Ichaía 1:11 - Tupanaarü Ore

¹¹ Rü nüma ya Cori ya Tupana rü ñanagürü pexü̃: —¿Ta̱xacüca̱x chauxü̃tawa penagagü i ngẽma muxü̃ i pexü̃nagü nax cha̱u̱xca̱x penada̱i̱xü̃ca̱x? Rü marü nüxü̃ charüchau i ngẽma carnérugü i cha̱u̱xca̱x ípeguxü̃ rü ngẽma wocaxacügüarü chíxü̃ i ípeguxü̃. Rü yimá nagü i ngẽma woca iyatüxü̃gü rü carnérugü, rü chíbuxacügü rü nawa chanaxoxéga.

Ichaía 1:11 Referans Kwoze

Amúx 5:21

Rü Cori ya Tupana rü ñanagürü pexü̃: —Choma rü naxchi chaxai rü nüxü̃ chaxo i ngẽma taxü̃ i peta i chauégagu pexüxü̃. Rü tama namaxã chataãxẽ i ngẽma perü ngutaque̱xegü i cha̱u̱xca̱x pexüxü̃.

1 Chamué 15:22

Rü nüma ga Chamué rü ínaca rü ñanagürü: —¿Ta̱xacü nixĩ i ngẽma rümemaexü̃ cuxca̱x? ¿Rü cuxca̱x rü ngẽma naxü̃nagü Tupanaca̱x iguxü̃ rüe̱xna Tupanaga nax ixĩnüexü̃? Rü dücax rü ngẽma Tupana yexera namaxã taãẽxü̃ nixĩ nax naga ixĩnüexü̃, rü tama carnérugüarü chíxü̃ naxca̱x nax iguxü̃.

Yeremía 6:20

¿Ta̱xacüca̱x i pema rü Chabáwa cha̱u̱xca̱x ne penana i pumaragü iyixichixü̃, rü ñu̱xũchi nanetügü i yixichixü̃ i yáxü̃guxü̃ i nachixü̃anegüwa ne penaxü̃? Choma rü tama chorü me nixĩ i ngẽma perü ãmaregü i cha̱u̱xca̱x ípeguxü̃, rü woo ngẽma togümare i perü ãmaregü i choxna pexãgüxü̃ —ñanagürü.

Ichaía 66:3

Natürü ngẽma duü̃xü̃gü i chixexü̃gu maxẽxü̃ rü nanaxügü i ngẽma nümatama nagu naxĩnüexü̃. Rü ngẽxguma cha̱u̱xca̱x yama̱xgüãgu i wüxi i woca i yatüxü̃ rü cha̱u̱xca̱x rü ñoma wüxi ya duü̃xẽ tüxü̃ yama̱xgüxü̃rüxü̃ nixĩgü. Rü ngẽxguma cha̱u̱xca̱x yama̱xgüãgu i wüxi i carnéru rü cha̱u̱xca̱x rü ñoma wüxi ya airu cha̱u̱xca̱x yama̱xgüãxü̃rüxü̃ nixĩgü. Rü ngẽxguma choxna naxãgüãgu i norü ãmare i trigu rü cha̱u̱xca̱x ñoma cuchiarü nagü choxna naxãgüxü̃rüxü̃ nixĩgü. Rü ngẽxguma pumarate̱xe cha̱u̱xca̱x yagugügu rü cha̱u̱xca̱x ñoma wüxi i naxchicüna̱xãca̱x yagugüãxü̃rüxü̃ nixĩgü. Rü ngẽma duü̃xü̃gü i ngẽma ügüxü̃ rü taãẽãcü nanaxü i guxü̃ma i ngẽma chixexü̃.

Miquéa 6:7

¿Rü tá nataãẽxü̃ ya Cori ya Tupana ega ngẽxguma 1,000 i carnérugü naxca̱x íchaguxgu rüe̱xna 10,000 natügü i chíxü̃ naxca̱x chiguxgu? ¿Rü tá nataãẽxü̃ ega ngẽxguma chorü chixexü̃gagu naxca̱x chayaguxgu ya yimá chaune ya yacü?

Maraquía 1:10

Rü nüma ya Cori ya Tupana ya Guxü̃étüwa Ngẽxmacü rü pexü̃ ñanagürü: —Chierüx texé i petanüwa tanawãxtagu ya chopata ya taxü̃nearü ĩã̱xgü nax tama natüca̱xmamare chorü ãmarearü guruü̃wa yayauraxü̃ca̱x ya üxü. Erü choma rü tama pemaxã chataãxẽ, rü ngẽmaca̱x taxuxü̃táma i perü ãmaregü i choxna pexãgüxü̃ tá pexü̃́ chayaxu.

Ucu̱xẽgüchiga 15:8

Nüma ya Cori ya Tupana tama nanayaxu i norü ãmaregü i ngẽma chixexü̃gu maxẽxü̃. Natürü taãẽãcü nanayaxu i tümaarü yumüxẽgü ya yíxema aixcüma mea maxẽxe.

Wiyaegü 50:8

Rü ñu̱xma rü tama pexü̃ chaxoregü naxca̱x i ngẽma ãmaregü i guxü̃guma cha̱u̱xca̱x pedaixü̃ rü cha̱u̱xca̱x ípeguxü̃.

Ucu̱xẽgüchiga 21:27

Nüma ya Cori ya Tupana, rü tama namaxã nataãxẽ i ngẽma chixexü̃gu maxẽxü̃arü ãmaregü, erü tama mexü̃ i ĩnümaxã nüxna nanaxãgü.

Ore i mexü̃ ga Matéu ümatüxü̃ 9:13

¡Rü ípixĩ, rü nawa pengúe i Tupanaarü ore i ümatüxü̃ i ñaxü̃: “Choma rü tama chanaxwa̱xe i cha̱u̱xca̱x peyama̱x rü peyagu i carnérugü, natürü ngẽma chanaxwa̱xexü̃ nixĩ nax togü pexü̃́ ngechaxü̃tümüxü̃güxü̃”, ñaxü̃! Choma rü tama núma chaxũ nax naxca̱x chayaca̱xaxü̃ca̱x i ngẽma ingearü pecaduã́xü̃, natürü núma chaxũ nax naxca̱x chayaca̱xaxü̃ca̱x i ngẽma pecaduã̱xgüxü̃ —ñanagürü.

Wiyaegü 51:16

Erü cuma rü tama cunaxwa̱xe nax ta̱xacürü ãmare cuxna chaxãxü̃ rüe̱xna ta̱xacürü ãmare cuxca̱x chiguxü̃. Rü choma rü chi cuxna chanaxã, natürü tama ngẽma nixĩ i namaxã cutaãẽxü̃.

Yeremía 7:21

Rü yima Cori ya Tupana ya Guxü̃étüwa Ngẽxmacü ya Iraétanüxü̃arü Tupana ixĩcü rü norü duü̃xü̃güxü̃ ñanagürü: —¡Cha̱u̱xca̱x ípenagu i guxü̃ma i ãmaregü i naxü̃nagü i ípeguxchaü̃xü̃, rü ñu̱xũchi penangõ̱x i ngẽma namachi!

Ore i mexü̃ ga Matéu ümatüxü̃ 22:4

Rü nüma ga ãẽ̱xgacü rü wenaxarü togü ga norü duü̃xü̃güxü̃ yéma namugü. Rü ñanagürü nüxü̃: “¡Ngéma pexĩ naxü̃tawa i ngẽma duü̃xü̃gü i nüxna chaxuchiréxü̃, rü namaxã nüxü̃ peyarüxu rü marü íname i chorü õna i taxü̃. Rü marü chanadai i chorü wocagü i ingüexü̃ rü guxü̃ma marü ínamemare. Rü chanaxwa̱xe i paxa nua naxĩ naxca̱x i ñaa chorü peta!” ñanagürü.

Iraétanüxü̃arü muxchiga 7:45

Rü inanamu ta ga wüxi ga wocaxacü ga yatüxü̃, rü wüxi ga carnéru ga yatüxü̃, rü wüxi ga carnéruxacü ga yatüxü̃ ga wüxi ga taunecü nüxü̃́ yexmaxü̃ nax Tupanaarü ãmarexü̃ ínaguãxü̃ca̱x.

Wiyaegü 40:6

Cuma rü tama namaxã cutaãxẽ nax ta̱xacü cuxca̱x ínaguxü̃, rü ãmaregü i cuxna naxãgüxü̃. Rü tama naxca̱x ícuca i ãmaregü i cuxca̱x ínaguxü̃ rü ãmaregü i pecaduarü ütanüruxü̃ ixĩgüxü̃. Natürü cuma rü cuyawaxna i chauxchi̱xẽ nax cuxü̃́ ichaxĩnüxü̃ca̱x.

Ucu̱xẽgüchiga 21:3

¡Nagu namaxü̃ i ngẽma nacümagü i mexü̃, rü ngẽma nixĩ i guxü̃ma i ãmaregüarü yexera Tupanaca̱x rümemaexü̃!

Ichaía 58:2

Rü nümagü rü guxü̃ i ngunexü̃gu cha̱u̱xca̱x nadaugü rü chomaxã nüxü̃ nixugü nax chauga naxĩnüechaü̃xü̃ ñoma mea namaxẽxü̃rüxü̃ rü chorü mugügu naxĩnüexü̃rüxü̃. Rü nümagü rü choxna naxca̱x nacagü i mexü̃ i mugü rü choxna nangaicamagüchaü̃.

Ochéa 6:6

Rü ngẽma choma pexü̃́ chanaxwa̱xexü̃ nixĩ nax aixcüma choxü̃ pengechaü̃xü̃, rü ngexrüma nax ta̱xacürü naxü̃nagü cha̱u̱xca̱x pedaixü̃. Rü ngẽma chanaxwa̱xexü̃ nixĩ nax aixcüma choxü̃ pecuáxü̃ nax perü Tupana chixĩxü̃ rü ngexrüma i ta̱xacürü ãmare i cha̱u̱xca̱x nax ípeguxü̃.

Amúx 5:22

Rü tama chanaxwa̱xe i naxü̃nagü cha̱u̱xca̱x nax ípeguxü̃. Rü woo i ngẽma perü ãmare i trigu rü tama chanaxwa̱xe. Rü taxũtáma chanayaxu i ngẽma wocaxacügü i ngüexü̃ i cha̱u̱xca̱x pedaixü̃ nax ngẽmamaxã choxü̃ perüngüxmüexẽẽxü̃ca̱x.

Aguéu 2:14

Rü yexguma ga nüma ga Aguéu rü ñanagürü: —Cori ya Tupana rü ñanagürü: “Rü ngẽmatama nüxü̃ nangupetü i ñaa duü̃xü̃gü i chope̱xewa ixãũãchixü̃. Rü guxü̃ma i ngẽma choxna naxãgüxü̃ rü guxü̃ma i ta̱xacü i naxügüxü̃ rü chope̱xewa rü nixãũãchi.

Chacaría 7:5

—Pa Chacaríax, ¡namaxã nüxü̃ ixu i guxü̃ma i duü̃xü̃gü i ñaa nachixü̃anewa maxẽxü̃ rü ñu̱xũchi ya chacherdótegü rü ñacurügü nüxü̃!: “Ñu̱xma i pema rü marü 70 ya taunecü pingegü nax norü wüxime̱e̱xpü̱x ya tauemacügu rü norü 7 ya tauemacügü pexauregüxü̃, natürü tama aixcüma cha̱u̱xca̱x nixĩ ga pexauregüxü̃.

Ochéa 8:13

Rü nümagü rü norü me nixĩ nax ãmare cha̱u̱xca̱x nada̱i̱xü̃ rü nax nangõ̱xgüãxü̃ i namachi i ngẽma naxü̃nagü i cha̱u̱xca̱x ínaguxü̃. Natürü i choma ya Cori ya Tupana rü tama namaxã chataãxẽ. Rü choma rü nüxü̃ chacua̱x i ngẽma norü pecadugü, rü ngẽmaca̱x tá chanapoxcue rü wena táxarü Equítuanecüã̱xgüme̱xẽwa chanangexmagüxẽxẽ.

Amúx 4:5

¡Rü pema i Iraétanüxü̃ rü paũ i ngearü pu̱xẽẽruü̃ã́xü̃ naxca̱x pigu i perü tupananetagü, rü ñu̱xũchi guxü̃wama nüxü̃ pixuchiga i ngẽma ãmaregü i perü ngúchaü̃maxã pexãgüxü̃! Erü ngẽma nixĩ i pema penaxwa̱xexü̃ —ñanagürü ya Cori ya Tupana.