Popera ga Yudíugü ga yaxõgüxü̃ca̱x ümatüxü̃ 7:5 - Tupanaarü Ore

⁵ Rü ñu̱xma i Yudíugü, rü guxü̃ma i norü ngẽmaxü̃wa ínanaxüxüchigü i ngẽma diésmu i Tupanana üxü̃, rü ñu̱xũchi norü chacherdótegü i Lebítaagüna nanaxã yerü yemaacü nixĩ ga namuaxü̃ ga yema mugü ga Moiché ümatüxü̃. Natürü guxü̃ma i ngẽma chacherdótegü rü togü i Yudíugürüxü̃ Abraáü̃taagü nixĩgü. Rü ngẽmaãcü i ngẽma togü i Yudíugü rü norü chacherdótegüna nanaxã i ngẽma diésmu i Tupanana üxü̃, woo natanüxü̃ i Yudíugü nax yixĩxü̃ i ngẽma chacherdótegü.

Popera ga Yudíugü ga yaxõgüxü̃ca̱x ümatüxü̃ 7:5 Referans Kwoze

Neemía 13:10

Rü nüxü̃ chacuáchiga ta nax tama Lebítanüxü̃na naxãgüãxü̃ ga nawemügü ga naxca̱x ixĩgüxü̃. Rü yemaca̱x ga Lebítanüxü̃ rü wiyaetanüxü̃ ga ngutaque̱xemaxã icua̱xgüxü̃ rü düxwa naxĩgü, rü naaneca̱x nawoegu.

Nüxíraxü̃xü̃ ga popera ga ãẽ̱xgacügüchiga 8:19

Natürü taxũtáma cuma cunaxü, rü wüxi i cune tá nixĩ i naxüxü̃”, ñanagürü nüxü̃ ga Cori ya Tupana.

Iraétanüxü̃arü muxchiga 18:7

Natürü cuma rü cunegüxica tá nixĩ i penaxügüxü̃ i ngẽma chacherdótegüarü puracü rü chope̱xewa ãmare pigugüxü̃ rü tüyemachiü̃ruxü̃arü aixepeguama pichocuxü̃ nagu i ucapu i Üünexüchixü̃. Rü ngẽma puracü rü pexica tátama nixĩ i penaxügüxü̃ erü choma rü nagu pexü̃ chamugü nax chacherdótegü pixĩgüxü̃ rü chacherdótegüarü puracü pexügüxü̃ca̱x. Rü ngẽxguma chi texé chacherdótearü puracü uxgu natürü tama chacherdóte tixĩxgu, rü tá yu tümamaxã naxuegu —ñanagürü.

Popera ga Yudíugü ga yaxõgüxü̃ca̱x ümatüxü̃ 5:4

Rü taxúema tügütama tingucuchixẽxẽ nax chacherdotegüarü ãẽ̱xgacü tixĩxü̃ca̱x. Natürü Tupana nixĩ ya tüxü̃ unetacü rü tüxna naxãcü i ngẽma puracü nax chacherdotegüarü ãẽ̱xgacü tixĩxü̃ca̱x, yexgumarüxü̃ ga Tupana rü Aróü̃xü̃ nax yangucuchixẽẽxü̃rüxü̃ nax chacherdotegüarü ãẽ̱xgacü yixĩxü̃ca̱x.

Ínachoxü̃xü̃chiga 28:1

¡Rü chorü puracüca̱x nüxü̃ naxuneta ya cuenexẽ ya Aróü̃ rü nanegü ya Nadáx, rü Abiú, rü Ereachá, rü Itamá! Rü nümagü tá nixĩ i chorü chacherdótegü.

Naanearü ügüchiga 46:26

Rü guxü̃wama ga norü mu ga yema duü̃xü̃gü ga Acóbumaxã wüxigu Equítuanewa ngugüxü̃ rü 66 nixĩ ga norü mu. Rü tama tixugü ga guxema Acóbu nanegü naxma̱x.

Ínachoxü̃xü̃chiga 1:5

Rü guxü̃ma ga yema Acóbutanüxü̃ ga Equítuanewa ngugüxü̃ rü 70 nixĩ. Rü nüma ga Yúche rü woetama marü Equítuanewa nayexma.

Wenaxarü naxümatü ga Tupanaarü mugü 26:12

Rü ngẽxguma norü tomaepü̱x ya taunecüwa nanguxgu, rü tá ípenaxüxüchi i perü diésmu nawa i guxü̃ma i perü nanetügüarü o. Rü nüxna tá penaxã i ngẽma Lebítanüxü̃, rü ngẽma to i nachixü̃anecüã̱x i petanüwa ngẽxmagüxü̃, rü ngẽma taxcutagü rü yutegüxü̃ i perü ĩanegüwa ngẽxmagüxü̃ nax ngẽmaãcü nümagü rü ta meama nachibüexü̃ca̱x.