Popera ga Yudíugü ga yaxõgüxü̃ca̱x ümatüxü̃ 4:2 - Tupanaarü Ore

² Erü yixema rü marü nüxü̃ taxĩnüe i Tupanaarü ore i mexü̃ i maxü̃chiga, yexgumarüxü̃ ga yema nũxcümaü̃güxü̃ ga duü̃xü̃gü nüxü̃ nax naxĩnüexü̃. Natürü nümagü ga yema duü̃xü̃gü rü taxuwama nüxü̃́ name ga nüxü̃ nax naxĩnüexü̃ ga yema ore, yerü tama yema togü ga naga ĩnüexü̃rüxü̃ nayaxõgü.

Popera ga Yudíugü ga yaxõgüxü̃ca̱x ümatüxü̃ 4:2 Referans Kwoze

1 Tesalonicenses 2:13

Rü ngẽmaca̱x guxü̃guma Tupanana moxẽ taxã, yerü yexguma noxri nüxü̃ pexĩnüegu ga yema norü ore ga pemaxã nüxü̃ tixuxü̃, rü mea penayauxgü, yerü nüxü̃ pecua̱xgü rü aixcüma Tupanaarü ore nixĩ rü tama duü̃xü̃güarü oremare nixĩ. Rü yema Tupanaarü ore nixĩ ga naxüchicüüxü̃ ga perü maxü̃ i pema nax peyaxõgüxü̃.

Popera ga Yudíugü ga yaxõgüxü̃ca̱x ümatüxü̃ 11:6

Natürü taxuacüma Tupana tamaxã nataãxẽ ega tama nüxü̃́ yaxõgügu. Rü yíxema Tupanamaxã ãmücüchaü̃xe, rü tanaxwa̱xe nax tayaxõxü̃ nax Tupana rü aixcüma nangẽxmaxü̃ rü aixcüma tüxü̃ nangü̃xẽẽxü̃ ya yíxema naxca̱x daugüxe.

Popera ga Yudíugü ga yaxõgüxü̃ca̱x ümatüxü̃ 3:12

Rü ñu̱xma Pa Chauenexẽgüx, rü name nixĩ i pegüna pedaugü nax tama ngürüãchi pechixearü maxü̃ã́xü̃ca̱x, rü ngẽmagagu nax nüxü̃ perüxoexü̃ nax Tupana ya Maxü̃cüaxü̃́ peyaxõgüxü̃.

Nüxíraxü̃xü̃ ga popera ga Timutéuca̱x naxümatüxü̃ ga Pauru 4:8

Rü wüxi i mexü̃ nixĩ nax yaxĩã̱xcüüxẽẽxü̃ i taxü̃ne nax naporaxü̃ca̱x. Natürü ngẽmaarü yexera narümemae nixĩ nax yigü iporaxẽẽxü̃ nax Tupanaga ixĩnüxü̃ca̱x erü ngẽma rü guxü̃wama tüxü̃́ name i ñu̱xma nax imaxẽxü̃ rü guxü̃gutáma i daxũguxü̃ i naanewa rü ta.

Romanos 2:25

Pema i Yudíugü rü pegü ípewíecha̱xmüü̃pe̱xechiraü̃güxü̃ nax Tupanaarü duü̃xü̃gü pixĩgüxü̃ca̱x. Rü ngẽma rü name ega aixcüma naga pexĩnüegu i Tupanaarü mugü. Natürü ngẽxguma tama naga pexĩnüegu i Tupanaarü mugü rü natüca̱xmamare nixĩ nax pegü ípewíecha̱xmüü̃pe̱xechiraü̃güxü̃.

Ngechuchuarü ngúexü̃gü ga yamugüxü̃arü puracüchiga 13:46

Natürü ga Pauru rü Bernabé rü tama namuü̃eãcüma yema Yudíugüxü̃ nangãxü̃gü, rü ñanagürügü: —Tupana nanaxwa̱xe nax pemaxãxíra nüxü̃ tixuxü̃ i norü ore. Natürü ñu̱xma nax nüxü̃ pexoexü̃ i ngẽma ore rü tama penayauxgüchaü̃xü̃ i maxü̃ i taguma gúxü̃, rü ngẽmaca̱x i ñu̱xmax i toma rü tá ngẽma tama Yudíugü ixĩgüxü̃tanüwa taxĩ.

Popera ga Chantiágu ümatüxü̃ 1:21

Rü ngẽmaca̱x name nixĩ i nüxü̃ perüxoe i guxü̃ma i ngẽma chixexü̃gü i guxü̃wama ngẽxmagüxü̃. ¡Rü mea penayaxu i ngẽma ore i petanügu toxü̃! Erü ngẽma ore rü nüxü̃́ nangẽxma i pora nax pexü̃ namaxẽxẽẽxü̃ca̱x.

1 Corintios 13:3

Rü woo ngẽma duü̃xü̃gü i ngearü diẽruã̱xgüxü̃xü̃ chayanuxgu i guxü̃ma i ta̱xacü i choxü̃́ ngẽxmaxü̃, rü woo Tupanaarü oreca̱x chaugü ichaxãxgu nax üxüwa choxü̃ yagugüxü̃ca̱x, rü taxuwama choxü̃́ name i ngẽma ega tama choxü̃́ nangẽxmagu i ngechaü̃.

Nüxíraxü̃xü̃ ga popera ga Pedru ümatüxü̃ 1:12

Natürü Tupana rü yema nũxcümaü̃güxü̃ ga orearü uruü̃güxü̃ nüxü̃ nacua̱xẽxẽ nax tama naxca̱x yixĩxü̃ ga yema ore nachiga ga gumá maxẽxẽẽruxü̃. Natürü pexca̱x nixĩ i ngẽma ore ga perü orearü uruü̃gü pemaxã nüxü̃ ixugüxü̃ ga yexguma Tupanaãxẽ ya Üünecü ga daxũwa ne muxü̃ yadexaxẽẽgu. Rü guxü̃ma i ngẽma ore i yimá Maxẽxẽxẽruü̃chiga, rü ngẽma Tupanaarü orearü ngeruü̃gü i daxũcüã̱x rü nüxü̃́ nangúchaü̃gü nax yexera nüxü̃ nacua̱xgüchaü̃xü̃.

1 Tesalonicenses 1:5

Rü yexguma pemaxã nüxü̃ tixuxgu ga Tupanaarü ore i tüxü̃ maxẽxẽẽxü̃, rü tama toechama tidexagümare, yerü Tupanaãxẽ ya Üünecü toxü̃ narüngü̃xẽxẽ nax Tupanaarü poramaxã pemaxã nüxü̃ tixuxü̃. Rü mea nüxü̃ tacuáãcüma pemaxã nüxü̃ tixu ga yema ore yerü toõxẽwatama nüxü̃ tacua̱x nax aixcüma yixĩxü̃. Rü pematama meama nüxü̃ pecua̱x nax aixcüma mea pepe̱xewa tamaxẽxü̃ nax yemaacü pexü̃ tarüngü̃xẽẽgüxü̃ca̱x.

Gálatas 3:8

Rü Tupanaarü ore i ümatüxü̃wa rü nüxü̃ nixu nax Tupanape̱xewa yamexü̃ i ngẽma duü̃xü̃gü i yaxõgüxü̃ i woo tama Yudíugü ixĩgüxü̃. Rü yemaca̱x ga Tupana rü Abraáü̃maxã nüxü̃ nixu ga ñaa ore i mexü̃ i ñaxü̃: “Rü cugagu tá nüxü̃ charüngü̃xẽxẽxü̃ i guxü̃ma i nachixü̃anecüã̱x i duü̃xü̃gü”, ñaxü̃.

Gálatas 4:13

Rü pema rü marü nüxü̃ pecua̱x rü yexguma noxri pemaxã nüxü̃ chixuxgu ga Tupanaarü ore i mexü̃, rü yema nax chida̱xawexü̃gagu nixĩ ga petanügu charüxã́ũxü̃ rü pemaxã nüxü̃ chixuxü̃ ga Tupanaarü ore.

Ngechuchuarü ngúexü̃gü ga yamugüxü̃arü puracüchiga 3:26

Rü yexguma Tupana wena namaxẽẽgu ga Nane ga Ngechuchu rü petanüwaxíra nanamu nax pexü̃ nangü̃xẽxẽxü̃ca̱x, erü nanaxwa̱xe i wüxichigü i pemax nax nüxü̃ perüxoexü̃ i pecümagü i chixexü̃ rü aixcüma peyaxõgüxü̃ —ñanagürü ga Pedru.

Wenaxarü naxümatü ga Tupanaarü mugü 1:32

Natürü woo yemaacü pexü̃ nigagü, natürü ga pema rü tama nüxü̃́ peyaxõgü ya Cori ya perü Tupana.

Romanos 3:3

¿Rü ta̱xacü tá ngupetüxü̃ i ñu̱xmax ega ñuxre i tatanüxü̃ i Yudíugü rü tama mea yanguxẽxẽgüãgu i ngẽma Tupana tüxü̃ muxü̃? ¿Rü pexca̱x rü ngẽmaca̱x taxũtáma yanguxẽẽãxü̃ ya Tupana i ngẽma tamaxã inaxunetaxü̃?

Gálatas 3:2

Rü ñu̱xma rü pexna chaca, rü chanaxwa̱xe nax choxü̃ pengaxü̃xü̃. ¿Ẽ̱xna yema mugü nax pingu̱xẽxẽgüxü̃gagu yixĩxü̃ ga penayaxuxü̃ ga Tupanaãxẽ ya Üünecü, rü ẽ̱xna ngẽma ore i mexü̃ ga nüxü̃ pexĩnüexü̃ rü pixõgüxü̃gagu yixĩxü̃ ga penayaxuxü̃?