Ichaía 1:17 - Tupanaarü Ore

¹⁷ ¡Rü naxca̱x pengúe nax mexü̃ pexügüxü̃! ¡Rü pora pexüe nax mexü̃ i nacümagu pemaxẽxü̃ca̱x! ¡Rü tüxü̃ perüngü̃xẽxẽ ya yíxema duü̃xẽgü ya togü chixri tümamaxã icua̱xgüxe! ¡Rü naétüwa pechogü i taxcutagü rü yutegüxü̃!

Ichaía 1:17 Referans Kwoze

Miquéa 6:8

Rü nüma ya Cori ya Tupana rü marü cumaxã nüxü̃ nixu, Pa Duü̃xü̃x, i ta̱xacü nixĩ i nape̱xewa mexü̃ rü ta̱xacü nixĩ i ngẽma cuxü̃́ nanaxwa̱xexü̃. Rü ngẽma cuxü̃́ nanaxwa̱xexü̃ nixĩ nax mexü̃ cuxüxü̃ rü quixaixcümaxü̃ rü curü Tupanaga nax cuxĩnüxü̃ rü tama cugü quicua̱xüxü̃.

Yeremía 22:3

¡Rü mea duü̃xü̃gümaxã inacua̱x rü mexü̃ i nacümagu pemaxẽ i ñaa nachicawa! ¡Rü ngẽma diẽruã̱xgüxü̃me̱xẽwa tüxü̃ ínanguxü̃xẽxẽ ya yíxema duü̃xẽgü i chixri tümamaxã inacua̱xgüxe! ¡Rü taxṹ i chixri namaxã pixĩgüxü̃ i ngẽma to i nachixü̃anecüã̱xgü, rü yíxema taxcutagü, rü ñu̱xũchi yíxema yutegüxe! ¡Rü taxṹ i ñaa nachicagu tüxü̃ pimáxü̃ ya yíxema duü̃xẽ ya taxuxü̃ma i chixexü̃ üxe!

Ichaía 1:23

Rü perü ãẽ̱xgacügü rü tama Tupanaga naxĩnüe rü namaxã naxãmücügü i duü̃xü̃gü i máxwa̱xegüxü̃. Rü diẽruca̱x rü ãmareca̱x ínacagü nax tama napoxcuexü̃ca̱x i ngẽma chixexü̃ ügüxü̃. Rü taxcutagü rü tama tüxü̃ narüngüxẽẽgü, rü tama tümagu narüxĩnüe ya yixema yutegüxe.

Ucu̱xẽgüchiga 31:9

¡Rü tümaétüwa idexa rü tüxü̃ ínapoxü̃ ya yíxema ngearü diẽruã̱xgüxe, rü yíxema tama nüxü̃ cuáxe nax tügüétüwa tidexagüxü̃!

Chacaría 8:16

Rü ñaa nixĩ i chanaxwa̱xexü̃ nax penaxüxü̃: “Rü name nixĩ i guxü̃guma aixcümaxü̃ pegümaxã pixugü. Rü ngẽxguma ãẽ̱xgacüpe̱xewa guxchaxü̃gü pemexẽẽgu rü penaxwa̱xe nax aixcümaxü̃ pixugüxü̃ nax ngẽxma yanaxoxü̃ca̱x i ngẽma guxchaxü̃.

Chofonía 2:3

Rü ngẽmaca̱x name nixĩ i Cori ya Tupanaca̱x pedaugü, Pa Guxãma i Aixcüma Nape̱xewa Mecümagüxe rü Naga Ĩnüexe i Norü Mugüx. ¡Rü nape̱xewa pixaixcümagü rü tama pegü picua̱xüü̃gü! Rü bexmana ngẽmaãcü nüma ya Cori ya Tupana rü tá pexü̃ ínapoxü̃ i ngẽma ngunexü̃ i nagu norü numaxã poxcu ínangu̱xẽẽxü̃.

Danié 4:27

Rü ngẽmaca̱x Pa Ãẽ̱xgacüx, ¡irüxĩnü i ñaa chorü ucu̱xẽ rü mea namaxã inacua̱x i duü̃xü̃gü! ¡Rü taxṹ i pecadu cuxüxü̃ rü ngẽxmatama yacua̱xẽxẽ nax cunaxüxü̃ i ngẽma chixexü̃ i cuãẽwa ínguxü̃! ¡Rü nagu rüxĩnü nax nüxü̃ curüngü̃xẽxẽxü̃ i ngẽma duü̃xü̃gü i ngearü ngẽmaxü̃ã̱xgüxü̃! Rü bexmana ngẽmaãcü ya Tupana i taxũtáma cuxna nanguxẽẽãxü̃ i ngẽma chixexü̃ i cumaxã naxueguxü̃” —ñanagürü ga Danié.

Popera ga Chantiágu ümatüxü̃ 1:27

Natürü tümaarü õ i Tanatü ya Tupanape̱xewa aixcüma mexü̃, rü ngẽma nixĩ nax nüxü̃ tarüngü̃xẽẽxü̃ i taxcutagü rü yutegüxü̃ rü tügüna tadauxü̃ nax tama ñoma i naanearü chixexü̃gu tanguxü̃.

Wenaxarü naxümatü ga Tupanaarü mugü 14:29

Rü ngẽmaãcü i ngẽma Lebítanüxü̃ i ngearü naaneã̱xgüxü̃ rü ngẽma to i nachixü̃anecüã̱x i perü ĩanewa ngẽxmagüxü̃ rü tá naxãwemügü ñu̱xmata mea nüxü̃́ yangu. Rü ngẽmaãcü i nüma ya Cori ya perü Tupana rü tá pexü̃ narüngü̃xẽxẽ nawa i guxü̃ma i ta̱xacü i pexüxü̃.

Wiyaegü 34:14

¡Rü nüxna ixũgachi i guxü̃ma i chixexü̃ rü mexü̃ naxü! ¡Rü naxca̱x nadau nax taxúemaxãma nax cuguxchaxü̃ã́xü̃! ¡Rü ngẽmaãcü mea namaxü̃!

Ichaía 56:1

Tupana rü ñanagürü: —¡Nagu pemaxẽ i ngẽma aixcüma mexü̃ rü nagu pexĩ i ngẽma we̱xguxü̃! Erü paxa tá ichanawe̱x i chorü pora rü tá pexü̃ íchanguxü̃xẽxẽ.

Ichaía 58:6

Natürü tama ngẽmaãcü üxü̃ i aure nixĩ i chanaxwa̱xexü̃. Rü ngẽma aure i namaxã chataãẽxü̃ nixĩ nax tüxü̃ ípinguxü̃xẽẽxü̃ ya yíxema natüca̱xma poxcuexe rü yíxema mugüruxü̃ ixĩgüxe, rü yíxema togü chixri tümamaxã icua̱xgüxe.

Yeremía 35:15

Rü choma rü marü muẽ̱xpü̱xcüna muxü̃ma ga chorü duü̃xü̃gü ga orearü uruü̃gü pexca̱x ngéma chamugüecha nax pemaxã nüxü̃ yaxugüexü̃ca̱x i ñaa chorü ore. Rü nümagü rü ñanagürügü pexü̃: ¡Nüxü̃ perüxoe i pecüma i chixexü̃ rü ngẽma chixexü̃gü i nagu pemaxẽxü̃! ¡Rü taxṹ i ngẽma tupananetagüwe perüxĩxü̃, rü taxṹ i nüxü̃ picua̱xüü̃güxü̃! Rü ngẽmaãcü tá nawa pemaxẽecha i ngẽma naane ga pexna rü perü o̱xigüna chaxãxü̃. Natürü i pema rü tama choxü̃ pecua̱xgüchaxü̃ rü tama chauga pexĩnüe.

Echequié 18:31

¡Rü noxtacüma nüxna pixĩgachitanü i guxü̃ma i ngẽma chixexü̃gü ga chope̱xewa pexüxü̃! ¡Rü penangexwaca̱xü̃xẽxẽ i ngẽma perü maxü̃, rü ñu̱xũchi ngẽma peãxẽ! ¿Tü̱xcüü̃ penaxwa̱xe nax peyuexü̃, Pa Iraétanüxü̃x?

Ínachoxü̃xü̃chiga 22:21

Rü taxũtáma chixeãcü namaxã icucua̱x i ngẽma to i nachixü̃anecüã̱x i duü̃xü̃. Yerü pema rü ta rü Equítuanewa to i nachixü̃anecüã̱xgü pixĩgü.

Ucu̱xẽgüchiga 15:25

Nüma ya Cori ya Tupana, rü nayanaxoxẽxẽ ya napata i ngẽma nügü icua̱xüü̃xü̃. Natürü yíxema yutexe rü tüxü̃́ nüxna nadau i tümaarü naane.

Ucu̱xẽgüchiga 21:3

¡Nagu namaxü̃ i ngẽma nacümagü i mexü̃, rü ngẽma nixĩ i guxü̃ma i ãmaregüarü yexera Tupanaca̱x rümemaexü̃!

Ichaía 10:2

Pema rü tama naétüwa pechogü i ngẽma taxuxü̃ma nüxü̃́ ngẽxmagüxü̃ rü tama nüxü̃ perüngü̃xẽxẽ i ngẽma chorü duü̃xü̃gü i ngearü diẽruã̱xgüxü̃. Rü chixri namaxã ipecua̱x i ngẽma yutegüxü̃, rü naxca̱x pengĩ̱x i ngẽma tacutagüna üxü̃.

Echequié 22:7

Rü ngẽma duü̃xü̃gü i cuwa maxẽxü̃ rü tama nanatüxü̃ rü tama naéxü̃ nangechaü̃gü. Rü chixri tümamaxã inacua̱x ya yíxema yutegüxe rü yíxema taxcuexe rü yíxema to i nachixü̃anewa ne ĩxẽ.

Echequié 45:9

Rü chomax ya Cori ya Tupana rü ñacharügü: —¡Pa Iraétanüxü̃arü Ãẽ̱xgacügüx, marütama nax namaxã penuexü̃ rü nüxü̃́ pengĩ́xü̃ i duü̃xü̃gü! ¡Rü aixcüma mea namaxã ipecuá i chorü duü̃xü̃gü! Rü choma ya Cori ya Tupana nixĩ i pemaxã nüxü̃ chixuxü̃ i ngẽma.