Ichaía 1:2 - Tupanaarü Ore

² Pa Daxũguxü̃ i Naanecüã̱x rü Ñoma i Naanecüã̱x ¡rü iperüxĩnüe i ñaa Tupanaarü ore i ñaxü̃: —Yema chaunegü ga mea chayaexẽẽxü̃ rü ñu̱xma rü tama chauga naxĩnüe!

Ichaía 1:2 Referans Kwoze

Wenaxarü naxümatü ga Tupanaarü mugü 32:1

—¡Nüxü̃ naxĩnü, Pa Daxũguxü̃ i Naanex, erü choma rü tá chidexa! ¡Rü mea choxü̃́ irüxĩnü, Pa Ñoma i Naanex, i chorü ore i tá nüxü̃ chixuxü̃!

Wenaxarü naxümatü ga Tupanaarü mugü 30:19

Rü ñoma i ngunexü̃gu rü Tupanape̱xewa rü duü̃xü̃güpe̱xewa pexna chaca nax pematama nüxü̃ pixuxü̃ca̱x i ngexü̃rüüxü̃ tá yixĩxü̃ i penaxwa̱xexü̃, rü ngẽma maxü̃ rüe̱xna ngẽma yu. ¿Rü tá penaxwa̱xe i Tupanaarü ngü̃xẽxẽ rüe̱xna norü poxcu? ¡Ẽcü penayaxu i maxü̃ nax pema rü petaagü rü ta namaxẽxü̃ca̱x!

Miquéa 1:2

Rü nüma ga Miquéa rü ñanagürü: —¡Pa Guxãma i Ñaa Nachixü̃anecüã̱xgüx i Duü̃xü̃güx, rü iperüxĩnüe i ñaa ore! Rü nüma ya Cori ya Tupana rü napata ya üünenewa tá pexü̃ nixu.

Wenaxarü naxümatü ga Tupanaarü mugü 4:26

Rü ngẽxguma ngẽma chixexü̃ pexü̱xgu, rü choma rü daxũguxü̃ i naanepe̱xewa rü ñoma i naanepe̱xewa pemaxã nüxü̃ chixu rü paxa tá ipeyarüxo nawa i ngẽma naane i nagu tá pechocuxü̃ i Yudáü̃arü tocutüwa ngẽxmaxü̃. Rü taxũtáma mucü ya taunecü nawa pemaxẽ i ngẽma naane rü noxtacüma tá ipeyarüxo.

Wiyaegü 50:4

Rü Tupana naxca̱x nangema i dauxü̃wa ngẽxmaxü̃ i naane rü ñoma i naane nax nüxü̃ nadaugüxü̃ca̱x i ngẽxguma norü duü̃xü̃gü i Iraécüã̱xgüxü̃ yacagügu.

Maraquía 1:6

Rü nüma ya Cori ya Tupana ya Guxü̃étüwa Ngẽxmacü rü chacherdótegüxü̃ ñanagürü: —Ngẽma buxü̃gü rü nanatügüxü̃ nangechaü̃, rü ngẽma naxü̃taxü̃gü rü norü coriga naxĩnü. Rü choma nax Penatü chixĩxü̃ ¿rü tü̱xcüü̃ i tama choxü̃ pengechaü̃xü̃? Rü choma nax perü Cori chixĩxü̃ ¿rü tü̱xcüü̃ i tama chauga pexĩnüexü̃? Natürü i pemax rü choxü̃ pexo, rü naétü ñaperügügü: “¿Ta̱xacüwa i cuxü̃ taxoxü̃?” ñaperügügü.

Miquéa 3:8

Natürü Cori ya Tupanaãxẽ ya Üünecü rü cua̱x choxna naxã rü mexü̃ i nacüma choxna naxã rü pora choxna naxã nax tama chamuü̃xü̃ca̱x ega Iraétanüxü̃maxã nüxü̃ chixuxgu nax nataxü̃ i ngẽma norü chixexü̃gü i Tupanape̱xewa naxügüxü̃ rü naétü nax namaxã nanuexü̃.

Amúx 3:1

Pa Iraétanüxü̃x ¡nüxü̃ pexĩnüe i ngẽma Cori ya Tupana nüxü̃ ixuxü̃ i pechiga i guxãma i pema nax Equítuanewa pexü̃ ínagaxü̃xü̃!

Echequié 36:4

Rü ngẽmaca̱x, Pa Iraéanearü Ma̱xpǘnegüx, ¡iperüxĩnüe i Cori ya Tupanaarü ore i pexca̱x ixĩxü̃, Pa Ma̱xpǘnegüx, rü Pa Máxpü̱xanexü̃güx, rü Pa Natügüx, rü Pa Doxonexü̃güx, rü Pa Ĩanechicagü i Ngearü Duü̃xü̃ã̱xgüxü̃x, rü Pa Ĩanegü ya Perü Uanügü Pexü̃ Deãcune rü Pegu Dauxcüraxü̃güne!

Yeremía 22:29

¡Pa Ñoma i Naanex, Pa Ñoma i Naanex, Pa Ñoma i Naanex! ¡Nüxü̃ naxĩnü i ngẽma Cori ya Tupanaarü ore!

Yeremía 6:19

¡Pa Duü̃xü̃gü i Ñoma i Naanewa Maxẽxü̃x rü nüxü̃ pexĩnüe i ñaa ore! Rü ñaa chorü duü̃xü̃güca̱x tá íchananguxẽxẽ i wüxi i taxü̃ i guxchaxü̃ i ãũcümaxü̃, nagagu i ngẽma chixexü̃ i nagu naxĩnüexü̃. Erü tama naga naxĩnüechaü̃ i chorü ucu̱xẽgü. Rü ñu̱xũchi nüxü̃ naxoe i ngẽma chorü mugü.

Ichaía 65:2

Rü guxü̃ i ngunexü̃gu íchamemare nax chanadexü̃ i ngẽma duü̃xü̃gü i tama chauga ĩnüexü̃ i chixexü̃weama rüxĩxü̃ rü noxrütama ngúchaü̃ ügüamaxü̃.

Ichaía 30:9

Ñaa duü̃xü̃gü rü duü̃xü̃gü i tama ixĩnüechaü̃xü̃ rü tama yaxõgüchaü̃xü̃ nixĩgü. Rü tama norü Coriarü ucu̱xẽgü inarüxĩnüechaxü̃.

Ichaía 30:1

Nüma ya Cori ya Tupana rü ñanagürü: —Wüxi i ngechaü̃ nixĩ naxca̱x i ngẽma chaunegü i tama chauga ĩnüexü̃. Nümagü rü tama choxna nacagüãcüma nanaxü i ngẽma nagu naxĩnüexü̃ rü tama chauxü̃tagu naxca̱x nadaugü i chorü ucu̱xẽ. Rü ngẽmaãcü nanayexeraxẽxẽ i norü pecadugü.

Yeremía 31:9

Rü nümagü rü tá inaxĩãchi, rü tá niyumü̃xẽtanü rü nixauxetanü. Rü ngẽmaãcü tá ínangugü. Rü choma rü natügü íngexmaxü̃gu tá chayagagü nagu i wüxi i nama i mexü̃ i ngexta nataxuma i ãũcümaxü̃. Erü choma rü nanatü chixĩ i ngẽma Iraétanüxü̃. Rü Efraíü̃tanüxü̃ rü chaune ya yacüxü̃ nixĩ.

Yeremía 13:15

Yeremía rü Iraétanüxü̃xü̃ ñanagürü: —Pa Iraétanüxü̃x, Cori ya Tupana rü nidexa. ¡Rü mea iperüxĩnüe rü taxṹ i nüxü̃ pexoexü̃ i ngẽma pemaxã nüxü̃ chixuxü̃! Erü Cori ya Tupanaarü ore nixĩ.

Wenaxarü naxümatü ga Tupanaarü mugü 1:31

Rü yexguma yema chianexü̃wa pichopetü̱xgu rü nüma ga perü Cori ya Tupana rü ñoma wüxi i papa naxacüxe nügüchacüügu tüxü̃ igaxü̃rüxü̃ meama pexü̃ nigagü rü ñu̱xmata ñaa nachicawa pengugü”, ñachagürü pexü̃ ga yexguma.

Ngechuchuarü ngúexü̃gü ga yamugüxü̃arü puracüchiga 4:20

Erü toma rü taxuacüma nüxü̃ tarüxoe nax nüxü̃ tixuxü̃ ga yema nüxü̃ tadaugüxü̃ rü nüxü̃ taxĩnüexü̃ —ñanagürügü.

Wiyaegü 49:1

¡Dücax, Pa Guxü̃ma i Duü̃xü̃gü i Ñoma i Naanewa Maxẽxü̃x, rü mea iperüxĩnüe i ñaa ore!

Ichaía 31:6

¡Pa Iraétanüxü̃x, naxca̱x pewoegu ya yimá ngóxü̃wama nüxü̃ pexoecü!

Ichaía 34:1

¡Pa Guxü̃ma i Nachixü̃anecüã̱x, dücax, nua pexĩ rü iperüxĩnüe i ngẽma tá pemaxã nüxü̃ chixuxü̃! ¡Rü nüxü̃ naxĩnü i ñoma i naane rü guxü̃ma i nawa ngẽxmagüxü̃! ¡Rü nüxü̃ naxĩnü i guxü̃ma i naane rü guxü̃ma i ngẽma nawa yaexü̃!

Ichaía 63:16

Rü cuma nixĩ i tonatü quixĩxü̃. Rü woo Abraáü̃ rü tama toxü̃ cua̱xgu, rü torü o̱xi i Iraé rü tama toxna nacua̱xãchigu, natürü cumax, Pa Cori Pa Tupanax, rü tonatü quixĩ. Rü cuma nixĩ i guxü̃guma torü ngü̃xẽẽruxü̃ quixĩxü̃.

Yeremía 3:22

¡Cha̱u̱xca̱x pewoegu, Pa Chauxacügü ya Tama Ixĩnüechaxü̃xẽx! Rü choma rü tá pexü̃́ nüxü̃ icharüngüma i ngẽma perü pecadugü —ñanagürü ya Cori ya Tupana.

Echequié 24:3

¡Rü ngẽma Iraétanüxü̃ i tama chauga ĩnüechaü̃xü̃maxã nüxü̃ ixu i chorü ore i wüxi ya panerachigagu ixuxü̃! “¡Üxüwa naxü̃nagü ya wüxi ya panera, rü dexámaxã naxüãcu!

Norü taxre ga popera ga ãẽ̱xgacügüchiga 21:22

Rü yemaacü Cori ya norü o̱xigüarü Tupanana nixũgachi, rü tama yema Cori ya Tupana naxwa̱xexü̃ãcüma nanaxügü.

Miquéa 1:1

Rü yexguma Yudáanearü ãẽ̱xgacügü yixĩgügu ga Yotáü̃ rü Acháx rü Echequía, rü yexguma nixĩ ga Cori ya Tupana ga Miquéa ga Moréchecüã̱xü̃ nawéaxü̃ ga yema guxchaxü̃gü ga ĩane ga Chamáriaca̱x tá ínguxü̃ rü ĩane ga Yerucharéü̃ca̱x tá ínguxü̃.