Popera ga Yudíugü ga yaxõgüxü̃ca̱x ümatüxü̃ 8:8 - Tupanaarü Ore

⁸ Natürü nüma ga Tupana rü nüxü̃ nadau nax tama aixcüma duü̃xü̃güxü̃ yamexẽẽxü̃ ga yema nüxíraxü̃xü̃ ga uneta ga Moichéna naxãxü̃. Rü yemaca̱x ga Tupana rü ñanagürü: “Wüxi i ngunexü̃ rü wena táxarü guxü̃ma i Iraétanüxü̃maxã rü Yudátanüxü̃maxã ichaxuneta.

Popera ga Yudíugü ga yaxõgüxü̃ca̱x ümatüxü̃ 8:8 Referans Kwoze

Popera ga Yudíugü ga yaxõgüxü̃ca̱x ümatüxü̃ 12:24

Rü marü naxca̱x pexĩ ya Ngechuchu ga taxca̱x yucü nax tüxü̃ namaxẽxẽẽxü̃ca̱x, ngẽma Tupanaarü uneta i ngexwaca̱xü̃xü̃ tamaxã nüxü̃ ixuxü̃rüxü̃. Rü nüma rü nagümaxã pexü̃́ iyanaxoxẽxẽ ga perü chixexü̃gü nax aixcüma Tupanape̱xewa pimexü̃ca̱x. Rü gumá nagü ga nũxcümaü̃cü ga Abé rü naxca̱x ínaca nax nayuxü̃ ga yema yamáxü̃, natürü yimá nagü ya Cristu rü tüxna nanaxã i maxü̃ i taguma gúxü̃.

Yeremía 32:40

Rü namaxã tá chanaxü i wüxi i uneta i guxü̃guca̱x ixĩxü̃ rü tagutáma nüxü̃ charüchau nax mexü̃ naxca̱x chaxüxü̃. Rü tá nüxna chanaxã i wüxi i ngúchaü̃ nax choxü̃ yacua̱xüü̃güxü̃ca̱x rü taguma choxna yaxĩgachixü̃ca̱x.

Popera ga Yudíugü ga yaxõgüxü̃ca̱x ümatüxü̃ 9:15

Rü ñu̱xma nax tórü pecaduca̱x nayuxü̃ ga Ngechuchu ya Cristu, rü nüma nixĩ i tórü ngü̃xẽẽruxü̃ i Tupanape̱xewa, ngẽma Tupanaarü uneta i ngexwaca̱xü̃xü̃ nüxü̃ ixuxü̃rüxü̃. Rü ñu̱xma i yixema nax Tupana tüxü̃ dexü̃, rü tüxü̃́ nangẽxma i maxü̃ i taguma gúxü̃ yerü Cristu rü marü nayu nax tüxü̃ ínanguxü̃xẽxẽxü̃ ga yema pecadugü ga taxügüxü̃ ga yexguma yema nüxíraxü̃xü̃ ga unetatüxü̃wa tayexmagügu.

2 Corintios 3:6

Rü nümatama ya Tupana nixĩ i toxü̃ nangúexẽẽxü̃ nax nüxü̃́ tapuracüexü̃ca̱x rü nüxü̃ tixuxü̃ca̱x i ngẽma ngexwaca̱xü̃xü̃ i norü uneta i tama Moichéarü mugüwa ne daxü̃ natürü Tupanaãxẽ i Üünexü̃wa ne ũxü̃. Rü yema mugü ga Moiché ümatüxü̃ rü yuwa tüxü̃ nagagü, natürü Tupanaãxẽ ya Üünecü rü tüxna nanaxã i maxü̃ i taguma gúxü̃.

1 Corintios 11:25

Rü yexgumarüxü̃ ta ga chibüwena rü Ngechuchu nanayaxu ga wüxi ga pochíyu ga bínuchíümaxã ããcuxü̃, rü ñanagürü: “Daa bínu rü wüxi i cua̱xruxü̃ nixĩ nax ngexwaca Tupana duü̃xü̃gümaxã ixunetaxü̃ i maxü̃ i taguma gúxü̃chiga. Rü chaugü ya pexca̱x ibacüwa nixĩ ya Tupana pexü̃ nüxü̃ cua̱xẽẽxü̃ i ngẽmachiga. Rü ngẽxguma penaxügüxü̃gu nax daa bínu pixaxgüxü̃ rü ngẽmaãcü tá penaxü nax choxna pecua̱xãchiexü̃ca̱x”, ñanagürü ga Ngechuchu

Ore i mexü̃ ga Luca ümatüxü̃ 22:20

Rü marü chibüwena rü nanayaxu ga copu ga bínumaxã ããcuxü̃, rü ñanagürü: —Daa bínu rü Tupanaarü uneta i ngexwacaxü̃xü̃arü cua̱xruxü̃ nixĩ. Rü chaugü ya pexca̱x ibacüwa Tupana pexü̃ nüxü̃ nadauxẽxẽ nax aixcüma yixĩxü̃ i ngẽma norü uneta.

Echequié 37:26

Rü ngẽma chorü duü̃xü̃gümaxã tá ichaxuneta nax ngẽmaãcü aixcüma nataãẽgüxü̃ca̱x. Rü ngẽma chorü uneta rü tagutáma inayacua̱x. Rü choma rü tá nüxü̃ charüngü̃xẽxẽxü̃ nax yamuxü̃ca̱x. Rü natanüwa tá chanangexmaxẽxẽ ya chopata ya üünene nax guxü̃gutáma ngéma nangẽxmaechaxü̃ca̱x.

Yeremía 31:38

Rü nüma ya Cori ya Tupana rü ñanagürü: —Tá ínangu i wüxi i ngunexü̃ i nagu tá wena namexẽxẽxü̃ ya chorü ĩane ya Yerucharéü̃. Rü Ananéarü Dauxü̃taechicawa tá inaxügü rü ñu̱xmata ngẽma Ĩã̱x i Ínapoõchixü̃wa ngẽxmaxü̃wa nangu nax namexẽẽxü̃.

Ichaía 55:3

¡Rü cha̱u̱xca̱x pexĩ, rü choxü̃́ iperüxĩnüe! ¡Chauga pexĩnüe rü tá pemaxẽ! Rü choma rü tá pemaxã chanaxü i wüxi i uneta i taguma gúxü̃. Rü ngẽmaãcü tá chayanguxẽxẽ ga yema chorü uneta ga ãẽ̱xgacü ga nüxü̃ changechaü̃xü̃chicü ga Dabímaxã nüxü̃ chixuxü̃.

Ore i mexü̃ ga Márcu ümatüxü̃ 14:24

Rü ñanagürü nüxü̃: —Daa bínu ya chaugü i muxü̃ma i duü̃xü̃güca̱x ibacüchiga nixĩ. Rü yimáwa Tupana nanango̱xẽxẽ nax aixcüma yixĩxü̃ i norü uneta.

Yeremía 31:27

Rü nüma ga Cori ya Tupana rü ñanagürü: —Tá ínangu i ngunexü̃ i nagu tá chayamuxẽxẽxü̃ i duü̃xü̃gü rü naeü̃gü nax Yudáanewa rü Iraéanewa namuxü̃ca̱x.

Yeremía 30:3

Rü tá nawa nangu i ngunexü̃ nax Babiróniawa íchanguxü̃xẽẽxü̃ i chorü duü̃xü̃gü i Iraéanecüã̱x rü Yudáanecüã̱x. Rü yema naane ga norü o̱xigüna chaxãxü̃ca̱x tá chanawoeguxẽxẽ. Rü ngẽma naane rü wenaxarü chorü duü̃xü̃güarü tá nixĩ” —ñanagürü ga Cori ya Tupana.

Yeremía 23:7

Rü nüma ya Cori ya Tupana rü ñanagürü: —Tá ínangugü i ngunexü̃gü i taxũtáma nagu ñapegügüxü̃: “Namaxü̃ ya Cori ya Tupana ga Equítuanewa Iraétanüxü̃xü̃ ínguxü̃xẽẽcü”.

Yeremía 23:5

Rü nüma ya Cori ya Tupana rü ñanagürü: —Wüxi i ngunexü̃ rü wüxi ya Dabítaxaxüchi tá Iraétanüxü̃arü ãẽ̱xgacü nixĩ. Rü nüma rü tá mea chorü duü̃xü̃gümaxã inacua̱x, erü aixcüma tá cua̱x nüxü̃́ nangẽxma. Rü nüma rü aixcüma tá nüxü̃ narüngü̃xẽxẽ i chorü duü̃xü̃gü nax ngẽmaãcü yanawe̱xãchixẽẽãxü̃ca̱x i norü guxchaxü̃gü i ñoma i naanewa.

Ore i mexü̃ ga Luca ümatüxü̃ 17:22

Rü yexguma norü ngúexü̃güxü̃ ñanagürü: —Rü tá pexca̱x ínangu i ngunexü̃ i nagu tá nüxü̃ pedaugüchaü̃xü̃ ya Tupana Nane ya duü̃xü̃xü̃ ixĩcü woo wüxi i paxaãchica̱x yixĩxgu. Natürü taxũtáma nüxü̃ pedaugü i ngẽxguma.

Ore i mexü̃ ga Matéu ümatüxü̃ 26:28

Erü daa bínu rü chaugü nixĩ. Rü yimámaxã Tupana duü̃xü̃güxü̃ nanawe̱x nax aixcüma yixĩxü̃ i norü uneta. Rü yimá chaugü rü muxü̃ma i duü̃xü̃güca̱x nixĩ i nabaxü̃ nax Tupana nüxü̃́ nüxü̃ irüngümaxü̃ca̱x i norü pecadugü.

Wenaxarü naxümatü ga Tupanaarü mugü 29:14

Natürü ngẽma Cori ya Tupanaarü uneta i tamaxã nüxü̃ yaxuxü̃ rü tama taxca̱xica nixĩ i yixema i ñu̱xma nape̱xewa nax ingẽxmagüxü̃, natürü guxü̃ma i ngẽma yixcüra tá ingóetanüxü̃ca̱x rü ta nixĩ.

Popera ga Yudíugü ga yaxõgüxü̃ca̱x ümatüxü̃ 7:22

Rü ñu̱xma nax yemaacü nügüégagutama inaxunetaxü̃ ga Tupana, rü nüxü̃ tacua̱x nax aixcüma Cristugagu tüxü̃́ nangẽxma i wüxi i Tupanaarü uneta i rümemaexü̃.

Popera ga Yudíugü ga yaxõgüxü̃ca̱x ümatüxü̃ 8:6

Rü ngẽma chacherdótegü rü nagu naxĩ ga yema mugü ga Moiché ümatüxü̃ nax duü̃xü̃güétüwa nachogüxü̃ca̱x. Natürü tórü Chacherdóte ya Guxü̃étüwa Ngẽxmacü ya Ngechuchu rü yema chacherdótegüarü yexera aixcüma tüxü̃ narüngü̃xẽxẽ. Rü ñu̱xma tüxü̃́ nangẽxma i wüxi i uneta i ngẽma nuxíraxü̃xü̃ ga uneta ga Moiché ümatüxü̃arü yexera mexü̃, erü Ngechuchugagu nixĩ ya Tupana tüxna naxü̃ i ngẽma uneta i ngexwaca̱xü̃xü̃.

Popera ga Yudíugü ga yaxõgüxü̃ca̱x ümatüxü̃ 8:13

Rü dücax, ñu̱xma nax Tupana ngexwaca̱xü̃xü̃ i unetachiga idexaxü̃, rü nüxü̃ tacua̱x nax yema nüxíraxü̃xü̃ ga uneta rü ñu̱xma rü marü taxuwama namexü̃ rü paxa tá iyanaxoxü̃.

Ore i mexü̃ ga Luca ümatüxü̃ 5:38

Rü ngẽmaca̱x tanaxwa̱xe nax yimá ngexwacaxü̃cü ya bínu rü ngexwaca̱xü̃xü̃ i naxchixü̃ i naxcha̱xmünaxca̱xgu yabacuchixü̃. Rü ngẽmaãcü rü taxuxü̃táma inayarütaxu.