Popera ga Yudíugü ga yaxõgüxü̃ca̱x ümatüxü̃ 5:12 - Tupanaarü Ore

¹² Rü marü ñuxgumama nüxü̃ nax pecuáxü̃ i Tupanaarü orechiga, rü pema rü chi marü namaxã pengúexẽẽtae. Natürü i pema rü ñu̱xma rü ta penaxwa̱xe nax wena pemaxã tanango̱xẽẽxü̃ i ngẽma Tupanaarü ore i tauxchaxü̃ i nawa inaxügüxü̃ nax Tupanachigaxü̃ icuáxü̃. Rü tama nüxü̃ pecua̱xgüéga i ngẽma Tupanaarü ore i yexeraãcü tamaxã nüxü̃ ixuxü̃ i Cristuchiga. Rü ngẽmaãcü i pemax, rü ñoma õxchana i naégünenixü̃wa mãĩxü̃rüü̃tama pixĩgü.

Popera ga Yudíugü ga yaxõgüxü̃ca̱x ümatüxü̃ 5:12 Referans Kwoze

Popera ga Yudíugü ga yaxõgüxü̃ca̱x ümatüxü̃ 6:1

Rü ngẽmaca̱x name nixĩ i yexeraãcü tingúeetanü nax aixcüma mea nüxü̃ icuáxü̃ca̱x i Cristuchiga. Rü tanaxwa̱xe nax nüxü̃ ichopetüxü̃ ga yema ore ga nawa inaxügüxü̃ nax Cristuchigaxü̃ icuáxü̃. Rü taxũtáma yeü̃cürü yema ore ga nawa inaxügüxü̃chiga tidexagüecha. Rü taxuca̱xma tü̱xcüü̃ wena pemaxã nüxü̃ tixu nax nüxü̃ perüxoexü̃ca̱x nax nagu pexĩxü̃ i ngẽma mugü ga Moiché ümatüxü̃ i tama tüxü̃ maxẽxẽẽxü̃. Rü ngẽxgumarüxü̃ ta taxuca̱xma tü̱xcüü̃ wena pemaxã nüxü̃ tixu i nachiga nax ñuxãcü Tupanaaxü̃́ yaxõgüxü̃.

Nüxíraxü̃xü̃ ga popera ga Pedru ümatüxü̃ 2:2

Rü ñoma wüxi i õxchana i ngexwaca buxü̃ i naégünenixü̃ nüxü̃́ ngúchaü̃xü̃rüxü̃ penaxwa̱xe i poraãcü pexü̃́ nangúchaü̃ i Tupanaarü ore nax ngẽmawa peporaexü̃ca̱x rü mea peyaexü̃ca̱x i perü õwa nax ngẽmaãcü guxü̃wama namexü̃ca̱x i perü maxü̃ i taguma gúxü̃.

Popera ga Yudíugü ga yaxõgüxü̃ca̱x ümatüxü̃ 5:13

Rü yíxema yaxṍxe ya tama mea Tupanaarü orexü̃ cuáxe, rü ñoma õxchana i maixü̃rüxü̃ tixĩ. Rü tama nüxü̃ tacua̱x i ta̱xacü nixĩ i mexü̃ rü ta̱xacü nixĩ i chixexü̃.

Colosenses 3:16

Rü name nixĩ i guxü̃guma peãẽwa nangẽxma i Cristuarü ore i taãxẽ pexna ãxü̃. Rü name nixĩ i nüxü̃ pecuáãcüma ngẽma oremaxã pegü pengúexẽxẽ rü pegü pixucu̱xẽgü. Rü name nixĩ i Tupanana moxẽ pexãgüãcüma nagu pewiyaegü i naguxü̃raü̃xü̃ i norü wiyaegü.

Wiyaegü 34:11

Pa Chauxacügüx ¡nua pexĩ rü choxü̃́ iperüxĩnüe! Rü pexü̃ tá changúexẽxẽ nax Cori ya Tupanaxü̃ pemuü̃exü̃.

Ore i mexü̃ ga Matéu ümatüxü̃ 17:17

Rü yexguma Ngechuchu nanangãxü̃, rü ñanagürü nüxü̃ ga yema duü̃xü̃gü ga yéma yexmagüxü̃: —Pa Duü̃xü̃gü i Tama Yaxõgüxü̃ i Chixri Maxẽxü̃, ¿ñuxguratáta i pemaxã chanuxmaxü̃ rü yáxna pemaxã chaxĩnüxü̃? ¡Nua penaga ya yimá bucü! —ñanagürü.

Ichaía 55:1

Cori ya Tupana rü ñanagürü: —¡Guxãma ya texé ya ita̱xawaexe rü nua taxĩ rü tayaxaxegü! ¡Rü yíxema ngearü diẽruã̱xgüxe rü nua taxĩ rü trigu rü bínu rü lechica̱x tadaugü rü ngetanüãcü tanangõ̱xgü rü taxaxegü!

Édra 7:10

Rü nüma ga Édra rü aixcüma nagu narüxĩnü nax Tupanaarü mugüwa nangúxü̃ rü nagu nax namaxü̃xü̃ rü yema togü ga Iraéanecüã̱xgüxü̃ nax nangúexẽẽxü̃ca̱x ga yema Tupanaarü mugü.

2 Chamué 16:23

Rü yema ga ngunexü̃gügu rü yema Aitópearü ucu̱xẽgü rü ñomatama Tupanaarü orewa nayauxgüxü̃rüxü̃ nixĩ. Rü yema Dabí naga naxĩnüxü̃rüxü̃ rü Acharóü̃ rü ta naga naxĩnü.

Nüxíraxü̃xü̃ ga popera ga Pedru ümatüxü̃ 4:11

Rü yíxema nüxü̃ cuáxe nax mea tidexaxü̃, rü name nixĩ nax Tupanaarü orexü̃ tixuxü̃. Rü ngẽxguma texé tüxü̃́ nangẽxmagu i cua̱x nax togüxü̃ tarüngü̃xẽẽxü̃, rü name nixĩ i ngẽma pora ya Tupana tüxna ãxü̃maxã nüxü̃ tarüngü̃xẽxẽ. Rü guxü̃ma i ngẽma pexüxü̃ rü name nixĩ i meama penaxü nax ngẽmaãcü Ngechuchu ya Cristugagu Tupanaxü̃ picua̱xüü̃güxü̃ca̱x. Erü nüma ya Tupana rü guxü̃guma naxüüne rü naporaxüchi. Rü ngẽmaãcü yixĩ.

1 Corintios 14:19

Natürü woo 10,000 i ore i taxúema nüxü̃ cuáxü̃ i nagawa nax chidexaxü̃, natürü ngẽma yaxõgüxü̃arü ngutaque̱xegüwa rü cha̱u̱xca̱x rü narümemae chi nixĩ ega woo wüxime̱xpü̱x i ore i meama nüxü̃ icuáxü̃wa namaxã nüxü̃ chixuxgu i Tupanaarü ore nax ngẽmaãcü ngẽmamaxã mea chanangúexẽẽxü̃ca̱x.

Romanos 3:2

Rü poraãcüxüchima tüxü̃́ name nax Yudíugü ixĩgüxü̃. Yerü nüma ga Tupana rü tüxnaxíra nixĩ ga naxããxü̃ ga norü ore.

Ngechuchuarü ngúexü̃gü ga yamugüxü̃arü puracüchiga 7:38

Rü nümatama ga Moiché nixĩ ga nũxcümaü̃güxü̃ ga tórü o̱xigümaxã nangutaque̱xexü̃ ga yema chianexü̃wa. Rü tórü o̱xigümaxã nayexma ga Chinaí ga ma̱xpǘnewa ga yexguma namaxã yadexaxgu ga Tupanaarü orearü ngeruxü̃ ga daxũcüã̱x. Rü nümatama ga Moiché nixĩ ga naya̱u̱xãxü̃ ga Tupanaarü ore i maxẽxẽẽruxü̃ nax nüxĩ́ tüxna naxããxü̃ca̱x.

Ore i mexü̃ ga Márcu ümatüxü̃ 9:19

Rü Ngechuchu nanangãxü̃, rü ñanagürü: —Pa Duü̃xü̃gü i Tama Yaxõgüxü̃, ¿ñuxguratáta i pemaxã chanuxmaxü̃ rü yáxna pemaxã chaxĩnüxü̃? ¡Nua penaga ya yimá bucü! —ñanagürü.

Filipenses 3:1

Rü ñu̱xma Pa Chauenexẽgüx, rü chanaxwa̱xe i petaãẽgü erü tórü Coriarü duü̃xü̃gü pixĩgü. Rü yema ore ga noxri pexca̱x chaxümatüxü̃ rü tama choxü̃́ nawa̱xtümüü̃ nax wena pexca̱x chanaxümatüxü̃ erü aixcüma pexü̃́ name i ngẽma ore.

Ichaía 28:13

Rü ngẽmaca̱x ya Cori ya Tupana rü ñoma buxü̃gü i buexüchixü̃ i ngexwaca̱xtama ugütaexü̃ cua̱xgüxü̃ãcü tá pemaxã nidexa. Rü pema rü ngẽxguma ipexĩxgu rü buxü̃gü i ngexwaca ũxü̃ cua̱xgüxü̃rüxü̃ tá peca̱xwe̱xmaxã ipeyayi rü peyapíe, rü perü uanügü tá pexü̃ ínayaxuxü̃.

1 Corintios 14:20

Pa Chauenexẽgüx, tama name i ñoma buxü̃gürüxü̃ nagu perüxĩnüe i ngẽma ore i pemaxã nüxü̃ chixuxü̃. Rü narümemae nixĩ i ñoma buxü̃gürüxü̃ pegü pixĩgüxẽxẽ na̱xcha̱xwa i ngẽma chixexü̃. Natürü ngẽma perü ĩnüwa rü penaxwa̱xe i duü̃xü̃gü i marü yáxü̃rüxü̃ mea nagu perüxĩnüe rü nagu pexĩ i ngẽma ore i pemaxã nüxü̃ chixuxü̃.

Gálatas 4:3

Rü yexgumarüxü̃ ta nixĩ ga tamaxã nangupetüxü̃ ga noxrix. Yerü yexguma tauta Cristuxü̃ icua̱xgu, rü natüü̃wa tayexmagü ga yema mugü i ñoma i naanemaxã icua̱xgüxü̃.

Popera ga Yudíugü ga yaxõgüxü̃ca̱x ümatüxü̃ 5:11

Rü ñu̱xma rü toxü̃́ nangẽxma i muxũchixü̃ma i ore i Cristuchiga ixĩxü̃ i pemaxã nüxü̃ tixuxchaü̃xü̃. Natürü naguxchaxüchi nax meama pemaxã tanango̱xẽẽxü̃ i ngẽma, erü pema rü tama pexü̃́ natauxcha nax nüxü̃ pecuáxü̃.

Popera ga Yudíugü ga yaxõgüxü̃ca̱x ümatüxü̃ 10:32

Rü name nixĩ i nüxna pecua̱xãchie ga yexguma noxri Cristuxü̃ peyauxgügu rü nüxü̃́ peyaxõgügu rü pema rü mea peyaxõgüama rü tama Cristuna pixĩgachi woo nax taxü̃ ga guxchaxü̃gü pexca̱x íngugüxü̃.