü̃ rü marü nanguxuchi rü Yudáanewa rü duü̃xü̃güchicaxica ínayaxü, erü duü̃xü̃gü rü chixri Cori ya Tupanachiga nidexagü rü nanaxügü i ta̱xacü i tama namaxã nataãẽxü̃, rü ngẽmaãcü tama naga naxĩnüe.

Ichaía 1:23

Rü perü ãẽ̱xgacügü rü tama Tupanaga naxĩnüe rü namaxã naxãmücügü i duü̃xü̃gü i máxwa̱xegüxü̃. Rü diẽruca̱x rü ãmareca̱x ínacagü nax tama napoxcuexü̃ca̱x i ngẽma chixexü̃ ügüxü̃. Rü taxcutagü rü tama tüxü̃ narüngüxẽẽgü, rü tama tümagu narüxĩnüe ya yixema yutegüxe.

Wiyaegü 89:18

Rü nüma ya Cori rü tórü poxü̃ruxü̃ nixĩ. Rü nüma nixĩ i tórü ãẽ̱xgacü ya üünecü i yixema i Iraétanüxü̃ nax ixĩgüxü̃.

Wiyaegü 78:40

Rü mue̱xpü̱xcüna tama Tupanaga naxĩnüe rü yema ínachianexü̃wa rü ngúxü̃ Tupanaxü̃ ningexẽẽgü.

Wiyaegü 78:8

Rü yemaacü nanamu ga Tupana yerü tama nanaxwa̱xe nax yema duü̃xü̃gü norü o̱xigürüxü̃ yixĩgüxü̃ca̱x. Yerü nümagü ga norü o̱xigü rü tama Tupanaga naxĩnüe rü tama naãẽxü̃ nicua̱x rü tama aixcüma Tupanawe narüxĩ rü tama naxca̱x namaxẽ.

Wiyaegü 58:3

Rü ngẽma chixexü̃gu maxẽxü̃ i duü̃xü̃gü rü woetama naéanüwa nixĩ i chixexü̃ nüxna nguxü̃. Rü ngẽma idorata̱xáxü̃ rü woetama nabuxgucürüwa rü ngẽma dora namaxã inacua̱x.

Ãẽ̱xgacügü ga guxchaxü̃güarü mexẽxẽruü̃gü 10:10

Rü yexguma ga Iraétanüxü̃ rü Cori ya Tupanana ngü̃xẽẽca̱x nacagüe rü ñanagürügü: —Pa Tórü Tupanax, cupe̱xewa chixexü̃ taxügü rü cuxna tixĩgachi nax nüxü̃ ticua̱xüü̃güxü̃ca̱x i ngẽma tupananetagümare —ñanagürügü.

Wenaxarü naxümatü ga Tupanaarü mugü 32:19

Rü yemaca̱x nixĩ ga Cori ya Tupana rü pemaxã nanuxü̃, rü pexü̃ naxoxü̃ i pema nax naxacügü pixĩgüxü̃.

Wenaxarü naxümatü ga Tupanaarü mugü 31:16

Rü yexguma ga Cori ya Tupana rü Moichémaxã nidexa rü ñanagürü: —Marü paxa tá cuyu, rü ñaa chorü duü̃xü̃gü i Iraétanüxü̃ rü paxa tá nawe narüxĩ i ngẽma tupananetagü i ngẽma naane i tá peyaxuxü̃wa ngẽxmagüxü̃. Rü ngẽxguma rü tá choxna nixĩgachitanü, rü ngẽmaãcü tá nagu narüchixe i ngẽma uneta i namaxã chaxüxü̃.

Wenaxarü naxümatü ga Tupanaarü mugü 29:25

Rü duü̃xü̃gü rü ñanagürügü tá: “Yema namaxã nangupetü ga yema Iraétanüxü̃ yerü nüxna nixĩgachi ga yema uneta ga Cori ya Tupana norü o̱xigümaxã üxü̃ ga yexguma Equítuanewa ínagaxü̃ãgu.

Iraétanüxü̃arü muxchiga 32:14

Rü ñu̱xma i pemax, Pa Rubéü̃tanüxü̃ rü Gáxtanüxü̃ i Chixexü̃güarü Üruxü̃ Nanegüx, rü ngẽma penatügücümagutama pexĩxchaü̃ nax ngẽmaãcü wena Iraétanüxü̃maxã penanuxẽẽxü̃ca̱x ya Cori ya Tupana.

Naanearü ügüchiga 13:13

Rü guma ĩanewa nixĩ ga guxü̃ma ga duü̃xü̃gü ga yachixecümaxüchixü̃ rü poraãcü chixexü̃ naxügüxü̃ ga Tupanape̱xewa.

Yema Cuáü̃ nüxü̃ dauxü̃ i yixcüra tá ngupetüxü̃chiga 18:5

Erü ngẽma ĩanecüã̱xarü pecadugü, rü nügüétüwa narünucue, rü düxwa marü daxũguxü̃ i naanewa nangu. Rü nüma ya Tupana rü tama yáxna namaxã naxĩnü i ngẽma chixexü̃ i naxügüxü̃.

Ichaía 12:6

¡Rü perü taãẽmaxã tagaãcü wáita pixüe, Pa Chióü̃cüã̱xgü! Erü Iraétanüxü̃arü Tupana rü nata rü naxüüne, rü petanüwa nangẽxma guxü̃ma i norü poramaxã —ñaperügügü tá.

Neemía 1:7

Rü cupe̱xewa poraãcü chixexü̃ taxügü, erü tama tayanguxẽxẽ i ngẽma curü mugü rü curü ucu̱xẽgü ga curü duü̃ ga Moichéwa tomaxã nüxü̃ quixuxü̃.

Wiyaegü 71:22

Pa Chorü Tupana ya Iraétanüxü̃güarü Tupana ya Üünecüx, rü cuxca̱x tá chawiyae rü chorü árpamaxã rü chorü árpaxacümaxã tá cuxü̃ chicua̱xüxü̃. Erü aixcüma cuyanguxẽxẽ i guxü̃ma i ngẽma nüxü̃ quixuxü̃.

Ichaía 1:28

Natürü ngẽma duü̃xü̃gü i tama chauga ĩnüexü̃ rü ngẽma chixexü̃ ügüamaxü̃ rü tá chanadai. Rü ngẽma duü̃xü̃gü i choxna ixĩgachitanüxü̃ rü tá nayue.

Ichaía 9:17

Rü nüma ya Cori ya Tupana rü ngẽmaca̱x tama namaxã nixauxãchi i ngextü̱xüxü̃gü, rü ñu̱xũchi tama nüxü̃́ tangechaü̃tümüxü̃ ya taxcutagü rü yutegüxe. Erü guxü̃ma i duü̃xü̃gü rü chixexü̃arü üruü̃gü nixĩgü rü naechitamare chixexü̃ i dexamaxã nidexagü. Rü guxü̃ma ga yema chixexü̃ ga naxügüxü̃gagu rü nüma ya Cori ya Tupana rü tama Iraéanecüã̱xgümaxã inarüngüxmü, rü yexeraãcü nayaxãxũnechigüama.

Ichaía 31:2

Natürü nüma ya Cori ya Tupana rü guxü̃xü̃ nacua̱x rü nüxü̃́ natauxcha nax guxchaxü̃ ínanguxẽẽxü̃. Rü ngẽxguma wüxi i ta̱xacü naxuegugu rü aixcüma nayanguxẽxẽ. Rü ngẽma duü̃xü̃gü i chixexü̃gu maxẽxü̃ rü nüma ya Tupana rü tá guxchaxü̃ naxca̱x ínanguxẽxẽ. Rü ngẽxgumarüxü̃ tá ta guxchaxü̃ naxca̱x ínanguxẽxẽ i ngẽma chixexü̃arü üruü̃güarü ngü̃xẽẽruü̃gü.

Ichaía 57:17

Rü yema Iraétanüxü̃arü pecadugagu nixĩ ga noxri chanuxü̃ rü chanapoxcuexü̃ rü nüxna chixũgachixü̃. Natürü ga nümagü rü chomaxã nanueama rü yexera norü ngúchaü̃we narüxĩ.

Ichaía 58:2

Rü nümagü rü guxü̃ i ngunexü̃gu cha̱u̱xca̱x nadaugü rü chomaxã nüxü̃ nixugü nax chauga naxĩnüechaü̃xü̃ ñoma mea namaxẽxü̃rüxü̃ rü chorü mugügu naxĩnüexü̃rüxü̃. Rü nümagü rü choxna naxca̱x nacagü i mexü̃ i mugü rü choxna nangaicamagüchaü̃.

Ichaía 65:11

Natürü i pema rü choxna pixĩgachitanü, rü nüxü̃ perüngümae ya yima chopata ya ma̱xpǘne ya üünexü̃wa ngẽxmane. Rü ñu̱xũchi ngẽma tupananetagü i Gáx i mexü̃ ueguxü̃, rü Mení i chixexü̃ ueguxü̃, rü pema rü õna rü bínu nüxna pexãgü.

Yeremía 15:6

Rü pemax, Pa Yerucharéü̃cüã̱xgüx, rü choxü̃ ípeta̱x rü choxna pexãgüca̱xwegümare. Rü choma ya Cori ya Tupana nixĩ i nüxü̃ chixuxü̃ i ngẽma. Rü ngẽma perü chixexü̃gagu rü choma rü marü düxwa chipa nax pemaxã yáxna chaxĩnüxü̃, rü ngẽmaca̱x i ñu̱xma rü tá pexü̃ chapoxcue nax peyarüxoxü̃ca̱x.

Echequié 14:5

Rü choma rü ngẽmaãcü tá chaugüca̱x chanawoeguxẽxẽ i guxü̃ma i ngẽma Iraétanüxü̃ ga choxna ĩgachitanüxü̃ naxca̱x ga norü tupananetachicüna̱xãgü.

Echequié 16:45

Cumax, Pa Yerucharéü̃x, rü wüxi i mama i natechi rü naxacügüchi aixü̃ãcü quixĩ. Rü ñu̱xũchi ga yema cueya̱xgü rü nategüchi rü naxacügüchi naxai. Rü guxema peé rü Itíta tixĩ, rü guxema penatü rü Amoréu tixĩ.

Danié 9:11

Rü guxü̃ma i chautanüxü̃ i Iraétanüxü̃ rü tama naga naxĩnüe i curü mugü. Rü cuxna nixĩgachi rü tama naga naxĩnüe i curü ucu̱xẽgü. Rü yemaca̱x ga yema poxcu ga curü duü̃ ga Moichéwa nüxü̃ quixuxü̃ rü togu nangu.

Chofonía 1:6

Rü ngẽxgumarüxü̃ tá ta ichayanaxoxẽxẽ i ngẽma duü̃xü̃gü i choxna ixĩgachixü̃, rü tama cha̱u̱xca̱x daugüxü̃ rü tama choxna cagüexü̃ ega ta̱xacü nanaxwa̱xegügu —ñanagürü tá.

Ínachoxü̃xü̃chiga 32:7

Rü yexguma ga Cori ya Tupana rü Moichéxü̃ ñanagürü: —¡Ẽcü, írüxĩ rü nataegu! Erü ngẽma cutanüxü̃ ga Equítuanewa ícunguxü̃xẽẽxü̃ rü marü chixexü̃gu nügü nayixẽxẽ.

Wenaxarü naxümatü ga Tupanaarü mugü 32:5

Pa Duü̃xü̃gü i Chixexü̃arü Üruü̃gü i Cori ya Tupanaxü̃ Nuxẽxẽgüxex, pema rü tama pime nax naxacügü pixĩgüxü̃.

Norü taxre ga popera ga ãẽ̱xgacügüchiga 21:22

Rü yemaacü Cori ya norü o̱xigüarü Tupanana nixũgachi, rü tama yema Cori ya Tupana naxwa̱xexü̃ãcüma nanaxügü.

Norü taxre ga to ga popera ga ãẽ̱xgacügüchiga ümatüxü̃ 12:1

Rü yexguma marü mea íyaxũxgu nax ãẽ̱xgacü yixĩxü̃ ga Roboáü̃ rü nügü nacua̱xgu nax naporaxü̃ rü nügümaxãtama inacuáxchaü̃ rü nüxü̃ narüxo nax Cori ya Tupanaarü mugügu yaxũxü̃. Rü guxü̃ma ga yema Iraétanüxü̃ rü ta yematama naxügü.

Norü taxre ga to ga popera ga ãẽ̱xgacügüchiga ümatüxü̃ 27:2

Rü nüma ga Yotáü̃ rü Tupanaga naxĩnü, nanatü ga Uchíarüxü̃, natürü tama nanatürüxü̃ Tupanapata ga taxü̃negu naxücu nax pumarate̱xe nawa yaguxü̃ca̱x. Natürü yema duü̃xü̃gü rü chixexü̃ naxügü yerü nüxü̃ nicua̱xüü̃güama ga yema tupananetachicüna̱xãgü.

Wiyaegü 78:41

Natürü wenaxarü nüxü̃ naxügüxü̃ rü yemaacü poraãcü nanangechaü̃xẽẽgü ya yimá Iraétanüxü̃arü Tupana ya Üünecü.

Wiyaegü 78:57

Rü yema norü o̱xigürüü̃tama nüxna nixĩgachitanü rü tama aixcüma nüxü̃́ nayaxõgü. Rü ñoma wüxi ya würa ya wü̃xü̃nerüxü̃ nixĩgü.

Ichaía 30:1

Nüma ya Cori ya Tupana rü ñanagürü: —Wüxi i ngechaü̃ nixĩ naxca̱x i ngẽma chaunegü i tama chauga ĩnüexü̃. Nümagü rü tama choxna nacagüãcüma nanaxü i ngẽma nagu naxĩnüexü̃ rü tama chauxü̃tagu naxca̱x nadaugü i chorü ucu̱xẽ. Rü ngẽmaãcü nanayexeraxẽxẽ i norü pecadugü.