Popera ga Yudíugü ga yaxõgüxü̃ca̱x ümatüxü̃ 5:9 - Tupanaarü Ore

⁹ Rü yemaacü Tupanaga naxĩnü rü curuchagu nayu nax tümaarü maxẽxẽẽruxü̃ yixĩxü̃ca̱x ya guxãma ya yíxema naga ĩnüexe.

Popera ga Yudíugü ga yaxõgüxü̃ca̱x ümatüxü̃ 5:9 Referans Kwoze

Popera ga Yudíugü ga yaxõgüxü̃ca̱x ümatüxü̃ 9:15

Rü ñu̱xma nax tórü pecaduca̱x nayuxü̃ ga Ngechuchu ya Cristu, rü nüma nixĩ i tórü ngü̃xẽẽruxü̃ i Tupanape̱xewa, ngẽma Tupanaarü uneta i ngexwaca̱xü̃xü̃ nüxü̃ ixuxü̃rüxü̃. Rü ñu̱xma i yixema nax Tupana tüxü̃ dexü̃, rü tüxü̃́ nangẽxma i maxü̃ i taguma gúxü̃ yerü Cristu rü marü nayu nax tüxü̃ ínanguxü̃xẽxẽxü̃ ga yema pecadugü ga taxügüxü̃ ga yexguma yema nüxíraxü̃xü̃ ga unetatüxü̃wa tayexmagügu.

Popera ga Yudíugü ga yaxõgüxü̃ca̱x ümatüxü̃ 2:10

Rü nümatama ga Tupana nixĩ ga naxüaxü̃ ga guxü̃ma i ñu̱xma ngẽxmaxü̃ rü naxme̱xwa nangẽxma i guxü̃ma nax nüma nanaxwa̱xexü̃ãcüma namaxã inacuáxü̃ca̱x. Rü nüma ga Tupana rü nanaxwa̱xe nax guxü̃ma i naxacügü nüxü̃́ nangẽxmaxü̃ca̱x i nachica i mexü̃ i naxü̃tawa. Rü yemaca̱x ñoma ga naanewa nanamu ga Ngechuchu ya Cristu nax ngúxü̃ yangexü̃ca̱x rü duü̃xü̃güca̱x nayuxü̃ca̱x nax nüxü̃́ nangẽxmaxü̃ca̱x i maxü̃ i taguma gúxü̃.

Popera ga Yudíugü ga yaxõgüxü̃ca̱x ümatüxü̃ 12:2

¡Rü ngĩxã Ngechuchuxü̃ tarüdaunü rü nagu taxĩ i nacüma! Yerü nüma nixĩ ga tüxü̃́ natauxchaxẽẽãxü̃ nax yaxõgüxü̃ca̱x. Rü nüma rü tama nügü nachu̱xu nax curuchawa ngúxü̃ yangexü̃, rü tama nagu narüxĩnü ga yema ãne nax yangexü̃, yerü nüxü̃ nacua̱x nax yemawena rü tá nataãẽxü̃. Rü ñu̱xma rü Tupanaarü tochicaxü̃arü tügünecüwawa narüto.

Popera ga Yudíugü ga yaxõgüxü̃ca̱x ümatüxü̃ 9:12

Rü Cristu rü wüxicanatama daxũguxü̃ i naanegu naxücu ya Tupana íngẽxmaxü̃wa, rü guxü̃guma ngéma nangẽxma. Rü tama yéma nanange ga nagü ga chíbugü rü wocaxacügü, natürü nagütama yéma nange. Rü yemaacü taétüwa nachogü nax guxü̃guma tüxü̃́ nangẽxmaxü̃ca̱x i maxü̃ i taguma guxü̃.

Ngechuchuarü ngúexü̃gü ga yamugüxü̃arü puracüchiga 5:32

Rü toma rü nüxü̃ tacua̱x nax aixcüma yixĩxü̃ i guxü̃ma i ngẽma pemaxã nüxü̃ tixuxü̃ erü tomatama nüxü̃ tadaugü ga yema Ngechuchu üxü̃. Rü Tupana rü tüxna nanamu ya Naãxẽ ya Üünecü ya yíxema naga ĩnüexe. Rü Tupanaãxẽ ya Üünecü rü towa inanawe̱x nax aixcüma yixĩxü̃ i ngẽma pemaxã nüxü̃ tixuxü̃ —ñanagürügü.

Nüxíraxü̃xü̃ ga popera ga Pedru ümatüxü̃ 1:22

Rü ñu̱xma nax naga pexĩnüexü̃ i Tupanaarü ore i aixcüma ixĩxü̃ rü pexü̃́ natauxcha nax pegü pengechaü̃güxü̃ erü Tupana rü marü pexü̃́ inayanaxoxẽxẽ i perü chixexü̃gü. Rü ngẽmaca̱x penaxwa̱xe i guxü̃ i perü ngúchaü̃maxã aixcüma pegü pengechaü̃gü.

Danié 9:24

Rü 70 i yüxügü ngupetüguwena rü yima curü ĩane ya üünene ya Yerucharéü̃ rü ngẽma curü duü̃xü̃gü i Iraétanüxü̃ rü düxwa tá inayarüxo i norü chixexü̃ i naxügüxü̃ rü tá Tupanaga naxĩnüe. Rü Tupana tá nüxü̃́ inanaxoxẽxẽ i ngẽma norü chixexü̃gü, rü tá nüxü̃́ nüxü̃ inarüngüma i ngẽma norü chixexü̃. Rü tá ningucuchi ya yimá aixcüma mecü nax guxü̃guma norü duü̃xü̃gümaxã mea inacuáxü̃ca̱x. Rü ngẽmaãcü tá ningu ga yema Tupana cuxü̃ wéxü̃. Rü wena tá nanamexẽxẽ ya yima napata ya üünene.

Popera ga Yudíugü ga yaxõgüxü̃ca̱x ümatüxü̃ 11:8

Rü gumá tórü o̱xi ga Abraáü̃, rü Tupanaaxü̃́ nayaxõ. Rü yexguma Tupana naxca̱x caxgux rü naga naxĩnü rü ínaxũxü̃ nawa ga yema naane ga nawa nayexmaxü̃ nax nawa naxũxü̃ca̱x ga yema naane ga Tupana nüxna ãxü̃ nax noxrü yixĩxü̃ca̱x. Rü yemaacü ga Abraáü̃ rü ínaxũxü̃ ga yema naane ga nawa nayexmaxü̃ woo tama nüxü̃ nax nacuáxü̃ ga ngextá tá nax naxũxü̃.

2 Tesalonicenses 1:8

Rü núma tá naxũ i nüma ya tórü Cori ya Ngechuchu nax napoxcueãxü̃ca̱x i ngẽma duü̃xü̃gü i tama Tupanaxü̃ cua̱xgüchaü̃xü̃ rü tama naga ĩnüexü̃ i ngẽma ore i mexü̃ i tórü Cori ya Ngechuchu ya Cristuchiga.

Romanos 2:8

Natürü Tupana tá tümamaxã nanu rü tá tüxü̃ napoxcu ya yíxema tama naga ĩnüechaü̃xü̃ i ore i aixcüma ixĩxü̃ rü naxca̱x daugüxe nax chixexü̃ taxügüxü̃.

Romanos 1:5

Rü Ngechuchu ga Cristugagu Tupana chomaxã namecüma rü choxü̃ naxuneta nax norü puracü chaxüxü̃ca̱x. Rü yemaca̱x Ngechuchuégagu choxü̃ namu nax guxü̃ i nachixü̃anewa nüxü̃ chixuxü̃ca̱x i norü ore nax yaxõgüãxü̃ca̱x i duü̃xü̃gü rü Tupanaga naxĩnüexü̃ca̱x.

Romanos 15:18

Rü ñu̱xma rü yema Cristu chowa üxü̃xicatama tá nixĩ i nüxü̃ chixuxü̃. Rü nüma nixĩ ga choxü̃ nangü̃xẽẽxü̃ nax Tupanaxü̃tawa chanagagüxü̃ca̱x ga yema duü̃xü̃gü i tama Yudíugü ixĩgüxü̃, nax nümagü rü ta Tupanaga naxĩnüexü̃ca̱x. Rü yemaacü chorü oremaxã, rü chorü puracümaxã, rü cua̱xruü̃gü ga taxü̃ ga Tupana üxü̃maxã, rü Naãxẽ ya Üünexü̃arü poramaxã Tupanaxü̃tawa chanagagü ga yema duü̃xü̃gü. Rü yemaacü Yerucharéü̃wa ichanaxügü rü guxü̃wama ñu̱xmata Ilíriaarü naanewa meama chayanguxẽxẽ nax nüxü̃ chixuxü̃ ga yema ore i tüxü̃ maxẽxẽẽxü̃ i Cristuchiga.

Ichaía 50:10

Rü pema nax Tupanaxü̃ pemuü̃exü̃ rü norü duü̃xü̃ga pexĩnüexü̃, rü ngẽxguma waanexü̃wa i omü ínataxuxü̃wa pexĩxgu rü ¡Tupanagu perüxĩnüe rü nüxü̃́ peyaxõgü!

Norü taxre ga popera ga Timutéuca̱x naxümatüxü̃ ga Pauru 2:10

Rü ngẽmaca̱x yáxna namaxã chaxĩnü i ngẽma ngúxü̃ i chingexü̃ naxca̱x i ngẽma duü̃xü̃gü ya Tupana dexü̃. Erü chanaxwa̱xe i nümagü rü ta Ngechuchu ya Cristuaxü̃́ nayaxõgü, rü ngẽmaãcü nax nayauxgüãxü̃ca̱x i ngẽma maxü̃ i mexü̃ i taguma gúxü̃.

Romanos 10:16

Natürü tama guxü̃ma i duü̃xü̃gü nayaxõgü i ngẽma ore i mexü̃. Rü Ichaía nüxü̃ ixuxü̃rüxü̃ nixĩ, rü ñanagürü: “Pa Corix, ¿texé yaxõxü̃ ga yema ore ga nüxü̃ ixuxü̃?” ñanagürü.

Romanos 6:17

Natürü Tupanana moxẽ chaxã, yerü woo pecaduga nax pexĩnüexü̃ ga noxri, natürü i ñu̱xma rü aixcüma naga pexĩnüe i ngẽma ngu̱xẽẽtae i marü pexü̃ tangúexẽẽxü̃ i Cristuchiga.

Popera ga Yudíugü ga yaxõgüxü̃ca̱x ümatüxü̃ 2:3

Rü yexguma yemaacü napoxcueãgu ga yema duü̃xü̃gü ga tama naga ĩnüexü̃, ¿rü ñuxũcürüwa i yixema i na̱xcha̱xwa ibuxmüxü̃ nax tama tüxü̃ napoxcuexü̃ca̱x ega nüxü̃ ixoegu i ngẽma maxü̃ i mexẽchixü̃ i ñu̱xma Cristugagu tüxna uaxü̃xü̃? Rü nümatama ya tórü Cori nixĩ ga nüxíra naxunagüãxü̃ ga yema maxü̃, rü ñu̱xũchi yixcama nixĩ ga yema nüxü̃ ĩnüexü̃ ga nüxĩ́ mea tüxü̃ nüxü̃ nacua̱xẽẽxü̃ nax aixcüma yixĩxü̃ i tüxü̃́ nangẽxmaxü̃ i ngẽma maxü̃.

Ore i mexü̃ ga Cuáü̃ ümatüxü̃ 19:30

Rü Ngechuchu nayaxaxü ga gumá bínu ga üxchíücü rü ñanagürü: —Marü ningu i guxü̃ma —ñanagürü. Rü ñu̱xũchi inayarümaxãchi, rü nayu.

Ore i mexü̃ ga Matéu ümatüxü̃ 17:5

Rü yexguma íyadexayane ga Pedru rü wüxi ga caixanexü̃ ga nangóonexẽẽxü̃ rü natanügu nayanga̱i̱xema. Rü yema caixanexü̃wa inanaxũ ga wüxi ga naga ga ñaxü̃: —Daa nixĩ ya Chaune ya nüxü̃ changechaü̃xü̃chicü rü namaxã chataãẽxü̃chicü. ¡Rü naga pexĩnüe! —ñanagürü.

Chacaría 6:15

Rü ngẽxguma tá Cori ya Tupanaga pexĩnüegu, rü nua tá naxĩ i togü i duü̃xü̃gü i yáxü̃wa ne ĩxü̃, rü pexü̃ tá narüngü̃xẽẽgü nawa i Tupanapata ya taxü̃nearü mexẽxẽ. Rü ngẽxguma tá yanguxgu i ngẽma rü pema rü tá nüxü̃ pecua̱x nax Tupana ya Guxãétüwa Ngẽxmacü yixĩxü̃ i nua choxü̃ muxü̃ nax pemaxã nüxü̃ chixuxü̃ca̱x i norü ore.

Ichaía 45:22

Rü pema i yáxü̃wa maxẽxe, rü cha̱u̱xca̱x pexĩ rü choma rü tá pexü̃ íchanguxü̃xẽxẽ, erü chaxicatama nixĩ ya Tupana chixĩxü̃ rü nataxuma i to.

Wiyaegü 51:6

Cuma rü nüxü̃ cungechaü̃ i ngẽma duü̃xü̃ i aixcüma nüxü̃ ixuxü̃ i norü pecadugü. Rü chauãẽwa cunanguxẽxẽ i cua̱x.

Popera ga Yúda ümatüxü̃ 1:21

¡Rü pegüna pedaugü nax guxü̃guma pewa nangẽxmaxü̃ca̱x i Tupanaarü ngechaü̃! ¡Rü mea ípenangu̱xẽxẽx i ngẽma ngunexü̃ i nagu tá núma naxũxü̃ ya tórü Cori ya Ngechuchu ya Cristu nax nüxü̃́ ingechaü̃tümüxü̃gügagu tüxna naxããxü̃ca̱x i maxü̃ i taguma gúxü̃!

Nüxíraxü̃xü̃ ga popera ga Cuáü̃ ümatüxü̃ 5:20

Rü nüxü̃ tacua̱x ta nax ñoma ga naanewa nanguxü̃ ga Tupana Nane. Rü nüma nixĩ i tüxna naxããxü̃ ga cua̱x nax nüxü̃ icua̱xgüxü̃ca̱x ya yimá aixcüma Tupana ixĩcü. Rü yixema rü norü duü̃xü̃gü tixĩgü ya yimá aixcüma Tupana ixĩcü, erü Nane ya Ngechuchu ya Cristuarü duü̃xü̃gü tixĩgü. Rü nüma ya Tupana Nane nixĩ i aixcüma Tupana ixĩcü, rü nüma nixĩ i tüxna naxããxü̃ i maxü̃ i taguma gúxü̃.

Popera ga Yudíugü ga yaxõgüxü̃ca̱x ümatüxü̃ 11:40

Rü yemaacü namaxã nangupetü ga yema duü̃xü̃gü, yerü ga Tupana rü tagu narüxĩnü rü tama nanaxwa̱xe nax yema nũxcümaü̃güxü̃ ga duü̃xü̃güxíra nüxica yamexẽẽgüãxü̃, natürü nanaxwa̱xe nax tamaxã wüxigu yamexẽẽgüãxü̃. Rü yemaacü ga Tupana rü taxca̱x nanamexẽxẽ ga wüxi ga ngü̃xẽxẽ ga yexera rümemaexü̃.

2 Tesalonicenses 2:16

Rü tórü Cori ya Ngechuchu ya Cristu rü Tanatü ya Tupana ya tüxü̃ ngechaü̃cü rü guxü̃guma taãxẽ tüxna ãcü rü marü tamaxã namecüma rü ngẽmaca̱x tamaxã inaxuneta nax guxü̃gutáma naxü̃tawa ingẽxmagüxü̃.

Ngechuchuarü ngúexü̃gü ga yamugüxü̃arü puracüchiga 3:15

Rü yemaacü pematama peyama̱xgü ga gumá Ngechuchu ya tüxü̃ maxẽxẽẽcü. Natürü ga Tupana rü wena nanamaxẽxẽ. Rü toma nixĩ ga nüxü̃ tadaugüxü̃ ga wena nax namaxü̃xü̃.

Ore i mexü̃ ga Luca ümatüxü̃ 13:32

Natürü nüma ga Ngechuchu nanangãxü̃ rü ñanagürü: —¡Naxü̃tawa pexĩ i ngẽma yatü i nüxü̃ cua̱xüchixü̃ nax duü̃xü̃güxü̃ nawomüxẽẽxü̃, rü namaxã nüxü̃ pixu rü ñu̱xma rü moxü̃ rü tá íchanawoxü̃ i ngo̱xogü, rü tá chanameexẽxẽ i ngẽma duü̃xü̃gü i ida̱xaweexü̃, rü pa̱xmaacü tá chanagu̱xẽxẽ!

Ichaía 49:6

Rü nüma ya Tupana rü ñanagürü: —Choma rü cuxü̃ chamu nax cunanutaque̱xexü̃ca̱x i Acóbuarü duü̃xü̃gü rü nachixü̃aneca̱x cunawoeguxẽẽxü̃ca̱x i ngẽma Iraétanüxü̃. Rü naétü cuxü̃ chamu nax wüxi i omü quixĩxü̃ca̱x naxca̱x i guxü̃ma i nachixü̃anegü. Rü cuxü̃ chamu nax nüxü̃ nüxü̃ cucua̱xẽẽxü̃ca̱x i chorü ore i maxü̃ nüxna ãxü̃ i guxü̃ma i nachixü̃anecüã̱x woo ngẽma yáxü̃wa ngẽxmagüxü̃ —ñanagürü.

Wiyaegü 51:8

Rü chanaxwa̱xe nax wena choxü̃ cutaãẽxẽẽxü̃. ¡Rü choxna naxã i taãxẽ ñu̱xmata yima chauxchina̱xãgü i cuma quibuyegünewa nangu!

Wiyaegü 45:17

Rü choma rü tá nüxü̃ nüxü̃ chacua̱xẽxẽ i cuéga nax ngẽmaãcü guxü̃ma i ngẽma ngexwaca ingóetanüxü̃ i duü̃xü̃gü rü nüxü̃ nacua̱xgüxü̃ca̱x i cuéga. Rü ñu̱xũchi guxü̃ma i nachixü̃anecüã̱xgü rü guxü̃gutáma cuxna nacua̱xãchie rü cuxü̃ natachigagü.

Ngechuchuarü ngúexü̃gü ga yamugüxü̃arü puracüchiga 4:12

Rü yimá Ngechuchuxicatama nixĩ ya tórü maxẽxẽxẽruxü̃, erü yixicatama nixĩ ga Tupana nüxü̃ unetacü i ñoma i naanewa nax tüxü̃ namaxẽxẽẽxü̃ca̱x —ñanagürü ga Pedru.

Ichaía 55:3

¡Rü cha̱u̱xca̱x pexĩ, rü choxü̃́ iperüxĩnüe! ¡Chauga pexĩnüe rü tá pemaxẽ! Rü choma rü tá pemaxã chanaxü i wüxi i uneta i taguma gúxü̃. Rü ngẽmaãcü tá chayanguxẽxẽ ga yema chorü uneta ga ãẽ̱xgacü ga nüxü̃ changechaü̃xü̃chicü ga Dabímaxã nüxü̃ chixuxü̃.

Filipenses 2:12

Rü ngẽmaca̱x chanaxwa̱xe i chauga pexĩnüe, Pa Chauenexẽgü ya Pexü̃ Changechaü̃güxe. Rü yéma petanüwa chayexmagu chauga nax pexĩnüexü̃arü yexera chanaxwa̱xe i chauga pexĩnüe i ñu̱xma nax tama petanüwa changexmaxü̃. Rü chanaxwa̱xe i Tupanaxü̃ pemuü̃ẽãcüma pegü peporaexẽxẽ nax nawe perüxĩxü̃ i ngẽma ore i maxü̃ tüxna ãxü̃.

Popera ga Yudíugü ga yaxõgüxü̃ca̱x ümatüxü̃ 1:14

Rü guxü̃ma i Tupanaarü orearü ngeruü̃gü i daxũcüã̱x rü naãxẽgü i Tupanaaxü̃́ puracüexü̃ nixĩgü. Rü nüma ya Tupana rü nanamugü nax nüxü̃ yanangü̃xẽẽgüxü̃ca̱x i guxü̃ma i ngẽma duü̃xü̃gü ya Tupana naxwa̱xexü̃ nax nayauxgüãxü̃ i maxü̃ i taguma gúxü̃.