Popera ga Yudíugü ga yaxõgüxü̃ca̱x ümatüxü̃ 6:19 - Tupanaarü Ore19 Rü ngẽma tórü õ rü natai, ñoma wüxi ya wapuruarü taixẽẽruü̃rüxü̃. Rü ñu̱xma nax ínangu̱xẽẽxü̃ nax aixcüma tá nayaxuxü̃ i ngẽma maxü̃ i taguma gúxü̃, rü taxuca̱xma taxoegaãẽgü, erü nüxü̃ tacua̱x nax aixcüma daxũguxü̃ i naanewa ya Tupana íngẽxmaxü̃wa tá íngugüxü̃. Gade chapit la |
Rü ngẽmawena rü tá nayama̱x i ngẽma chíbu i duü̃xü̃güarü pecaduarü ütanüruxü̃ ixĩxü̃. Rü yimá nagü i ngẽma chíbu rü tá ngẽma Tupanapataarü tüyemachiü̃arü aixepewa nanange. Rü ngéma aixepewa rü yimá nagümaxã tá nanamaxcuétü rü nanamaxcupe̱xe i ngẽma baúátaü̃ ngẽxgumarüxü̃ nax wocaxacügümaxã namaxcuãxü̃rüxü̃.
Rü Cori ya Tupana rü ñanagürü Moichéxü̃: —¡Namaxã nüxü̃ ixu ya cuenexẽ ya Aróü̃ rü tama name i ngexü̃rüüxü̃ i ngunexü̃gumare nagu naxücu i ngẽma naxmachiã i Üünexüchixü̃ i tüyemachiü̃ca̱xwena ngẽxmaxü̃ rü bai nüxna nangaicama i ngẽma baúátaü̃ nax tama nayuxü̃ca̱x! Erü choma rü tá ngẽma baúátaü̃étüwa caixanexü̃wa chaugü chango̱xẽxẽ.
Natürü yema to ga naxmachiãwa rü yema chacherdótegüarü ãẽ̱xgacüxicatama nixĩ ga wüxicanatama yexma ücuxü̃ ga wüxichigü ga taunecügu. Rü yexguma yexma naxücu̱xgu rü yéma nanange ga nagü nax gumámaxã yema baúxü̃ namaxcuétüxü̃. Rü yemaacü ga yema chacherdótegüarü ãẽ̱xgacü rü Tupanana nanaxã ga gumá nagü nax noxrütama pecaduxü̃ rü yema duü̃xü̃güarü pecadu ga naxücüraxü̃xü̃ iyanangümaxü̃ca̱x ga Tupana.
Natürü Tupanaarü ore rü taguma inayarüxo rü taguma naxüchicüü. Rü ngẽma norü orewa rü ñanagürü: “Tórü Cori ya Tupana nüxü̃ nacua̱x i texé tixĩ ya norü duü̃xü̃gü ixĩgüxe. Rü guxãma ya yíxema nüxü̃ ixuxe nax Ngechuchu ya Cristu rü tümaarü Cori yixĩxü̃, rü name nixĩ i nüxna tixĩgachi i guxü̃ma i chixexü̃”, ñanagürü i ngẽma norü orewa.
Rü yexguma Tupana Abraáü̃maxã ixunetagu nax nüxü̃ tá nangü̃xẽẽxü̃, rü Abraáü̃arü õgagu nixĩ ga namaxã inaxunetaxü̃. Rü ngẽmaca̱x i guxãma i yixema nax Abraáü̃rüxü̃ yaxõgüxü̃ rü taxca̱x ta nixĩ ga yema Tupanaarü uneta ga Abraáü̃maxã nüxü̃ yaxuxü̃. Rü ngẽmawa nüxü̃ tacua̱x rü tama yíxema mugü auregüxeca̱xicatama nixĩ i ngẽma Tupanaarü uneta, natürü guxãma ya yíxema Abraáü̃rüxü̃ Tupanaaxü̃́ yaxõgüxeca̱x ta nixĩ. Rü ñu̱xma rü guxãma i yixema nax Abraáü̃rüxü̃ mea yaxõgüxü̃ rü Abraáü̃xacügü tixĩgü rü nüma rü tanatü nixĩ i Tupanape̱xewa yerü nüxíra nayaxõ.
Rü ñu̱xma nax tüxü̃́ nangẽxmaxü̃ ya tórü ngü̃xẽẽruxü̃ ya Ngechuchu, rü tüxü̃́ natauxcha nax tama imuü̃eãcüma nüxna ingaicamaxü̃ ya tórü Tupana ya tüxü̃ ngechaü̃cü nax ngẽmaãcü nüma nüxü̃́ ingechaü̃tümüxü̃güxü̃ca̱x rü tüxü̃ nangechaü̃ãcüma tüxü̃ nangü̃xẽẽxü̃ca̱x i ngẽxguma guxchaxü̃gü taxca̱x ínguxgu.
Rü yexguma Pauru nüxü̃ cua̱xgu nax Chaduchéugü yixĩxü̃ ga nümaxü̃ ga ãẽ̱xgacügü rü togü rü Parichéugü nax yixĩxü̃, rü yema ãẽ̱xgacügüpe̱xewa tagaãcüma ñanagürü: —Pa Chautanüxü̃x, choma rü Parichéu chixĩ, rü Parichéu nane chixĩ. Rü choma rü chayaxõ nax wena tá namaxẽxü̃ i yuexü̃, rü ngẽmagagu choxü̃ ípexuãü̃gü i ñu̱xmax —ñanagürü.
Rü nüma ga Abraáü̃ rü aixcüma nayaxõ ga yexguma Tupana nüxü̃ ñaxgu: “Tá namuxũchi i cutaagü”, ñaxgu. Rü woo ga Abraáü̃ ga marü yaxguã̱xü̃chichire̱x nax yixĩxü̃ rü nax nangexacüxü̃, natürü nayaxõõma ga yema Tupanaarü uneta rü mea ínanangu̱xẽxẽ nax wüxi ga nane tá nüxü̃́ yexmaxü̃. Rü yemaacü ningu nax muxü̃ma i duü̃xü̃günatü yixĩxü̃, yema Tupana namaxã nüxü̃ ixuxü̃rüxü̃.